Respublika aholisining yuqori sifatli oziq-ovqat mahsulotlariga boʻlgan ehtiyojini yanada toʻliq qondirish, eksportbop va importning oʻrnini bosadigan mahsulotlar ishlab chiqarishni koʻpaytirish maqsadida Vazirlar Mahkamasi qaror qiladi:

1. “Oʻzgoʻshtsutsanoat” uyushmasiga qarashli “Nafosat” ochiq turdagi aksiyadorlik jamiyati (Namangan shahri)ning “Nestle S.A.” (Shveysariya) kompaniyasi bilan birgalikda masʼuliyati cheklangan jamiyat shaklidagi “Nestle Oʻzbekiston” Oʻzbekiston-Shveysariya qoʻshma korxonasini tashkil etish toʻgʻrisidagi taklifiga rozilik berilsin.

2. “Nestle Oʻzbekiston” qoʻshma korxonasi ustav jamgʻarmasining 7,0 mln AQSH dollarini tashkil etishi maʼlumot uchun qabul qilinsin, ulardan:

pul mablagʻlari, asbob-uskunalar va aylanma sarmoya (xom ashyo, materiallar va tayyor mahsulotlar) tarzida qoʻshiladigan 80 foizi yoki 5,6 mln AQSH dollari — “Nestle S.A.” kompaniyasiga tegishlidir. Bunda tayyor mahsulot tarzida qoʻshiladigan ulush moʻljaldagi investitsiyalar umumiy hajmining 10 foizidan oshib ketmaydi;

asosiy va aylanma mablagʻlar (shu jumladan yerlardan foydalanish huquqi) tarzida qoʻshiladigan 20 foizi yoki 1,4 mln AQSH dollari — “Nafosat” ochiq turdagi aksiyadorlik jamiyatiga tegishlidir.

3. Qurilishga va yangi zavodni jihozlashga, shuningdek xalqaro standartlarga muvofiq bolalar oziq-ovqat mahsulotlari hamda boshqa xil mahsulotlar ishlab chiqarishni tashkil etish maqsadida ishlab turgan quvvatlarni rekonstruksiya qilishga yoʻnaltiriladigan 30,0 mln AQSH dollarini 6 yil mobaynida respublika iqtisodiyotiga investitsiyalashni nazarda tutuvchi “Nestle S.A.” kompaniyasining investitsiya dasturi maʼqullansin (ilova).

Investitsiya dasturining amalga oshirilishi natijasida “Nestle Oʻzbekiston” qoʻshma korxonasining ustav jamgʻarmasi foydani qayta investitsiyalash yoʻli bilan qoʻshiladigan mablagʻlarga va loyiha qatnashchilarining qoʻshimcha investitsiyalariga mutanosib ravishda oʻzgartiriladi.

4. Oʻzbekiston Respublikasi Davlat mulki qoʻmitasi “Nafosat” ochiq turdagi aksiyadorlik jamiyati tomonidan umumiy qiymati 1,4 mln AQSH dollariga teng miqdordagi asosiy va aylanma mablagʻlarning (shu jumladan yerlardan foydalanish huquqining) “Nestle Oʻzbekiston” qoʻshma korxonasi ustav jamgʻarmasiga berilishini belgilangan tartibda rasmiylashtirsin.

5. “Nestle Oʻzbekiston” qoʻshma korxonasi ustav jamgʻarmasiga ulush qoʻshish uchun hamda “Nestle S.A.” kompaniyasining investitsiya dasturini roʻyobga chiqarish doirasida keltiriladigan asbob-uskunalar, xom ashyo, materiallar, ehtiyot qismlar va tarkibiy qismlar uchun bojxona toʻlovlaridan (bojxona rasmiylashtirishi uchun yigʻimlar bundan mustasno) ozod qilinsin.

