Oʻzbekiston Respublikasi Hukumati bilan Pokiston Islom Respublikasi Hukumati (bundan keyin alohida holda “Tomon” yoki birgalikda “Tomonlar” deb ataluvchilar),

jinoiy ishlar boʻyicha hamkorlik va oʻzaro yordam berish orqali jinoyatchilikni oldini olish, tergov qilish, jinoiy taʼqib hamda bartaraf etishda samaradorlikni oshirishga intilib,

quyidagilar toʻgʻrisida ahdlashib oldilar:

1. Tomonlar ushbu Shartnomaning qoidalariga va oʻz milliy qonunlariga muvofiq jinoiy ishlar boʻyicha tergov olib borish, jinoiy taʼqib qilish yoki jinoiy ishlar boʻyicha sud jarayonini amalga oshirishda bir-birlariga yordam beradilar.

2. Ushbu Shartnoma maqsadlarida, jinoiy ishlar deganda yordam soʻralgan vaqtda Soʻrayotgan Tomon vakolatli organlari yurisdiksiyasiga taalluqli hamda ikki davlat jinoyat qonunchiliklarida koʻrsatilgan qilmish yuzasidan tergov olib borish, jinoiy taʼqib qilish yoki sud jarayonini amalga oshirish tushuniladi.

3. Soʻralgan yordamga quyidagilar kiradi:

a) shaxslardan dalillar yoki koʻrsatmalarni olish;

b) maʼlumotlar, hujjatlar, yozuvlar va guvohlik koʻrsatmalarini taqdim etish;

s) shaxslarni identifikatsiyalash;

d) hujjatlarni topshirish;

e) oʻgʻirlangan mulkni qidirib topish va berish;

f) Soʻrayotgan Tomonda koʻrsatmalar berishga qodir yoki tergovni olib borish, jinoiy taʼqib yoxud sud jarayonini amalga oshirishga koʻmak beruvchi shaxslar bilan uchrashuvlarni tashkil qilish;

g) Soʻralayotgan Tomonning qonunchiligi bilan taqiqlanmagan, ushbu Shartnoma maqsadlariga muvofiq keladigan boshqa turdagi yordam;

h) ashyolar va hujjatlarni qidirib topish, olib qoʻyish va ularni taqdim qilishni tashkillashtirish, yozma va ashyoviy dalillarni berish;

i) koʻzdan kechirish va guvohlantirish oʻtkazish;

j) ekspertiza almashinuvi;

k) gumon qilinuvchi shaxslar, jabrlanuvchilar, ayblanuvchi va guvohlarni oʻz mamlakatlarida soʻroq qilish;

4. Tomon yozma ravishda quyidagilar boʻyicha yordam soʻrab murojaat etishi mumkin;

a) qamoqqa olish va ushlab turish;

b) Soʻrayotgan Tomon davlatida jinoiy ishlar boʻyicha chiqarilgan sud qarorlarini Soʻralayotgan Tomonda uning qonunchiligi va ushbu Shartnoma doirasida ijro etish;

s) jinoiy ishlar boʻyicha ish yurituvni oʻtkazish.

Ushbu Shartnoma boshqa shartnomalar, ahdlashuvlar kelib chiqadigan yoki oʻzgacha tarzda Tomonlar oʻrtasida mavjud majburiyatlarga daxl qilmaydi hamda boshqa shartnomalar, ahdlashuvlarga muvofiq yoki oʻzgacha tarzda Tomonlar bir-birlariga yordam berishlariga toʻsqinlik qilmaydi.

1. Har bir Tomon ushbu Shartnoma maqsadlarida iltimosnomalar yuborish va qabul qilish uchun vakolatli Markaziy organ hisoblanadigan idorani cheklanmagan muddatga tayinlaydi.

2. Ushbu Shartnoma kuchga kirgan paytda quyidagi idoralar Markaziy organlar etib tayinlanadi:

(a) Oʻzbekiston Respublikasi Hukumati uchun Bosh prokuratura;

(b) Pokiston Islom Respublikasi Hukumati uchun Ichki ishlar vazirligi.

