Oʻzbekiston Respublikasi Soliq kodeksiga (Oʻzbekiston Respublikasi qonun hujjatlari toʻplami, 2007-y., 52 (I)-son ), Oʻzbekiston Respublikasi “Chet el investitsiyalari toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 1998-y., 5-6-son, 91-modda), Oʻzbekiston Respublikasi Prezidentining 1997-yil 26-avgustdagi PF-1831-son “Xorijiy sarmoyalari boʻlgan korxonalar ishlab chiqaradigan mahsulot eksportini ragʻbatlantirishga oid qoʻshimcha chora-tadbirlar toʻgʻrisida”gi, 1997-yil 10-oktabrdagi PF-1871-son “Tovarlar (ishlar, xizmatlar) eksportini ragʻbatlantirishning qoʻshimcha chora-tadbirlari toʻgʻrisida”gi, 2000-yil 5-iyundagi PF-2613-son “Eksport mahsuloti ishlab chiqaruvchilarni ragʻbatlantirish borasidagi qoʻshimcha chora-tadbirlar toʻgʻrisida”gi (Oʻzbekiston Respublikasi Oliy Majlisining Axborotnomasi, 2000-y., 5-6-son, 174-modda) farmonlariga, Oʻzbekiston Respublikasi Prezidentining 2009-yil 22-dekabrdagi “Oʻzbekiston Respublikasining 2010-yilgi asosiy Makroiqtisodiy koʻrsatkichlari va Davlat budjeti parametrlari toʻgʻrisida”gi PQ-1245-son qaroriga (Oʻzbekiston Respublikasi qonun hujjatlari toʻplami, 2009-yil, 52-son, 560-modda), Oʻzbekiston Respublikasi Vazirlar Mahkamasining 2000-yil 29-iyundagi “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida”gi 245-son qaroriga (Oʻzbekiston Respublikasi Hukumati qarorlari toʻplami, 2000-y., № 6, 33-modda) muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladilar:

1. Erkin almashtiriladigan valyutaga eksport qilishda imtiyozlar va preferensiyalarni qoʻllash maqsadida oʻzi ishlab chiqargan tovarlarni (ishlarni, xizmatlarni) aniqlash qoidalari ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Qoidalar Oʻzbekiston Respublikasi Soliq kodeksining 32-moddasiga (Oʻzbekiston Respublikasi qonun hujjatlari toʻplami, 2007-y., 52 (I)-son ), Oʻzbekiston Respublikasi “Chet el investitsiyalari toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1998-y., 5-6-son, 91-modda) 12-moddasiga, Oʻzbekiston Respublikasi Prezidentining 1997-yil 26-avgustdagi PF-1831-son “Xorijiy sarmoyalari boʻlgan korxonalar ishlab chiqaradigan mahsulot eksportini ragʻbatlantirishga oid qoʻshimcha chora-tadbirlar toʻgʻrisida”gi, 1997-yil 10-oktabrdagi PF-1871-son “Tovarlar (ishlar, xizmatlar) eksportini ragʻbatlantirishning qoʻshimcha chora-tadbirlari toʻgʻrisida”gi, 2000-yil 5-iyundagi PF-2613-son “Eksport mahsuloti ishlab chiqaruvchilarni ragʻbatlantirish borasidagi qoʻshimcha chora-tadbirlar toʻgʻrisida”gi (Oʻzbekiston Respublikasi Oliy Majlisining Axborotnomasi, 2000-y., 5-6-son, 174-modda) farmonlariga, Oʻzbekiston Respublikasi Prezidentining 2009-yil 22-dekabrdagi “Oʻzbekiston Respublikasining 2010-yilgi asosiy Makroiqtisodiy koʻrsatkichlari va Davlat budjeti parametrlari toʻgʻrisida”gi PQ-1245-son qaroriga (Oʻzbekiston Respublikasi qonun hujjatlari toʻplami, 2009-yil, 52-son, 560-modda), Oʻzbekiston Respublikasi Vazirlar Mahkamasining 2000-yil 29-iyundagi “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida”gi 245-son qaroriga (Oʻzbekiston Respublikasi Hukumati qarorlari toʻplami, 2000-y., № 6, 33-modda) muvofiq, oʻzi ishlab chiqargan tovarlarni (ishlarni, xizmatlarni) erkin almashtiriladigan valyutaga eksport qilishda qonun hujjatlarida belgilangan imtiyozlar va preferensiyalarni qoʻllash uchun oʻzi ishlab chiqargan tovarlarni (ishlarni, xizmatlarni) aniqlash qoidalarini belgilaydi.