6. “Nestle S.A.” kompaniyasi “Nestle Oʻzbekiston” qoʻshma korxonasi faoliyatida qatnashishdan olingan daromadlar boʻyicha daromad (foyda) soligʻi toʻlashdan 6 yil muddatga ozod qilinsin.

7. “Nestle Oʻzbekiston” qoʻshma korxonasiga:

Oʻzbekiston Respublikasida ham, chet ellarda ham istalgan sugʻurta tashkilotlarida sugʻurtalashni amalga oshirish;

qoʻshma korxonaning xorijiy xodimlari bilan, chet el valyutasini ularning Oʻzbekiston Respublikasi tashqarisidagi valyuta hisobvaraqlariga oʻtkazish yoʻli bilan chet el valyutasida ish haqi toʻlagan holda, mehnat shartnomalari tuzish;

tayyor mahsulotning sifatini va muvofiqligini aniqlash boʻyicha laboratoriya sinovlarini bajarish uchun zarur boʻlgan kimyoviy vositalar hamda reagentlarni belgilangan tartibda import qilish;

Qonunchilikda belgilangan tartibda naqd mablagʻlarga fermer, dehqon xoʻjaliklaridan va jismoniy shaxslardan mustaqil ravishda sut xarid qilish huquqi berilsin.

8. Oʻzbekiston Respublikasi Tashqi iqtisodiy aloqalar vazirligi “Nestle Oʻzbekiston” qoʻshma korxonasi va “Sosyete de Prodyui Nestle S.A.” kompaniyasi oʻrtasidagi bosh litsenziya bitimini belgilangan tartibda roʻyxatdan oʻtkazsin.

9. Namangan viloyati hokimligi:

“Nestle Oʻzbekiston” qoʻshma korxonasini korxonaning ishlab chiqarish maqsadlari uchun zarur miqdorda xom ashyo bilan taʼminlashda yordam koʻrsatsin;

“Nestle Oʻzbekiston” qoʻshma korxonasini mahalliy hokimiyat organlari tomonidan joriy etilgan mahalliy soliqlar va yigʻimlarning barcha turlaridan roʻyxatdan oʻtkazilgan vaqtidan boshlab 6 yil muddatga ozod qilsin.

10. Oʻzbekiston Respublikasi Mehnat vazirligi “Nestle Oʻzbekiston” qoʻshma korxonasi buyurtmanomalariga binoan loyihani amalga oshirishga jalb etiladigan xorijiy xodimlarning ishlashi uchun ruxsatnomalarning belgilangan tartibda berilishini taʼminlasin.

11. Oʻzbekiston Respublikasi Tashqi ishlar vazirligi “Nestle Oʻzbekiston” qoʻshma korxonasi buyurtmanomalariga binoan loyihani ishlab chiqish va amalga oshirishda qatnashuvchi xorijiy mutaxassislarga, ularni konsullik yigʻimlari toʻlashdan ozod qilgan holda, kelish vizalarining belgilangan tartibda rasmiylashtirilishini taʼminlasin.

12. Oʻzbekiston Respublikasi Ichki ishlar vazirligi “Nestle Oʻzbekiston” qoʻshma korxonasi buyurtmanomalariga binoan loyihani ishlab chiqish va amalga oshirishda qatnashuvchi xorijiy mutaxassislarga, ularni davlat bojlari toʻlashdan ozod qilgan holda, koʻp martalik kelish vizalari berishni va vizalarning muddatini uzaytirishni, shuningdek ularni vaqtinchalik roʻyxatdan oʻtkazishni va vaqtinchalik roʻyxatdan oʻtkazish muddatini uzaytirishni belgilangan tartibda taʼminlasin.

13. “Nestle Oʻzbekiston” qoʻshma korxonasida ishlash uchun kelishayotgan xorijiy mutaxassislarga respublika hududida yashash va transportda yurish uchun Oʻzbekiston Respublikasi fuqarolari uchun nazarda tutilgan tariflar boʻyicha milliy valyutada haq toʻlash huquqi berilsin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.