“Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi Qonuni amalga oshirilishini taʼminlash, shuningdek fuqarolar yigʻinlari xodimlarining kasbiy va boshqaruv malakalarini yanada oshirish, fuqarolarning oʻzini oʻzi boshqarish organlariga tizimli metodik yordamni tashkil etish maqsadida:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida davlat taʼlim muassasasi shaklida fuqarolarning oʻzini oʻzi boshqarish organlari xodimlarining malakasini oshirish boʻyicha oʻquv kurslarini tashkil etish toʻgʻrisida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari va Oʻzbekiston “Mahalla” xayriya jamoat fondining taklifi qabul qilinsin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi fuqarolarning oʻzini oʻzi boshqarish organlari xodimlarining malakasini oshirish boʻyicha oʻquv kurslari (keyingi oʻrinlarda Oʻquv kurslari deb yuritiladi) tuzilmasi ilovaga muvofiq tasdiqlansin.

3. Quyidagilar Oʻquv kurslarining asosiy vazifalari etib belgilansin:

fuqarolarning oʻzini oʻzi boshqarish organlari xodimlari oldida turgan vazifalar, shu jumladan yoshlarni maʼrifatli qilish va maʼnaviy-axloqiy tarbiyalash, kasbga yoʻnaltirish, kichik va xususiy tadbirkorlikni, oilaviy biznesni rivojlantirish, aholini manzilli ijtimoiy qoʻllab-quvvatlash va ijtimoiy faolligini oshirish, jamoatchilik nazoratini, tabiatni muhofaza qilishni tashkil etish, hududlarni obodonlashtirish va koʻkalamzorlashtirish, jamiyatda tinchlik va osoyishtalikni taʼminlash sohalaridagi vazifalarni amalga oshirishda fuqarolarning oʻzini oʻzi boshqarish xodimlarining malakasini, kasbiy va boshqaruv koʻnikmalarini, huquqiy va ijtimoiy-iqtisodiy bilimlarini oshirishni tashkil qilish;

fuqarolar yigʻinlarining nodavlat notijorat tashkilotlari, shuningdek davlat hokimiyati va boshqaruvi organlari bilan ijtimoiy sheriklik mexanizmlarini shakllantirish va rivojlantirishga qaratilgan faoliyatini takomillashtirishga koʻmaklashish.

4. Belgilab qoʻyilsinki:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻquv kurslari faoliyatiga tashkiliy rahbarlikni, Oʻzbekiston Respublikasi Prezidenti huzuridagi Davlat boshqaruvi akademiyasi esa oʻquv-metodik rahbarlikni amalga oshiradi;

Oʻquv kurslariga Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari tomonidan lavozimga tayinlanadigan va ozod qilinadigan direktor rahbarlik qiladi;

Oʻquv kurslari yuridik shaxs hisoblanadi va Oʻzbekiston Respublikasi Davlat budjetining mablagʻlari va qonun hujjatlarida taqiqlanmagan boshqa manbalar hisobidan moliyalashtiriladi;

Oʻquv kurslarida fuqarolar yigʻinlari raislari, ularning oila, xotin-qizlar va ijtimoiy-maʼnaviy masalalar boʻyicha hamda obodonlashtirish, tomorqa va tadbirkorlik masalalari boʻyicha oʻrinbosarlari, oila va xotin-qizlar masalalari boʻyicha mutaxassislar, shuningdek, profilaktika (katta) inspektorlarining jamoat tartibini saqlash boʻyicha yordamchilari (keyingi oʻrinlarda tinglovchilar deb yuritiladi) malaka oshiradilar.

5. Oʻzbekiston Respublikasi Prezidenti huzuridagi Davlat boshqaruvi akademiyasi, Mahalla va oilani qoʻllab-quvvatlash vazirligi:

Oliy va oʻrta maxsus taʼlim vazirligi bilan birgalikda malaka oshirish boʻyicha oʻquv rejalari va dasturlarini doimiy ravishda yangilanib turilishini taʼminlasin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda oʻqitishning zamonaviy shakl va metodlaridan, ilgʻor pedagogik, axborot-kommunikatsiya va innovatsiya texnologiyalaridan foydalangan holda oʻquv jarayoni tashkil etilishini taʼminlasin.