3. Har bir Tomon oʻzining Markaziy organlari oʻzgarishlari toʻgʻrisida boshqa Tomonni xabardor qiladi.

4. Markaziy organlar, bir-birlari bilan bevosita yoki diplomatik kanallar orqali ham aloqada boʻlishlari mumkin.

1. Yordam koʻrsatish toʻgʻrisidagi iltimosnomalar quyidagilardan iborat boʻlishi lozim:

(a) iltimosnomaning maqsadini ifodalash va soʻralayotgan yordamning mohiyati;

(b) iltimosnomaning tashabbuskori boʻlgan shaxsning ismi-sharifi, agentlik yoki organning nomlanishi;

(s) jinoiy ish predmeti tavsifi, tegishli faktlarning umumiy tavsifi hamda tegishli qonunlardan koʻchirmalar hamda qoʻllanishi mumkin boʻlgan jazo tavsifi;

(d) tergov yoki sud jarayonining ayni bosqichdagi holati bayoni;

(e) iltimosnomalarning bajarilishi maqsadga muvofiq boʻlgan zarur muddatlar bayoni.

2. Yordam toʻgʻrisidagi iltimosnoma, tegishli hollarda va imkon qadar, quyidagilarni ham oʻz ichiga olishi lozim:

a) unga nisbatan jinoiy ish olib borilayotgan yoki jinoiy ishga aloqador axborotga ega shaxs yoxud shaxslarning shaxsiyati, fuqaroligi va joylashgan joyi toʻgʻrisida maʼlumotlar;

b) 10-moddaga muvofiq yordam koʻrsatish toʻgʻrisidagi iltimosnomalar boʻyicha:

i) shaxslar soʻrov qilinishi mumkin boʻlgan masalalar tavsifi, jumladan, zarur holda Soʻrayotgan Tomon bu shaxslardan soʻrashni istagan har qanday savollar roʻyxati;

ii) koʻrsatilishi lozim boʻlgan har qanday hujjatlar, yozuvlar yoki guvohlik koʻrsatmalarining tavsifi va zarur holda ular yuzasidan soʻroq qilinadigan tegishli shaxsning tavsifi;

s) 11- yoki 12-moddalarga muvofiq yordam koʻrsatish toʻgʻrisidagi iltimosnomaga koʻra, Soʻrayotgan Tomonga borganda shaxs ega boʻladigan sutkalik xarajatlar va boshqa xarajatlar toʻgʻrisida axborot;

d) 15- yoki 16-moddalarga muvofiq yordam koʻrsatish toʻgʻrisidagi soʻrovga koʻra, qidirilayotgan materiallarning tavsifi va zarur hollarda ularning taxminiy joylashgan joyi;

e) 16-moddaga muvofiq yordam koʻrsatish toʻgʻrisidagi iltimosnomaga koʻra:

i) Soʻralayotgan Tomonning yurisdiksiyasiga kirishi mumkin boʻlgan jinoiy yoʻl bilan topilgan daromadlar toʻgʻrisida Soʻrayotgan Tomonning mulohazasiga asoslangan koʻrsatma; va

ii) bajarilishi lozim boʻlgan sud qarori va agar mavjud boʻlsa, ushbu qarorning maqomiga taalluqli bayonot;

f) iltimosnomaga binoan koʻrsatiladigan yordam natijasida jinoiy yoʻl bilan topilgan daromadlarning aniqlanishi yoki undirilishi mumkin boʻlgan hollarda, 16-moddaning 4-bandiga asosan maxsus tadbir oʻtkazish zaruriyati bayoni;

g) iltimosnomani bajarishda Soʻrayotgan Tomon rioya etishi mumkin boʻlgan yoki istalgan har qanday maxsus talab yoki tartibning tavsifi, bunga axborot, dalil, hujjat yoki ashyo taqdim etish usuli va shakllarining tafsilotlari ham kiradi;

