“Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi to‘g‘risidagi Bitimni (Moskva, 2011-yil 16-iyun) ratifikatsiya qilish haqida” O‘zbekiston Respublikasining 2011-yil 13-dekabrdagi O‘RQ-307-son Qonunini bajarish yuzasidan hamda ko‘rsatib o‘tilgan Bitim qoidalari O‘zbekiston Respublikasi vazirliklari va idoralari tomonidan bajarilishi maqsadida Vazirlar Mahkamasi qaror qiladi:

1. O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi to‘g‘risidagi Bitimning amalga oshirilishi uchun O‘zbekiston Respublikasi tomonidan mas’ul bo‘lgan vakolatli organ etib belgilansin.

2. O‘zbekiston Respublikasi Markaziy banki, Davlat xavfsizlik xizmati, Tashqi ishlar vazirligi, Moliya vazirligi, Iqtisodiy taraqqiyot va kambag‘allikni qisqartirish vazirligi, Investitsiyalar va tashqi savdo vazirligi, Ichki ishlar vazirligi, Adliya vazirligi, Davlat soliq qo‘mitasi, Davlat bojxona qo‘mitasi, Davlat statistika qo‘mitasi, O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Davlat aktivlarini boshqarish agentligi, Monopoliyaga qarshi kurashish qo‘mitasi, O‘zbekiston Respublikasi Prezidenti huzuridagi Loyiha boshqaruvi milliy agentligi O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti bilan birgalikda Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi to‘g‘risidagi Bitimdan kelib chiquvchi majburiyatlarning bajarilishini ta’minlasinlar.

3. O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentiga amalda maqsadga muvofiqlikdan kelib chiqib hamda ushbu qarorning 2-bandida ko‘rsatib o‘tilgan vazirliklar va idoralar rahbarlari bilan kelishgan holda Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi faoliyatining tegishli qismi bo‘yicha, shuningdek Yalpi majlislarda va Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi doirasida o‘tkaziladigan boshqa tadbirlarda ishtirok etish uchun O‘zbekiston Respublikasi delegatsiyalarini shakllantirishda ularning vakillarini ekspert sifatida jalb qilishga ruxsat etilsin.

4. O‘zbekiston Respublikasi Moliya vazirligi O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentiga tasdiqlangan budjet mablag‘lari doirasida:

Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhining budjetiga O‘zbekiston Respublikasining har yilgi ulushini to‘lash uchun;

O‘zbekiston Respublikasi delegatsiyalarining Yalpi majlislarda va Jinoiy daromadlarni legallashtirishga va terrorizmni moliyalashtirishga qarshi kurashish bo‘yicha Yevroosiyo guruhi doirasida o‘tkaziladigan boshqa tadbirlarda, shu jumladan videokonferensiyalarda ishtirok etishi bilan bog‘liq xarajatlarni qoplash uchun belgilangan tartibda mablag‘larni nazarda tutsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov zimmasiga yuklansin.