O‘zbekiston Respublikasi bilan Hindiston Respublikasi, bundan keyin “Ahdlashuvchi Tomonlar” deb ataluvchilar,

hamkorlikni kuchaytirish va jinoiy ishlar bo‘yicha o‘zaro huquqiy yordamni rivojlantirish orqali jinoyatlarni, bunga terrorizm ham kiradi, tekshirish, jinoiy ta’qib qilish va oldini olishda ikkala Tomonning faoliyati samaradorligini oshirish maqsadida,

quyidagilar to‘g‘risida ahdlashib oldilar:

1. Ahdlashuvchi Tomonlar ushbu Shartnomaga muvofiq bir-birlariga jinoiy ishlar yuzasidan keng ko‘lamda o‘zaro yordamlashadilar.

2. Ushbu moddaning 1-bandida tilga olingan o‘zaro huquqiy yordam deganda, so‘ralayotgan Tomon tarafidan so‘rayotgan Tomon yurisdiksiyasi doirasida, bunday huquqiy yordam sud yoki boshqa biron-bir organ tarafidan so‘ralayotgan yoinki berilishi-berilmasligidan qat’i nazar, jinoiy ishlar bo‘yicha tekshirish va protsessual faoliyat yuzasidan ko‘maklashish tushuniladi.

3. Ushbu modda 1-bandida tilga olingan jinoiy ishlar deganda O‘zbekiston Respublikasi uchun O‘zbekiston Respublikasi jinoiy qonunlarida ko‘zda tutilgan har qanday huquqbuzarlikka oid tekshirish yoki protsessual faoliyat, Hindiston Respublikasi uchun — Parlament chiqargan qonunlarda, shuningdek shtatlarning qonunlarida ko‘zda tutilgan har qanday huquqbuzarlikka oid tekshirish yoki protsessual faoliyat tushuniladi.

4. Jinoiy ishlar, shuningdek soliq, bojxona bojlari va to‘lovlariga oid, sarmoya va to‘lovlarni xalqaro o‘tkazishga aloqador, bunga terrorizmga madad berish uchun foydalaniladigan o‘tkazishlar ham kiradi, jinoiy huquqbuzarliklarga oid tekshirish yoki protsessual faoliyatni ham o‘z ichiga oladi.

5. Jinoiy ishlar, shuningdek terrorizm, ya’ni siyosiy maqsadlarda yoxud aholini qo‘rqitish uchun zo‘ravonlik qilishga aloqador jinoiy huquqbuzarliklarga oid tekshirish yoki protsessual faoliyatni ham o‘z ichiga oladi.

6. Huquqiy yordam deganda quyidagilar tushuniladi:

6.1 shaxslar va narsalarning joyini aniqlash va tayin qilish;

6.2 hujjatlarni, jumladan shaxslarning kelib-ketishlari talab etiladigan hujjatlarni topshirish;

6.3 axborot, hujjatlar va boshqa materiallarni, bunga jinoiy va sudlov materiallari ham kiradi, taqdim etish;

6.4 mol-mulkni berish;

6.5 ashyoviy dalillarni vaqtincha berib turish;

6.6 shaxslarning guvohlik ko‘rsatmalarini va arizalarini olish

6.7 tintuv o‘tkazish va ashyolarni olib qo‘yish to‘g‘risidagi so‘rovlarni bajarish;

6.8 guvohlar, shuningdek boshqa shaxslarning, jumladan ekspertlarning guvohlik ko‘rsatmalari berishi va hibsda saqlanayotgan shaxslar ustidan tekshiruv ishlari olib borilishiga ko‘maklashishini ta’minlash;

6.9 jinoyat orqali qo‘lga kiritilgan mol-mulk turgan joyni aniqlash, uni hibsga olish, tortib olish va musodara qilish tadbirlarini ko‘rish;

6.10 terrorizm maqsadlari uchun mo‘ljallangan vositalarning joyini aniqlash, ularni hibsga olish, tortib olish va musodara qilish bo‘yicha tadbirlarini ko‘rish; hamda

6.11 ushbu Shartnomaga muvofiq bo‘lgan boshqa turdagi yordamlarni berish.

