Oʻzbekiston Respublikasi Prezidentining “Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirishni chuqurlashtirishga doir qoʻshimcha chora-tadbirlar toʻgʻrisida” 2009-yil 1-dekabrdagi PQ-1236-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Tashqi savdo vazirligi huzuridagi Xalqaro sanoat yarmarkasi va Kooperatsiya birjasi direksiyasi faoliyatini tashkil etish tartibi toʻgʻrisidagi Nizom ilovaga muvofiq tasdiqlansin.

2. Belgilab qoʻyilsinki, Oʻzbekiston Respublikasi Tashqi savdo vazirligi huzuridagi Xalqaro sanoat yarmarkasi va Kooperatsiya birjasi direksiyasi (keyingi oʻrinlarda Direksiya deb ataladi):

mustaqil yuridik shaxs hisoblanadi va davlat korxonasi shaklida tashkil etiladi;

Xalqaro sanoat yarmarkasi va Kooperatsiya birjasi doirasida tuzilgan shartnomalar (kontraktlar)ni roʻyxatdan oʻtkazishda, xoʻjalik yurituvchi subyektlarga ular ishlab chiqargan mahsulotlarni yetkazib berish yuzasidan shartnomalar (kontraktlar) tuzishda koʻmaklashish xizmatlari uchun undiriladigan vositachilik haqi, xalqaro moliyaviy institutlar va donor tashkilotlarning grant mablagʻlari, homiylik yordami, shuningdek qonun hujjatlarida taqiqlanmagan boshqa manbalar hisobiga moliyalashtiriladi.

3. Direksiya “Oʻzekspomarkaz” MKK” ochiq aksiyadorlik jamiyatining Toshkent shahar, Amir Temur koʻchasi, 107-uydagi binosida joylashtirilsin.

4. “Oʻzekspomarkaz” MKK” ochiq aksiyadorlik jamiyati bir oy muddatda:

Xalqaro sanoat yarmarkasi va Kooperatsiya birjasining Ijro etuvchi organi foydalanayotgan jihozlar va asbob-uskunalarni Direksiya balansiga bersin;

Xalqaro sanoat yarmarkasi va Kooperatsiya birjasi doirasida xoʻjalik yurituvchi subyektlar tomonidan 2010-yil uchun tuzilgan shartnomalar (kontraktlar)ni roʻyxatdan oʻtkazganlik uchun tushgan vositachilik haqini Direksiyaning hisob raqamiga oʻtkazsin.

5. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, Davlat bojxona qoʻmitasi, Davlat statistika qoʻmitasi va boshqa manfaatdor idoralar bilan birgalikda bir oy muddatda Xalqaro sanoat yarmarkasi va Kooperatsiya birjasining doimiy faoliyat koʻrsatuvchi tashkiliy qoʻmitasiga Direksiyaning samarali faoliyatini taʼminlovchi maʼlumotlarning axborot bazalarini shakllantirishda va doimiy ravishda yangilab borishda oʻzaro hamkorlik qilish tartibi toʻgʻrisidagi nizomni tasdiqlash uchun kiritsin.

6. Quyidagilar:

Vazirlar Mahkamasining “Xalqaro sanoat yarmarkasi va Kooperatsiya birjasi faoliyatini tashkil etish chora-tadbirlari toʻgʻrisida” 2008-yil 11-apreldagi 67-son qarori;

Vazirlar Mahkamasining “Vazirlar Mahkamasining “Xalqaro sanoat yarmarkasi va Kooperatsiya birjasi faoliyatini tashkil etish chora-tadbirlari toʻgʻrisida” 2008-yil 11-apreldagi 67-son qaroriga oʻzgartirish va qoʻshimchalar kiritish haqida” 2009-yil 26-fevraldagi 55-son qarori oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov hamda Oʻzbekiston Respublikasi Bosh vazirining oʻrinbosari E.M. Gʻaniyev zimmasiga yuklansin.

1. Ushbu Nizom Oʻzbekiston Respublikasi Prezidentining “Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirishni chuqurlashtirishga doir qoʻshimcha chora-tadbirlar toʻgʻrisida” 2009-yil 1-dekabrdagi PQ-1236-son qaroriga muvofiq Oʻzbekiston Respublikasi Tashqi savdo vazirligi huzuridagi Xalqaro sanoat yarmarkasi va Kooperatsiya birjasi direksiyasi (keyingi oʻrinlarda Direksiya deb ataladi) faoliyatini tashkil etish tartibini belgilaydi.

