Oʻzbekiston Respublikasi Prezidentining “Jizzax” maxsus industrial zonasini tashkil etish toʻgʻrisida” 2013-yil 18-martdagi PF–4516-son Farmonini bajarish yuzasidan hamda yangidan tashkil etilgan maxsus industrial zonaga xorijiy va mahalliy investitsiyalarni jalb etish, ichki va jahon bozorlarida raqobatbardoshli, yuqori qoʻshilgan qiymatli mahsulotlar ishlab chiqarish boʻyicha zamonaviy va yuqori texnologiyali investitsiya loyihalarini amalga oshirishga koʻmaklashadigan va shu asosda yangi ish oʻrinlari tashkil etishni taʼminlaydigan ishonchli ishlab chiqarish, transport va muhandislik-kommunikatsiya infratuzilmasini shakllantirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Moliya vazirligi va “Davarxitektqurilish” qoʻmitasi tomonidan “Oʻzbekenergo” davlat-aksiyadorlik kompaniyasi, “Oʻztransgaz” aksiyadorlik kompaniyasi, “Oʻzkommunxizmat” agentligi, Jizzax va Sirdaryo viloyatlari hokimliklari bilan birgalikda ishlab chiqilgan 2013 — 2015-yillarda “Jizzax” maxsus industrial zonasining transport, ishlab chiqarish va muhandislik-kommunikatsiya infratuzilmasini jadal rivojlantirish dasturi (keyingi oʻrinlarda Dastur deb ataladi) maʼqullansin, Dastur quyidagilarni oʻz ichiga oladi:

Dasturning asosiy maqsadli koʻrsatkichlari 1-ilovaga* muvofiq;

“Jizzax” maxsus industrial zonasi uchun avtomobil yoʻllari va temir yoʻl infratuzilmasi uchastkalarini qurish va rekonstruksiya qilish tadbirlari 2 va 3-ilovalarga* muvofiq;

“Jizzax” maxsus industrial zonasi uchun suv taʼminoti, irrigatsiya va kanalizatsiya tizimini rivojlantirish tadbirlari 4-ilovaga* muvofiq;

“Jizzax” maxsus industrial zonasi uchun elektr taʼminoti va gaz taʼminoti tarmoqlarini qurish va rekonstruksiya qilish tadbirlari 5 va 6-ilovalarga* muvofiq.

Davlat va xoʻjalik boshqaruvi organlari, Jizzax va Sirdaryo viloyatlari hokimliklari, boshqa manfaatdor tashkilotlar rahbarlari zimmasiga Dasturga kiritilgan loyihalar boʻyicha maqsadli koʻrsatkichlar va tadbirlarning toʻliq hajmda va belgilangan muddatlarda amalga oshirilishi, shu jumladan loyiha hujjatlarining sifatli ishlab chiqilishi yuzasidan shaxsiy masʼuliyat yuklansin.

2. “Jizzax” maxsus industrial zonasining Maʼmuriy kengashiga, “Jizzax” maxsus industrial zonasi hududida yangidan tashkil etilayotgan quvvatlarni transport, ishlab chiqarish va muhandislik-kommunikatsiya infratuzilmasi bilan taʼminlash ustuvorliklaridan kelib chiqib, tasdiqlangan Dasturga Oʻzbekiston Respublikasi Iqtisodiyot vazirligi va Moliya vazirligi taqdimnomalari boʻyicha oʻzgartirish va qoʻshimchalar kiritish huquqi berilsin.

3. Dasturga kiritilgan “Jizzax” maxsus industrial zonasining infratuzilma obyektlarini, shuningdek “Jizzax” maxsus industrial zonasi hamda “Angren” maxsus industrial zonasi maʼmuriy binolarini, loyiha-smeta hujjatlarini ayni bir vaqtda ishlab chiqqan holda, moliyalashtirish, qurish va rekonstruksiya qilishni 2014-yil 1-yanvargacha amalga oshirishga istisno tariqasida ruxsat etilsin.