h) iltimosnomaning maxfiyligini taʼminlash boʻyicha Soʻrayotgan Tomon xohishi va uning sabablarini belgilab beruvchi bayonot, agar bunday xohish mavjud boʻlsa;

i) Soʻrayotgan Tomonning mansabdor shaxsi iltimosnoma bilan bogʻliq masala yuzasidan Soʻralayotgan Tomonga borishni rejalashtirayotgan boʻlsa, bunday shaxs tashrifining maqsadi, taxminiy vaqti hamda safar tashkiliy masalalari toʻgʻrisida axborot;

j) Soʻralayotgan Tomon iltimosnomani bajarishi uchun muhim boʻlgan yoki koʻmak berishi mumkin boʻlgan har qanday qoʻshimcha axborot, dalil yoki hujjat.

3. Ushbu Shartnomaga muvofiq taqdim etilgan iltimosnoma, har qanday qoʻshimcha hujjat va murojaat Soʻrayotgan Tomonning tilida va Soʻralayotgan Tomonning tiliga yoki ingliz tiliga tarjima qilingan holda yuborilishi lozim.

4. Agar Soʻralayotgan Tomon iltimosnomadagi axborot ushbu Shartnomaga muvofiq iltimosnomani bajarishga yetarli emas deb topsa, u qoʻshimcha axborotni soʻrab olishi mumkin.

5. Iltimosnoma yozma ravishda tuziladi, faqat kechiktirib boʻlmaydigan hollarda Soʻralayotgan Tomon iltimosnomani mustasno tarzida boshqa shaklda qabul qilishi mumkin. Bunday vaziyatda, agar Soʻralayotgan Tomon boshqacha tarzda kelishilmagan boʻlsa, iltimosnoma 20 kun ichida yozma ravishda tasdiqlanadi.

1. Yordam koʻrsatish rad etiladi, agar Soʻralayotgan Tomonning fikriga koʻra:

a) shaxsning Soʻralayotgan Tomonda sudlangan, oqlangan yoki afv etilgan jinoiy qilmishi yuzasidan jinoiy taʼqibni amalga oshirish bilan bogʻliq iltimosnoma;

b) yordam koʻrsatish shaxsning irqi, jinsi, dini, fuqaroligi yoki siyosiy qarashlari bilan bogʻliq holda unga nisbatan jinoiy taʼqib yoki jazo belgilash uchun soʻralganligiga aniq asoslar boʻlsa; yoki

s) iltimosnomaning bajarilishi Soʻralayotgan Tomonning suvereniteti, xavfsizligi va muhim manfaatlariga jiddiy zarar yetkazadigan boʻlsa hamda Soʻralayotgan Tomonga xarajatlarni yuklaydigan va har qanday shaxsning xavfsizligiga taalluqli hollarni qamrab olsa;

d) iltimosnoma boʻyicha shaxsga nisbatan jinoiy taʼqib amalga oshiriladigan xatti-harakat Soʻralayotgan Tomon yurisdiksiyasi doirasida sodir etilib, jinoiy qilmish hisoblanmasa;

2. Soʻralayotgan Tomonning fikriga koʻra, iltimosnoma boʻyicha shaxsga nisbatan jinoiy taʼqib amalga oshiriladigan xatti-harakat Soʻralayotgan Tomon yurisdiksiyasi doirasida sodir etilib, shaxsni jinoiy javobgarlikka tortish muddati oʻtib ketganligi sababli ortiq taʼqib etila olmasa, yordam koʻrsatishga rad javobi berilishi mumkin.

3. Agar iltimosnoma Soʻralayotgan Tomonda olib borilayotgan tergov va jinoiy taʼqib jarayoniga aralashuviga olib kelsa, Soʻralayotgan Tomon yordam koʻrsatishni keyingi muddatlarga qoldirishi mumkin.