2. Xalqaro sanoat yarmarkasi va Kooperatsiya birjasi, hududiy va tarmoq sanoat yarmarkalari hamda ular doirasida mamlakatimizda ishlab chiqarilgan isteʼmol tovarlari yarmarkalari (keyingi oʻrinlarda Xalqaro sanoat yarmarkasi va Kooperatsiya birjasi deb ataladi) xoʻjalik yurituvchi subyektlarni, shu jumladan xorijiy xaridorlarni respublikada ishlab chiqarilayotgan mahsulotlar toʻgʻrisida keng xabardor qilish, sheriklarni izlab topishda hamda oʻzi ishlab chiqargan mahsulotlarni yetkazib berish yuzasidan mamlakatimiz ishlab chiqaruvchilari oʻrtasida xoʻjalik shartnomalari, shuningdek mahsulotlarni eksportga yetkazib berish uchun shartnomalar tuzishda yordam koʻrsatish maqsadida har yili oʻtkaziladi.

3. Xalqaro sanoat yarmarkasi va Kooperatsiya birjasi direksiyasi faoliyatini tashkil etishda davlat va xoʻjalik boshqaruvi organlarining oʻzaro hamkorligi bilan bogʻliq masalalarni muvofiqlashtirish Xalqaro sanoat yarmarkasi va Kooperatsiya birjasining doimiy faoliyat koʻrsatuvchi tashkiliy qoʻmitasi (keyingi oʻrinlarda Tashkiliy qoʻmita deb ataladi) tomonidan amalga oshiriladi.

Xalqaro sanoat yarmarkasi va Kooperatsiya birjasini tayyorlash va oʻtkazish Tashkiliy qoʻmita tomonidan tasdiqlanadigan kompleks chora-tadbirlar asosida amalga oshiriladi.

4. Direksiya:

mustaqil yuridik shaxs hisoblanadi va davlat korxonasi shaklida tashkil etiladi, banklarda hisob raqamlariga, belgilangan namunadagi muhrga va shtampga ega boʻladi;

Tashkiliy qoʻmitaning ishchi organi funksiyalarini bajaradi hamda Xalqaro sanoat yarmarkasi va Kooperatsiya birjasi doirasida tuzilgan shartnomalar (kontraktlar)ni roʻyxatdan oʻtkazishda, oʻzi ishlab chiqargan mahsulotlarni yetkazib berish yuzasidan shartnomalar (kontraktlar) tuzishda xoʻjalik yurituvchi subyektlarga koʻmaklashish xizmatlari uchun undiriladigan vositachilik haqi, xalqaro moliyaviy institutlar va donor tashkilotlarning grant mablagʻlari, homiylik yordami, shuningdek qonun hujjatlarida taqiqlanmagan boshqa manbalar hisobiga moliyalashtiriladi.

5. Oʻzbekiston Respublikasi Tashqi savdo vazirligi Direksiyaning muassisi hisoblanadi.

6. Quyidagilar Direksiyaning asosiy vazifalari hisoblanadi:

Xalqaro sanoat yarmarkasi va Kooperatsiya birjasining har yili oʻtkazilishini tashkil etish;

har yili oʻtkaziladigan Xalqaro sanoat yarmarkasi va Kooperatsiya birjasini, uning ishida qatnashadigan mamlakatimiz korxonalarini va ular ishlab chiqaradigan mahsulotlarni, shu jumladan mahalliylashtiriladigan mahsulotlarni keng reklama qilishni, shu jumladan xorijiy foydalanuvchilar foydalanadigan axborot resurslari orqali reklama qilishni tashkil etish;

potensial xorijiy xaridorlarni Xalqaro sanoat yarmarkasi va Kooperatsiya birjasiga jalb etish va ularning qatnashishini kengaytirish ishini tizimli asosda olib borish;

birjalar va yarmarkalarda xorijiy sheriklar bilan eksport-import bitishuvlarini kengaytirish, mahsulot eksporti boʻyicha ikki tomonlama hukumatlararo bitimlardan asta-sekin voz kechish, birja va yarmarka savdolari maydonchalarida tuziladigan eksport kontraktlarini rasmiylashtirishda mahalliy korxonalarga koʻmaklashish yoʻli bilan mahalliy tovarlar va xizmatlarni eksport qilishning bozor prinsiplari va mexanizmlarini kuchaytirish tadbirlarini amalga oshirish;

sheriklar izlab topishda va oʻzi ishlab chiqargan mahsulotni yetkazib berish yuzasidan mahalliy ishlab chiqaruvchilar oʻrtasida xoʻjalik shartnomalari tuzishda hamda mahsulotni eksportga yetkazib berish uchun shartnomalar tuzishda koʻmaklashish;

