Futbolni rivojlantirish uchun qo‘shimcha shart-sharoitlar yaratish, uning aholi salomatligini mustahkamlash va jismoniy madaniyatini yuksaltirishdagi rolini oshirish, Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalari futbolni rivojlantirishni muvofiqlashtirish va qo‘llab-quvvatlash masalalaridagi faoliyatini faollashtirish, shuningdek ularning moddiy-texnika bazasini mustahkamlash maqsadida Vazirlar Mahkamasi qaror qiladi:

1. O‘zbekiston futbol assotsiatsiyasi hamda O‘zbekiston Respublikasi Jismoniy tarbiya va sport vazirligining Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalariga quyidagi asosiy vazifalarni hal etishni yuklash to‘g‘risidagi taklifiga rozilik berilsin:

futbolning barcha turlarini, shu jumladan havaskorlik futboli va professional futbolni rivojlantirishning muvofiqlashtirilishini ta’minlash;

futbol klublari va jamoalariga ularning futbol bo‘yicha hududiy, respublika va xalqaro musobaqalarga tayyorlanishida va ularda qatnashishida har tomonlama ko‘maklashish;

aholi keng qatlamlari o‘rtasida futbol bo‘yicha musobaqalar o‘tkazishni tashkil etish;

O‘zbekiston o‘smirlar va yoshlar terma jamoalariga nomzodlar tayyorlash uchun javob beradigan asosiy futbol klublari sifatida ularning huzuridagi futbol bo‘yicha bolalar-o‘smirlar sport maktablarini rivojlantirish hamda futbol klublari uchun rezerv tayyorlash monitoringini amalga oshirish;

futbolchilar, trenyerlar va hakamlar, shuningdek tegishli hududdagi futbol bo‘yicha boshqa mutaxassislarni tayyorlash, qayta tayyorlash va ularning malakasini oshirish;

futbolni, shu jumladan xalqaro arenada rivojlantirishga katta hissa qo‘shgan hududiy futbol assotsiatsiyalari a’zolarini, futbolchilar, trenyerlar va hakamlarni, futbol faxriylari va boshqa mutaxassislarni axborotlar bilan, ilmiy-metodik va moddiy-texnik jihatdan ta’minlashga ko‘maklashish.

2. O‘zbekiston Futbol federatsiyasi tomonidan ishlab chiqilgan Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalari to‘g‘risidagi Namunaviy nizom ilovaga muvofiq ma’qullansin.

Qoraqalpog‘iston Respublikasi, viloyatlar va Toshkent shahar futbol federatsiyalariga O‘zbekiston Futbol federatsiyasi bilan kelishgan holda Namunaviy nizomga muvofiq o‘z ustavlarini bir oy muddatda qayta ko‘rib chiqish va adliya organlariga davlat ro‘yxatidan o‘tkazish uchun belgilangan tartibda taqdim etish tavsiya qilinsin.

O‘zbekiston Respublikasi Adliya vazirligi Qoraqalpog‘iston Respublikasi, viloyatlar va Toshkent shahar futbol federatsiyalarining ustavlarini davlat ro‘yxatidan o‘tkazishda ko‘maklashsin.

3. Tegishli hududlar hududiy futbol assotsiatsiyalarining prezidentlari hisoblanadigan Qoraqalpog‘iston Respublikasi Vazirlar Kengashi Raisiga, viloyatlar va Toshkent shahar hokimlariga quyidagi vazifalarni hal etish yuklansin:

Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalarining moliyaviy hamda moddiy-texnika bazasini mustahkamlashda, tegishli hududda futbolni rivojlantirish uchun homiylar topishda, shuningdek ularni joylashtirish uchun binolar ajratishda ko‘maklashish;

professional futbol klublari huzuridagi futbol bo‘yicha bolalar-o‘smirlar sport maktablarining rivojlanishini doimiy nazorat qilish hamda ularning moddiy-texnika bazasini mustahkamlashda ko‘maklashish;

tegishli hududda professional futbolni rivojlantirish uchun zarur shart-sharoitlar yaratilishini ta’minlash.

4. Belgilansinki, Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalari ish haqi fondlarini moliyalashtirish O‘zbekiston Futbol assotsiatsiyasining mablag‘lari hisobiga amalga oshiriladi.

5. O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi hamda O‘zbekiston futbolini qo‘llab-quvvatlash jamg‘armasi professional futbol klublari huzuridagi futbol bo‘yicha bolalar-o‘smirlar sport maktablarini yanada rivojlantirishni ta’minlash maqsadida:

professional futbol klublari huzuridagi futbol bo‘yicha yangi bolalar-o‘smirlar sport maktablarini qurish va mavjudlarini rekonstruksiya qilish uchun 2010-yilda teng ulushlarda 8 mlrd so‘m miqdorida mablag‘ ajratishni nazarda tutsinlar;

professional futbol klublari huzuridagi futbol bo‘yicha bolalar-o‘smirlar sport maktablarini rivojlantirish uchun tegishli loyiha-smeta hujjatlari bir oy muddatda tayyorlanishini ta’minlasinlar hamda ularni belgilangan tartibda tasdiqlash uchun taqdim etsinlar.