1. Ushbu Qoidalarda quyidagi asosiy tushunchalar qoʻllaniladi:

tovarlarni eksport qilish — Oʻzbekiston Respublikasining bojxona hududidan tovarlarni, agar qonun hujjatlarida boshqacha qoida nazarda tutilmagan boʻlsa, qayta olib kirish majburiyatisiz olib chiqish;

ishlarni (xizmatlarni) eksport qilish — ishlarni bajarish (xizmatlar koʻrsatish) joyidan qatʼi nazar, Oʻzbekiston Respublikasining yuridik yoki jismoniy shaxsi tomonidan chet davlatning yuridik yoki jismoniy shaxsi uchun ishlarni bajarish, xizmatlar koʻrsatish.

2. Tovarlarning eksport qilinganligini tasdiqlovchi hujjatlar quyidagilardir:

kontrakt (kontraktning belgilangan tartibda tasdiqlangan koʻchirma nusxasi);

tovarlarni eksport qilish rejimiga chiqarishni amalga oshiruvchi bojxona organining belgi qoʻyilgan bojxona yuk deklaratsiyasi;

Oʻzbekiston Respublikasining bojxona hududidan oʻtkazish punktida joylashgan bojxona organining tovarlar tayin etilgan mamlakatga joʻnatilganligini tasdiqlovchi qayd belgisi qoʻyilgan tovarga ilova qilinadigan hujjatlar.

3. Ishlar va xizmatlar eksport qilinganligi fakti hisobvaraq-faktura yoxud belgilangan tartibda rasmiylashtirilgan bajarilgan ishlar dalolatnomasi bilan tasdiqlanadi.

4. Tovarlar eksportga vositachi (ishonchli vakil) orqali vositachilik (topshiriq) shartnomasi boʻyicha realizatsiya qilinganda eksportni tasdiqlash uchun komitent (topshiriq beruvchi) tomonidan quyidagi hujjatlar taqdim etiladi:

soliq toʻlovchi bilan vositachi yoki ishonchli vakil oʻrtasidagi vositachilik shartnomasi yoki topshiriq shartnomasi (shartnomaning koʻchirma nusxasi);

soliq toʻlovchining topshirigʻiga koʻra (vositachilik shartnomasi yoki topshiriq shartnomasiga muvofiq) eksportga tovarlar yetkazib berishni amalga oshirayotgan shaxsning tovarlarni Oʻzbekiston Respublikasi bojxona hududidan tashqariga yetkazib berish uchun chet ellik shaxs bilan tuzilgan kontrakti (kontraktning belgilangan tartibda tasdiqlangan koʻchirma nusxasi);

tovarlarni eksport rejimiga chiqarishni amalga oshiruvchi bojxona organining belgisi qoʻyilgan bojxona yuk deklaratsiyasining koʻchirma nusxasi.

5. Oʻzi ishlab chiqargan tovar deganda korxona oʻzi tomonidan ishlab chiqarish texnologik jarayonini hisobga olgan holda, ishlab chiqarish quvvatlaridan foydalanib ishlab chiqarilgan yoki qayta ishlangan mahsulot (jumladan yarim tayyor mahsulot) tushuniladi.

Oʻzi ishlab chiqargan ish (xizmat) deganda korxona tomonidan oʻz kuchi bilan bajarilgan (koʻrsatilgan) ish (xizmat) tushuniladi.

6. Quyidagilar ishlab chiqarish texnologik jarayoni boʻlib hisoblanmaydi:

saqlash yoki transportda tashish vaqtida tovarlarning saqlanishini taʼminlash boʻyicha operatsiyalar;

tovarlarni sotish va transportda tashishga tayyorlash boʻyicha operatsiyalar (tovar turkumini maydalash, tovarlarni joʻnatishni tashkil qilish, saralash, qaytadan oʻrash, qadoqlash).

7. Oʻzi ishlab chiqargan mahsulot toifasiga mansubligi faktini tasdiqlash uchun ariza beruvchi korxona davlat soliq xizmati organlariga va boshqa vakolatli organlarga ushbu Qoidalarga ilova qilingan shakl boʻyicha Ariza-maʼlumotnoma taqdim etadi.

8. Ariza-maʼlumotnoma tuzilgan kontrakt doirasida tayyor mahsulot (xizmatlar koʻrsatishda (ishlar bajarishda) — haqiqatda koʻrsatilgan xizmatlar (bajarilgan ishlar hajmiga) hajmiga (miqdoriga) beriladi.

9. Ariza-maʼlumotnomada koʻrsatilgan maʼlumotlarning ishonchliligi uchun ariza beruvchi korxona javobgardir.

10. Ushbu Qoidalarning 2, 3 va 4-bandlarida koʻrsatilgan hujjatlar belgilangan tartibda oʻtkazilayotgan tekshiruv paytida davlat soliq xizmati organlarining talablariga koʻra taqdim etiladi.

11. Ushbu Qoidalar Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan kelishilgan.