Xalqaro sanoat yarmarkasi va Kooperatsiya birjasi doirasida tuziladigan shartnomalar (kontraktlar)ni tahlil qilish va tegishli loyihalarni Mahalliylashtirish dasturiga kiritish boʻyicha takliflarni shakllantirish, ularni Iqtisodiyot vazirligiga taqdim etish;

ishlab chiqarilayotgan mahsulotning, shu jumladan mahalliylashtiriladigan mahsulotning yagona axborot bazasini shakllantirish va doimiy ravishda yangilab borish, Oʻzbekiston sanoat korxonalari mahsulotlarining har yili yangilanadigan kataloglarini elektron va qogʻoz formatda nashr etish;

Tashkiliy qoʻmita qarorlarini amalga oshirish.

7. Direksiya oʻziga yuklangan vazifalarga muvofiq quyidagi funksiyalarni amalga oshiradi:

ishlab chiqarilayotgan, import qilinayotgan va mamlakatimiz korxonalari bazasida ishlab chiqarish mumkin boʻlgan oʻzlashtirilishi istiqbolli tovarlar, shuningdek oʻzlashtirilgan mahsulotning potensial isteʼmolchilari boʻlgan xorijiy korxonalar toʻgʻrisidagi doimiy ravishda yangilab boriladigan maʼlumotlarning axborot bazasini yuritish va Internet tarmogʻiga joylashtirish;

mamlakatimiz ishlab chiqaruvchilarini ichki bozorda ehtiyoj mavjud boʻlgan tovarlar, butlovchi buyumlar va materiallar, shuningdek tovarlarni ishlab chiqarishni mahalliylashtirishda beriladigan davlat tomonidan qoʻllab-quvvatlash chora-tadbirlari toʻgʻrisida aniq tarzda xabardor qilish;

ishlab chiqarish aloqalarini yoʻlga qoʻyish uchun mamlakatimizdagi potensial mahsulot ishlab chiqaruvchilarning import qilinadigan mahsulotlarga oʻxshash mahsulot isteʼmolchilari bilan amaliy uchrashuvlari va muzokaralarini tashkil etish;

birgalikdagi ishlab chiqarish faoliyatini va kooperatsiya aloqalarini yoʻlga qoʻyish maqsadida respublika ishlab chiqaruvchilarining boshqa mahalliy ishlab chiqaruvchilar, potensial xorijiy sheriklar bilan muzokaralari va taqdimotlarini tashkil etishga koʻmaklashish;

respublika xoʻjalik yurituvchi subyektlarini Xalqaro sanoat yarmarkasi va Kooperatsiya birjasini oʻtkazish sanalari, tartibi va ularda qatnashish shartlari toʻgʻrisida oʻz vaqtida xabardor qilish;

tashkil etilayotgan Xalqaro sanoat yarmarkasi va Kooperatsiya birjasida xoʻjalik yurituvchi subyektlarning — ishlab chiqaruvchilarning, birinchi navbatda respublika korxonalari tomonidan import qilinadigan mahsulotga oʻxshash mahsulotlarni ishlab chiqaruvchilarning, shuningdek respublikada ishlab chiqarishni oʻzlashtirish maqsadga muvofiq boʻlgan tovarlarni import qiluvchi korxonalarning keng taqdim etilishini taʼminlash;

potensial xorijiy xaridorlarni Xalqaro sanoat yarmarkasi va Kooperatsiya birjasiga keng jalb etish tadbirlarini amalga oshirish;

milliy ishlab chiqaruvchilarga sheriklar izlab topishda va Xalqaro sanoat yarmarkasi va Kooperatsiya birjasi doirasida oʻzi ishlab chiqargan mahsulotni yetkazib berish, shu jumladan eksportga yetkazib berish yuzasidan shartnomalar tuzishda koʻmaklashish;

