O‘zbekiston Respublikasi Prezidentining “Byurokratik to‘siqlarni bartaraf etish va tadbirkorlik faoliyati erkinligini yanada oshirish chora-tadbirlari to‘g‘risida” 2011-yil 25-avgustdagi PQ-1604-son qarorini bajarish yuzasidan, shuningdek eksport operatsiyalarini amalga oshirish mexanizmini yanada soddalashtirish maqsadida Vazirlar Mahkamasi qaror qiladi:

1. 2011-yil 1-oktabrdan boshlab “bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmining bosqichma-bosqich joriy etilishi tajriba tariqasida ro‘yobga chiqarilishi ma’lumot uchun qabul qilinsin.

2. Quyidagilar:

“Bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmi to‘g‘risidagi Vaqtinchalik nizom 1-ilovaga muvofiq;

“Bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmi joriy etiladigan O‘zbekiston Respublikasi Davlat bojxona qo‘mitasining tashqi iqtisodiy faoliyat bojxona postlari ro‘yxati 2-ilovaga muvofiq tasdiqlansin.

3. O‘zbekiston Respublikasi Davlat bojxona qo‘mitasi bir vaqtning o‘zida, tovarlarning kelib chiqishi to‘g‘risidagi sertifikatni, veterinariya, fitosanitariya, sanitariya-epidemiologik xulosalarni berish va bojxonada rasmiylashtirish bilan birga, “bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmini joriy qilish uchun mas’ul organ etib belgilansin.

4. O‘zbekiston Respublikasi Tashqi savdo vazirligi, Qishloq va suv xo‘jaligi vazirligi, Sog‘liqni saqlash vazirligi, Markaziy banki tegishli sertifikatlarni berish uchun va “bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmi joriy etiladigan tashqi iqtisodiy faoliyat bojxona postlarida to‘lovlarni qabul qilish bo‘yicha vakolatli banklar bo‘limlari uchun kamida ikki nafar vakolatli vakilning faoliyat yuritishini ta’minlasinlar.

5. O‘zbekiston Respublikasi Tashqi savdo vazirligi, Qishloq va suv xo‘jaligi vazirligi, Sog‘liqni saqlash vazirligi, “O‘zstandart” agentligi, O‘zbekiston aloqa va axborotlashtirish agentligi Davlat bojxona qo‘mitasi bilan birgalikda 2012-yil 1-aprelgacha barcha xizmatlarning yagona elektron ma’lumotlar bazasi shakllantirilishini nazarda tutgan holda onlayn rejimida eksport operatsiyalarni bojxonada rasmiylashtirishning birxillashtirilgan tizimini joriy etish bo‘yicha zarur tayyorgarlik chora-tadbirlarini ko‘rsinlar.

6. O‘zbekiston Respublikasi Davlat bojxona qo‘mitasi “bir darcha” tamoyili bo‘yicha eksport operatsiyalarini rasmiylashtirish mexanizmini joriy etish natijalari to‘g‘risidagi tahliliy axborotni hamda tegishli qonun hujjatlari normalarini yanada takomillashtirish bo‘yicha takliflarni 2012-yil 1-martgacha bo‘lgan muddatda O‘zbekiston Respublikasi Vazirlar Mahkamasiga taqdim etsin.

7. O‘zbekiston Respublikasi Davlat bojxona qo‘mitasining barcha tashqi iqtisodiy faoliyat bojxona postlariga 2012-yil 1-apreldan boshlab onlayn rejimida elektron shakldagi hujjatlarni taqdim etgan holda “bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmi joriy etilsin.

8. O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Qishloq va suv xo‘jaligi vazirligi, Sog‘liqni saqlash vazirligi, Davlat bojxona qo‘mitasi, Adliya vazirligi, boshqa manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsinlar.

9. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. Mazkur Vaqtinchalik nizom bir vaqtning o‘zida, tovarlarning kelib chiqishi to‘g‘risidagi sertifikatni, veterinariya, fitosanitariya, sanitariya-epidemiologik xulosalarni berish va bojxonada rasmiylashtirish bilan birga, “bir darcha” tamoyili bo‘yicha eksportga yetkazib berishlar bilan bog‘liq tartibotlarni amalga oshirish mexanizmini belgilaydi.

Eksport tovarlarini sertifikatsiyalash va bojxonada rasmiylashtirish tartibotlaridan o‘tish sxemasi ushbu Vaqtinchalik nizomga 1-ilovada keltirilgan.

Ushbu Vaqtinchalik nizom qonun hujjatlarida belgilanadigan tovarlarning alohida toifalarini eksport qilish uchun qo‘shimcha ruxsatnoma hujjatlari (litsenziya, ruxsatnoma) olish bilan bog‘liq bo‘lgan eksport tartibotlarini amalga oshirish mexanizmiga joriy etilmaydi.

