Oʻzbekiston Respublikasi Prezidentining 2013-yil 25-fevraldagi “Oʻzbekiston sportchilarining 2016-yilda Rio-de-Janeyro shahrida (Braziliya) boʻlib oʻtadigan XXXI yozgi Olimpiada va XV Paralimpiada oʻyinlarida ishtirok etishga tayyorgarligi toʻgʻrisida”gi PQ–1923-son qaroriga muvofiq va respublikada sport tibbiyotini yanada rivojlantirish uchun zarur shart-sharoit yaratish hamda uning ilgʻor yutuqlarini mamlakat terma jamoalari sportchi-aʼzolarining Olimpiya, Osiyo oʻyinlariga, jahon va Osiyo chempionatlariga, boshqa xalqaro musobaqalarga kompleks jismoniy va psixologik tayyorgarlik koʻrish jarayoniga keng joriy etish maqsadida:

1. Oʻzbekiston Milliy olimpiya qoʻmitasining, Oʻzbekiston Respublikasi Sogʻliqni saqlash vazirligi hamda Madaniyat va sport ishlari vazirligining Oʻzbekiston Milliy olimpiya qoʻmitasi huzurida Respublika sport tibbiyoti ilmiy-amaliy markazini (keyingi oʻrinlarda Sport tibbiyoti markazi deb yuritiladi) tashkil etish toʻgʻrisidagi taklifi qabul qilinsin.

Belgilansinki, Sport tibbiyoti markazi sportchilarning — mamlakat terma jamoalari aʼzolarini musobaqalarga tibbiy-biologik va tibbiy — psixologik tayyorgarligini taʼminlovchi bosh tibbiyot muassasasi hisoblanadi.

2. Quyidagilar Sport tibbiyoti markazining asosiy vazifalari va faoliyati yoʻnalishlari etib belgilansin:

sport tibbiyoti sohasida ilmiy tadqiqotlar olib borish, sport turining xususiyatini, yoʻl qoʻyiladigan jismoniy yuklamani, sport patologiyasini davolash va oldini olishning ilgʻor uslublarini, musobaqalarga tayyorgarlik koʻrishda sportchilarning tibbiy nazoratini hisobga olgan holda sportchilarning funksional ahvolini diagnostika va korreksiya qilish standartlarini ishlab chiqish va joriy etish;

iqtidorli yosh va istiqbolli sportchilarni, ularning individual genetik va fenotipik imkoniyatlarini hisobga olgan holda tanlashning zamonaviy tibbiy-biologik uslublarini ishlab chiqish va joriy etish;

sportchilarni sport turlari boʻyicha tayyorlashning yakka tartibdagi dasturlarini ishlab chiqqan holda musobaqalarga tayyorlashning turli davrlarida dori vositalarining, ovqatlanish tartibi va ratsionining sportchilarning fiziologik holatiga taʼsirini tadqiq qilish;

musobaqa va mashgʻulotlarni rejalashtirishni hisobga olgan holda sportchining individual sport jismoniy yuklamasini tekshirish va maqbullashtirish;

sportchi organizmining jismoniy tayyorgarligi oʻsishiga va masʼuliyatli xalqaro musobaqalarga eng yuqori funksional tayyorgarligini taʼminlashga qaratilgan ular salomatligi darajasining muttasil oʻsishini nazorat va korreksiya qilish;

sportchilarning xalqaro musobaqalarda qatnashishga psixologik tayyorgarligini, shuningdek zarur psixologik korreksiyani oʻtkazishni taʼminlash;

sportchilarda sport jarohatlari, patologiyalari va sindromlarini, shu jumladan respublikaning boshqa ixtisoslashtirilgan tibbiyot muassasalari davolash-diagnostika bazalaridan foydalangan holda, oldini olish, diagnostika qilish va davolash;

mamlakatda sport tibbiyoti va antidoping nazorat sohasidagi ilgʻor metodika va texnologiyalarni almashish va joriy qilish uchun bu sohadagi yetakchi xorijiy muassasalar bilan xalqaro hamkorlikni mustahkamlash va kengaytirish;

sport federatsiyalari, klublari va jamoalari tibbiy xodimlarining malakasini oshirishga koʻmaklashish, ularga ilmiy-tashkiliy, maslahat-diagnostika, davolash-profilaktika va reabilitatsiya ishlari masalasida uslubiy yordam koʻrsatish.