Xalqaro sanoat yarmarkasi va Kooperatsiya birjasi doirasida xoʻjalik yurituvchi subyektlar bilan tuzilgan shartnomalarni roʻyxatdan oʻtkazish va ularning reyestrini yuritish, shuningdek bunday shartnomalar qatnashchilariga ushbu reyestrdan koʻchirmalar berish;

Xalqaro sanoat yarmarkasi va Kooperatsiya birjasi, hududiy va tarmoq sanoat yarmarkalari doirasida isteʼmol qilishga moʻljallangan mahsulotlarni yetkazib berish yuzasidan tuzilgan shartnomalarni roʻyxatdan oʻtkazish;

Xalqaro sanoat yarmarkasi va Kooperatsiya birjasi doirasida tuzilgan shartnomalar bajarilishi monitoringini olib borish;

Xalqaro sanoat yarmarkasi va Kooperatsiya birjasi doirasida tuzilgan shartnomalar (kontraktlar)ni oʻrganib chiqish yoʻli bilan tegishli loyihalarni Mahalliylashtirish dasturiga kiritishga doir takliflar tayyorlash;

tarmoq va mintaqaviy sanoat yarmarkalari tashkilotchilariga ularni oʻtkazishda metodik yordam koʻrsatish;

sanoat kooperatsiyasi aloqalarini chuqurlashtirishga va sanoat kooperatsiyasi hamda zamonaviy texnologiyalarni oʻzlashtirish asosida mahsulotlar ishlab chiqarishni mahalliylashtirishni kengaytirishga yoʻnaltirilgan tadbirlar boʻyicha axborotlarni tadbirkorlar va aholi oʻrtasida keng yoyishni taʼminlash uchun ommaviy axborot vositalarida materiallar va tahliliy sharhlar eʼlon qilish;

shunga oʻxshash tadbirlarni oʻtkazishga oid xalqaro tajribani oʻrganish hamda ishlab chiqarish kooperatsiyasini kengaytirish, Xalqaro sanoat yarmarkasi va Kooperatsiya birjasini tayyorlash va oʻtkazish masalalari boʻyicha Tashkiliy qoʻmitaga takliflar kiritish;

belgilangan tartibda unga yuklangan boshqa funksiyalar.

8. Direksiya oʻz vazifalari va funksiyalarini amalga oshirishda Oʻzbekiston Respublikasi Savdo-sanoat palatasi, davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, korxonalar bilan oʻzaro hamkorlik qiladi.

9. Direksiyaning faoliyatini samarali tashkil etish uchun Oʻzbekiston Respublikasi Tashqi savdo vazirligi, Iqtisodiyot vazirligi, Davlat statistika qoʻmitasi, Davlat bojxona qoʻmitasi, Oʻzbekiston Respublikasi Savdo-sanoat palatasi, Oʻzbekiston respublika tovar-xomashyo birjasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, xoʻjalik boshqaruvi organlari va korxonalar Direksiyaga zarur axborot materiallarini taqdim etadilar.

10. Boshlangʻich axborotlarni toʻplash va tahlil qilishda, shuningdek keyinchalik maʼlumotlar bazasini Direksiyaga taqdim etishda vazirliklar, idoralar va korxonalarning oʻzaro hamkorlik qilish tartibi Tashkiliy qoʻmita tomonidan tasdiqlanadi.

11. Direksiya oʻziga yuklangan vazifalar va funksiyalarni bajarish uchun oʻz vakolatlari doirasida quyidagi huquqlarga ega:

ishlab chiqarish kooperatsiyasini kengaytirish, Xalqaro sanoat yarmarkasi va Kooperatsiya birjasini tayyorlash va oʻtkazish masalalari boʻyicha takliflarni Tashkiliy qoʻmitaga kiritish;

vazirliklar, idoralar va korxonalardan Xalqaro sanoat yarmarkasi va Kooperatsiya birjasi doirasida tuzilgan shartnomalar (kontraktlar)ning bajarilishi toʻgʻrisidagi axborotlarni olish;

qonun hujjatlarida nazarda tutilgan boshqa huquqlar.