4. Ushbu moddaga muvofiq iltimosnomani rad etish yoki uning bajarilishini keyingi muddatlarga qoldirishdan avval Soʻralayotgan Tomon oʻzining Markaziy organlari orqali:

a) Soʻrayotgan Tomonni rad etish yoki keyingi muddatlarga qoldirish sabablari toʻgʻrisida darhol xabar beradi;

b) yordamning oʻzi zarur deb hisoblaydigan shart-sharoitlarda koʻrsatilishi mumkinligini aniqlashtirish maqsadida Soʻrayotgan Tomon bilan maslahatlashuvlar olib boradi.

5. Agar Soʻrayotgan Tomon yordamni 4(b) bandda belgilangan shart-sharoitlarda bajarilishiga rozi boʻlsa, u bunday shart-sharoitlarga rioya etishi lozim.

1. Yordam koʻrsatish toʻgʻrisida iltimosnoma Soʻralayotgan Tomon vakolatli idoralari tomonidan oʻsha Tomonning qonunlariga muvofiq va ushbu qonunlar doirasida Soʻrayotgan Tomonning iltimosnomasida koʻrsatilgan tarzda bajariladi.

2. Soʻralayotgan Tomon soʻralgan materialni taqdim etishni keyingi muddatlarga qoldirishi mumkin, agar ushbu material oʻsha tomonda olib borilayotgan jinoiy yoki fuqarolik ishlari koʻrilishida qoʻllash uchun zarur boʻlsa. Bu holda, Soʻralayotgan Tomon iltimosnoma asosida hujjatlarning tasdiqlangan nusxalarini taqdim etadi.

3. Soʻralayotgan Tomon iltimosnomani sezilarli darajada kechiktirilishiga sabab boʻladigan oʻziga maʼlum holatlar haqida Soʻrayotgan Tomonni xabardor qiladi.

Soʻralayotgan Tomon talab qilgan taqdirda, Soʻrayotgan Tomon ushbu Shartnoma doirasida olingan materialni qaytarib beradi, agar u yuborilgan iltimosnomaga taalluqli jinoyat ishi uchun kelgusida zarur boʻlmasa.

1. Soʻralayotgan Tomon, agar soʻralsa, yordam koʻrsatish toʻgʻrisidagi iltimosnomani, uning mazmuni va unga ilova qilingan hujjatlarni hamda iltimosnomaga binoan amalga oshirilgan har qanday xatti-harakatni maxfiy saqlaydi. Agar ushbu iltimosnomani maxfiylikni saqlay olmasdan ijro etishni imkoni boʻlmasa, Soʻralayotgan Tomon bu haqda Soʻrayotgan Tomonni iltimosnoma ijro etilgunga qadar xabardor qiladi, u esa oʻz navbatida ushbu iltimosnomaning ijro etilishi zarurligi yoki yoʻqligini bildiradi.

2. Soʻrayotgan Tomon, agar soʻralsa, Soʻralayotgan Tomon taqdim etgan axborot va dalillarni, yuborilgan iltimosnomaga taalluqli jinoyat ishi uchun zarur boʻladigan hamda Soʻralayotgan Tomon ruxsat bergan boshqa hollardan tashqari, maxfiy saqlaydi.

3. Soʻrayotgan Tomon, agar soʻralsa, axborot yoki dalillarning yoʻqolishi hamda ruxsatsiz olinishi, foydalanishi, oʻzgartirilishi, oshkor qilinishi yoki boshqa tarzda suiisteʼmol qilinishidan himoya qilishni taʼminlaydi.

4. Soʻrayotgan Tomon olingan axborot yoki dalillarni yoxud undan ajratib olingan har qanday qismni Soʻralayotgan Tomonning roziligisiz iltimosnomada koʻrsatilmagan maqsadlarda foydalanmaydi.

1. Soʻralayotgan Tomon, oʻzining qonunlari doirasida, jinoiy ishlarga taalluqli hujjatlarni topshirish yuzasidan iltimosnomani bajaradi.

