Oʻzbekiston Respublikasining Budjet kodeksi va Oʻzbekiston Respublikasi Prezidentining 2007-yil 28-fevraldagi PQ-594-son “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida”gi qaroriga asosan buyuraman:

1. Ilova qilinayotgan Mudofaa majmui va huquqni muhofaza qilish organlari muassasalari va tashkilotlarining budjet xarajatlari va boshqa maxfiy xarakterga ega boʻlgan xarajatlarning gʻazna ijrosi tartibi haqidagi nizom tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining Budjet kodeksi va Oʻzbekiston Respublikasi Prezidentining 2007-yil 28-fevraldagi PQ-594-son “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida”gi qaroriga muvofiq Oʻzbekiston Respublikasi Mudofaa vazirligi, Ichki ishlar vazirligi va Favqulodda vaziyatlar vazirligi, Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi va Davlat zaxiralarini boshqarish qoʻmitasi korxonalari, tashkilotlari, muassasalari hamda harbiy qismlari xarajatlari, shuningdek maxfiy xususiyatga ega xarajatlari boʻlgan boshqa budjet tashkilotlarining (keyingi oʻrinlarda — budjet tashkilotlari) maxfiy xarajatlarning gʻazna ijrosi tartibini belgilaydi.

1. Budjet tashkilotlarining tovar (ish, xizmat)lar yetkazib beruvchilar (keyingi oʻrinlarda — mahsulot yetkazib beruvchilar) bilan shartnomalarini roʻyxatga olish (hisobga olish) va ularning xarajatlarini toʻlab berish, shu jumladan maxfiy xarakterga ega boʻlgan budjet xarajatlari toʻlovlarini amalga oshirish boʻyicha vazifa va funksiyalarni bajarish Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasi va uning hududiy boʻlinmalari (keyingi oʻrinlarda — gʻaznachilik boʻlinmalari) tomonidan amalga oshiriladi.

2. Davlat budjeti xarajatlarining gʻazna ijrosi bilan qamrab olinadigan gʻaznachilik boʻlinmalari, budjet tashkilotlarining roʻyxati, zarur hollarda tegishli vazirlik va idoralar bilan kelishilgan holda, Oʻzbekiston Respublikasi Iqtisodiyot va moliya vazirligi tomonidan belgilanadi.

Budjet tashkilotlari bilan ishlash uchun, shuningdek, maxfiy xarakterga ega boʻlgan xarajatlar, jumladan Oʻzbekiston Respublikasi Vazirlar Mahkamasining zaxira jamgʻarmasi, Qoraqalpogʻiston Respublikasi, viloyatlar va Toshkent shahar budjetlari mablagʻlari hisobidan amalga oshirilgan hollarda, har bir gʻaznachilik boʻlinmasida maxfiy maʼlumotlar bilan ishlashga oʻrnatilgan tartibda ruxsat olgan alohida xodimlar aniqlanadi.

3. Yuqorida koʻrsatilgan budjet tashkilotlari bilan ishlashda Oʻzbekiston Respublikasi Iqtisodiyot va moliya vazirligining Axborot texnologiyalar markazi va gʻaznachilik boʻlinmalari tomonidan maʼlumotlar xavfsizligi rejimini taʼminlash boʻyicha zarur choralar koʻriladi.

4. Budjet tashkilotlarining maxfiy xarakterga ega boʻlgan xarajatlari Iqtisodiyot va moliya vazirligining Yagona gʻazna hisobvaragʻidan (keyingi oʻrinlarda — YAGʻH) mazkur Nizom talablari doirasida toʻlanadi.

Bunda budjet tashkilotlarining ish haqi va unga tenglashtirilgan mablagʻlarini naqd pulda olish uchun ularning tegishli banklardagi 23404, 23432, 23430, 23426 balans hisobvaraqlaridan foydalaniladi.

4¹. Budjet tashkilotlari 23404, 23432, 23430, 23426 balans hisobvaraqlaridan majburiy toʻlovlarni amalga oshirish va naqd pul mablagʻlari olish uchun tegishli bankka toʻlov hujjati va chek taqdim qilish yoʻli bilan mablagʻlarni tasarruf qiladilar.

Bunda ushbu hisobvaraqlarda ishlatilmagan mablagʻlar moliya yili mobaynida YAGʻHga qaytarilishi lozim.

4². YAGʻHdan xarajatlar Davlat budjeti xarajatlarining iqtisodiy tasnifi 4821190 xarajatlar moddasida aks ettirish orqali amalga oshiriladi.

Bunda budjet tashkilotlari xarajatlarining gʻazna ijrosi nazorati Davlat budjeti xarajatlarining iqtisodiy tasnifiga muvofiq tuzilgan xarajatlar smetasining choraklik ajratilgan mablagʻlari doirasida alohida axborot tizimda amalga oshiriladi.