4. “Jizzax” maxsus industrial zonasi Maʼmuriy kengashining “OʻzshaharsozlikLITI” davlat unitar korxonasini — “Jizzax” maxsus industrial zonasining bosh rejasini ishlab chiqish, shu jumladan uning ishlab chiqarish infratuzilmasini rivojlantirish boʻyicha bosh loyiha tashkiloti etib belgilash toʻgʻrisidagi taklifiga rozilik berilsin.

5. “Jizzax” maxsus industrial zonasi Direksiyasi bir oy muddatda “OʻzshaharsozlikLITI” davlat unitar korxonasiga texnik topshiriqni bersin hamda texnik va ekologik talablardan kelib chiqib, sohalar boʻyicha taqsimlagan holda birinchi navbatdagi sanoat klasterlari ajratilishini nazarda tutadigan “Jizzax” maxsus industrial zonasining bosh rejasini ishlab chiqish uchun shartnoma tuzilishini taʼminlasin.

6. Oʻzbekiston Respublikasi Iqtisodiyot vazirligi va Moliya vazirligi joriy yilda “Jizzax” maxsus industrial zonasi Direksiyasiga hamda Jizzax va Sirdaryo viloyatlari hokimliklariga 2013-yilgi kapital qoʻyilmalar limitlarini qayta taqsimlash hisobiga “Jizzax” maxsus industrial zonasining infratuzilma obyektlari bosh rejasini va loyiha-smeta hujjatlarini ishlab chiqishga zarur mablagʻlar ajratilishini taʼminlasinlar.

7. Oʻzbekiston Respublikasi Davlat geologiya qoʻmitasi Jizzax va Sirdaryo viloyatlari hokimliklari bilan birgalikda “Jizzax” maxsus industrial zonasi qatnashchilarining buyurtmanomalariga binoan, kelgusida loyihalar tashabbuskorlari tomonidan suv taʼminoti vertikal quduqlari qurish uchun suv resurslarining sanoat zaxiralari boʻyicha maʼlumotlarning taqdim etilishini taʼminlasin.

8. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi 2014-yil va keyingi yillar uchun Oʻzbekiston Respublikasi Investitsiya dasturini shakllantirishda ularga Dasturda koʻrsatilgan investitsiya loyihalari kiritilishini belgilangan tartibda nazarda tutsinlar, bunda quyidagilarni hisobga olsinlar:

“Jizzax” maxsus industrial zonasining Maʼmuriy kengashida ishlab chiqarish infratuzilmasi va transport kommunikatsiyalarini joylashtiriladigan yangi ishlab chiqarishlar bilan uzviy bogʻliq holda jadal rivojlantirish boʻyicha takliflarni koʻrib chiqish;

investitsiyalarni jalb etish va respublika mintaqalarida sanoat zonalarini qurish uchun qulay shart-sharoitlar yaratish maqsadida, “Jizzax” maxsus industrial zonasining infratuzilma obyektlarini qurishga maxsus ajratiladigan Oʻzbekiston Respublikasi Davlat budjeti mablagʻlari hisobiga amalga oshirish taklif etiladigan loyihalar roʻyxatini aniqlash.

9. Oʻzbekiston Respublikasi “Davarxitektqurilish” qoʻmitasi Jizzax va Sirdaryo viloyatlari hokimliklari bilan birgalikda bajarilayotgan loyihalash va qurilish-montaj ishlarining sifati, shuningdek Dasturga kiritilgan loyihalar doirasida shartnomaviy majburiyatlarga va obyektlarni qurish muddatlariga rioya etilishi yuzasidan nazoratni taʼminlasin.

10. Iqtisodiyot vazirligi Jizzax va Sirdaryo viloyatlari hokimliklari bilan birgalikda Dasturning amalga oshirilishi yuzasidan tizimli monitoring oʻrnatsin va natijalari boʻyicha har chorakda Oʻzbekiston Respublikasi Vazirlar Mahkamasiga axborot taqdim etsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.