6. Farg‘ona (X. Ne’matov), Namangan (B. Yusupov) va Samarqand (O‘. Barnoyev) viloyatlari hokimliklari O‘zbekiston Futbol federatsiyasi bilan birgalikda:

“Farg‘ona” (Farg‘ona shahri), “Navbahor” (Namangan shahri), “Dinamo” (Samarqand shahri) markaziy stadionlarini mukammal ta’mirlash yuzasidan tegishli loyiha-smeta hujjatlari tayyorlanishini bir oy muddatda ta’minlasinlar hamda ularni belgilangan tartibda tasdiqlash uchun taqdim etsinlar;

7. O‘zbekiston Futbol assotsiatsiyasiga Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalarining rahbar va shtatdagi xodimlariga nisbatan talablarni, ularning malakasini, ishbilarmonlik, kasbiy va boshqa sifatlarini, malakasini oshirish davriyligini hisobga olgan holda belgilash tavsiya etilsin.

8. O‘zbekiston matbuot va axborot agentligi, O‘zbekiston milliy teleradiokompaniyasi hamda boshqa ommaviy axborot vositalari Qoraqalpog‘iston Respublikasida, viloyatlar va Toshkent shahrida ommaviy futbol harakatining rivojlanishini, eng yaxshi futbol klublari, sport maktablari, jismoniy tarbiya jamoalari, futbol bo‘yicha trenyerlar va boshqa mutaxassislar faoliyatini muntazam ravishda va keng yoritsinlar, rasmiy futbol o‘yinlari o‘tkazilishini targ‘ib va reklama qilsinlar.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N.Aripov zimmasiga yuklansin.

1. Ushbu Namunaviy nizom Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalari faoliyatining asosiy prinsiplari va yo‘nalishlarini belgilaydi.

2. Ushbu Namunaviy nizomda quyidagi asosiy tushunchalar qo‘llaniladi:

Xalqaro Futbol Federatsiyasi — jahonda futbolning barcha turlarini, havaskorlik futbolini va professional futbolni rivojlantirishni muvofiqlashtirish va boshqarish yuzasidan mutlaq huquqqa ega bo‘lgan tashkilot;

Osiyo Futbol Konfederatsiyasi — mamlakatlarning Osiyo qit’asiga kiradigan Milliy futbol federatsiyalarini birlashtiruvchi hamda Osiyodagi futbolning barcha turlarini, havaskorlik futbolini va professional futbolni rivojlantirishni muvofiqlashtirish va boshqarish yuzasidan mutlaq huquqqa ega bo‘lgan tashkilot;

O‘zbekiston Futbol assotsiatsiyasi — O‘zbekistonda futbolning barcha turlarini, shu jumladan havaskorlik futbolini va professional futbolni rivojlantirishni muvofiqlashtiruvchi tashkilot;

Sport va jismoniy tarbiya — ommaviy tadbirlar reglamenti (Reglament) — sport va jismoniy tarbiya — ommaviy tadbirlarni tashkil etish va o‘tkazish tartibini belgilaydigan hamda ular yuzasidan shartlar va talablarni qo‘llanish va bajarish tartibini belgilaydigan qoidalar yig‘indisidan iborat bo‘lgan asosiy hujjat;

Sport va jismoniy tarbiya — ommaviy tadbirlar to‘g‘risida Nizom (Nizom) — sport va jismoniy tarbiya — ommaviy tadbirlarni tashkil etish va o‘tkazish tartibini belgilaydigan asosiy hujjat;

o‘quv-trenirovka yig‘inlari — sport yo‘nalishiga, pedagogik va tarbiyaviy xaraktyerga ega bo‘lgan, futbolchilarni musobaqalarda va jismoniy tarbiya-ommaviy tadbirlarda muvaffaqiyatli qatnashishga tayyorlash uchun sport mahoratini oshirishga yo‘naltirilgan uyushtirilgan tadbirlar;

futbol bo‘yicha trener — yuqori malakali va sport rezervi futbolchilarini tayyorlash bo‘yicha mutaxassis hisoblanadigan shaxs;

futbolchi — havaskorlik yoki professional asosda futbol bilan muntazam ravishda shug‘ullanadigan, o‘z sport mahoratini doimiy oshirib boradigan va futbol bo‘yicha o‘tkaziladigan musobaqalarda muntazam qatnashadigan shaxs;

