Respublika aholisining boʻsh naqd pul mablagʻlarini jalb etish va pul muomalasini mustahkamlash maqsadida Vazirlar Mahkamasi qaror qiladi:

1. Moliya vazirligi, Markaziy bank, “Oʻzjamgʻarmabank”, “Oʻzbeksavdo” va Oʻzbekbirlashuvning 1994-yilda 200 mln soʻmlik miqdordagi “Sovgʻa” pul-buyum lotereyasini chiqarish va oʻtkazish toʻgʻrisidagi taklifi qabul qilinsin.

Lotereya boʻyicha yutuqlar summasi 140 mln soʻmni yoki chiqarilgan lotereya umumiy summasining 70 foizini tashkil qiladi.

2. 1994-yilda “Sovgʻa” pul-buyum lotereyasini oʻtkazish shartlari va tartibi 1-ilovaga muvofiq tasdiqlansin.

3. Belgilab qoʻyilsinki, lotereya biletlarini sotish “Oʻzjamgʻarmabank”, Aloqa vazirligi, “Oʻzbeksavdo”, Oʻzbekbirlashuv muassasalarida hamda ushbu maqsadlar uchun shartnoma asosida jalb etilgan shaxslar orqali, qatʼiy ixtiyoriylik asosida, naqd pulga amalga oshiriladi.

“Sovgʻa” pul -buyum lotereyasi respublika hududida 2-ilovaga muvofiq taqsimlansin.

4. Vakillar etib quyidagilar belgilansin:

lotereya biletlarini qabul qilib olish, saqlash va yutuqlarni toʻlash boʻyicha — “Oʻzjamgʻarmabank” muassasalari;

lotereya biletlarini “Oʻzjamgʻarmabank” muassasalariga hamda biletlarni tarqatuvchi tashkilotlarga yetkazib berish boʻyicha — Oʻzbekiston Respublikasi Markaziy banki va “Oʻzjamgʻarmabank”.

5. Belgilab qoʻyilsinki, yutuqlarni berish va joʻnatish Oʻzbekbirlashuvning “Matlubotchi” universal savdo-aksionerlik jamiyati tomonidan, “Oʻzjamgʻarmabank” topshiriqnomalariga binoan, topshiriqnoma olingandan keyin 15 kun mobaynida amalga oshiriladi.

6. Davlat konsernlari, uyushmalar, korxonalar va tashkilotlar “Oʻzbeksavdo” va Oʻzbekbirlashuvga 3-ilovaga muvofiq miqdordagi va turdagi zarur tovarlarni sotsinlar hamda ular Oʻzbekbirlashuvning “Matlubotchi” universal savdo-aksionerlik jamiyatiga oʻz vaqtida yetkazib berilishini taʼminlasinlar.

7. Markaziy bank Oʻzbekiston Respublikasi Moliya vazirligi bilan birgalikda lotereya biletlarini tayyorlashni taʼminlasin.

8. “Oʻzjamgʻarmabank”, “Oʻzbeksavdo”, Oʻzbekbirlashuv, Oʻzbekiston Respublikasi Aloqa vazirligi, “Oʻzdavteleradio”, OʻzA, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

aholi oʻrtasida lotereya biletlarini sotish boʻyicha keng reklama ishlarini tashkil etsinlar;

lotereya biletlarini sotishning borishi, biletlarni sotishdan tushgan pullarning oʻz vaqtida topshirilishi va yutuqlarning berilishi ustidan doimiy nazorat oʻrnatsinlar.

9. Belgilab qoʻyilsinki:

lotereya biletlarini shartnomaviy asosda sotuvchi shaxslarga sotilgan biletlar summasining ikki foizi miqdorida mukofot toʻlanadi;

lotereya chiqarishdan olingan mablagʻlar (lotereyani oʻtkazish bilan bogʻliq boʻlgan barcha xarajatlarni chegirgan holda) quyidagicha taqsimlanadi:

40 foizi — respublika budjeti daromadiga;

15 foizi — Markaziy bank hisob schyotiga;

15 foizi — “Oʻzjamgʻarmabank” hisob schyotiga;

15 foizi — “Oʻzbeksavdo” hisob schyotiga;

15 foizi — Oʻzbekbirlashuv hisob schyotiga.

10. Lotereya biletlarini sotishdan tushgan mablagʻlar “Oʻzjamgʻarmabank” muassasalarining maxsus schyotida toʻplanadi. Lotereya boʻyicha yutuqlarni toʻlash, shuningdek lotereyani chiqarish bilan bogʻliq boʻlgan boshqa xarajatlar ushbu schyotdan amalga oshiriladi.

11. Mazkur qarorning bajarilishini nazorat qilish Bosh vazirning oʻrinbosarlari B.S. Hamidov va M.Z. Usmonov zimmasiga yuklansin.

1 “Sovgʻa” pul-buyum lotereyasi (keyingi oʻrinlarda lotereya deb ataladi) respublika aholisining naqd pul mablagʻlarini jalb etish maqsadida chiqariladi.