1. Huquqiy yordam berish to‘g‘risidagi so‘rovlar so‘ralayotgan Tomonning qonunlariga muvofiq oshig‘ich ravishda va taqiqlanmagan bo‘lsa, so‘rayotgan Tomon ko‘rsatgan tarzda bajariladi.

2. Agar so‘rayotgan Tomon o‘z so‘rovida bu to‘g‘rida maxsus qayd qilgan bo‘lsa, so‘ralayotgan Tomon so‘rovni bajarish vaqti hamda joyini unga xabar qiladi.

3. So‘ralayotgan Tomon bank sirlarining asoslari to‘g‘risida so‘rovni bajarishni rad etmaydi.

1. Agar so‘ralayotgan Tomon so‘rovni bajarish uning suvereniteti, xavfsizligi, jamoat tartibi va jamiyatning boshqa muhim manfaatlariga ziyon yetkazadi, deb hisoblasa, so‘rovni bajarish rad etilishi mumkin.

2. So‘rovni bajarish o‘tkazilayotgan tekshirish yoki so‘ralayotgan Tomon yurisdiksiyasi doirasida jinoiy ta’qibni amalga oshirishga xalaqit beradigan bo‘lsa, So‘ralayotgan Tomon huquqiy yordam berish to‘g‘risidagi so‘rovni bajarishni kechiktirishi mumkin.

3. So‘ralayotgan Tomon so‘rayotgan Tomonni sababini ko‘rsatgan holda, so‘rovni bajarishni to‘la yoki qisman rad etish yoinki uni bajarishni kechiktirish to‘g‘risidagi qaroridan xabardor qiladi.

4. So‘ralayotgan Tomon yordam berish to‘g‘risidagi so‘rovni bajarishni rad etish yoki uni kechiktirish haqida qaror qabul qilishdan avval huquqiy yordam qanday shart-sharoitda berilishi mumkinligini ham ko‘rib chiqadi. Agar so‘rayotgan Tomon shu sharoitda huquqiy yordamni qabul qilishga rozi bo‘lsa, u bunga amal qiladi.

So‘ralayotgan Tomonning vakolatli organlari so‘rovda ko‘rsatilgan shaxslar va narsalarning joyini aniqlash va tayin belgilash uchun barcha choralarni ko‘radilar.

1. So‘ralayotgan Tomon unga so‘rov maqsadlarida berilgan hujjatlarni topshiradi.

2. So‘rayotgan Tomon javob berilishi kerak bo‘lgan yoki so‘rayotgan Tomonning yurisdiksiyasi doirasida qatnashishi kutilayotgan hujjatning bunday javob yoki hozir bo‘lishi zarur hujjat uchun tayinlangan maqbul muddat ichida topshirilishi to‘g‘risida so‘rov beradi. Qanchalik vaqtni “maqbul” muddat deb belgilashda so‘rayotgan Tomon so‘ralayotgan Tomonning yurisdiksiyasi doirasidagi imkoniyatlarni hisobga oladi.

3. So‘ralayotgan Tomon hujjatlar so‘rayotgan Tomon ko‘rsatgan tarzda topshirilganini tasdiqlaydi. Hujjatni topshirish orqaga surilsa yoki qoldirilsa, buning sabablari so‘rayotgan Tomonga xabar qilinadi.

1. Huquqiy yordam berish to‘g‘risidagi so‘rov material va hujjatlarga taalluqli bo‘lsa, so‘ralayotgan Tomon agar so‘rayotgan Tomon asl nusxalarning o‘zini talab etmayotgan bo‘lsa, ularning lozim tartibda tasdiqlangan nusxalarini berib yuborishi mumkin, asl nusxalar so‘ralgan holda esa so‘ralayotgan Tomon bunday so‘rovni bajarish uchun barcha lozim choralarni ko‘radi.

2. So‘rayotgan Tomonga berib yuborilgan materiallar, hujjatlar yoki narsalarning asl nusxalari so‘ralayotgan Tomonning so‘roviga ko‘ra, iloji boricha darhol qaytarilishi lozim.

3. So‘ralayotgan Tomonning qonunlari yo‘l bersa, materiallar, hujjatlar yoki narsalar so‘rayotgan Tomonning qonunlariga muvofiq kelishi uchun so‘rayotgan Tomon talab qilishi mumkin bo‘lgan tartibda tasdiqlab yuboriladi.