2. Shaxsning Soʻrayotgan Tomonga guvoh sifatida kelishi toʻgʻrisida sud chaqiruvini yetkazish iltimosnomasi kelish moʻljallangan vaqtdan 45 kun avval Soʻralayotgan Tomonga taqdim etiladi. Kechiktirib boʻlmaydigan hollarda, Soʻralayotgan Tomon ushbu talabdan voz kechishi mumkin.

3. Soʻralayotgan Tomon hujjatlarni topshirganligi toʻgʻrisida Soʻrayotgan Tomonga maʼlumot beradi. Agar hujjatlarni taqdim etishning imkoni boʻlmasa, Soʻrayotgan Tomon ushbu haqda sabablari koʻrsatilgan holda xabardor qilinadi.

4. Shaxs, unga tegishli har qanday iltimosnomaga rioya qilmagan taqdirda, Soʻrayotgan tomon yoki Soʻralayotgan Tomon qonuniga muvofiq har qanday jazo va majburlov choralariga tortilishi mumkin emas.

1. Soʻralayotgan Tomon, oʻzining qonunlari doirasida va iltimosnoma asosida shaxslardan guvohlik yoki boshqa xil tarzdagi koʻrsatmalarni olishi yoki Soʻrayotgan Tomonga taqdim etish maqsadida ulardan ashyoviy dalillarini berishni talab qiladi.

2. Soʻralayotgan Tomon, oʻzining qonunlari doirasida, bajarilayotgan iltimosnomada alohida koʻrsatilgan hollarda Soʻrayotgan Tomon yuborgan shaxslarga ularning oʻz xarajatlari hisobidan ishtirok etishga hamda ushbu shaxslarga guvohlik yoki dalillar olinayotgan shaxslarni soʻroq qilishga ruxsat berishi mumkin. Toʻgʻridan-toʻgʻri soʻroq qilishga ruxsat berilmagan taqdirda, ushbu shaxslarga guvohlik yoki dalillar olinayotgan shaxslarga berish uchun savollarni taqdim etishga ijozat beriladi.

3. Ushbu moddaga binoan yoʻllangan iltimosnoma asosida Soʻralayotgan Tomonda shaxs guvohlik koʻrsatuvlarini rad etishi mumkin, qachonki:

a) Soʻralayotgan Tomon qonuni unda olib boriladigan jinoiy ishlar tergoviga oʻxshash vaziyatlarda shaxsga guvohlik berishdan bosh tortishga ruxsat bersa; yoki

b) Soʻrayotgan Tomon qonuni unda olib boriladigan jinoiy ishlarda ushbu shaxsga guvohlik berishdan bosh tortishga ruxsat bersa.

4. Agar Soʻralayotgan Tomondagi har qanday shaxs Soʻrayotgan Tomon qonuni asosida guvohlik berishdan bosh tortish huquqi yoki majburiyati mavjudligini talab qilsa, Soʻrayotgan Tomonning vakolatli idorasi murojaat qilinganda Soʻralayotgan Tomonning vakolatli idorasiga ushbu huquqni mavjudligi yoki boshqa xil holati toʻgʻrisida sertifikatni taqdim etadi. Inkor etuvchi dalil boʻlmaganda sertifikat unda koʻrsatilgan masalalar uchun yetarli dalil boʻladi.

5. Ushbu modda maqsadida, dalil olishga hujjatlarni yoki boshqa ashyolarni tuzish kiradi.

1. Soʻrayotgan Tomon murojaatiga binoan Soʻralayotgan Tomon davlatida qamoqqa olingan yoki ozodlikdan mahrum qilish jazosini oʻtayotgan shaxs, fuqaroligidan qatʼi nazar, uning roziligiga binoan, qamoqda saqlanishi va belgilangan muddatda qaytarilishi sharti bilan, jinoyat ishi boʻyicha guvohlik berish uchun Soʻrayotgan Tomonga berish turilishi mumkin.

