“Sud hujjatlari va boshqa organlar hujjatlarini ijro etish toʻgʻrisida”gi Oʻzbekiston Respublikasi Qonuni (Oʻzbekiston Respublikasi Oliy Majlisining Axborotnomasi, 2001-y., 9-10-son, 169-modda) hamda Oʻzbekiston Respublikasi Prezidentining 2012-yil 29-dekabrdagi PQ–1900-sonli “Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamenti faoliyatini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 2-son, 16-modda) muvofiq Oʻzbekiston Respublikasi Adliya vazirligi va Markaziy banki Boshqaruvi qaror qiladi:

1. Qarzdorlar va ularning debitorlari bank hisobvaraqlarini qidirishda Bank depozitorlarining Milliy axborot bazasidagi maʼlumotlardan foydalanish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Adliya vazirligi va Markaziy banki Boshqaruvining 2010-yil 20-fevraldagi 13, 7/1-son “Qarzdorlar va ularning debitorlari bank hisobvaraqlarini qidirishda Bank depozitorlarining Milliy axborot bazasidagi maʼlumotlardan foydalanish tartibi toʻgʻrisidagi nizomni tasdiqlash haqida”gi qarori (roʻyxat raqami 2085, 2010-yil 3-mart) (Oʻzbekiston Respublikasi qonun hujjatlari toʻplami, 2010-y., 9-son, 72-modda) oʻz kuchini yoʻqotgan deb topilsin.

3. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Sud hujjatlari va boshqa organlar hujjatlarini ijro etish toʻgʻrisida”gi (Oʻzbekiston Respublikasi Oliy Majlisining Axborotnomasi, 2001-y., 9-10-son, 169-modda), “Bank siri toʻgʻrisida”gi (Oʻzbekiston Respublikasi Oliy Majlisining Axborotnomasi, 2003-y., 9-10-son, 144-modda) va “Elektron hujjat aylanishi toʻgʻrisida”gi (Oʻzbekiston Respublikasi qonun hujjatlari toʻplami, 2004-y., 20-son, 230-modda) qonunlariga, Oʻzbekiston Respublikasi Prezidentining 2012-yil 29-dekabrdagi PQ–1900-son “Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamenti faoliyatini yanada takomillashtirish chora-tadbirlari toʻgʻrisida”gi qaroriga muvofiq sud hujjatlari va boshqa organlar hujjatlarini majburiy ijro etish jarayonida Bank depozitorlari Milliy axborotlar bazasi (keyingi oʻrinlarda BDMAB deb yuritiladi) boʻyicha qarzdorlar va ularning debitorlari tomonidan milliy va xorijiy valyutada ochilgan bank hisobvaraqlarini (keyingi oʻrinlarda bank hisobvaraqlari deb yuritiladi) qidirishda Oʻzbekiston Respublikasi Markaziy bankining Axborotlashtirish Bosh Markazi (keyingi oʻrinlarda ABM deb yuritiladi) hamda Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamentining (keyingi oʻrinlarda Sud departamenti deb yuritiladi) organlari bilan oʻzaro hamkorligi tartibini belgilaydi.

1. Sud departamenti BDMABdan elektron soʻrov asosida maʼlumotlarni faqat sudning undiruvni qarzdorning mol-mulkiga qaratish toʻgʻrisidagi yoki ularning mol-mulkini xatlash haqidagi qonuniy kuchga kirgan qarori boʻlgan taqdirda soʻrashga haqlidir. Sud departamenti BDMABga joʻnatiladigan elektron soʻrovning toʻliqligi va haqqoniyligini taʼminlaydi.

2. ABMning Sud departamenti bilan maʼlumot almashinuvidagi oʻzaro hamkorligi:

sud hujjatlari va boshqa organlar hujjatlarining ijrosini oʻz vaqtida va toʻliq bajarilishini;

undiruvchining huquqlari amalga oshirilishini;

maʼlumotlarning tezkor elektron almashinuvini;

sud hujjatlari va boshqa organlar hujjatlarining bajarilishi ustidan samarali nazoratni tashkil etishni taʼminlash maqsadida amalga oshiriladi.

3. ABM Sud departamentining elektron soʻroviga asosan unda koʻrsatilgan qarzdorlarning (yuridik shaxs, jismoniy shaxslar, shu jumladan yakka tartibdagi tadbirkorlarning) bank hisobvaraqlari toʻgʻrisidagi maʼlumotlarni elektron soʻrovni olgan kunning ertasidan kechiktirmasdan taqdim qiladi.

