Naqd pul muomalasini yanada mustahkamlash, respublika mintaqalarida naqd pul muomalasining ahvoli uchun rahbarlar va mansabdor shaxslarning javobgarligini oshirish maqsadida Vazirlar Mahkamasi qaror qiladi:

1. Qoraqalpogʻiston Respublikasida, viloyatlar, Toshkent shahar, shaharlar va tumanlar boʻyicha umuman 2000-yilda va yilning I choragida naqd pul mablagʻlari emissiyasi darajasining cheklangan parametrlari va kassa rejasiga 1, 2, 3-ilovalarga* muvofiq rozilik berilsin.

Qoraqalpogʻiston Respublikasi Vazirlar Kengashi raisi, viloyatlar, shaharlar va tumanlar hokimlari belgilangan naqd pul mablagʻlari emissiyasi darajasining cheklangan parametrlari va kassa rejalari bajarilishi ustidan qattiq va amaliy nazoratni taʼminlasinlar.

2. Belgilansinki, Qoraqalpogʻiston Respublikasi Vazirlar Kengashi raisi, viloyatlar, shaharlar va tumanlar hokimlari isteʼmol bozorining zarur tovarlar bilan toʻldirilishi, naqd pul tushumlari taʼminlanishi va aholiga ish haqi, pensiyalar, nafaqalar va boshqa toʻlovlarning oʻz vaqtida toʻlanishi uchun shaxsan javob beradilar.

3. “Oʻzbeksavdo”, “Oʻzbekbirlashuv” kompaniyalari, “Oʻzavtotrans” davlat korporatsiyasi, “Oʻzbekiston havo yoʻllari” milliy aviakompaniyasi, “Oʻzbekiston temir yoʻllari” davlat aksionerlik kompaniyasi, “Toshshaharyoʻlovchitrans” davlat uyushmasi, Oʻzbekiston pochta va telekommunikatsiyalar agentligi, Oʻzbekiston Respublikasi Kommunal xizmat koʻrsatish vazirligi, savdo tarmogʻiga ega boʻlgan va aholiga pulli xizmatlar koʻrsatuvchi boshqa vazirliklar va idoralar, Qoraqalpogʻiston Respublikasi Vazirlar Kengashi, viloyatlar va shaharlar hokimliklari mahalliy bozorlarni zarur turdagi xalq isteʼmol tovarlari bilan taʼminlash va pulli xizmatlar sohasini kengaytirish boʻyicha aniq chora-tadbirlar koʻrsinlar.

4. Vazirlar Mahkamasi komplekslari rahbarlari mazkur qarorning bajarilishi barcha darajadagi kollegial organlar majlislarida muntazam ravishda koʻrib borilishini taʼminlasinlar, tasdiqlangan kassa rejalarining bajarilishi taʼminlanishi uchun masʼul boʻlgan mansabdor shaxslar va mutaxassislarga nisbatan moddiy ragʻbatlantirish va ularning javobgarligini oshirishning belgilangan usullarini qoʻllasinlar.

5. Davlat soliq qoʻmitasi va Oʻzbekiston Respublikasi Prokuraturasi xoʻjalik yurituvchi subyektlar tomonidan tovarlar sotilishi, ishlar bajarilishi va xizmatlar koʻrsatilishidan tushgan naqd pul tushumi oʻz vaqtida va toʻliq topshirilishi taʼminlanishi ustidan nazoratni kuchaytirsinlar.

6. Oʻzbekiston Respublikasi Markaziy bankiga 2000-yilning keyingi choraklari uchun naqd pul emissiyasi darajasi va kassa rejalarining aniqlashtirilgan parametrlarini navbatdagi chorak boshlanishidan 10 kun oldin Vazirlar Mahkamasiga tasdiqlash uchun kiritish tavsiya etilsin.

7. Pul-kredit siyosati boʻyicha respublika komissiyasi mazkur qarorning bajarilishini har oyda koʻrib borsin va naqd pul mablagʻlari emissiyasi darajasi va kassa rejasining belgilangan cheklangan parametrlarining bajarilishi uchun mansabdor shaxslarni ragʻbatlantirish va ularning javobgarligini oshirish yuzasidan, shuningdek prognoz koʻrsatkichlarning amalda bajarilishini hisobga olgan holda ularga tuzatish kiritish boʻyicha Vazirlar Mahkamasiga takliflar kiritsin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov va Oʻzbekiston Respublikasi Markaziy banki raisi F.M. Mullajonov zimmasiga yuklansin.