2. Bunday shaxsning vaqtinchalik berib turilishi unga nisbatan Soʻralayotgan Tomonda olib borilayotgan tergov yoki jazoni oʻtashga salbiy taʼsir koʻrsatmagan holda, Tomonlar oʻzaro kelishgan muddatda amalga oshiriladi.

3. Bunday shaxsning Soʻrayotgan Tomon davlatida boʻlishi muddati qamoqda saqlash yoki jazoni oʻtash muddatiga kiradi.

4. Ushbu modda asosida iltimosnomaga binoan berib turilgan shaxs Tomon bilan erishilgan kelishuvlarga muvofiq, guvohlik berilgandan soʻng qisqa muddatlarda yoki shaxsning Soʻrayotgan Tomon davlatida boʻlishiga ehtiyoj qolmaganda imkon qadar tezroq vaqtda Soʻralgan Tomonga qaytariladi.

5. Berib turilgan shaxs Soʻrayotgan Tomonda qamoqda saqlangan vaqti uchun Soʻralayotgan Tomonda jazoni amalga oshirgan muddati degan dalolatnomani oladi.

1. Soʻrayotgan Tomon ushbu Shartnomaning 11-moddasida koʻrsatilmagan shaxslarni sudlovga yoki tergovga koʻmak berish maqsadida taklif qilish uchun Soʻralayotgan Tomondan yordam soʻrashi mumkin. Ushbu shaxs har qanday xarajatlar va toʻlanadigan mablagʻlar haqida xabardor qilinadi.

2. Soʻralayotgan Tomon shaxsning javobi toʻgʻrisida Soʻrayotgan Tomonni xabardor qiladi.

1. Ushbu moddaning 2-bandiga muvofiq, shaxs ushbu Shartnomaning 11 yoki 12-moddasi asosida iltimosnomaga binoan Soʻrayotgan Tomonda iltimosnoma maqsadlarida boʻlib turishi vaqti davomida:

a) har qanday huquqbuzarlik uchun Soʻrayotgan Tomonda qamoqqa olinishi, jinoiy javobgarlikka tortilishi yoki jazolanishi, shuningdek uning Soʻralayotgan Tomondan kelishidan oldin sodir etilgan har qanday xatti-harakatlar yoki ehtiyotsizlik natijasida yuzaga kelgan kam ahamiyatli qilmishlari uchun, agar u Soʻrayotgan Tomonda boʻlmagan boʻlsa, fuqarolik ishlari boʻyicha har qanday javobgarlikka tortilishi mumkin emas; va

b) uning roziligisiz iltimosnomaga taalluqli jinoiy ishdan boshqa har qanday ish yuzasidan guvohlik berishi yoki tergovga koʻmak berishi talab qilinmaydi.

2. Agar shaxs chiqib ketish erkinligi boʻla turib, uning boʻlib turishiga ehtiyojning yoʻqligi rasman eʼlon qilingandan soʻng 45 kun davomida Soʻrayotgan Tomonni tark etmasa yoki chiqib ketib, qaytib kelsa, unga nisbatan ushbu moddaning 1-bandi qoʻllanilmaydi.

3. Ushbu Shartnomaning 11 yoki 12-moddasiga binoan guvohlik berishga rozilik bildirmagan shaxsga nisbatan Soʻrayotgan Tomon yoki Soʻralayotgan Tomon sudi har qanday jazo yoki majburlov choralarini qoʻllashi mumkin emas.

4. Ushbu Shartnomaning 11 yoki 12-moddasiga binoan guvohlik berishga rozi boʻlgan shaxs oʻzi bergan guvohlik asosida jinoiy taʼqibga olinmasligi kerak, yolgʻon guvohlik berish yoki sudni haqorat qilish bundan mustasno.