futbol bo‘yicha hakam — futbol bo‘yicha musobaqalarni o‘tkazishda ularning Qoidalariga va reglamentlovchi hujjatlariga muvofiq ularni nazorat qilish va boshqarishni ta’minlaydigan shaxs;

futbol bo‘yicha terma jamoalar — futbolchilarning texnik-taktik tayyorgarligini takomillashtirish va sport mahoratini oshirish maqsadida shakllantirilgan, rahbarlar, menejyerlar, ma’murlar, trenyerlar, futbolchilar, vrachlar, farmatsevtlar, massajchilar, psixologlar, ilmiy va xizmat ko‘rsatuvchi xodimlar va boshqa mutaxassislardan iborat bo‘lgan jamoalar.

3. Qoraqalpog‘iston Respublikasi, viloyatlar va Toshkent shahar Hududiy futbol assotsiatsiyalari (keyingi o‘rinlarda hududiy assotsiatsiyalar deb ataladi) futbolni rivojlantirishdan manfaatdor bo‘lgan yuridik va jismoniy shaxslarni birlashtiruvchi, tegishli hududlarda futbolning barcha turlarini, shu jumladan havaskorlik futbolini va professional futbolni rivojlantirishni muvofiqlashtiruvchi nodavlat notijorat tashkilotlar hisoblanadi.

4. Hududiy assotsiatsiya belgilangan tartibda davlat ro‘yxatidan o‘tkazilgan vaqtdan boshlab yuridik shaxs maqomiga ega bo‘ladi.

5. Hududiy assotsiatsiya o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi qarorlari va boshqa hujjatlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, ushbu Namunaviy nizomga, shuningdek o‘z ustaviga hamda O‘zbekiston Futbol federatsiyasi hujjatlariga amal qiladi.

6. Quyidagilar Hududiy assotsiatsiyaning maqsadi va vazifalari hisoblanadi:

futbolning barcha turlarini, havaskorlik futbolini va professional futbolni rivojlantirishning muvofiqlashtirilishini ta’minlash;

futbol klublari va jamoalariga ularning futbol bo‘yicha hududiy, respublika va xalqaro musobaqalarga tayyorlanishida va ularda qatnashishida har tomonlama ko‘maklashish;

aholi keng qatlamlari o‘rtasida futbol bo‘yicha musobaqalar o‘tkazishni tashkil etish;

O‘zbekiston o‘smirlar va yoshlar terma jamoalariga nomzodlar tayyorlash uchun javob beradigan asosiy futbol klublari sifatida ularning huzuridagi futbol bo‘yicha bolalar-o‘smirlar sport maktablarini rivojlantirish hamda futbol klublari uchun rezerv tayyorlash monitoringini amalga oshirish;

futbolchilar, trenyerlar va hakamlar, shuningdek tegishli hududdagi futbol bo‘yicha boshqa mutaxassislarni tayyorlash, qayta tayyorlash va ularning malakasini oshirish;

futbolni, shu jumladan xalqaro arenada rivojlantirishga katta hissa qo‘shgan hududiy futbol assotsiatsiyalari a’zolarini, futbolchilar, trenyerlar va hakamlarni, futbol faxriylari va boshqa mutaxassislarni axborotlar bilan, ilmiy-metodik va moddiy-texnik jihatdan ta’minlashga ko‘maklashish;

joylarda futbol bo‘yicha sport-ommaviy tadbirlar o‘tkazish orqali tinchlik, do‘stlik va o‘zaro hamfikrlik g‘oyalarini targ‘ib qilish;

futbolni targ‘ib qilish va rivojlantirish, uning manfaatlari va qadriyatlarini himoya qilish, tegishli hududlarda joylashgan turli tashkilotlarda futbolni muvofiqlashtirish va rivojlantirish;

futbolni axborotlar bilan, ilmiy-metodik va moddiy-texnik jihatdan ta’minlash;

futbolchilar, trenyerlar va hakamlarning, shuningdek tegishli hududdagi futbol bo‘yicha boshqa mutaxassislarning huquq va manfaatlarini himoya qilish.

7. Hududiy assotsiatsiya o‘z faoliyatini kontraktlar (shartnomalar), o‘zaro ixtiyoriy hamkorlik va o‘zaro munosabatlarning taqiqlanmagan boshqa shakllari asosida amalga oshiradi.