2. Mazkur Vaqtinchalik nizomda quyidagi tushunchalardan foydalaniladi:

“bir darcha” tamoyili — tovarlarning kelib chiqishi to‘g‘risidagi sertifikatni, veterinariya, fitosanitariya, sanitariya-epidemiologik xulosalarni berish va eksport qilinadigan tovarlarni bojxonada rasmiylashtirish (keyingi o‘rinlarda sertifikatsiyalash va bojxona rasmiylashtiruvi deb yuritiladi) uchun eksportga yetkazib berishlar bilan bog‘liq tartibotlarni amalga oshirishning soddalashtirilgan mexanizmi, bunda arizachi arizaning yagona shaklini to‘ldiradi va uni zarur hujjatlarni ilova qilgan holda “bir darcha” tamoyili bo‘yicha eksport tartibotlarini rasmiylashtirish joriy etiladigan tashqi iqtisodiy faoliyat bojxona postlarida (keyingi o‘rinlarda TIF bojxona postlari deb yuritiladi) faoliyat yurituvchi manfaatdor vazirliklar va idoralarning vakolatli vakillariga taqdim etadi;

arizachi — eksport qiluvchi va/yoki deklarant va/yoki bojxonada rasmiylashtirish mutaxassisi;

arizaning yagona shakli — sertifikatsiyalash va bojxonada rasmiylashtirish uchun hujjatlarni berishda arizachi tomonidan to‘ldiriladigan shakl.

3. Arizachi eksport qilinadigan tovarlarni sertifikatsiyalash va bojxonada rasmiylashtirish uchun ushbu Vaqtinchalik nizomga 2-ilovaga muvofiq yagona shakl bo‘yicha arizani to‘ldiradi.

4. TIF bojxona postlarida O‘zbekiston Respublikasi Veterinariya va chorvachilikni rivojlantirish davlat qo‘mitasi, O‘simliklar karantini va himoyasi agentligi, Sog‘liqni saqlash vazirligi, “O‘zbekekspertiza” AJ (keyingi o‘rinlarda vakolatli sertifikatsiya organlari deb ataladi) hamda O‘zbekiston Respublikasi Davlat bojxona qo‘mitasining vakillari doimiy ravishda faoliyat yuritadilar.

5. “Bir darcha” tamoyili bo‘yicha sertifikatsiyalash va bojxonada rasmiylashtirish ikki bosqichda amalga oshiriladi.

6. Birinchi bosqichda arizachi oladigan sertifikatning turiga qarab TIF bojxona postlaridagi vakolatli sertifikatsiya organlariga quyidagi hujjatlarni ilova qilgan holda yagona shakldagi arizani taqdim etadi:

a) tovarlarning kelib chiqishi to‘g‘risidagi sertifikatni olish uchun (O‘zbekiston Respublikasi “O‘zbekekspertiza” AJ):

eksport kontrakti nusxasi;

yuklanadigan tovarga schyot-faktura nusxasi;

eksport qilinadigan tovarni tayyorlovchi, ishlab chiqarishda foydalanilgan xom ashyoning kelib chiqishi va komponentlari (xom ashyo yetkazib berishga shartnomalar, schyot-fakturalar) to‘g‘risidagi ma’lumotlarni tasdiqlaydigan hujjatlarning nusxalari;

texnologik jarayonlarni tartibga soluvchi hujjatlarning nusxalari.

Tovarlar kelib chiqqan mamlakatni, ishlab chiqarish jarayonida foydalanilgan import qilingan komponentlar, xom ashyo-materiallar, butlovchi va ehtiyot qismlarni aniqlash bo‘yicha murojaat qilingan taqdirda — yuqorida ko‘rsatilgan hujjatlarga qo‘shimcha ravishda quyidagi hujjatlar taqdim etiladi:

Yukning bojxona deklaratsiyasi nusxasi;

materiallar va qo‘shilgan qiymatning foizdagi ulushini aniqlash uchun tovarning tannarxi hisob-kitobi;

tovar pozitsiyasining tovarni qayta ishlash natijasida yuzaga kelgan birinchi to‘rtta belgisidan biri darajasida TIF TN bo‘yicha o‘zgarishini asoslab berish;

sertifikatni rasmiylashtirish xizmatlari uchun to‘lovlar to‘g‘risidagi to‘lov hujjati;

b) veterinariya sertifikatini olish uchun (O‘zbekiston Respublikasi Veterinariya va chorvachilikni rivojlantirish davlat qo‘mitasi):

eksport qilishga O‘zbekiston Respublikasi Veterinariya va chorvachilikni rivojlantirish davlat qo‘mitasining ruxsatnomasi;

nazoratdagi yukni tranzit qilishga veterinariya ruxsatnomasi;

veterinariya guvohnomasi;

sertifikatni rasmiylashtirish xizmatlari uchun to‘lovlar to‘g‘risidagi to‘lov hujjati;

v) fitosanitariya sertifikatini olish uchun (O‘simliklar karantini va himoyasi agentligi):

import qiluvchi mamlakatning (alohida mamlakatlar uchun hukumatlararo bitimga asosan) import qilishga karantin ruxsatnomasi;

tranzitga ruxsatnoma (alohida mamlakatlar uchun);

fitosanitariya karantin sertifikati;

sertifikatni rasmiylashtirish xizmatlari uchun to‘lovlar to‘g‘risidagi to‘lov hujjati;

g) sanitariya-epidemiologiya xulosasini olish uchun (O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi) sertifikatni rasmiylashtirish xizmatlari uchun to‘lovlar to‘g‘risidagi to‘lov hujjati.

