Oʻzbekiston Respublikasi “Davlat bojxona xizmati toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda) 6-moddasi va Oʻzbekiston Respublikasi Bojxona kodeksiga (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda) muvofiq Oʻzbekiston Respublikasi Davlat bojxona qoʻmitasi qaror qiladi:

1. Xorijiy aviakompaniyalarning havo kemalari uchun moʻljallangan aviakerosin mahsulotini bojxona rasmiylashtiruvidan oʻtkazish qoidalari ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Qoidalar xorijiy aviakompaniyalarning havo kemalari uchun moʻljallangan aviakerosin mahsulotini Oʻzbekiston Respublikasi bojxona hududiga olib kirish, saqlash va uni havo kemalariga quygan holda respublika hududidan olib chiqish tartibini belgilaydi.

1. Mazkur Qoidalarda quyidagi asosiy tushunchalar qoʻllaniladi:

aviakerosin mahsuloti — Oʻzbekiston Respublikasida ishlab chiqarilmagan, xorijiy aviakompaniyalarning havo kemalariga quyish uchun chetdan olib kelingan aviakerosin;

bojxona omborining egasi — bojxona ombori faoliyati bilan shugʻullanish uchun litsenziyaga ega boʻlgan Oʻzbekiston Respublikasi yuridik shaxsi;

deklarant — aviakerosin mahsulotini olib oʻtuvchi, aviakerosin mahsuloti va transport vositalarini oʻz nomidan deklaratsiyalovchi, koʻrsatuvchi va taqdim etuvchi shaxs yoki aviakerosin mahsulotini olib oʻtuvchi shaxs nomidan ish olib borayotgan bojxona brokeri;

maxsus transport — bojxona omboridan aviakerosin mahsulotini olib havo kemasiga quyish uchun yetkazib beradigan maxsus transport vositasi;

xizmat koʻrsatuvchi — “Oʻzbekiston havo yoʻllari” milliy aviakompaniyasining aeroportlari;

havo kemasi — xorijiy aviakompaniyalarga tegishli boʻlgan havo kemasi.

hududiy bojxona organlari — Oʻzbekiston Respublikasi Davlat bojxona qoʻmitasining Qoraqalpogʻiston Respublikasi, viloyatlar boʻyicha boshqarmalari va “Toshkent — AERO” ixtisoslashtirilgan bojxona kompleksi.

2. Aviakerosin mahsulotini chetdan Oʻzbekiston Respublikasi hududiga olib kirish, bojxona nazorati ostida belgilangan joyga yetkazish va tanlangan bojxona rejimiga joylashtirilgunga qadar vaqtincha saqlash Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda), Vazirlar Mahkamasining 2003-yil 20-noyabrdagi 523-son qarori (Oʻzbekiston Respublikasi qonun hujjatlari toʻplami, 2003-y., 22-son, 224-modda) bilan tasdiqlangan Bojxona ombori faoliyatini litsenziyalash toʻgʻrisida nizom, Tovarlarni avtomobil transportida bojxona nazorati ostida yetkazish qoidalari (roʻyxat raqami 875, 2000-yil 19-yanvar) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2000-y., 2-son), “Vaqtincha saqlash” bojxona rejimi haqidagi nizom (roʻyxat raqami 447, 1998-yil 17-iyun) va “Bojxona ombori” bojxona rejimi toʻgʻrisidagi nizom (roʻyxat raqami 1318, 2004-yil 27-fevral) (Oʻzbekiston Respublikasi qonun hujjatlari toʻplami, 2004-yil, 8-son, 103-modda) talablari asosida amalga oshiriladi.

3. Aviakerosin mahsuloti belgilangan joyga yetkazilganidan soʻng, uning bojxona rasmiylashtiruvi hududiy bojxona organlarining tashqi iqtisodiy faoliyat bojxona postlari tomonidan amalga oshiriladi.

4. Aviakerosin mahsuloti qoida tariqasida bojxona omboriga “vaqtincha saqlash” yoki “bojxona ombori” bojxona rejimida joylashtiriladi.

Bojxona omboridan aviakerosin mahsulotini olib chiqish tanlangan bojxona rejimiga muvofiq qonun hujjatlarida belgilangan shartlar asosida amalga oshiriladi.

5. Havo kemalariga quyish uchun moʻljallangan aviakerosin mahsuloti “reeksport” bojxona rejimiga joylashtiriladi.

6. Aviakerosin mahsulotini “reeksport” bojxona rejimiga joylashtirish Oʻzbekiston Respublikasi Davlat bojxona qoʻmitasining ruxsatnomasi asosida amalga oshiriladi.

7. “Reeksport” bojxona rejimiga joylashtirishga ruxsatnoma berish Oʻzbekiston Respublikasining “Tadbirkorlik faoliyati sohasidagi ruxsat berish tartib-taomillari toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2012-yil, 51-son, 575-modda) talablari asosida Oʻzbekiston Respublikasi Vazirlar Mahkamasi tomonidan belgilangan tartibda amalga oshiriladi.

8. Havo kemasiga quyish uchun aviakerosin mahsuloti bojxona omboridan maxsus transportga yuklanadi. Yuklash yakunlangach ilovaga muvofiq 4 nusxada aviakerosin mahsuloti maxsus transportga yuklanganligi toʻgʻrisida dalolatnoma (bundan buyon matnda dalolatnoma deb yuritiladi) bojxona omborining egasi tomonidan tuziladi. Dalolatnomaning I boʻlimi 1 — 4-bandlari, 5-bandining “a” — “g” va “j” ustunlari bojxona omborining egasi tomonidan toʻldiriladi.