1. Soʻralayotgan Tomon, Soʻrayotgan Tomonning iltimosnomasi boʻyicha davlat roʻyxatiga kiritilgan yoki boshqacha tarzda jamoatchilikka ochiq boʻlgan, yoki boʻlmasa sotib olish yoki tekshirish uchun foydalanish mumkin boʻlgan hujjatlar va yozishmalarning nusxalarini taqdim etadi.

2. Soʻralayotgan Tomon har qanday hujjat va yozishmalarning nusxalarini oʻzining huquqni muhofaza qilish va sudlov organlariga taqdim etish shartlari asosida va tartibida ham taqdim etishi mumkin.

1. Tintuv oʻtkazish, olib qoʻyish hamda ashyo va materiallardan jinoiy ishda dalil sifatida foydalanish maqsadida Soʻralayotgan Tomon, oʻzining qonunlari doirasida, Soʻrayotgan Tomon talablariga rioya qilgan holda, unda qoʻzgʻatilgan jinoiy ish yuzasidan iltimosnomani bajaradi.

2. Soʻralayotgan Tomon Soʻrayotgan Tomonning iltimosnomasiga binoan, har qanday tintuv, olib qoʻyish joyi va shart-sharoitlari, shuningdek olib qoʻyilgan materiallarni xatlash natijalariga taalluqli maʼlumot bilan taʼminlashi lozim.

3. Soʻralayotgan Tomonning Soʻrayotgan Tomonga taqdim etgan har qanday olib qoʻyilgan materiallariga taalluqli belgilab bergan shartlariga Soʻrayotgan Tomon rioya etishi lozim.

1. Soʻralayotgan Tomon, murojaatga asosan jinoyat sodir etilishining biror bir qismi uning yurisdiksiyasiga tegishli ekanligini aniqlashga harakat qiladi va olib borgan tergovi natijasi haqida Soʻrayotgan Tomonga xabar beradi.

2. 1-bandga asosan jinoiy faoliyat orqali olingan daromadlar aniqlangan taqdirda, Tomon, oʻzining qonunlari doirasida bunday daromadlarni chegaralash yoki ushlab olish bilan bogʻliq barcha choralarni amalga oshirishi lozim.

3. Ushbu moddani qoʻllashda, haqiqiy uchinchi tomon Soʻralayotgan Tomonning qonuniga amal qiladi.

4 Alohida ish boʻyicha boshqa kelishuvga kelinmagan boʻlsa, Soʻralayotgan Tomon, ushlab olingan jinoiy faoliyatdan olingan daromadlar uning hududida topilgan boʻlsa, ushbu daromadlarni oʻzining mulkiga aylantirishi mumkin.

5. Ushbu Shartnoma maqsadi doirasida, jinoiy faoliyatdan olingan daromadlar bu sud tomonidan mulkning bevosita yoki bilvosita jinoyat sodir etilishi natijasida olingan deb topilgan yoki gumon qilingan, yoxud jinoyat sodir etilishi natijasida olingan mulk miqdori yoki boshqa daromadni tashkil qilgan va jinoyat sodir etishda foydalanilgan mulkni bildiradi.

1. Ushbu moddaning 2-qismiga muvofiq, yordam koʻrsatish toʻgʻrisida iltimosnoma, unga tegishli hujjatlar hamda iltimosnomaga javoban tayyorlangan hujjatlar uchun sertifikatlash yoki haqiqiyligini tasdiqlash talab qilinmaydi.

2. Qachonki alohida holda Soʻrayotgan yoki Soʻralayotgan Tomon hujjatlar yoki materiallarni haqiqiyligini tasdiqlashni soʻrasa ularning haqiqiyligi 3-bandida koʻrsatilgan tartibda tasdiqlanadi.

3. Ushbu Shartnoma maqsadida hujjatlar yoki materiallar tasdiqlanishi mumkin, agar:

a) ular sudya yoki mansabdor shaxs tomonidan imzolangan yoki sertifikatlangan boʻlsa;

b) ular hujjatni taqdim etayotgan Tomon Vaziri, idorasi yoki Hukumatning mansabdor shaxsi tomonidan qoʻyilgan mazkur Tomonning rasmiy muhri bilan tasdiqlangan boʻlsa.

