Toshkent shahar atrofidagi hududlarda (Toshkent viloyatining Qibray, Toshkent va Zangiota tumanlarida) yashaydigan aholisi suv taʼminoti ahvolining tahlili aholiga nomuntazam va sifatsiz xizmat koʻrsatilayotganligini, bunday holatning:

suv quvurlari tarmoqlarining eskirganligi sababli suvning belgilangan normalardan ortiqcha isrof boʻlayotgani, berilgan suv uchun mablagʻlar yigʻilishi darajasining pastligi (30 foiz);

tizimli xatlovdan oʻtkazish va isteʼmolchilarni shartnomalar bilan qamrab olish, berilayotgan suv hajmlarini va abonentlarni (aholini, kichik korxonalarni, boshqa ulgurji isteʼmolchilarni) hisobga olish ishlarining zarur darajada tashkil etilmaganligi;

buxgalteriya hisobi va hisoboti ishlarining sust yoʻlga qoʻyilganligi, tumanlarning suv taʼminoti korxonalari faoliyati natijalarining zarar koʻrishdan iborat boʻlayotganligi;

suv taʼminoti korxonalari rahbar kadrlarining qoʻnimsizligi (2002-yildan boshlab ular ishlagan eng kam muddat — bir oydan kamni va eng koʻp muddat — 22 oyni tashkil qilgan) bilan bogʻliqligini koʻrsatdi.

Tumanlarning suv taʼminoti korxonalari ishida yoʻl qoʻyilgan kamchiliklar natijasida ushbu tumanlarda ichimlik suv yetkazib beruvchi (Zangiota tumanida suv yetkazib berish 80 foizdan ortiq) “Suvsoz” tresti davlat unitar korxonasidan qoplashning real manbalari bilan mustahkamlanmagan ancha miqdordagi kreditorlik qarzlar va, tegishli ravishda, elektr energiyasidan foydalanganlik uchun “Suvsoz” tresti davlat unitar korxonasining toʻlov muddati oʻtgan kreditorlik qarzlari vujudga keldi.

Shu bilan birga, 2007-yilda Toshkent shahri va Toshkent viloyati hokimliklari tomonidan tashkil etilgan “Musaffo obihayot” masʼuliyati cheklangan jamiyat tumanlararo suv taʼminoti korxonasi Qibray, Toshkent va Zangiota tumanlari hududining muayyan qismida yashaydigan va “Suvsoz” tresti davlat unitar korxonasi yetkazib beradigan suvdan foydalanadigan aholi suv taʼminotini:

aholini kecha-kunduz suv bilan taʼminlash, suv tarmoqlarini mukammal taʼmirlash va avariyalar sonini keskin qisqartirish;

oʻtkazilgan yalpi xatlov asosida barqaror moliyaviy faoliyatni taʼminlash, barcha abonentlar bilan suv taʼminoti xizmatlari yuzasidan shartnomalar tuzish, pul mablagʻlari yigʻilishini 90 foizgacha koʻpaytirish hisobiga tubdan yaxshiladi.

Toshkent viloyati aholisini sifatli suv va kanalizatsiya xizmatlari bilan uzluksiz taʼminlash, shuningdek Toshkent viloyatidagi “Toshvilsuvoqava” ochiq aksiyadorlik jamiyatini va Toshkent shahridagi “Suvsoz” tresti davlat unitar korxonasini moliyaviy sogʻlomlashtirish maqsadida Vazirlar Mahkamasi qaror qiladi:

1. Toshkent viloyati va Toshkent shahar hokimliklarining 2009-yil 1-fevraldan boshlab Qibray, Toshkent va Zangiota tumanlarining shahar tarmoqlariga toʻgʻridan toʻgʻri ulanadigan suv taʼminoti korxonalarining suv quvurlari va kanalizatsiya tarmoqlarining bir qismini, shuningdek suv koʻtarish nasos stansiyalarini, suv yuborish va tozalash inshootlarini “Musaffo obihayot” masʼuliyati cheklangan jamiyat balansiga tasarruf etish huquqisiz boshqarish va foydalanish uchun 1-ilovaga* muvofiq roʻyxat boʻyicha berish toʻgʻrisidagi takliflariga rozilik berilsin.

Belgilab qoʻyilsinki, Toshkent viloyatining Qibray va Zangiota tumanlaridagi ilgari jamiyat balansiga berilgan 2-ilovaga* muvofiq roʻyxat boʻyicha suv quvurlari, kanalizatsiya tarmoqlari va suv koʻtarish nasos stansiyalari tasarruf etish huquqisiz “Musaffo obihayot” masʼuliyati cheklangan jamiyat boshqaruvida va foydalanishida qoladi.

2. Toshkent viloyatining Qibray, Toshkent va Zangiota tumanlari aholisini sifatli suv bilan uzluksiz taʼminlashga, suvdan tejamli foydalanishga hamda Toshkent shahri va Toshkent viloyatining suv taʼminoti korxonalarini moliyaviy sogʻlomlashtirishga yoʻnaltirilgan kompleks tadbirlar 3-ilovaga* muvofiq tasdiqlansin.

4. Toshkent shahar va Toshkent viloyati hokimliklari:

ushbu qaror bilan tasdiqlangan kompleks tadbirlarning “Suvsoz” tresti davlat unitar korxonasi, “Toshvilsuvoqava” ochiq aksiyadorlik jamiyati va “Musaffo obihayot” masʼuliyati cheklangan jamiyat tomonidan bajarilishi;

suv taʼminoti korxonalari tomonidan koʻrsatilgan xizmatlar hajmlarini, isteʼmolchilarni zarur darajada hisobga olinishi va moliya hisobotlarining yoʻlga qoʻyilishi;

suv taʼminoti korxonalari tomonidan aylanma mablagʻlarning ishlab chiqarishdan tashqari xarajatlar uchun jalb etilishiga, debitorlik qarzlarning undirib olinishiga va kreditorlik qarzlarning qisqartirilishiga yoʻl qoʻymaslik yuzasidan taʼsirchan nazorat oʻrnatsinlar.

Amalga oshirilgan ishlar toʻgʻrisida 2010-yil 1-yanvargacha har chorakda Oʻzbekiston Respublikasi Vazirlar Mahkamasiga axborot taqdim etilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.