2. Moliya vazirligi, Markaziy bank, “Oʻzjamgʻarmabank”, “Oʻzbeksavdo” va Oʻzbekbirlashuv lotereyaning muassislari hisoblanadilar.

3. Lotereya 200000000 (ikki yuz million) soʻmlik miqdorda chiqariladi. Mana shu miqdordagi summaga nominal qiymati 10 soʻm boʻlgan 20000000 (yigirma million) dona lotereya bileti chiqariladi.

Lotereya biletlari har biri 5000000 (besh million) soʻmlik boʻlgan 40 ta alohida razryadlarga boʻlinadi.

Lotereyaning har bir razryadi 000001 dan 005000 gacha tartib raqamiga ega boʻlgan 5000 seriyadan iborat boʻladi.

Har bir seriya 001 dan 100 gacha tartib raqamiga ega boʻlgan 100 biletdan iborat boʻladi.

4. Lotereyaning yutuqlari tiraji 1994-yil 28-29-dekabrda Toshkent shahrida oʻtkaziladi.

5. Lotereyaning yutuqlari miqdori 140000000 (bir yuz qirq million) soʻmni yoki lotereyani chiqarish umumiy summasining 70 foizini tashkil etadi.

Lotereyaning 40 razryadi boʻyicha tirajda umumiy miqdori 140000000 million soʻmlik 2476000 (ikki million toʻrt yuz yetmish olti ming) yutuq, shu jumladan, 116121200 (bir yuz oʻn olti million bir yuz yigirma bir ming ikki yuz) soʻmlik 88120 (sakson sakkiz ming bir yuz yigirma) buyum yutuqlari va 23878800 (yigirma uch million sakkiz yuz yetmish sakkiz ming sakkiz yuz) soʻmlik 2387880 (ikki million uch yuz sakson yetti ming sakkiz yuz sakson) pul yutuqlari oʻynaladi (ilova qilinmoqda).

6. Lotereya biletlari Oʻzbekiston Respublikasi hududida “Oʻzjamgʻarmabank” muassasalari, Oʻzbekiston Respublikasi Aloqa vazirligining aloqa boʻlimlari, savdo va mutlubot kooperatsiyasi korxonalari hamda shu maqsadlar uchun shartnoma asosida jalb etilgan shaxslar tomonidan sotiladi.

7. Lotoreya biletlari 12x7 santimetr oʻlchamli toʻgʻri burchak shaklida boʻlib, davlat belgisi qoʻyilgan qogʻozdan tayyorlanadi. Lotereya biletining old tomonida Oʻzbekiston Respublikasi Davlat gerbi tasviri; “Oʻzbekiston Respublikasining “Sovgʻa” pul-buyum lotereyasi, “Lotereya bileti”, “Oʻzbekiston Respublikasi Moliya vazirligi”, Oʻzbekiston Respublikasi Markaziy banki, “Oʻzjamgʻarmabank”, “Oʻzbeksavdo”, Oʻzbekbirlashuv” degan yozuvlar; “Turkiston” konsert zalining tasviri; “Biletning bahosi 10 soʻm” degan yozuv; razryad, seriya, bilet tartib raqamlari; yutuqlar tiraji oʻtkaziladigan oy va kun hamda joy qayd etilgan boʻladi. Lotereya biletining orqa tomonida lotereyani oʻtkazish shartlari bayon qilinadi hamda “Yangi yilda Sizga omad tilaymiz” soʻzlari yozilgan boʻladi. Barcha yozuvlar oʻzbek tilida ifodalanadi.

8. Qabul qilish, saqlash, hisobga olish va pul yutuqlarini toʻlash “Oʻzjamgʻarmabank” tomonidan amalga oshiriladi.

9. Buyum yutuqlarini berish va joʻnatish Oʻzbekbirlashuvning “Matlubotchi” universal savdo-aksionerlik jamiyati tomonidan amalga oshiriladi.

10. Buyum yutuqlari bahosi 1991-yil 1-noyabrda amalda boʻlgan narxlar boʻyicha belgilangan.

11. Lotereya biletlari boʻyicha pul yutuqlari yutuqli bilet koʻrsatilgach, “Oʻzjamgʻarmabank”ning barcha muassasalari tomonidan toʻlanadi.

Buyumli yutuqlar yutuq chiqqan lotereya biletlari “Oʻzjamgʻarmabank” tomonidan ekspertizadan oʻtkazilganidan keyin beriladi.

Buyum yutuqlarini berish va joʻnatish “Oʻzjamgʻarmabank” topshiriqnomalari boʻyicha, topshiriqnoma olingandan keyin 15 kun mobaynida Oʻzbekbirlashuvning “Matlubotchi” universal savdo-aksionerlik jamiyati tomonidan amalga oshiriladi.

12. Yutuq chiqqan lotereya biletlari pul yoki pul yutugʻini olish uchun 1995-yil 30-iyungacha (oʻsha kun ham kiradi) taqdim etilishi mumkin. Mana shu muddatdan keyin lotereya biletlari oʻz kuchini yoʻqotadi va yutuqni berish uchun qabul qilinmaydi.