8. Hududiy assotsiatsiya maqsadi va vazifalariga erishish uchun:

futbol bo‘yicha chempionatlar va kuboklarni, turli turnirlar, festivallar, konferensiyalar va simpoziumlarni tashkil etadi va o‘tkazadi;

futbolchilar, trenyerlar va hakamlar, shuningdek tegishli hududdagi futbol bo‘yicha boshqa mutaxassislar uchun, shu jumladan respublika va xalqaro kurslar, seminarlar va yig‘inlar tashkil qiladi va o‘tkazadi;

tegishli hududda futbolni rivojlantirishni muvofiqlashtiradi, hududiy assotsiatsiya a’zolari, futbolchilar, trenyerlar va hakamlar, shuningdek tegishli hududdagi futbol bo‘yicha boshqa mutaxassislar o‘rtasida vujudga kelishi mumkin bo‘lgan kelishmovchiliklar va bahslarni tartibga solishni ta’minlaydi;

Hududiy assotsiatsiya ustavini, futbol va uning qoidalarini buzish va suiiste’mol qilishning turli shakllarini, musobaqaga zararli va boshqa salbiy metodlar yoki amaliyotning joriy etilishini bartaraf etishga yo‘naltirilgan zarur chora-tadbirlarni tashkil qiladi;

futbolchilar, trenyerlar va hakamlarni, shuningdek tegishli hududdagi futbol bo‘yicha boshqa mutaxassislarni tayyorlash, qayta tayyorlash va ularning malakasini oshirishni tashkil qiladi;

futbol bo‘yicha ilmiy-metodik va ommabop adabiyotlar nashr etish, shuningdek tadbirkorlik bilan shug‘ullanishni va qonun hujjatlariga zid bo‘lmagan boshqa faoliyatni belgilangan tartibda amalga oshiradi.

9. Assotsiatsiya O‘zbekiston Futbol assotsiatsiyasiga futbol bo‘yicha terma jamoalarni, futbol klublarini, futbolchilar, trenyerlar va hakamlarni, shuningdek, tegishli hududdagi futbol bo‘yicha boshqa mutaxassislarni tavsiya etadi.

10. Hududiy assotsiatsiya:

tegishli hududlarning terma jamoalari va futbol klublarining hujjatlarini rasmiylashtirmasdan Xalqaro Futbol Federatsiyasi, Osiyo Futbol Konfederatsiyasi va O‘zbekiston Futbol assotsiatsiyasi tomonidan o‘tkaziladigan musobaqalarda va boshqa sport musobaqalarida qatnashishiga;

futbolchilar, trenyerlar, hakamlar va futbol bo‘yicha boshqa mutaxassislar tomonidan futbol o‘yinlari qoidalarining, Reglament va Nizomning, o‘zlarining faoliyatiga taalluqli boshqa hujjatlar normalari va talablarining buzilishiga;

Xalqaro Futbol Federatsiyasi, Osiyo Futbol Konfederatsiyasi, O‘zbekiston Futbol assotsiatsiyasining tegishli ruxsatnomalariga ega bo‘lmagan shaxslar tomonidan trenerlik va hakamlik faoliyati yuritilishiga yo‘l qo‘ymaslik bo‘yicha zarur chora-tadbirlarni ko‘rishi kerak.

11. Hududiy assotsiatsiya futbol bo‘yicha terma jamoalarni va ularning rezervini va/yoki alohida futbolchilarni tayyorlash bo‘yicha o‘quv-trenirovka mashg‘ulotlari yig‘inlarini tashkil etish va o‘tkazish masalalaridagi o‘z faoliyatini ham respublika hududida, ham chet elda amalga oshirishi mumkin.

12. Hududiy assotsiatsiya o‘zining maqsadi, vazifalari va funksiyalarini to‘laqonli bajarish uchun doimiy faoliyat ko‘rsatadigan organlarga ega bo‘lishi, zarur mablag‘larni qidirib topishi, bog‘lanish telefonlari (faks)ga, elektron pochta va sayt (veb-sayt)ga ega bo‘lishi, Hududiy assotsiatsiya xodimlariga o‘z zimmasiga yuklangan funksiyalarini to‘laqonli va samarali bajarishi uchun zarur shart-sharoitlar yaratishi kerak.

13. Hududiy assotsiatsiya o‘z ishlari va tadbirlarining yillik rejalarini ishlab chiqadi va tasdiqlash uchun O‘zbekiston Futbol federatsiyasiga taqdim etadi.

14. Hududiy assotsiatsiya Xalqaro Futbol Federatsiyasi, Osiyo Futbol Konfederatsiyasi va boshqa xalqaro organlarda O‘zbekiston futbol federatsiyasi nomidan mustaqil ravishda vakillik qilishi mumkin emas.

15. Hududiy assotsiatsiya Xalqaro Futbol Federatsiyasi, Osiyo Futbol Konfederatsiyasi va O‘zbekiston Futbol federatsiyasi shafeligida tegishli hududda futbol bo‘yicha musobaqalar va boshqa tadbirlarning tashkil etilishi va o‘tkazilishi uchun javob beradi.

