Ishlab chiqarish-texnika buyumlari parchalari va rangli metallar chiqindilari oʻgʻirlanishi hamda noqonuniy olib chiqib ketilishining oldini olish, respublikaning iqtisodiy manfaatlarini himoya qilish, shuningdek qimmatli xomashyo resurslaridan oqilona foydalanish maqsadida:

1. Oʻzbekiston Respublikasi Prezidentining 1999-yil 5-fevraldagi PF-2212-son Farmoniga muvofiq rangli metallar parchalari va chiqindilarini Oʻzbekiston Respublikasidan tashqariga olib chiqib ketish taqiqlanganligi qayd etib oʻtilsin.

2. Oʻzbekiston Respublikasi Davlat bojxona qoʻmitasi Oʻzbekiston Respublikasi Ichki ishlar vazirligi va Davlat chegaralarini himoya qiluvchi qoʻmita bilan birgalikda ishlab chiqarish-texnika buyumlari parchalari va rangli metallar chiqindilarining chegara yaqinidagi temir yoʻllar va Oʻzbekiston Respublikasi Davlat chegarasi boʻylab joylashgan avtomobil oʻtish va aylanib oʻtish yoʻllari orqali qonunga zid ravishda olib chiqib ketilishini bartaraf etish yuzasidan qatʼiy tezkor chora-tadbirlar koʻrsin.

3. Belgilansinki, faqat “Oʻzbekiston lom, rangli metallar parchalari va chiqindilarini tayyorlash va qayta ishlash zavodi” AJ Oʻzbekiston Respublikasi hududida rangli metallar parchalari va chiqindilarini tayyorlovchi vakolatli organ hisoblanadi.

4. Jismoniy shaxslarga lom va rangli metallar parchalari va chiqindilarini tayyorlash taqiqlansin.

Belgilansinki, “Oʻzikkilamchiranglimetal” AJ va uning tarkibiy tuzilmalari jismoniy shaxslardan rangli metallarning maishiy lomini, shu jumladan, foydalanish uchun moʻljallangan asboblar va uskunalar, shuningdek, Hukumat qarori bilan tasdiqlangan roʻyxat boʻyicha lom va rangli metallar parchalari va chiqindilarini maxsus qabul punktlari orqali qabul qilinishini amalga oshiradilar.

5. Oʻzbekiston Respublikasi Iqtisodiyot vazirligi hamda “Oʻzbekiston lom, rangli metallar parchalari va chiqindilarini tayyorlash va qayta ishlash zavodi” AJ ikkilamchi alyuminiyni hamda rangli metallar parchalari va chiqindilarini taqsimlash chogʻida xalq isteʼmol mollari ishlab chiqaruvchi kichik biznesga tegishli qayta ishlash korxonalari ehtiyojlarini belgilangan tartibda nazarda tutsinlar.

“Oʻzbekiston lom, rangli metallar parchalari va chiqindilarini tayyorlash va qayta ishlash zavodi” AJ xalq hunarmandchiligi va amaliy sanʼatni qoʻllab-quvvatlash hamda rivojlantirish uchun rangli metall parchalari va chiqindilarini sotishga ruxsat etilsin.

6. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda rangli metallardan tayyorlangan ishlab chiqarish-texnika buyumlarini oʻgʻirlash, rangli metallar parchalari va chiqindilarini sotib olish va noqonuniy ravishda olib chiqib ketish, havo va kabel liniyalari hamda elektruzatkichlarga qasddan zarar yetkazganlik uchun jinoiy javobgarlikni kuchaytirish toʻgʻrisidagi takliflar kiritsin.

7. Oʻzbekiston Respublikasi Prokuraturasi rangli metallar parchalari va chiqindilarini toʻplash, tayyorlash, saqlash va sotish yuzasidan nazoratni kuchaytirsin, rangli metallar parchalari va chiqindilari bilan muomala qilish boʻyicha har bir noqonuniy xatti-harakat yuzasidan batafsil tekshirish oʻtkazib, aybdor shaxslarni qonunchilikka muvofiq ravishda javobgarlikka tortsin.

8. Oʻzbekiston Teleradiokompaniyasi, Oʻzbekiston Milliy axborot agentligi, ommaviy axborot vositalari aholi oʻrtasida rangli metallar parchalari va chiqindilari bilan noqonuniy muomala qilish va ularni respublika hududidan olib chiqib ketish, havo va kabel aloqa liniyalari hamda elektruzatkichlarga qasddan zarar yetkazish uchun javobgarlik haqida keng tushuntirish ishlarini olib borsin.