Xorijiy fuqarolarning va fuqaroligi boʻlmagan shaxslarning Oʻzbekiston Respublikasida boʻlishlari tartibini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining “Xorijiy fuqarolarning va fuqaroligi boʻlmagan shaxslarning Oʻzbekiston Respublikasiga kelishlari, ketishlari, bu erda boʻlishlari va tranzit oʻtishlari tartibi toʻgʻrisida” 1996-yil 21-noyabrdagi 408-son qaroriga ilovaga muvofiq oʻzgartirishlar va qoʻshimcha kiritilsin.

3. Vazirliklar va idoralar bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Tashqi ishlar vaziri A.X. Komilov va Oʻzbekiston Respublikasi ichki ishlar vaziri B.A. Matlyubov zimmasiga yuklansin.

1. 1-ilova (Xorijiy fuqarolarning va fuqaroligi boʻlmagan shaxslarning Oʻzbekiston Respublikasiga kelishlari va Oʻzbekiston Respublikasidan ketishlari tartibi)ning 19-bandida:

“v” kichik band chiqarib tashlansin;

“g — j” kichik bandlar tegishli ravishda “v — e” kichik bandlar deb hisoblansin;

quyidagi mazmundagi xatboshi bilan toʻldirilsin:

“Ushbu qaror bilan tasdiqlangan Xorijiy fuqarolarning va fuqaroligi boʻlmagan shaxslarning Oʻzbekiston Respublikasida boʻlishlari qoidalarining 40-bandiga muvofiq xorijiy fuqaroga nisbatan Oʻzbekiston Respublikasiga kelish cheklangan boʻlsa, unga Oʻzbekiston Respublikasiga kelishi rad etiladi”.

2. 2-ilova (Xorijiy fuqarolarning va fuqaroligi boʻlmagan shaxslarning Oʻzbekiston Respublikasida boʻlishlari qoidalari)ning 40-bandi quyidagi tahrirda bayon qilinsin:

“40. Xorijiy fuqaro Oʻzbekiston Respublikasida boʻlish qoidalarini buzgan taqdirda, yaʼni Oʻzbekistonda yashash huquqini beruvchi hujjatlarsiz yoki haqiqiy boʻlmagan hujjatlar boʻyicha yashaganda, vaqtincha yoki doimiy roʻyxatdan oʻtishning, harakatlanish yoki yashash joyini tanlashning belgilangan tartibiga rioya qilinmaganda, boʻlish muddati tugagandan keyin chiqib ketishdan bosh tortganda, Oʻzbekiston Respublikasi hududi orqali tranzit oʻtish qoidalariga rioya qilmaganda, keyinchalik Oʻzbekiston Respublikasiga kelish huquqini bir yildan uch yil muddatgacha cheklangan holda Oʻzbekiston Respublikasidan chiqarib yuborilishi mumkin.

Xorijiy fuqaro Oʻzbekiston Respublikasi hududida sodir etilgan jinoyat uchun sud tomonidan tayinlangan jazoni ijro etgandan yoki oʻtagandan yoxud qonun hujjatlarida nazarda tutilgan hollarda jinoiy javobgarlikdan yoki jazodan ozod qilingandan soʻng, keyinchalik Oʻzbekiston Respublikasiga kelish huquqi cheklangan holda:

ijtimoiy xavfi katta boʻlmagan va uncha ogʻir boʻlmagan jinoyatlar sodir etganligi uchun — besh yilga;

ogʻir jinoyatlar sodir etganligi uchun — oʻn yilga;

oʻta ogʻir jinoyatlar sodir etganligi uchun — umrbod Oʻzbekiston Respublikasidan chiqarib yuboriladi

Xorijiy fuqaroga Oʻzbekiston Respublikasiga kelish huquqini cheklash muddati, u Oʻzbekiston Respublikasi hududidan chiqarib yuborilgan (Davlat chegarasini kesib oʻtish) paytdan boshlab hisoblanadi”.