16. Hududiy assotsiatsiya rahbariyati va ma’muriyati tarkibini saylash tartibi qonun hujjatlariga muvofiq va Hududiy assotsiatsiyaning o‘z ustavida nazarda tutilgan tashkiliy-huquqiy shakliga muvofiq belgilanadi.

Hududiy assotsiatsiyaning birinchi vitse-prezidenti va shtatlar jadvali O‘FA bilan kelishgan holda Hududiy assotsiatsiya tomonidan tasdiqlanadi.

Hududiy assotsiatsiya (apparati)ning rahbariyati va ma’muriyati tarkibi tuzilmasi ushbu Namunaviy nizomga ilovada belgilangan.

17. Hududiy assotsiatsiya belgilangan tartibda tegishli hududda futbolni yanada rivojlantirish masalalarini hal etish bo‘yicha o‘z qo‘mitalari, kengashlari va komissiyalarini tashkil etishi, shuningdek jamg‘armalar va boshqa tashkilotlar tashkil qilishi, noshirlik faoliyati hamda o‘zining maqsadi va vazifalariga muvofiq boshqa faoliyat turlari bilan shug‘ullanishi mumkin.

18. Futbol uchun mo‘ljallangan sport inshootlari, futbol tashkilotlari, shuningdek terma jamoalar rahbarlari, futbol klublari va futbol bo‘yicha boshqa jamoalar, tegishli hududning futbol bo‘yicha barcha darajalardagi trenyerlari Hududiy assotsiatsiya bilan kelishilgan holda lavozimga tayinlanadi va lavozimdan ozod qilinadi.

19. Futbolchilar bilan o‘quv-trenirovka mashg‘ulotlarini o‘tkazish faqat O‘zbekiston Futbol assotsiatsiyasi tomonidan belgilangan tartibda futbol bo‘yicha trenerlik faoliyatiga yo‘l qo‘yilgan shaxslar tomonidan amalga oshiriladi.

Futbol bo‘yicha trenyerlar, futbolchilar, futbol bo‘yicha hakamlar va tegishli hudud futboli bo‘yicha boshqa mutaxassislarning kontraktlari (shartnomalari)ni ro‘yxatdan o‘tkazish tartibi O‘zbekiston Futbol assotsiatsiyasi tomonidan belgilanadi.

20. Futbol bo‘yicha trenyerlar, hakamlar va tegishli hududdagi futbol bo‘yicha boshqa mutaxassislarni tayyorlash hamda ularning malakasini oshirish bo‘yicha mashg‘ulotlarni o‘tkazish faqat O‘zbekiston Futbol assotsiatsiyasi tomonidan ushbu faoliyat bilan shug‘ullanishga belgilangan tartibda qo‘yilgan shaxslar tomonidan amalga oshiriladi.

21. O‘quv-trenirovka yig‘inlarini tashkil etish va o‘tkazish Hududiy assotsiatsiya qarorlariga muvofiq amalga oshiriladi.

22. Hududiy assotsiatsiyalar Kalendariga kiritilgan futbol musobaqalari hududiy maqomidan, darajasi va ko‘lamidan qat’i nazar Hududiy assotsiatsiyaning rasmiy musobaqalari hisoblanadi hamda Hududiy assotsiatsiyaning rahbarligida va O‘FAning kuzatuvi ostida o‘tkaziladi.

Assotsiatsiya taqvimiga kiritilgan musobaqalarni boshqarish, ularni o‘tkazish Assotsiatsiya tomonidan ro‘yxatdan o‘tkazilgan hakamlar tomonidan amalga oshiriladi.

Assotsiatsiyaning rasmiy musobaqalarida qatnashishga qo‘yish musobaqalar to‘g‘risidagi Reglamentga va Nizomga hamda Futbol o‘yini qoidalariga muvofiq amalga oshiriladi.

Assotsiatsiyaning rasmiy musobaqalari o‘tkazilayotganda:

Assotsiatsiyaning a’zolari hisoblanmagan, Assotsiatsiyada akkreditatsiyadan o‘tmagan hamda Assotsiatsiyaning rasmiy homiylari hisoblanmagan tashkilotlarning ramzlari, logotiplari va qisqartma so‘zlaridan reklama maqsadlarida foydalanishga;

Assotsiatsiyada akkreditatsiyadan o‘tmagan jismoniy va yuridik shaxslar tomonidan har qanday suratga olish va translatsiyalarga;

O‘zbekiston Futbol Assotsiatsiyasi tomonidan ma’qullanmagan sport kiyimlari, inventar va jihozlardan, shuningdek elektron, o‘lchov, texnik va boshqa yordamchi vositalardan foydalanishga yo‘l qo‘yilmaydi.

