Joriy 1996-yilda yetishtirilgan meva-sabzavot mahsulotlari hosili nobudgarchiligiga yoʻl qoʻymaslik, uni isteʼmolchilarga sotishni jadallashtirish maqsadida Vazirlar Mahkamasi qaror qiladi:

1. Meva-sabzavot mahsulotlarini respublika tashqarisiga sotishning tashkiliy-huquqiy va operativ masalalarini koʻrib chiqish boʻyicha respublika komissiyasi 1-ilovaga muvofiq tarkibda tuzilsin.

Komissiya meva-sabzavot mahsulotlari sotishning borishini muntazam tahlil etib borsin va paydo boʻladigan muammolarni bartaraf etish chora-tadbirlarini koʻrsin.

2. “Oʻzmevasabzavotuzumsanoat”, “Oʻztayyorlovsavdo” uyushmalari, Oʻzbekbirlashuv va Oʻzbekiston Respublikasi Qishloq xoʻjaligi vazirligining yuklab joʻnatiladigan mahsulotlar hajmi boʻyicha takliflariga 2-ilovaga muvofiq rozilik berilsin.

3. Qoraqalpogʻiston Respublikasi Vazirlar Kengashi, viloyatlar va tumanlar hokimliklari, “Oʻzmevasabzavotuzumsanoat” (Nosirov) va “Oʻztayyorlovsavdo” (Qurbonov) uyushmalari, Oʻzbekbirlashuv (Burxonov) va Oʻzbekiston Respublikasi Qishloq xoʻjaligi vazirligi (Jumaniyozov) hoʻl meva-sabzavot mahsulotlarini Rossiya Federatsiyasi isteʼmolchilariga yetkazib berish yuzasidan shartnoma-kontraktlarning barter boʻyicha moddiy-texnika resurslarini, birinchi navbatda yogʻoch-taxta materiallar, metall prokati, quvurlar, avtotransport vositalari va qishloq xoʻjaligi texnikasini oʻzaro yetkazib berish shartlari bilan tuzilishini taʼminlasinlar.

4. Qoraqalpogʻiston Respublikasi Vazirlar Kengashi, viloyatlar va tumanlar hokimliklari, tegishli vazirliklar, idoralar, uyushmalar va korxonalar rahbarlari hoʻl meva-sabzavot va konserva mahsulotlarini Rossiya Federatsiyasi isteʼmolchilariga viloyatlar maʼmuriyatlarining yetkazib berilayotgan mahsulot uchun 1996-yil oxirigacha pul bilan yoki moddiy-texnika resurslari bilan haq toʻlash toʻgʻrisida kafolat xatlari mavjud boʻlgan taqdirda joʻnatsinlar.

5. Mahsulot sotilgandan keyin valyuta tushumining bir qismini, istisno tariqasida, Markaziy bankka, biroq 1996-yil 31-dekabrdan kechikmay, majburan sotishga ruxsat berilsin.

6. Toshkent, Samarqand, Fargʻona, Namangan, Andijon, Surxondaryo, Sirdaryo, Jizzax, Qashqadaryo, Buxoro viloyatlari hokimlari, tegishli vazirliklar, idoralar, uyushmalar va korxonalarning rahbarlari meva-sabzavot mahsulotlari yetkazib berish yuzasidan bitimlar tuzish uchun Rossiya Federatsiyasi mintaqalariga shaxsan oʻzlari borsinlar.

7. “Oʻzdavstandart” (Asriyans), Oʻsimliklar karantini boʻyicha davlat nazorati (Toʻlaganov), Davlat soliq qoʻmitasi (Gataulin), vakolatli banklar, “Oʻzbekiston temir yoʻllari” kompaniyasi (Ermetov) hoʻl meva-sabzavot mahsulotlari joʻnatuvchi joylashgan joyda yuklab joʻnatish hujjatlari ikki sutkadan koʻp boʻlmagan muddatda belgilangan tartibda rasmiylashtirilishini taʼminlasinlar, ushbu ishda sansalorlikka va sunʼiy toʻsiqlar vujudga keltirilishiga yoʻl qoʻymasinlar.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

hoʻl meva-sabzavot va konserva mahsulotlarini tuzilgan kontraktlar boʻyicha yuklab joʻnatish masalalarini tezkorlik bilan hal etsinlar;

joylarda zarur hujjatlarni tezlikda rasmiylashtirish va meva-sabzavot mahsulotlarini yuklab joʻnatish boʻyicha tayanch punktlari tashkil etsinlar.

9. “Oʻzbekiston temir yoʻllari” kompaniyasi raisi N. Ermetovning:

hoʻl meva-sabzavot mahsulotlarini temir yoʻlda tashish tariflari Qozogʻiston Respublikasi hududi boʻyicha 1996-yil 31-dekabrgacha, Rossiya Federatsiyasi hududi boʻyicha (Moskvagacha) 1996-yil 1-noyabrgacha 50 foizga pasaytirilganligi;

Rossiya Federatsiyasining boshqa yoʻnalishlari boʻyicha temir yoʻlda tashish tariflarining pasaytirilishi toʻgʻrisidagi masala “Oʻzbekiston temir yoʻllari” kompaniyasi tomonidan meva-sabzavot mahsulotlari yetkazib berishga kontraktlar mavjud boʻlgan taqdirda har bir aniq holatda Rossiya Temir yoʻllar vazirligi bilan birgalikda hal etilishi toʻgʻrisidagi axboroti maʼlumot uchun qabul qilinsin.

10. “Oʻzbekiston temir yoʻllari” kompaniyasi (Ermetov):

Oʻzbekiston Respublikasi hududida hoʻl meva-sabzavot va konserva mahsulotlarini tashish tariflarini 50 foizga pasaytirsin;

yukni joʻnatuvchining tashishning toʻliq qiymatini belgilangan muddatlarda toʻlash toʻgʻrisidagi kafolati bilan oldindan haq toʻlanmasdan yukka harakatdagi sostavning oʻz vaqtida ajratilishi va berilishini taʼminlasin.

11. Vazirlar Mahkamasining 1996-yil 6-avgustdagi 323-f-son farmoyishi oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R. Giniyatullin zimmasiga yuklansin.