“Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi toʻgʻrisidagi Bitimni (Moskva, 2011-yil 16-iyun) ratifikatsiya qilish haqida” Oʻzbekiston Respublikasining 2011-yil 13-dekabrdagi OʻRQ-307-son Qonunini bajarish yuzasidan hamda koʻrsatib oʻtilgan Bitim qoidalari Oʻzbekiston Respublikasi vazirliklari va idoralari tomonidan bajarilishi maqsadida Vazirlar Mahkamasi qaror qiladi:

1. Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi toʻgʻrisidagi Bitimning amalga oshirilishi uchun Oʻzbekiston Respublikasi tomonidan masʼul boʻlgan vakolatli organ etib belgilansin.

2. Oʻzbekiston Respublikasi Markaziy banki, Milliy xavfsizlik xizmati, Tashqi ishlar vazirligi, Tashqi iqtisodiy aloqalar, investitsiyalar va savdo vazirligi, Ichki ishlar vazirligi, Adliya vazirligi, Davlat soliq qoʻmitasi, Davlat bojxona qoʻmitasi, Davlat statistika qoʻmitasi, Aloqa, axborotlashtirish va telekommunikatsiya texnologiyalari davlat qoʻmitasi, Xususiylashtirish, monopoliyadan chiqarish va raqobatni rivojlantirish davlat qoʻmitasi, Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markazi Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti bilan birgalikda Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi toʻgʻrisidagi Bitimdan kelib chiquvchi majburiyatlarning bajarilishini taʼminlasinlar.

3. Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentiga amalda maqsadga muvofiqlikdan kelib chiqib hamda ushbu qarorning 2-bandida koʻrsatib oʻtilgan vazirliklar va idoralar rahbarlari bilan kelishgan holda Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi faoliyatining tegishli qismi boʻyicha, shuningdek Yalpi majlislarda va Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi doirasida oʻtkaziladigan boshqa tadbirlarda ishtirok etish uchun Oʻzbekiston Respublikasi delegatsiyalarini shakllantirishda ularning vakillarini ekspert sifatida jalb qilishga ruxsat etilsin.

4. Oʻzbekiston Respublikasi Moliya vazirligi Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentiga tasdiqlangan budjet mablagʻlari doirasida:

Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhining budjetiga Oʻzbekiston Respublikasining har yilgi ulushini toʻlash uchun;

Oʻzbekiston Respublikasi delegatsiyalarining Yalpi majlislarda va Jinoiy daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi doirasida oʻtkaziladigan boshqa tadbirlarda, shu jumladan videokonferensiyalarda ishtirok etishi bilan bogʻliq xarajatlarni qoplash uchun belgilangan tartibda mablagʻlarni nazarda tutsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.