23. Tegishli hududning turli tashkilotlari tomonidan o‘tkaziladigan futbol musobaqalari Hududiy assotsiatsiya tomonidan tasdiqlanishi kerak. Futbol o‘yini qoidalariga rioya qilinishini va turli tashkilotlar tomonidan o‘tkaziladigan musobaqalarni ularni tartibga soluvchi hujjatlarga muvofiq boshqarishni nazorat qilishni ta’minlash faqat Hududiy assotsiatsiya tomonidan tavsiya etilgan futbol hakamlari tomonidan amalga oshirilishi kerak.

24. Futbolni ommalashtirishga, uni ilmiy-metodik va texnik jihatdan ta’minlashga, futbol murabbiylari, futbolchilar va futbol hakamlarining, shuningdek futbol bo‘yicha boshqa mutaxassislarning malakasini oshirishga yo‘naltirilgan festivallar, konferensiyalar, simpoziumlar, kurslar, seminarlar, yig‘inlar, sport-ko‘ngilochar, jismoniy tarbiya-sog‘lomlashtirish va boshqa sport tadbirlarini tashkil etish va o‘tkazish Hududiy assotsiatsiyaning qaroriga ko‘ra amalga oshiriladi.

25. Tegishli hududning futbol bo‘yicha terma jamoalari va ularning zaxirasi Assotsiatsiya va O‘zbekiston Futbol assotsiatsiyasi tomonidan tasdiqlanadi.

Terma jamoalar va ularning zaxirasini shakllantirish shartlari, talablari va tartibi belgilangan tartibda tasdiqlanadi.

Tegishli hududning futbol bo‘yicha terma jamoalari va ularning zaxirasi katta yoshdagilar, yoshlar (o‘smirlar), o‘smirlar va bolalar toifasiga bo‘linishi mumkin.

Tegishli hududning futbol bo‘yicha terma jamoalari va ularning zaxirasiga kiritish uchun futbol hakamlari, futbolchilar, shuningdek futbol bo‘yicha boshqa mutaxassislar O‘zbekiston Futbol assotsiatsiyasi tomonidan belgilangan talablarga javob berishi kerak.

Tegishli hududning terma jamoalarini ta’minlash, ularni tayyorlash, shu jumladan o‘quv-trenirovka yig‘inlari o‘tkazish hamda musobaqalarda va/yoki jismoniy tarbiya-ommaviy tadbirlarda qatnashish:

terma jamoa a’zolarining ovqatlanishi, yo‘l yurishi, joylashishi va sutkalik puli, shuningdek ularni farmakologiya va tiklanish vositalari, vitaminlar va oqsil-glyukoza preparatlari, umumiy davolanish maqsadidagi dori-darmonlar va bog‘lash materiallari bilan ta’minlash;

sport inshootlari, jihozlar, inventar va texnik vositalardan foydalanganlik uchun ijara to‘lovi;

terma jamoalar a’zolarining energiyaga bo‘lgan ehtiyojini, sarflangan kuch-quvvati va jismoniy resurslari kompensatsiyasi uchun oziq-ovqatlarning asosiy komponentlari bilan ta’minlash;

terma jamoalar a’zolarini zarur sport buyumlari, kiyim-bosh, inventar va jihozlar bilan ta’minlash, ularning tiklanish tadbirlari (fizioterapevtik, psixologik va boshqalar);

terma jamoalar a’zolarini tayyorlash uchun audio va video jihozlar hamda materiallar sotib olish, o‘quv-metodik jihatdan ta’minlash va davolash-pedagogik tekshiruvlar va nazorat qilish hamda terma jamoalar futbolchilarini samarali tayyorlash maqsadida ilmiy tadqiqotlarni tashkil etish va olib borish;

terma jamoalar a’zolarini akkreditatsiyadan o‘tkazishga, ularga viza olish uchun haq to‘lash va ularning musobaqalar, jismoniy tarbiya-ommaviy tadbirlarda va o‘quv-mashq yig‘inlarida qatnashganligi uchun badal to‘lash, doping-nazoratdan o‘tish;

aeroportlar, temir yo‘l, avtomobil va suv vokzallari yig‘imlarini to‘lash, sport inventari va jihozlarini transportda tashish, yoqilg‘i-moylash materiallari va boshqa zarur materiallar bilan ta’minlash;

futbol murabbiylari va mutaxassislari, shu jumladan xorijiy murabbiylar va mutaxassislar mehnatiga haq to‘lash, terma jamoalar a’zolarini qonun hujjatlarida belgilangan tartibda sug‘urta qilish, vakillik xarajatlari va ko‘zda tutilmagan xarajatlar (apellatsiya, da’vo, faks, xalqaro telefon so‘zlashuvlaridan foydalanganlik uchun haq to‘lash, og‘ir jarohatlar olinganda tibbiy yordam uchun haq to‘lash, Internet xizmatlar), shikast yetkazganlik uchun haq to‘lash va boshqa xarajatlar bilan bog‘liq xarajatlarni taqozo etadi.