12. Direksiya:

ishlab chiqarilayotgan, import qilinayotgan va oʻzlashtirilishi istiqbolli boʻlgan tovarlar, shuningdek buning uchun ishlab chiqarish va texnologik resurslarga ega boʻlgan mamlakatimiz korxonalari, bunday tovarlarni ishlab chiqarishni mahalliylashtirishda beriladigan davlat tomonidan qoʻllab-quvvatlash chora-tadbirlari toʻgʻrisidagi doimiy ravishda yangilab boriladigan maʼlumotlarning axborot bazasi yuritilishi va Internet tarmogʻiga joylashtirilishi;

tarmoqlararo va tarmoq ichki ishlab chiqarish aloqalarini yoʻlga qoʻyish va mustahkamlashga koʻmaklashish chora-tadbirlari samarali amalga oshirilishi hamda ushbu Nizom bilan yuklangan vazifalar va funksiyalar doirasida xoʻjalik yurituvchi subyektlarning buyurtmalar portfeli shakllantirilishi;

Xalqaro sanoat yarmarkasi va Kooperatsiya birjasini tayyorlash va oʻtkazish boʻyicha kompleks tadbirlarning oʻz vaqtida kelishilishi va Tashkiliy qoʻmita tomonidan tasdiqlanishi;

davlat va xoʻjalik boshqaruvi organlari, Oʻzbekiston Respublikasi Savdo-sanoat palatasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, korxonalar, shu jumladan xorijiy korxonalarning Xalqaro sanoat yarmarkasi va Kooperatsiya birjasini oʻtkazish muddatlari toʻgʻrisida oʻz vaqtida xabardor qilinishi;

Xalqaro sanoat yarmarkasi va Kooperatsiya birjasi doirasida xoʻjalik yurituvchi subyektlar bilan tuzilgan shartnomalarning oʻz vaqtida roʻyxatdan oʻtkazilishi va ularning reyestri yuritilishi, shuningdek bunday shartnomalarning qatnashchilariga ushbu reyestrdan koʻchirmalar berilishi;

qonun hujjatlariga muvofiq Direksiyaga yuklangan boshqa vazifalar va funksiyalarning samarali bajarilishi uchun javob beradi.

13. Direksiyaga Oʻzbekiston Respublikasi Tashqi savdo vaziri tomonidan lavozimga tayinlanadigan va lavozimdan ozod qilinadigan direktor boshchilik qiladi.

14. Direktor:

Direksiya faoliyatiga umumiy rahbarlik qiladi va Direksiyaga yuklangan vazifalar va funksiyalarning bajarilishi uchun shaxsan javob beradi;

Xalqaro sanoat yarmarkasi va Kooperatsiya birjasini oʻtkazish bilan bogʻliq tadbirlarning oʻz vaqtida va sifatli bajarilishi yuzasidan nazoratni taʼminlaydi;

boʻlimlar toʻgʻrisidagi nizomlarni tasdiqlaydi va Direksiya xodimlari oʻrtasida vazifalarni taqsimlaydi;

Oʻzbekiston Respublikasi Tashqi savdo vaziri bilan kelishgan holda shtatlar jadvalini tasdiqlaydi, Direksiya xodimlarini lavozimga tayinlaydi va lavozimdan ozod qiladi;

Direksiya nomidan xoʻjalik shartnomalari va boshqa shartnomalar tuzadi;

Oʻzbekiston Respublikasi Tashqi savdo vazirining topshiriqlariga muvofiq boshqa funksiyalarni bajaradi.

15. Direksiya quyidagi uchta boʻlimdan iborat boʻladi:

a) Xalqaro sanoat yarmarkasi va Kooperatsiya birjasini oʻtkazishni tashkil etish boʻlimi;

b) axborot-tahliliy taʼminlash, reklama, maʼlumotlar bazasini yuritish va tuzilgan kontraktlar monitoringi boʻlimi;

v) xoʻjalik yurituvchi subyektlar bilan ishlash va xoʻjalik yurituvchi subyektlar, shu jumladan xorijiy xaridorlar va mahalliylashtiriladigan mahsulot buyurtmachilari oʻrtasidagi ishlab chiqarish-kooperatsiya aloqalarini yoʻlga qoʻyishga koʻmaklashish boʻlimi.

16. Tashqi savdo vaziri Direksiya tuzilmasiga va xodimlari soniga xodimlarning belgilangan soni va mehnatga haq toʻlash fondi doirasida oʻzgartirishlar kiritishi mumkin.