YUNESKO Bosh konferensiyasi 1996-yilda Amur Temur tugʻilgan kunining 660 yilligini nishonlash toʻgʻrisida qaror qabul qilganligi munosabati bilan Vazirlar Mahkamasi qaror qiladi:

1. YUNESKO rahbariyatining 1996-yil 22—27-aprelda YUNESKO shtab-kvartirasi (Parij)da “Temuriylar davrida fan, madaniyat va taʼlimning ravnaqi” haftaligini oʻtkazish toʻgʻrisidagi taklifi qoʻllab-quvvatlansin.

2. YUNESKO ishlari boʻyicha Oʻzbekiston Respublikasi Milliy komissiyasi Oʻzbekiston Respublikasi Tashqi ishlar vazirligi va Madaniyat ishlari vazirligi bilan birgalikda tashkiliy tadbirlarga tayyorgarlik koʻrilishi va oʻtkazilishini taʼminlasin.

Tadbirlar dasturi ilovaga* muvofiq tasdiqlansin.

3. Oʻzbekiston Respublikasi Fanlar akademiyasi Markaziy Osiyo tadqiqotlari xalqaro instituti bilan birgalikda 15 kun ichida dasturni ishlab chiqsin, fransuz olimlari qatnashadigan xalqaro ilmiy konferensiya qatnashchilari tarkibini aniqlasin va tasdiqlash uchun Vazirlar Mahkamasiga taqdim etsin.

4. Oʻzbekiston Respublikasi Madaniyat ishlari vazirligi:

Fanlar akademiyasi, Tashqi iqtisodiy aloqalar vazirligi, “Mahalliy sanoat” davlat korporatsiyasi va Rassomlar uyushmasi bilan birgalikda tarixiy materiallarni, Oʻzbekistonning tasviriy va amaliy sanʼatini oʻz ichiga oluvchi koʻrgazmani tayyorlash chora-tadbirlarini koʻrsin;

Haftalik doirasida respublika sanʼat ustalarining konsertlari va chiqishlarini tashkil etsin. Oʻn kun muddatda Amur Temur tugʻilgan kunning 660 yilligiga tayyorgarlik koʻrish va oʻtkazish tashkiliy qoʻmitasiga “Temuriylar davrida fan, madaniyat va taʼlimning ravnaqi” koʻrgazmasi materiallariga sifatli baho berish uchun yuqori malakali ekspertlardan iborat badiiy Kengash tarkibini, konsert dasturlarini tasdiqlash uchun taqdim etsin.

5. Koʻrgazmaning bezatilishi, transportda tashilishi, saqlanishi va barcha muzey eksponatlarining oʻz vaqtida qaytarilishi uchun javobgarlik Oʻzbekiston Respublikasi Tashqi iqtisodiy aloqalar vazirligiga yuklansin.

6. Oʻzbekiston Respublikasi Milliy xavfsizlik xizmati muzey eksponatlari va boyliklari kuzatib borilishini va qoʻriqlanishini taʼminlasin.

7. Oʻzbekiston Respublikasi Davlat matbuot qoʻmitasi 1996-yil aprel oyigacha Temuriylar davrining madaniy merosiga bagʻishlangan kitoblarning oʻzbek, ingliz va rus tillarida hamda F. Mayorning “Pamyat o buduщem” kitobining oʻzbek tilida nashr etilishini tugallasin.

8. “Oʻzdavkinokompaniya” va “Oʻzdavteleradiokompaniya” delegatsiyani Haftalik davomida Parij shahrida ingliz va fransuz tillarida namoyish etish uchun zarur hujjatli kino va videofilmlar bilan taʼminlasin.

9. Oʻzbekiston Respublikasi Ichki ishlar vazirligi va Tashqi ishlar vazirligi Fransiyaga borayotgan ishchi guruhi aʼzolari, Haftalik qatnashchilarining zarur borish hujjatlari oʻz vaqtida rasmiylashtirilishini taʼminlasin.

10. “Oʻzbekiston havo yoʻllari” milliy aviakompaniyasi Parij shahriga borayotganlarni Toshkent—Parij—Toshkent yoʻnalishi boʻyicha aeroport yigʻimlari olmasdan milliy valyutada aviatsiya chiptalari bilan taʼminlasin.

11. Oʻzbekiston Respublikasi Davlat soliq qoʻmitasi, “Oʻzbekiston havo yoʻllari” milliy aviakompaniyasi Parij shahriga olib borilayotgan yuklarning boj yigʻimlari undirilmasdan tezlikda rasmiylashtirilishini va yetkazib berilishini tashkil etsinlar.

12. Oʻzbekiston Respublikasi Prezidenti apparatining Ishlar Boshqarmasi YUNESKOga topshirish uchun Oʻzbekiston Rassomlar uyushmasiga maxsus kartina tayyorlash boʻyicha buyurtma bersin.

13. “Oʻzbekyengilsanoat”, “Oʻzmevasabzavotuzumsanoat”, “Oʻzbeksavdo” uyushmalari, “Mahalliy sanoat” davlat korporatsiyasi, “Foton”, “Oniks”, “Usto”, Toshkent aviatsiya birlashmalari, “Musavvir” firmasi va “Sovplastital” qoʻshma korxonasi Haftalik ochilishi marosimi va YUNESKO shtab-kvartirasidagi rasmiy qabul qatnashchilariga topshirish uchun badiiy Kengash tomonidan tasdiqlangan va Amur Temur tugʻilgan kunning 660 yilligiga tayyorgarlik koʻrish va oʻtkazish tashkiliy qoʻmitasi bilan kelishilgan har xil sovgʻalar tayyorlanishini taʼminlasinlar.

14. Oʻzbekiston Respublikasi Moliya vazirligi 1996-yilda respublika budjetidan Amur Temur tugʻilgan kunning 660 yilligiga tayyorgarlik koʻrish va oʻtkazish tashkiliy qoʻmitasi raisi tomonidan tasdiqlanadigan taqdim etilgan smeta hisob-kitoblari boʻyicha Parijda oʻtkaziladigan Haftalikka tayyorgarlik koʻrish va uni oʻtkazishga doir xarajatlarni qoplash uchun soʻmlarda zarur mablagʻ ajratilishini, Markaziy bank ularning chet el valyutasiga konvertatsiya qilinishini nazarda tutsinlar.

15. Mazkur qarorning bajarilishini nazorat qilish Bosh vazirning birinchi oʻrinbosari I. H. Joʻrabekov zimmasiga yuklansin.