4. Qarzdor va uning debitorlari toʻgʻrisidagi bank hisobvaraqlarini aniqlash va olish uchun Sud departamenti har bir qarzdor boʻyicha alohida-alohida tarzda ABMga quyidagi maʼlumotlarni elektron soʻrov orqali joʻnatadi:

qarzdor soliq toʻlovchining identifikatsiya raqami (STIR);

jismoniy shaxslar uchun pasport seriyasi va raqami;

qarzdorning nomi (jismoniy shaxsning ismi, familiyasi, otasining ismi);

Sud departamentining hududiy boshqarmasi va tegishli tuman (shahar) sud ijrochilari boʻlimi nomi;

ijro hujjatini chiqargan organ nomi;

ijro hujjati raqami va sanasi.

5. BDMABga elektron soʻrovnoma yuborish va elektron maʼlumotlarni olish tartibi ABM va Sud departamenti tomonidan tasdiqlanadigan maʼlumotlarni almashish bayonnomasi bilan tartibga solinadi.

6. Maʼlumotlarning ishonchliligini, toʻliqliligini, toʻgʻriligini va saqlanilishini taʼminlash maqsadida BDMAB maʼlumotlari shifrlangan holda taqdim qilinadi. Oʻzbekiston Respublikasi Markaziy banki Sud departamentiga deshifratsiya dasturini beradi.

Maʼlumotlarning buzib koʻrsatilishi holatlarining oldi olinishini hamda maʼlumot joʻnatuvchining identifikatsiyalanishini taʼminlash maqsadida, maʼlumot elektron raqamli imzo bilan tasdiqlanadi.

7. BDMAB tomonidan uzatiladigan elektron javob quyidagi maʼlumotlardan iborat:

qarzdor soliq toʻlovchining identifikatsiya raqami (STIR);

qarzdorning nomi (jismoniy shaxsning ismi, familiyasi, otasining ismi);

qarzdorga bank hisobvaragʻini ochgan bank nomi;

qarzdorga bank hisobvaragʻini ochgan bank kodi;

qarzdorning bank hisobvaragʻi ochilgan sana;

qarzdorning asosiy bank hisobvaragʻi;

qarzdorga ikkilamchi bank hisobvaragʻini ochgan bank nomi;

qarzdorga ikkilamchi bank hisobvaragʻini ochgan bank kodi;

qarzdorning ikkilamchi bank hisobvaraqlari;

qarzdor asosiy bank hisobvaragʻining boshqa bankka oʻtkazilgan sanasi;

qarzdor asosiy bank hisobvaragʻi oʻtkazilgan bank kodi;

qarzdor bank hisobvaragʻi yopilish asosi belgilari;

qarzdor bank hisobvaragʻi yopilgan sana.

8. BDMAB maʼlumotlarining Sud departamentiga taqdim qilinishi, banklarni Sud departamenti organlarining yozma soʻrovlariga asosan qonun hujjatlarida belgilangan tartibda qarzdorlarning bank hisobvaraqlari toʻgʻrisidagi maʼlumotlarni berish majburiyatidan ozod etmaydi.

9. BDMABdan olingan maʼlumotlardan foydalanish tartibi Sud departamenti direktori tomonidan tasdiqlanadigan Yoʻriqnomaga asosan belgilanadi.

10. Sud departamenti tomonidan BDMABdan olingan maʼlumotlarga oʻzgartirish kiritish taqiqlanadi.

11. Sud departamenti BDMAB maʼlumotlaridan qonun hujjatlari doirasida foydalanadi va maʼlumotlarning maxfiyligini taʼminlaydi.

12. Sud departamenti BDMAB maʼlumotlarini oʻrganib boradi va zarur hollarda ularni mukammallashtirish borasida tegishli takliflarni beradi.

13. ABM mazkur Nizom boʻyicha berilayotgan elektron maʼlumotlarning toʻliqligini va oʻz vaqtida berilishini taʼminlaydi.

14. Mazkur Nizom talablarining buzilishida aybdor boʻlgan shaxslar qonun hujjatlariga muvofiq javobgar boʻladi.

15. Elektron maʼlumot almashinuvi bilan bogʻliq xarajatlarni hisob-kitob qilish tartibi ABM va Sud departamenti oʻrtasida tuziladigan shartnomaga asosan belgilanadi.