1. So‘ralayotgan Tomon yurisdiksiyasi doirasida ko‘rsatma berish yoki hujjatlar, materiallar yoxud ashyolarni taqdim etishi, shuningdek so‘ralayotgan Tomon qonunlari talabiga muvofiq bo‘lgan hujjatlar, materiallar yoxud ashyolarni taqdim etishi talab etilayotgan shaxs, zaruratga ko‘ra, chaqiruv qog‘ozi berish orqali yoki boshqa biron tartibda qatnashish va ko‘rsatma berish uchun chorlanadi.

2. So‘ralayotgan Tomon o‘z qonunlari talabiga ko‘ra so‘rovni bajarishda unda ko‘rsatilgan shaxslarning hozir bo‘lishi va so‘roq qilinayotgan shaxsga beriladigan savollarini etishlariga yo‘l qo‘yishi mumkin.

3. So‘rovni bajarishda hozir bo‘ladigan shaxslarning protsessual xatti-harakatlar chog‘ida so‘zma-so‘z yozib olishlariga yo‘l qo‘yiladi. So‘ralayotgan Tomonning qonunlarida taqiqlanmagan bo‘lsa, bunday yozib olishni amalga oshirish uchun texnikaviy vositalarni qo‘llashga ruxsat beriladi.

1. So‘rayotgan Tomon so‘ralayotgan Tomondan tekshirish o‘tkazishda shaxsning ko‘rgazma berishi yoki yordamlashishini so‘rashi mumkin.

2. So‘ralayotgan Tomon shaxsni ixtiyoriy ravishda u tekshirish o‘tkazishda yordamlashish uchun yoki guvohlik ko‘rsatmasi berishi uchun taklif etishi mumkin. Ushbu shaxs barcha xarajatlar qoplanishi va to‘lanadigan mablag‘lar xususida xabardor etilishi lozim. So‘ralayotgan Tomon ushbu shaxsning javobi to‘g‘risida so‘rayotgan Tomonga xabar qiladi.

1. Tintuv o‘tkazish va olib qo‘yish to‘g‘risidagi so‘rovni bajarayotgan vakolatli organ so‘rayotgan Tomon so‘rab qolishi mumkin bo‘lgan, olib qo‘yilgan hujjatlar, materiallar yoki ashyolarning aniqligi, holati, tugalligi, davomiyligi kabi jihatlar hamda olib qo‘yish tafsilotlarini o‘z ichiga olgan axborotni taqdim etadi.

2. So‘rayotgan Tomon olib qo‘yilgan hujjatlar, materiallar yoki ashyolar o‘ziga berilishida so‘ralayotgan Tomon o‘rtaga qo‘ygan shartlarga amal qiladi.

1. So‘ralayotgan Tomonning yurisdiksiyasi doirasida bo‘lgan hibsda saqlanayotgan shaxs so‘rayotgan Tomonning so‘roviga ko‘ra tekshirish o‘tkazishga ko‘maklashish yoki jarayonda guvohlik ko‘rsatmasi berish uchun, ushbu shaxsning roziligiga ko‘ra hamda bunday shaxsni berishga to‘sqinlik qiladigan asos bo‘lmagan hollarda so‘rayotgan Tomonga vaqtincha berilishi mumkin. So‘rayotgan Tomon ushbu shaxsni hibsda saqlaydi va uni so‘rovni bajarish yakunlanishi bilanoq so‘ralayotgan Tomonga qaytaradi.

2. Chiqarilgan hukm muddatining o‘tganligi yoki so‘ralayotgan Tomon so‘rayotgan Tomonga berilgan shaxsni hibsda saqlash ehtiyoji barham topganligini xabar qilsa, ushbu shaxs ozod etilishi lozim va bu holda unga nisbatan ushbu Shartnomaning 8-moddasi qoidalari qo‘llanadi.

1. So‘rayotgan Tomonning yurisdiksiyasi doirasida turgan shaxs uning hozir bo‘lishini taqozo etgan so‘rovga muvofiq, ushbu Shartnoma 10-moddasining 1-bandi ko‘zda tutilgan holatlardan tashqari hollarda hibsga olinmaydi yoki boshqa har qanday cheklovga duchor qilinmaydi, shuningdek ushbu shaxs uning so‘ralayotgan Tomon yurisdiksiyasi hududidan chiqishidan avval qilgan yoki qilmagan xatti-harakati uchun jinoiy javobgarlikka tortilmaydi. Bunday shaxs ushbu so‘rov mansub bo‘lgan jarayondan bo‘lak har qanday jarayon bo‘yicha ko‘rsatma berishga majbur emas.