Terma jamoalarning o‘quv-trenirovka yig‘inlarida va/yoki jismoniy tarbiya-ommaviy tadbirlarda qatnashishi bilan bog‘liq boshqa xarajatlar qonun hujjatlari bilan tasdiqlangan me’yorlar bo‘yicha qoplanadi.

Xorijiy valyutadagi xarajatlar belgilangan tartibda tasdiqlangan me’yorlarga, shuningdek Reglament va/yoki Nizomning moliyaviy shartlariga yoxud qabul qilish shartlariga muvofiq ajratilgan va kelishilgan mablag‘lar doirasida aniqlanadi.

26. Hududiy assotsiatsiya o‘z faoliyatini samarali ta’minlash maqsadida qonun hujjatlariga muvofiq o‘z mulki bo‘lgan va/yoki ijaraga olingan ma’muriy va qo‘shimcha binolarga ega bo‘lishi, sport bazasini (sport zallari, basseynlar, maydonchalar va hokazolarni) ijaraga olishi, tibbiyot xonasi, kino-, foto-, videolaboratoriyalar, metodika xonasi, jihozlar va inventar, metodik adabiyotlar, ko‘rgazmali qo‘llanmalar, avtotransport, texnik va elektron vositalar, yer uchastkalari, binolar, inshootlar, turarjoy fondiga, so‘mda va xorijiy valyutada pul mablag‘lariga, qimmatli qog‘ozlar hamda boshqa ko‘char va ko‘chmas mulkka ega bo‘lishi mumkin.

27. Hududiy assotsiatsiya O‘FA yoki boshqa tashkilotlar tomonidan berilgan mol-mulkning, shuningdek, Hududiy assotsiatsiyaning o‘zi boshqa qonuniy asoslarda sotib olgan mol-mulkning egasi hisoblanadi.

28. Hududiy assotsiatsiyaning mablag‘lari va mol-mulki quyidagi manbalardan:

kirish badallari;

yillik a’zolik badallari;

homiylardan tushadigan mablag‘lar;

xo‘jalik faoliyatidan, shu jumladan noshirlik faoliyatidan olingan daromadlar;

Assotsiatsiya ustavida nazarda tutilgan tadbirlarni o‘tkazishdan tushgan tushumlar;

O‘zbekiston Futbol assotsiatsiyasi va boshqa tashkilotlarning moliyaviy qo‘llab-quvvatlashi, shuningdek jismoniy va yuridik shaxslarning xayriya badallari;

pulli xizmatlar ko‘rsatish, Hududiy assotsiatsiyaning rasmiy ramzlaridan foydalanish, davlat tashkilotlari va boshqa tashkilotlardan tushadigan subsidiyalar, shuningdek qonun hujjatlariga zid bo‘lmagan boshqa manbalar va daromadlardan shakllantiriladi.

29. Hududiy assotsiatsiyaning moliyaviy mablag‘lari va daromadlari futbolni rivojlantirish va ommalashtirish qatnashchilari, Hududiy assotsiatsiya a’zolari va har qanday boshqa shaxslar o‘rtasida taqsimlanmaydi hamda faqat Hududiy assotsiatsiyaning tegishli maqsadlari, vazifalari va faoliyati xarajatlariga yo‘naltirilishi mumkin.

30. Qonun hujjatlarida nazarda tutilgan soliqlar va boshqa majburiy to‘lovlar belgilangan tartibda Hududiy assotsiatsiya tomonidan to‘lanadi.

31. Hududiy assotsiatsiya qonun hujjatlariga muvofiq o‘z faoliyati natijalarining buxgalteriya hisobini amalga oshiradi, statistika hisoboti yuritadi, hisobot ma’lumotlari va balans hisob-kitoblarining ishonchliligini ta’minlaydi.

32. Hududiy assotsiatsiya va uning organlarining mol-mulki va hujjatlari qonun hujjatlarida belgilangan tartibda hisobga olinadi.

33. Hududiy assotsiatsiya tegishli hududda futbolni rivojlantirishga tegishli barcha masalalarda O‘zbekiston Futbol federatsiyasi bilan mustahkam aloqada ishlaydi va unga hisob beradi. Hududiy assotsiatsiya O‘zbekiston Futbol federatsiyasiga har yilgi hisobot taqdim etadi.

