Qashqadaryo viloyatining turizm salohiyatini yanada oshirish, mintaqaning noyob tarixiy-madaniy merosidan samarali foydalanish, meʼmorchilikning tarixiy arxitektura ansambllari va yodgorliklari holatini yaxshilash, sayyohlar uchun mehmonxonalar va xizmat koʻrsatish obyektlari qurish, diqqatga sazovor madaniy-tarixiy yodgorliklar boʻyicha zamonaviy sayyohlik yoʻnalishlarini shakllantirish va joriy etish, mintaqaning tabiiy salohiyatidan samarali foydalanish, transport infratuzilmasini rivojlantirish, koʻrsatilayotgan xizmatlar sifatini oshirish, shu asosida yangi ish oʻrinlari tashkil etish va viloyat aholisining daromadlarini oʻstirish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, “Oʻzbekturizm” milliy kompaniyasi, Qashqadaryo viloyati hokimligi tomonidan manfaatdor vazirliklar, idoralar va xoʻjalik birlashmalari bilan birgalikda ishlab chiqilgan 2013 — 2015-yillar davrida Qashqadaryo viloyatida turizm sohasini rivojlantirish dasturi (keyingi oʻrinlarda Dastur deb ataladi) maʼqullansin. Dastur quyidagilarni oʻz ichiga oladi:

2013 — 2015-yillar davrida Qashqadaryo viloyatida turizm sohasini rivojlantirishning maqsadli parametrlari 1-ilovaga* muvofiq;

2013 — 2015-yillar davrida Qashqadaryo viloyatida turizm sohasi koʻlamlarini yanada rivojlantirish va kengaytirish tadbirlari kompleksi 2-ilovaga* muvofiq;

2013 — 2015-yillar davrida Qashqadaryo viloyatida tarixiy-madaniy meros obyektlarini restavratsiya qilish va ularning holatini yaxshilash boʻyicha manzilli roʻyxat 3-ilovaga* muvofiq;

2013 — 2015-yillar davrida mehmonxonalar, restoranlar va turizm infratuzilmasining boshqa obyektlarini qurish va rekonstruksiya qilish boʻyicha manzilli roʻyxat 4-ilovaga* muvofiq;

2013 — 2015-yillar davrida Qashqadaryo viloyatida turizm sohasini rivojlantirish dasturiga kiritilgan loyihalar va tadbirlarni banklarning kredit liniyalari hisobiga moliyalashtirish jadvali 5-ilovaga* muvofiq.

2. 2013 — 2015-yillar davrida Qashqadaryo viloyatida turizm sohasini rivojlantirish dasturining bajarilishi monitoringini olib borish boʻyicha 6-ilovaga* muvofiq tarkibda ishchi guruh (keyingi oʻrinlarda Ishchi guruh deb ataladi) tashkil etilsin.

2. Ishchi guruhga (E.M. Gʻaniyev):

davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan ushbu qaror bilan tasdiqlangan tadbirlar belgilangan muddatlarga muvofiq oʻz vaqtida va sifatli amalga oshirilishini muvofiqlashtirish va nazorat qilish;

Dasturga kiritilgan loyihalarni birgalikda moliyalashtirish uchun xorijiy investitsiyalarni, donor mamlakatlar, xalqaro tashkilotlarning kreditlari va grantlarini jalb etish yuklansin.

Ishchi guruhga, zaruriyat boʻlganda, tayyorlangan va belgilangan tartibda kelishilgan loyiha takliflari mavjud boʻlganda Dasturga oʻzgartirish va qoʻshimchalar kiritish huquqi berilsin.

3. Qashqadaryo viloyati hokimligi “Oʻzbekturizm” milliy kompaniyasi, vazirliklar, idoralar va xoʻjalik birlashmalari, Dasturda nazarda tutilgan tadbirlar amalga oshirilishi uchun masʼul boʻlgan boshqa tashkilotlar bilan birgalikda Ishchi guruhga yilning har choragida tadbirlarning bajarilishi toʻgʻrisida axborot taqdim etsin.

4. Oʻzbekiston Respublikasi Davlat arxitektura va qurilish qoʻmitasi Dasturga kiritilgan tadbirlarni amalga oshirish doirasida:

bajarilayotgan qurilish-montaj ishlarining sifati, shaharsozlik normalari va qoidalariga rioya etilishi ustidan davlat nazoratini amalga oshirgan holda qurilayotgan va rekonstruksiya qilinayotgan obyektlarning loyiha-smeta hujjatlari ekspertizadan oʻtkazilishini taʼminlasin;

Qashqadaryo viloyati hokimligi bilan birgalikda noqonuniy qurilishga va yer uchastkalaridan boshqa maqsadlarda foydalanilishiga yoʻl qoʻymaslik ustidan nazoratni kuchaytirsin.

5. Banklarga ushbu qaror bilan tasdiqlangan Dastur doirasida amalga oshirish nazarda tutilgan loyihalarning tashabbuskorlariga Oʻzbekiston Respublikasi Markaziy bankining qayta moliyalashtirish stavkasidan ortiq boʻlmagan stavka boʻyicha, imtiyozli davri oʻn ikki oy boʻlgan kamida besh yil muddatga beriladigan imtiyozli kreditlar ajratish tavsiya qilinsin.

6. Ushbu qaror bilan tasdiqlangan Dastur doirasida amalga oshirish nazarda tutilgan obyektlarni qurish, rekonstruksiya qilish va jihozlash uchun respublikada ishlab chiqarilmaydigan, Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha chetdan olib kiriladigan asbob-uskunalar, ularga ehtiyot qismlar va boshqa tovarlar 2016-yil 1-yanvargacha bojxona toʻlovlaridan ozod qilinsin (bojxona rasmiylashtiruvi yigʻimlari bundan mustasno).

Belgilansinki:

bojxona imtiyozlari berilishi munosabati bilan toʻlanmagan bojxona toʻlovlari summasi maqsadli tartibda ushbu qaror bilan tasdiqlangan Dastur doirasida nazarda tutilgan loyihalarni moliyalashtirishga yoʻnaltiriladi;

olib kirilayotgan tovarlardan boshqa maqsadlarda foydalanilgan taqdirda boʻshaydigan mablagʻlar qonun hujjatlarida nazarda tutilgan jarima sanksiyalari qoʻllanilgan holda toʻliq hajmda Davlat budjetiga undiriladi.

7 “Oʻzbekturizm” milliy kompaniyasi, Oʻzbekiston Respublikasi Adliya vazirligi, boshqa vazirliklar va idoralar bilan birgalikda bir oy muddatda Oʻzbekiston Respublikasi Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

8. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.