2. Shaxs uning hozir bo‘lishi ortiq shart emas ekanligi to‘g‘risida rasman xabardor qilinganidan keyin o‘ttiz kun mobaynida so‘rayotgan Tomon yurisdiksiyasi hududini ixtiyoriy ravishda tark etmasa yoki uning yurisdiksiyasi hududini tark etib, yana o‘z xohishi bilan unga qaytib kelsa, unga nisbatan ushbu moddaning 1-bandi qo‘llanmaydi.

3. So‘rayotgan Tomon yurisdiksiyasi hududiga kelmagan har qanday shaxs buning uchun so‘ralayotgan Tomonning hech qanday sanksiyalari yoki majburlash choralariga duchor qilinmaydi.

1. So‘ralayotgan Tomon so‘rovga ko‘ra o‘zining yurisdiksiyasi doirasida jinoyat orqali topilgan har qanday mol-mulk, jumladan terrorizm maqsadida sarflanadigan mablag‘ bor-yo‘qligini aniqlash uchun barcha chora-tadbirlarni ko‘radi va tekshirish natijalari to‘g‘risida so‘rayotgan Tomonga xabar qiladi.

2. So‘rov jinoyat orqasida topilgan mol-mulk, jumladan terrorizm maqsadida sarflanadigan mablag‘ni hibsga olish yoki musodara etishni ta’minlash maqsadida berilishi mumkin. Bunday yordam so‘ralayotgan Tomonning qonunlariga muvofiq ravishda, istalgan maqbul usulda beriladi. Bu so‘rayotgan Tomonning sudi yoki boshqa vakolatli organining qarorini kuchlantirish yoxud so‘ralayotgan Tomonda mol-mulkni hibsga olish yoinki musodara qilish maqsadida so‘ralayotgan Tomonning vakolatli organiga so‘rov yuborishni o‘z ichiga olishi mumkin.

3. So‘rov jinoyat orqasida topilgan mol-mulkni qaytarib berish to‘g‘risida qaror ijrosini ta’minlash maqsadida hibsga olishda yordam so‘rab berilishi mumkin.

4. Jinoyat orqasida topilgan va ushbu Shartnomaga muvofiq hibsga olingan yoki musodara etilgan mol-mulk, agar har bir alohida holatda boshqacha ahdlashuvga erishilmagan bo‘lsa, so‘ralayotgan Tomonga tegishli bo‘ladi.

5. Ushbu moddaning 1- va 2-bandlariga muvofiq yordam so‘rab berilgan so‘rovga binoan so‘ralayotgan Tomonda choralar ko‘rilgan bo‘lsa hamda O‘zbekiston Respublikasi va Hindiston Respublikasida mulkni hibsga olish va musodara qilish to‘g‘risidagi buyruqnomada manfaatlari aks etgan shaxsning tavsiyasi mavjud bo‘lsa, tegishli Ahdlashuvchi Tomon bu to‘g‘risida boshqa Ahdlashuvchi Tomonga iloji boricha tezda xabar beradi hamda tez orada ushbu tavsiyani ko‘rib chiqish natijalarini ma’lum qiladi.

1. Har qanday hollarda so‘rovda quyidagilar aks ettirilishi kerak:

1.1 ish yuzasidan tekshirish, jinoiy ta’qib yoki ishlab chiqarish olib boradigan, so‘rov yuborilgan vakolatli organning nomi;

1.2 ish yuzasidan tekshirish, jinoiy ta’qib yoki ishlab chiqarish mazmunining bayoni hamda ishga aloqador faktlarning nusxalari yoki qisqa tafsiloti va tegishli qonunlar matni;

1.3 so‘rovni yuborishdan maqsad va so‘ralayotgan yordam turi;

1.4 so‘rovni bajarishning maqbul muddati.