3. Quyidagilar:

Oʻzbekiston Milliy olimpiya qoʻmitasi huzurida Respublika sport tibbiyoti ilmiy-amaliy markazining boshqaruv xodimlari cheklangan soni 19 nafar boʻlgan tuzilmasi 1-ilovaga muvofiq;

Oʻzbekiston Milliy olimpiya qoʻmitasi huzurida Respublika sport tibbiyoti ilmiy-amaliy markazining faoliyatini tashkil etish Komissiyasi tarkibi 2-ilovaga muvofiq tasdiqlansin.

4. Respublika sport tibbiyoti ilmiy-amaliy markazining faoliyatini tashkil etish Komissiyasi (A.I. Ikramov) bir oylik muddatda:

Oʻzbekiston Milliy olimpiya qoʻmitasi huzuridagi Respublika sport tibbiyoti ilmiy-amaliy markazi toʻgʻrisidagi nizomni;

Sport tibbiyoti markazi faoliyatini tashkil etish boʻyicha, shu jumladan yuqori malakali mutaxassislar bilan taʼminlash va eng zamonaviy tibbiy va laboratoriya uskunalari bilan jihozlash, sportchilarning ular tomonidan xizmat koʻrsatiladigan kontingentini aniqlash boʻyicha chora-tadbirlar kompleksini ishlab chiqsin va Oʻzbekiston Respublikasi Vazirlar Mahkamasi tasdigʻiga kiritsin.

5. Oʻzbekiston Milliy olimpiya qoʻmitasi, Oʻzbekiston Respublikasi Sogʻliqni saqlash vazirligi, Madaniyat va sport ishlari vazirligining Oʻzbekiston Milliy olimpiya qoʻmitasi ijro etuvchi apparati va Sport tibbiyoti markazini joylashtirish uchun yangi bino qurilishi toʻgʻrisidagi taklifi qabul qilinsin.

6. Oʻzbekiston Respublikasi Davlat arxitektura va qurilish qoʻmitasi:

Oʻzbekiston Milliy olimpiya qoʻmitasi bilan birgalikda toʻrt oylik muddatda bino qurilishi uchun loyiha-smeta hujjatlarining ishlab chiqilishini taʼminlasin;

bino qurilishi uchun loyiha-smeta hujjatlarining ekspertizadan oʻtkazilishini taʼminlasin va qurilish-montaj ishlari sifatiga rioya qilinishi ustidan davlat arxitektura-qurilish nazoratini oʻrnatsin.

7. Oʻzbekiston Milliy olimpiya qoʻmitasi, Madaniyat va sport ishlari vazirligi Oʻzbekiston Respublikasi Moliya vazirligi, Sogʻliqni saqlash vazirligi bilan birgalikda ikki haftalik muddatda yangi bino qurilishini moliyalashtirish va Sport tibbiyoti markazini saqlash manbalari yuzasidan takliflarni Vazirlar Mahkamasiga kiritsin.

8. Toshkent shahar hokimiyati ikki oylik muddatda bino qurilishi uchun zarur boʻlgan yer maydonini belgilangan tartibda ajratsin.

9. Yangi bino qurilishi uchun respublikaga olib kelinadigan, respublikada ishlab chiqarilmaydigan qurilish materiallari va konstruksiyalari, shuningdek Sport tibbiyoti markazining moddiy-texnik bazasini shakllantirish va mustahkamlash uchun tibbiyot anjomlari va jihozlari, ehtiyot qismlar va uning uchun sarflanadigan materiallar, Vazirlar Mahkamasi tomonidan tasdiqlanadigan roʻyxatlar boʻyicha 2016-yil 1-yanvargacha boʻlgan muddatda bojxona toʻlovlaridan (bojxona rasmiylashtiruvi yigʻimlaridan tashqari) ozod qilinsin.

10. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.