7. Vakolatli sertifikatsiya organlari vakillari:

taqdim etilgan hujjatlarning to‘liqligi va ularda uchraydigan nomuvofiqlikni aniqlash uchun ularni darhol ko‘rib chiqadilar;

taqdim etilgan hujjatlar belgilangan talablarga mos kelganda ularni qabul qiladilar;

kamchiliklar aniqlanganda arizachiga yagona shakldagi arizada kamchiliklarni ko‘rsatgan holda kamchiliklarni bartaraf etish uchun hujjatlarni qaytaradilar.

8. Vakolatli sertifikatsiya organlari vakillari ariza qabul qilingan kun mobaynida, eksport uchun mo‘ljallangan tovarlardan belgilangan tartibda namunalar oladilar va tovarlar namunalarini hamda hujjatlarni tegishli sinov laboratoriyalariga va/yoki vakolatli organlarga yuboradilar.

9. Eksportga mo‘ljallangan tovarlar uchun laboratoriya sinovlari, ekspertizadan o‘tkazish va tegishli sertifikatlar berish muddati, qishloq xo‘jaligi mahsulotlaridan tashqari, ko‘pi bilan 3 ish kunini tashkil etadi.

Qishloq xo‘jaligi mahsulotini eksport qilishda:

tovarning kelib chiqishi sertifikatini berish muddati 3 ish kunidan oshmaydi;

laboratoriya sinovlarini o‘tkazish va boshqa tegishli sertifikatlarni berish muddati 5 ish kunidan oshmaydi.

10. Laboratoriya sinovlari yakunlari bo‘yicha ijobiy natija olingan taqdirda vakolatli sertifikatsiya organlari vakillari bir ish kuni mobaynida arizachiga bevosita TIF bojxona postida tegishli sertifikatlarni beradilar.

11. Ikkinchi bosqichda arizachi eksport uchun mo‘ljallangan tovarlarni bojxonada rasmiylashtirish uchun davlat bojxona xizmati organlari xodimiga quyidagi hujjatlarni taqdim etadi:

yukning bojxona deklaratsiyasi, qonun hujjatlarida belgilangan tartibda yo‘lovchi bojxona deklaratsiyasini to‘ldirish yo‘li bilan tovarlarni deklaratsiyalash hollari bundan mustasno;

tovarlarga ilova qilinadigan hujjatlar, o‘rov varag‘i bundan mustasno.

12. Davlat bojxona xizmati organi xodimi:

taqdim etilgan hujjatlarning to‘liqligi va ularda uchraydigan nomuvofiqlikni aniqlash uchun ularni darhol ko‘rib chiqadi;

taqdim etilgan hujjatlar belgilangan talablarga mos kelganda ularni qabul qiladi;

kamchiliklar aniqlanganda arizachiga yagona shakldagi arizada kamchiliklarni ko‘rsatgan holda kamchiliklarni bartaraf etish uchun hujjatlarni qaytaradi.

14. Davlat bojxona xizmati organi xodimi eksport qilinadigan tovarlarning yuklab jo‘natishga tayyorligiga qarab, ularni va transport vositalarini bojxona tekshiruvidan o‘tkazadi, shuningdek eksport qilinadigan tovarlarni va transport vositalarining bojxona rasmiylashtiruvini bir ish kuni mobaynida amalga oshiradi.

15. Vakolatli sertifikatsiya organlari va davlat bojxona xizmati organlari tomonidan mazkur Vaqtinchalik nizomning 6 va 11-bandlarida ko‘rsatilmagan qo‘shimcha hujjatlarni talab qilish taqiqlanadi.

16. Hujjatlarni qayta ko‘rib chiqishda vakolatli sertifikatsiya organlari va davlat bojxona xizmati organlari tomonidan yagona shakldagi arizada ilgari bayon qilinmagan yangi e’tiroz bilan da’vo bildirilishiga yo‘l qo‘yilmaydi.

17. Arizachidan sertifikatsiya va bojxonada rasmiylashtirish hujjatlari vakolatli sertifikatsiya organlari hamda davlat bojxona xizmati organlari tomonidan butun ish kuni (soat 9:00 — 18:00) davomida qabul qilinadi.

18. Mazkur Vaqtinchalik nizomning buzilishida aybdor shaxslar qonun hujjatlariga muvofiq javob beradilar.