2. Huquqiy yordam so‘rab berilgan so‘rovda, shuningdek quyidagi axborot ham bo‘lishi lozim:

2.1 iloji bo‘lsa — ish yuzasidan tekshirish yoki ishlab chiqarish olib borilayotgan shaxs yoki shaxslarning kimligi, fuqaroligi, turar joyi to‘g‘risida ma’lumot;

2.2 zarur bo‘lsa — sababini ko‘rsatgan holda, so‘rayotgan Tomon uchun amal qilinishi maqbul bo‘ladigan istalgan alohida protsessual xatti-harakat yoki talabning mazmuni;

2.3 guvohlik ko‘rsatmalari olish yoki tintuv o‘tkazish va olib qo‘yish to‘g‘risida so‘rov yuboriladigan hollarda — shunday dalillar so‘ralayotgan Tomon yurisdiksiyasi doirasida bo‘lishi mumkinligi haqidagi taxmin asoslangan ariza;

2.4 shaxsdan guvohlik ko‘rsatmalarini olish to‘g‘risida so‘rov yuboriladigan hollarda — ushbu guvohlik ko‘rsatmalarini guvohlik ko‘rsatmalari yoki ariza beradigan shaxsdan qasam ichirib olinishi, tasdiqlanishi yoki so‘ralayotgan Tomonning qonunlarida ko‘zda tutilgan boshqa tarzda olinishi lozim yoki shart emasligi to‘g‘risida axborot;

2.5 ashyoviy dalillarni vaqtincha berib turish hollarida — bu ashyoviy dallollarni saqlab turadigan shaxs yoki shaxslar guruhi, ular topshiriladigan joy, ular yuzasidan o‘tkaziladigan ekspertizalar tarzi va ular qaytarib beriladigan sana;

2.6 hibsda saqlanadigan shaxslar ishtirok etadigan hollarda — o‘tkazishning butun davrida ularning hibsda saqlanishi uchun mas’ul bo‘lgan shaxs va shaxslar guruhi, hibsdagi shaxsni olib borish lozim bo‘lgan joy va uning qaytarilish sanasi;

2.7 shart bo‘lsa — maxfiylikni saqlash zarurati va buning sabablari;

2.8 so‘rovni bajarish uchun asqotishi mumkin bo‘lgan boshqa har qanday axborot.

3. So‘ralayotgan Tomon so‘rovda aks ettirilgan axborot so‘rovni bajarish uchun yetarli emas deb topsa, u qo‘shimcha axborot etilishini talab qilishi mumkin.

4. So‘rov yozma ravishda beriladi. Kechiktirib bo‘lmaydigan hollarda yoki so‘ralayotgan Tomon yo‘l qo‘yadigan o‘zga hollarda so‘rov faks yoki elektron pochtaning boshqa kelishilgan vositalari orqali berilishi mumkin, ammo shundan so‘ng darhol yozma asl nusxa orqali tasdiqlanishi kerak.

Ushbu Shartnomani bajarishda markaziy organlar barcha so‘rovlar va ularning javoblarini beradi hamda qabul qilib oladi.

O‘zbekiston Respublikasi tomonidan — O‘zbekiston Respublikasi Prokuraturasi Markaziy Organ hisoblanadi; Hindiston Respublikasi tomonidan Hindiston Respublikasi Ichki ishlar vazirligi Markaziy Organ hisoblanadi.

1. So‘ralayotgan Tomon taqdim etilgan axborot yoki dalillar yoxud bunday axborot yoki dalillar manbai maxfiy saqlanishini yoinki ular o‘zi qo‘ygan shartlarga amal qilinganidagina ochilishini talab qilishi mumkin. So‘rayotgan Tomon ushbu axborot yoki dalillarni ana shu shartlar bilan qabul qilib olsa, ularga amal qilishi lozim.

2. So‘ralayotgan Tomon so‘rovga ko‘ra va so‘ralayotgan darajada so‘rov, uning mazmuni, ilova etilgan hujjatlar hamda ushbu so‘rovga binoan ko‘rilgan chora-tadbirlarning maxfiyligini saqlaydi. So‘rovni bajarish uning maxfiyligini saqlagan holda mumkin bo‘lmasa, so‘ralayotgan Tomon bu to‘g‘rida so‘rayotgan Tomonni xabardor qiladi, so‘rayotgan Tomon esa, ushbu so‘rov shunday holda ham bajarilishi lozimmi-yo‘qmi, hal qiladi.