Har bir tomonning markaziy organi ushbu Shartnoma maqsadlariga va Tomonlarning qonunlariga muvofiq har bir Tomonning Markaziy organi qoʻshimcha ahdlashuvlarga kirishi mumkin.

1. Agar ushbu Shartnomada boshqacha qoida nazarda tutilgan boʻlmasa, yordam toʻgʻrisidagi soʻrovnomaga asosan, Soʻralayotgan Tomon Soʻrayotgan Tomonni har qanday tergov harakatlari davomida ishtirok etishi uchun barcha choralarni koʻrishi va Soʻrayotgan Tomonning manfaatlarini boshqa bir tarzda koʻzlashi lozimdir.

2. Soʻralayotgan Tomon yordam koʻrsatish toʻgʻrisidagi soʻrovni amalga oshirishi boʻyicha xarajatlarni qoplaydi, bundan istisno tariqasida Soʻrayotgan Tomon quyidagilarni oʻz zimmasiga oladi:

a) Ushbu Shartnomaning 9, 11, 12-moddalariga asosan taqdim etilgan iltimosnomaga binoan, shaxslarni Soʻralayotgan Tomonga olib kirish va olib chiqish xarajatlari hamda Soʻragan Tomonda ushbu shaxsning yashashi bilan bogʻliq xarajatlar;

b) Qoʻriqchilar yoki hamroh-zobitlar eskorti xizmati natijasida yuzaga kelgan xarajatlar;

s) hujjatlarni tarjima qilish bilan bogʻliq va hamda ekspertlarning toʻlov va xarajatlar;

d) Soʻralayotgan Tomonning talabiga koʻra, iltimosnomani bajarishga sarflangan qoʻshimcha xarajatlar.

Ushbu shartnomani talqin qilish, qoʻllash va bajarish bilan bogʻliq barcha bahslar Tomonlar oʻrtasida muzokaralar oʻtkazish orqali hal qilinadi.

Ushbu Shartnomaga Tomonlarning yozma kelishuvlariga asosan har qanday vaqtda qoʻshimcha va oʻzgartishlar kiritilishi mumkin. Qoʻshimchalar va oʻzgartishlar ushbu Shartnomaning 22-moddasi 1-qismida koʻrsatilgan tartibda kuchga kiradi.

1. Ushbu Shartnoma ratifikatsiya yorliqlari almashilgan vaqtdan boshlab kuchga kiradi.

2. Ushbu Shartnoma u kuchga kirganidan soʻng sodir etilgan xatti-harakatlar va qilmishlar bilan bogʻliq iltimosnomalarga nisbatan qoʻllaniladi.

3. Har qanday vaqtda Tomonlarning har biri yozma xabar qilish orqali ushbu Shartnomaning amal qilishini tugatishi mumkin. Bunday xabarnoma olingan kundan boshlab olti oy oʻtgach shartnomaning amal qilishi tugaydi. Ushbu moddaga muvofiq Shartnomani amal qilishini tugatish toʻgʻrisida xabarnoma berilgan taqdirda, huquqiy yordam koʻrsatish toʻgʻrisida tugatilgunga qadar taqdim etilgan iltimosnoma, Soʻrayotgan Tomon qaytarib olmasa, u Shartnoma amal qilishi tartibida koʻrib chiqiladi.

Ushbuni tasdiqlab, oʻzlarining tegishli Hukumatlari tomonidan vakolatlangan quyida imzo chekuvchilar ushbu Shartnomani imzoladilar.

Toshkent shahrida 2007-yil 14-martda, ikki asl nusxada, oʻzbek va ingliz tillarida tuzildi, bunda barcha matnlar bir xil kuchga ega. Matn yuzasidan nomuvofiqliklar yoki talqin qilishda kelishmovchiliklar yuzaga kelsa, ingliz tilidagi matn ustuvor hisoblanadi.