6. Oʻzbekiston Respublikasi Vazirlar Mahkamasi bir oy muddatda fuqarolarning oʻzini oʻzi boshqarish organlari xodimlari malakasini oshirishning tashkiliy tuzilmasi va tizimi toʻgʻrisidagi nizomni tasdiqlasin, unda malaka oshirishning yagona huquqiy asoslari, umumiy va maxsus talablari, asosiy yoʻnalishlari, shuningdek taʼlim sifatini nazorat qilish va baholash mexanizmlari belgilab qoʻyilsin.

7. Quyidagilar belgilansin:

Oʻquv kurslarining xodimlariga oliy taʼlim muassasalari pedagog kadrlarini qayta tayyorlash va malakasini oshirish mintaqaviy markazlarining xodimlari uchun oʻrnatilgan mehnatga haq toʻlash shartlari tatbiq etiladi;

malaka oshirish boʻyicha mehnatga soatbay haq toʻlash shartlarida oʻqituvchilik faoliyatini amalga oshirish uchun qonun hujjatlarida belgilangan tartibda yetakchi taʼlim, tadqiqot va ilmiy muassasalarning xodimlari, shuningdek amaliyotchi mutaxassislar jalb etiladilar;

malaka oshirishning tasdiqlangan jadvaliga kiritilgan va Oʻquv kurslariga oʻqishga yoʻllangan tinglovchilarning asosiy ish joyi boʻyicha oʻrtacha ish haqi oʻqish davrida saqlanib qolinadi;

malaka oshirish uchun Oʻquv kurslariga yuborilgan boshqa shaharlik tinglovchilarga toʻlanadigan sutkalik pul va taʼlim olish joyiga bir marta borib kelish boʻyicha sarflangan xarajatlar ularni yuborayotgan tomon hisobidan respublika doirasida xizmat safarlari uchun oʻrnatilgan tartib va miqdorlarda qoplanadi.

8. Oʻzbekiston Respublikasi Xalq taʼlimi vazirligi bepul asosda:

Oʻquv kurslarini Qoraqalpogʻiston Respublikasi, viloyatlar va Toshkent shahar xalq taʼlimi xodimlarini qayta tayyorlash va malakasini oshirish institutlarida joylashtirsin;

Oʻquv kurslariga oʻquv mashgʻulotlarini oʻtkazish uchun zarur xonalar va tinglovchilarning yashashi uchun joy ajratilishini taʼminlasin.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston “Mahalla” xayriya jamoat fondi bilan birgalikda Oʻquv kurslarining yuqori malakali kadrlar bilan toʻldirilishini;

Oʻquv kurslari uchun ajratilgan xonalarning oʻquv jarayonining oʻziga xos xususiyatini inobatga olgan holda taʼmirdan chiqarilishini;

xalq taʼlimi xodimlarini qayta tayyorlash va malakasini oshirish institutlarining yotoqxonalarida joylar yetishmagan (mavjud boʻlmagan) taqdirda taʼlim muassasalarining yotoqxonalarida joy ajratilishini taʼminlasin.

10. Oʻzbekiston Respublikasi Moliya vazirligi 2013-yilda Oʻzbekiston Respublikasining Davlat budjeti parametrlarida ijtimoiy sohaga yoʻnaltirish koʻzda tutilgan mablagʻlar doirasida mazkur Qarorda nazarda tutilgan tadbirlarni amalga oshirishga, shu jumladan binolarni mukammal taʼmirlashga, idora mebeli, tashkiliy-texnika vositalari bilan jihozlashga, oʻquv-metodik va ilmiy adabiyotlar nashr etishga zarur budjet mablagʻlari ajratsin, 2014-yildan boshlab esa Oʻzbekiston Respublikasi Davlat budjeti parametrlarida ularni nazarda tutsin.

11. Mazkur Qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi I.B. Abdullayev zimmasiga yuklansin.