Mustaqillik yillarida mamlakatimiz poytaxti Toshkent shahrida Prezidentimizning bevosita tashabbuslari bilan bunyodkorlik, obodonlashtirish, koʻkalamzorlashtirish va aholi uchun qulay infratuzilma yaratish borasida ulkan ishlar amalga oshirilib kelinmoqda. 2013-yil “Obod turmush yili” Davlat dasturining eng muhim yoʻnalishlari va ustuvor vazifalarining ijrosini taʼminlash maqsadida, Toshkent shahrini yanada rivojlantirish va obodonlashtirishga katta eʼtibor qaratilmoqda. Toshkent shahrining aholi zich joylashgan mavzelari kesimida “Namunaviy mahalla” dasturi asosida keng koʻlamli obodonlashtirish, koʻp qavatli turar joy binolarini, yer osti muhandislik tarmoqlarini, hududlararo yoʻl va yoʻlaklarni qayta taʼmirlash, sport va bolalar maydonchalarini tashkil etish ishlari mahalliy hokimliklar tomonidan bosqichma-bosqich amalga oshirilishi ustuvor vazifalardan biri etib belgilangan. Toshkent shahrida shaharsozlik norma va qoidalari talablariga javob bermaydigan avtomototransportlar saqlash qurilmalari obodonlashtirish ishlarini olib borishda toʻsqinlik qilib kelmoqda.

Yuqoridagilarni inobatga olib, Toshkent shahar aholisining avtomototransporti turar joylarini tashkil qilish haqidagi takliflari hamda mutasaddi tashkilotlar va mutaxassislarning xulosalaridan kelib chiqib, qaror qilaman:

1. Toshkent shahrida oʻrnatilgan avtomototransport saqlash qurilmalari joylashgan yer uchastkalarini olib qoʻyish va ular oʻrniga zamonaviy yengil turdagi avtomototransportlar uchun turar joylarni tashkil etish toʻgʻrisidagi “Mahalla” xayriya jamoat fondi, Toshkent shahar Ichki ishlar bosh boshqarmasi, Toshkent shahar Ichki ishlar bosh boshqarmasi yongʻinga qarshi kurash boshqarmasi, Toshkent shahar tabiatni muhofaza qilish qoʻmitasi va bir qator jamoat tashkilotlarining takliflari maʼqullansin.

2. Toshkent shahar hokimining birinchi oʻrinbosari (B. Raxmonov)ga:

Toshkent shahar arxitektura va qurilish bosh boshqarmasi va boshqa mutasaddi tashkilotlar bilan birgalikda bir oy muddatda turar joy mavzelarida tashkil etiladigan avtomototransportlar turar joylarining batafsil yagona namunaviy loyihasini ishlab chiqish topshirilsin.

3. 2013-2014-yillarda Toshkent shahridagi barcha oʻrnatilgan avtomototransport saqlash qurilmalarini bosqichma-bosqich olib, ular oʻrniga har tomonlama shaharsozlik normalari va qoidalariga javob beradigan, zamonaviy avtomototransportlar turar joylarini tashkil etish manzilli jadvali ilovaga muvofiq tasdiqlansin.

4. Tuman hokimlariga:

birinchi navbatda avtomototransport saqlanayotgan qurilma egalariga avtomototransportlar turar joylari ajratish belgilansin va qonun hujjatlariga muvofiq rasmiylashtirish amalga oshirilsin.

5. Toshkent shahar Ichki ishlar bosh boshqarmasi (M. Adilov) va tuman hokimlariga:

profilaktika inspektorlari va barcha tuman hokimiyatlari qoshidagi garajlar boshqarmasi davlat unitar korxonalari rahbarlari bilan birgalikda oʻzlariga biriktirilgan turar joy mavzelari va mahallalarda avtomototransportlar turar joylari monitoringini oʻtkazib, qonun buzilish holatlarini bartaraf etish topshirilsin.

6. Tuman hokimlariga:

yangi quriladigan avtomototransport turar joylarini qurishda homiylar, tadbirkorlar va boshqa subyektlarni jalb qilish;

xususiy uy-joy mulkdorlari shirkatlari bilan birgalikda yangi tashkil etilgan avtomototransport turar joylarini saqlash, obodonlashtirish, tozalash ishlarini taʼminlash belgilansin.

7. “Mahalla” xayriya jamoat fondi, “Nuroniy” jamgʻarmasi Toshkent shahar boʻlimlari, “Kamolot” yoshlar ijtimoiy harakati Toshkent shahar Kengashi, Toshkent shahar xususiy uy-joy mulkdorlari shirkatlari uyushmasi hamda tuman ichki ishlar boshqarmalariga oʻrnatilgan avtomototransport saqlash qurilmalarini olish yuzasidan aholi oʻrtasida keng targʻibot va tashviqot ishlarini olib borish tavsiya etilsin.

8. Toshkent shahar hokimining maʼnaviy va maʼrifiy ishlar boʻyicha yordamchisi (A. Akramov), Axborot xizmati (X. Ermatov) mazkur qaror “Toshkent oqshomi” va “Вечерный Ташкент” gazetalarida rasman eʼlon qilinsin.

9. Ushbu qaror rasmiy eʼlon qilingan kundan eʼtiboran bir oydan keyin kuchga kiradi.

10. Mazkur qaror Xalq deputatlari Toshkent shahar Kengashining navbatdagi sessiyasi tasdigʻiga kiritilsin.

11. Mazkur qarorning bajarilishini nazorat qilish Toshkent shahar hokimining birinchi oʻrinbosari B. Raxmonov zimmasiga yuklansin.