Dalolatnomaning II boʻlimi yuklash yakunlangach toʻldiriladi.

9. Dalolatnomaning 1-nusxasi bojxona omborida qoladi, 2, 3 va 4 — nusxalari aviakerosin mahsulotini havo kemasiga quyilganligi toʻgʻrisidagi maʼlumotlar qayd qilinishi uchun havo kemasiga quyish joyigacha yetkaziladi.

10. Bojxona omboridan maxsus transportga yuklangan aviakerosin mahsuloti havo kemasiga quyilgunga qadar bojxona omborida saqlanayotgan tovar sifatida qaraladi.

11. Aviakerosin mahsuloti qonun hujjatlari talablari asosida bojxona omborida saqlanishi va undan olib chiqilishi uchun bojxona omborining egasi, maxsus transportdan havo kemasiga quyilishi uchun xizmat koʻrsatuvchi javobgardir.

12. Havo kemasiga aviakerosin mahsulotini quyish jarayonida bojxona nazorati hududiy bojxona organlarining tashqi iqtisodiy faoliyat bojxona posti mansabdor shaxsi tomonidan amalga oshiriladi.

13. Maxsus transportdan havo kemasiga aviakerosin mahsulotini quyishda dalolatnomaning 5-bandi “d” va “e” ustunlari hamda III boʻlimi toʻldiriladi.

Dalolatnomaning 5-bandi “d” va “e” ustunlari xizmat koʻrsatuvchi vakili tomonidan toʻldiriladi.

14. Toʻliq maʼlumotlar aks ettirilgan dalolatnomaning:

2-nusxasi bojxona nazorati va rasmiylashtiruvi amalga oshiriladigan bojxona postida alohida yigʻma jildda saqlash uchun olib qolinadi;

3-nusxasi bojxona omboriga joylashtirilgan va bojxona omboridan olib chiqilgan aviakerosin mahsulotining hisobini yuritish uchun bojxona omborining egasiga qaytariladi;

4-nusxasi bojxona rasmiylashtiruvini amalga oshirishda bojxona postiga taqdim qilish uchun deklarantga beriladi.

15. Dalolatnoma qatʼiy hisobda turuvchi blank hisoblanib, 5 yil muddat davomida saqlanadi.

16. Aviakerosin mahsulotini “reeksport” bojxona rejimiga joylashtirish uchun uning havo kemasiga quyilgan kunidan boshlab uch ish kunidan kechiktirmasdan bojxona rasmiylashtiruvini amalga oshiradigan bojxona postiga deklarant tomonidan ushbu rejimga rasmiylashtirish uchun toʻldirilgan bojxona yuk deklaratsiyasining asl nusxalari bilan birga quyidagi hujjatlarning nusxalari taqdim qilinishi lozim:

aviakerosin mahsulotini “reeksport” bojxona rejimiga joylashtirish uchun Oʻzbekiston Respublikasi Davlat bojxona qoʻmitasi tomonidan berilgan ruxsatnoma;

dalolatnomaning 4-nusxasi;

tovarning kuzatuv hujjatlari.

Hujjatlarning nusxalari deklarant tomonidan tasdiqlanishi lozim.

16¹. Deklarant oʻz xohishiga koʻra aviakerosin mahsulotini “reeksport” bojxona rejimiga rasmiylashtirishni elektron shaklda amalga oshirish huquqiga ega.

Bunday hollarda bojxona rasmiylashtiruvi amalga oshiriladigan bojxona postiga bojxona yuk deklaratsiyasi mazkur Qoidalarning 16-bandida qayd etilgan hujjatlar deklarantning elektron raqamli imzosi bilan tasdiqlangan holda “Tovarlarni elektron deklaratsiyalash” avtomatlashtirilgan axborot tizimi orqali taqdim etiladi.

17. Bir havo kemasiga bitta dalolatnoma boʻyicha quyilgan aviakerosin mahsuloti bitta partiya hisoblanadi. Bojxona yuk deklaratsiyasi har bir partiya uchun alohida rasmiylashtiriladi.

18. “Vaqtincha saqlash” va “bojxona ombori” bojxona rejimlariga joylashtirilgan aviakerosin mahsuloti havo kemasiga quyilgandan keyin uni “reeksport” bojxona rejimiga rasmiylashtirishda bojxona yuk deklaratsiyasining 37-katagidagi oxirgi boʻlimida tovarlarni olib oʻtish xususiyatining “07” kodi koʻrsatiladi.

19. Bojxona omborining egasi bojxona omboriga joylashtirilgan va undan chiqarilgan aviakerosin mahsulotining hisobini Vazirlar Mahkamasining 2003-yil 20-noyabrdagi 523-son qarori bilan tasdiqlangan Bojxona ombori faoliyatini litsenziyalash toʻgʻrisida nizom va “Bojxona ombori” bojxona rejimi toʻgʻrisidagi nizomda (roʻyxat raqami 1318, 2004-yil 27-fevral) belgilangan tartibda yuritadi hamda har chorak yakuni boʻyicha bojxona rasmiylashtiruvini amalga oshiradigan bojxona postiga hisobot taqdim qilib boradi.

20. Ushbu Qoidalar talablarini buzgan shaxslar qonun hujjatlarida belgilangan tartibda javobgarlikka tortiladilar.

21. Mazkur Qoidalar “Oʻzbekiston havo yoʻllari” milliy aviakompaniyasi bilan kelishilgan.