2003-yil boshoqli don ekinlari hosilini yigʻishtirib olishni uyushqoqlik bilan, sifatli va qisqa muddatlarda oʻtkazish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi, “Oʻzdonmahsulot” davlat-aksiyadorlik korporatsiyasi, “Oʻzqishloqxoʻjalikmash-xolding” kompaniyasi, “Oʻzagromashservis” uyushmasi, Qoraqalpogʻiston Respublikasi Vazirlar Kengashi, viloyatlar hokimliklarining:

joriy yilning 15-mayigacha don xirmonlari va maydonchalari, don tozalash qurilmalari va donni dastlabki qayta ishlash boʻyicha boshqa vositalar, shuningdek boshoqli don ekinlari hosilini qabul qilib olish uchun don qabul qilish punktlari va elevatorlar tayyorlab qoʻyilganligi;

joriy yilning 25-mayigacha taʼmirlash ishlari, don oʻrish kombaynlari, don tashish uchun transport vositalari tayyorlab qoʻyilishi, hosilni yigʻishtirib olishga gʻalla oʻrish kombaynlari toʻliq jalb qilinishi, birinchi navbatda, hosil oʻrim-yigʻimida yuqori unumli “Keys”, “Klaas” va “Nyu-Xolland” kombaynlarining qatnashishi;

donning xoʻjaliklar tomonidan tayyorlov punktlariga albatta dastlab tozalangan, iflosligi va namligi standart normativlardan ortiq boʻlmagan holda yetkazib berilishi taʼminlanishi toʻgʻrisidagi axboroti maʼlumot uchun qabul qilinsin.

2. 2003-yil don hosilini oʻz vaqtida va sifatli yigʻishtirib olishni tashkil etish va amalga oshirish uchun shaxsiy javobgarlik Qoraqalpogʻiston Respublikasi Vazirlar Kengashi Raisi, viloyatlar hokimlari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi, uning hududiy birlashmalari va mashina-traktor parklari rahbarlari zimmasiga yuklansin.

4. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi donni kombaynlardan xirmonlargacha va don qabul qilish punktlarigacha tashish uchun yuk avtomobillari, tirkamali transport traktorlari ishga solinishini taʼminlasinlar, shuningdek umumiy foydalanishdagi avtokorxonalardan va boshqa tashkilotlardan transport vositalarini 1-ilovaga muvofiq shartnoma asosida jalb etsinlar.

Zarurat boʻlganda don tashishga Oʻzbekiston Respublikasi Mudofaa vazirligi hamda boshqa vazirliklar va idoralar avtotransporti shartnoma asosida jalb etilsin.

Belgilab qoʻyilsinki, donni don qabul qilish punktlariga tashish boʻyicha transport xarajatlari “Oʻzdonmahsulot” davlat-aksiyadorlik korporatsiyasi tomonidan toʻlanadi.

5. “Oʻzagromashservis” uyushmasi boshoqli don ekinlari yangi hosilini yigʻishtirib olish uchun qishloq xoʻjaligi texnikasining yuqori darajada tayyorlanishini taʼminlasin hamda zarurat boʻlganda tuzilgan shartnomalar asosida viloyatlar oʻrtasida gʻalla oʻrim-yigʻim texnikasini ekipajlari bilan birga qayta taqsimlasin.

6. 2003-yil boshoqli don ekinlari hosilini oʻz vaqtida va sifatli yigʻishtirib olishga koʻmaklashish uchun 2-ilovaga muvofiq tarkibda Ishchi komissiya tuzilsin, unga joylarga borib qishloq xoʻjaligi texnikasini oʻz vaqtida tayyorlash va resurslarni qayta taqsimlash masalalarini tezkorlik bilan hal etish huquqi berilsin.

7. 2003-yil boshoqli don ekinlari hosilini yigʻishtirib olish davrida yoʻllarda harakatlanish xavfsizligini taʼminlash, yongʻinlar kelib chiqishining oldini olish hamda donning talon-toroj qilinishi va nobud boʻlishiga yoʻl qoʻymaslik maqsadida:

Oʻzbekiston Respublikasi Ichki ishlar vazirligi joriy yilning 1-iyunidan boshlab Ichki ishlar vazirligi taʼlim muassasalarining tinglovchilari va kursantlarini 3-ilovaga muvofiq viloyatlar ichki ishlar boshqarmalari ixtiyoriga yuborsin;

“Oʻzbekiston temir yoʻllari” davlat-aksiyadorlik kompaniyasi, “Toshshaharyoʻlovchitrans” davlat uyushmasi Ichki ishlar vazirligi buyurtmanomalari boʻyicha tinglovchilar va kursantlarni vaqtincha boʻlish joyiga olib borish hamda hosil yigʻishtirib olingandan keyin ularni qaytarib olib kelish uchun zarur miqdordagi transport vositalari ajratilishini taʼminlasinlar. Tinglovchilar va kursantlarni tashish bilan bogʻliq transport xarajatlari “Oʻzbekiston temir yoʻllari” davlat-aksiyadorlik kompaniyasi va “Toshshaharyoʻlovchitrans” davlat uyushmasi mablagʻlari hisobidan qoplanadi;

Jizzax, Qashqadaryo, Samarqand, Sirdaryo va Toshkent viloyatlari hokimliklari tinglovchilar va kursantlarni vaqtincha yashash joylari, oziq-ovqat, ularni tashish uchun transport va yonilgʻi-moylash materiallari bilan gʻallakor xoʻjaliklar mablagʻlari hisobidan taʼminlasinlar.

8. “Oʻzbekneftgaz” milliy xolding kompaniyasi hosilni yigʻishtirib olish davrida xoʻjaliklarga, mashina-traktor parklariga hamda hosilni yigʻishtirib olish va tashish bilan band boʻlgan boshqa tashkilotlarga yonilgʻi-moylash materiallari ular qiymatining 15 foizi oldindan toʻlangandan keyin belgilangan limitlar doirasida uzluksiz berilishini taʼminlasin.

9. “Oʻzbekiston temir yoʻllari” davlat-aksiyadorlik kompaniyasi Oʻzbekiston Respublikasi Moliya vazirligi, “Oʻzdonmahsulot” davlat-aksiyadorlik korporatsiyasi bilan kelishgan holda yangi hosilni yigʻishtirib olish davrida don tashishga imtiyozli tariflarni qoʻllashni nazarda tutsin, uning qiymati oshib ketishiga yoʻl qoʻymasin.

10. Oʻzbekiston Respublikasi Statistika davlat qoʻmitasi xoʻjaliklar tomonidan don sotish toʻgʻrisidagi statistika hisobotlarining toʻgʻriligini don qabul qilib olish korxonalari boʻyicha muntazam ravishda tekshirib borsin, hisobotni buzib koʻrsatishning aniqlangan hollari toʻgʻrisida tezkorlik bilan Vazirlar Mahkamasiga axborot bersin.

11. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari N.S. Yusupov zimmasiga yuklansin.