34. Hududiy assotsiatsiya qonun hujjatlariga muvofiq ro‘yxatdan o‘tkazuvchi va boshqa organlarga hisobotlar taqdim etadi.

35. Assotsiatsiya tomonidan Xalqaro Futbol Federatsiyasi, Osiyo Futbol Konfederatsiyasi va O‘zbekiston Futbol assotsiatsiyaning qarorlari, Futbol o‘yini qoidalari buzilganligi uchun belgilangan tartibda quyidagi tegishli intizomiy choralar qo‘llanilishi mumkin:

Hududiy assotsiatsiyaning jamoa a’zolariga, tegishli hududning futbol bo‘yicha sport tadbirlarini ommalashtiradigan yoki o‘tkazadigan futbol klublari va tashkilotlariga — ogohlantirish, jarima solish, o‘yinni tomoshabinlarsiz o‘tkazish, o‘yin natijalarini bekor qilish, muayyan stadionda o‘yin o‘tkazishni taqiqlash, o‘yinni betaraf maydonda o‘tkazish, musobaqalarda qatnashishni taqiqlash, transferni taqiqlash, ochkolarni olib tashlash, quyi divizionga o‘tkazish, a’zolikdan chiqarish;

Hududiy assotsiatsiyaning yakka tartibdagi a’zolariga (futbol bo‘yicha trenyerlarga, futbolchilarga, futbol bo‘yicha hakamlarga, shuningdek tegishli hududdagi futbol bo‘yicha boshqa mutaxassislarga) — ogohlantirish, jarima, musobaqalarda qatnashish natijalarini bekor qilish, musobaqalarda ishtirok etishdan chetlatish, musobaqalarda ishtirok etishni taqiqlash, o‘yinda qatnashishdan mahrum etish, mukofotdan mahrum qilish, malakasidan mahrum qilish yoki uni pasaytirish, tegishli hududda futbol bilan bog‘liq bo‘lgan har qanday faoliyatda ishtirok etishdan chetlatish.

36. Hududiy assotsiatsiyani tugatish belgilangan tartibda amalga oshiriladi.

Hududiy assotsiatsiyani tugatish O‘zbekiston Respublikasi Fuqarolik kodeksi va boshqa qonun hujjatlarida nazarda tutilgan tartibda amalga oshiriladi.

37. Kreditorlar talablari qondirilgandan keyin qolgan mol-mulk Hududiy assotsiatsiya ishtirokchilari (a’zolari), shuningdek rahbar organlar a’zolari yoki Hududiy assotsiatsiya xodimlari o‘rtasida taqsimlanishi mumkin emas va ulardan futbolni rivojlantirish uchun belgilangan tartibda foydalaniladi.

38. Davlat tashkilotlari va boshqa tashkilotlar Hududiy assotsiatsiyaga har tomonlama yordam ko‘rsatishi mumkin. Davlat tashkilotlari va boshqa tashkilotlar tomonidan yordam ko‘rsatish qonun hujjatlarida belgilangan tartibda tuzilgan kontraktlar (shartnomalar) asosida amalga oshiriladi.

39. Assotsiatsiyaning O‘zbekiston Futbol assotsiatsiyasiga a’zoligi O‘zbekiston Futbol assotsiatsiyasi ustaviga muvofiq belgilanadi.

40. Futbol bo‘yicha paydo bo‘ladigan barcha bahsli masalalar, qoidaga ko‘ra,Assotsiatsiya va O‘zbekiston Futbol assotsiatsiyasida ko‘rib chiqiladi.

41. Federatsiyaning xatti-harakati oqibatida Xalqaro Futbol Federatsiyasi, Osiyo Futbol Konfederatsiyasi yoki boshqa vakolatli tashkilotlar tomonidan O‘zbekiston Futbol federatsiyasiga jarima sanksiyalari qo‘llanilgan taqdirda, unda bu sanksiyalar Federatsiyaning o‘zi tomonidan qoplanishi kerak.

42. Federatsiyaning moliyaviy-xo‘jalik faoliyatini tekshirish qonun hujjatlarida belgilangan tartibda amalga oshiriladi.

43. Federatsiya faoliyatini nazorat qilish ro‘yxatdan o‘tkazgan va boshqa vakolatli tashkilotlar tomonidan, belgilangan tartibda amalga oshiriladi.

44. Xalqaro Futbol Federatsiyasi, Osiyo Futbol Konfederatsiyasi va O‘zbekiston Futbol federatsiyasining normativ hujjatlari Federatsiya va tegishli hududda futbolni rivojlantirayotgan barcha tashkilotlar uchun amal qilinadigan hujjatlar hisoblanadi.

45. Mazkur Namunaviy nizomda tartibga solinmagan munosabatlar tegishli qonun hujjatlariga muvofiq belgilanadi.