So‘ralayotgan Tomon so‘ralayotgan Tomon markaziy organining roziligini olmasdan turib taqdim etilgan axborot va dalillarni oshkor qilishi hamda ulardan so‘rovda ko‘rsatilganidan bo‘lak maqsadlarda foydalanishi mumkin emas.

Ushbu Shartnomaga muvofiq berilgan dalil va hujjatlarni ushbu Shartnomaning 6-moddasida ko‘rsatilganidan boshqacha tartibda tasdiqlash shart emas.

Ushbu Shartnomani bajarishda Ahdlashuvchi Tomonlar o‘z davlat tillaridan foydalanadilar. Uning boshqa Ahdlashuvchi Tomon davlat tiliga va inglizchaga tarjimasi ham ilova qilinadi.

1. Konsullik mansabdor shaxslari o‘zlari bo‘lib turgan davlat hududida rasmiy so‘rovsiz, ixtiyoriy ravishda guvohlik ko‘rsatmalari olishlari mumkin. Mo‘ljallanayotgan protsessual xatti-harakatlar to‘g‘risida bo‘lib turgan davlatga oldindan xabar beriladi. Bu davlat ushbu Shartnoma 3-moddasida ko‘rsatilgan istalgan sababga binoan bunga o‘z roziligini bermasligi mumkin.

2. Konsullik mansabdor shaxslari konsullik binosiga ixtiyoriy ravishda kelgan shaxsga hujjatlarni topshirishlari mumkin.

1. So‘ralayotgan Tomon o‘z hududida so‘rovni bajarishga oid xarajatlarni ko‘taradi. So‘rayotgan Tomon ko‘taradigan quyidagi xarajatlar undan mustasno:

1.1 so‘rayotgan Tomonning so‘roviga binoan ushbu Shartnomaning 7- yoki 8-moddalariga asosan so‘ralayotgan Tomon yurisdiksiyasi hududiga istalgan shaxsni olib borish va ushbu shaxsning so‘ralayotgan Tomon yurisdiksiyasi doirasida bo‘lgan chog‘idagi ovqatlanishi va bo‘lak xarajatlari;

1.2 ham so‘ralayotgan Tomon, ham so‘rayotgan Tomon yurisdiksiyasi doirasida ekspertlarning xarajatlari va ularning gonorarlari;

2. So‘rovni bajarish haddan tashqari xarajatlarni taqozo etishi ma’lum bo‘lib qolsa, Ahdlashuvchi Tomonlar so‘ralayotgan yordam qanday sharoitda berilishi mumkinligi to‘g‘risida maslahatlashib oladilar.

Tegishli harakat yoki harakatsizlik bu sanaga qadar yuz bergan-bermaganligidan qat’i nazar, ushbu Shartnoma kuchga kirganidan keyingi barcha so‘rovlarga nisbatan qo‘llanadi.

Ushbu Shartnoma Ahdlashuvchi Tomonlarning ular ishtirok etgan boshqa xalqaro konvensiyalar/shartnomalardan kelib chiqadigan majburiyatlariga daxl qilmaydi.

Ahdlashuvchi Tomonlar istalgan Ahdlashuvchi Tomonning ushbu Shartnomani yaxlit yoinki undagi biron-bir konkret masala yuzasidan talqin qilish yoki qo‘llash borasidagi iltimosiga binoan darhol maslahatlashuv o‘tkazadilar.

1. Ushbu Shartnoma ratifikatsiya qilinadi va ratifikatsiya yorliqlari almashingan sanadan boshlab kuchga kiradi.

2. Har bir Ahdlashuvchi Tomon istalgan vaqtda boshqa Ahdlashuvchi Tomonga diplomatik kanallar orqali bildirishnoma yuborib ushbu Shartnoma faoliyatini to‘xtatishi mumkin; ushbu Shartnoma shunday bildirishnoma olinganidan keyin olti oy o‘tgach kuchdan qoladi.

Dehli shahrida, 2000-yil 2-mayda ikki nusxada, o‘zbek, hind va ingliz tillarida tuzildi, bunda barcha matnlar bir xil kuchga ega. Talqinda har xilliklar kelib chiqqan hollarda ingliz tilidagi matn qo‘llanadi.