4³. Budjet tashkilotlari toʻlovlarni amalga oshirish uchun Oʻzbekiston Respublikasi budjet tizimi budjetlarining gʻazna ijrosi qoidalarida (roʻyxat raqami 2850, 2016-yil 22-dekabr) belgilangan tartibda gʻaznachilik boʻlinmalariga imzolar namunalari va muhr izi kartochkasi taqdim etadilar.

4⁴. Moliya yiliga qoʻshimcha davrda va joriy moliya yilida oʻtgan moliya yilining kreditor qarzdorliklarini toʻlash Oʻzbekiston Respublikasi budjet tizimi budjetlarining gʻazna ijrosi qoidalarida (roʻyxat raqami 2850, 2016-yil 22-dekabr) belgilangan tartibda amalga oshiriladi.

8. Budjet tashkilotlari yoki iqtisodiyot va moliya organlari tomonidan tegishli iqtisodiyot va moliya organlarida oʻrnatilgan tartibda roʻyxatga olingan yakka tartibdagi va umumiy xarajatlar smetasi hamda ularga oʻzgartirishlar gʻaznachilik boʻlinmalariga taqdim etiladi.

Bunda iqtisodiyot va moliya organlari tomonidan taqdim qilingan xarajatlar smetasiga oʻzgartirishlar nazorati gʻaznachilik boʻlinmalari tomonidan choraklik ajratilgan mablagʻlar doirasida amalga oshiriladi.

9. Gʻaznachilik boʻlinmalari tomonidan yuridik majburiyatlarni roʻyxatga olish (hisobga olish) va kassa xarajatlarini amalga oshirish faqat ularga budjet tashkilotlari xarajatlar smetalarini taqdim qilgandan soʻng amalga oshirilishi mumkin.

11. Kapital qurilish obyektlari boʻyicha kapital qurilish buyurtmachilari kapital qurilish obyektlari boʻyicha tegishli iqtisodiyot va moliya organlari bilan kelishilgan, qurilishlarning manzilli roʻyxati (loyiha-tadqiqot ishlarining manzilli roʻyxati) va qurilishlarning titul roʻyxati asosida tuzilgan, xarajatlarning oylik boʻlinmasini (keyingi oʻrinlarda — kapital qurilish boʻyicha xarajatlar smetasi) gʻaznachilik boʻlinmalariga taqdim qiladi.

Kapital qurilish boʻyicha xarajatlar smetasiga aniqliklar qurilishlarning aniqlangan manzilli va titul roʻyxatlari asosida, davlat xaridlarining oʻtkazilishi va yuqoridagi qurilishlar roʻyxatlarini oʻrnatilgan tartibda tasdiqlanishiga qarab kiritiladi.

12. Gʻaznachilik boʻlinmalari budjet tashkilotlarining mahsulot yetkazib beruvchilar bilan shartnomalar tuzishi va ular tomonidan Davlat budjeti xarajatlarining iqtisodiy tasnifining tegishli moddalari boʻyicha kreditorlik qarzlarni hisobga olgan holda, xarajatlar smetasida ajratilgan choraklik mablagʻlar doirasida amalga oshirilishi ustidan nazorat qiladi.

13. Asosiy xarajatlar smetalari roʻyxatga olingandan soʻng, budjet tashkilotlari va ularning mahsulot yetkazib beruvchilar bilan vaqtinchalik xarajatlar smetalari asosida oldin tuzgan shartnomalarini roʻyxatga olingan asosiy xarajatlar smetalariga muvofiqlashtirish maqsadida, zarur boʻlgan hollarda, oʻzgartirishlar kiritilishi mumkin.

15. Tegishli budjetlarning daromadlar va xarajatlar yoyilmasiga, budjet tashkilotlarining xarajatlar smetalariga, kapital qurilishning smeta xarajatlariga (qurilishlarning manzilli va titul roʻyxatlariga (loyiha-tadqiqot ishlarining manzilli roʻyxatiga) oʻzgartirishlar kiritish, iqtisodiyot va moliya organlari tomonidan budjet tashkilotlari, buyurtmachilar hamda kiritilayotgan oʻzgartirishlarni tegishli gʻaznachilik boʻlinmalari bilan majburiy tartibda kelishilgan holda amalga oshiriladi.

16. Qabul qilingan yuridik majburiyatlarning ajratilgan mablagʻlar summasidan, shuningdek kassa xarajatlarining aniqlangan mablagʻlari summasidan ortiqcha amalga oshirilishiga olib keladigan miqdorda mablagʻlarini kamaytirishga yoʻl qoʻyilmaydi.

Shu bilan birga, ajratiladigan mablagʻlarining kamaytirilishi tomonlar yuridik majburiyatini oʻzaro kamaytirgan holda amalga oshirilishi mumkin.

Ajratilgan mablagʻlar koʻpaytirilgandan soʻng, budjet tashkilotlari va ularning mahsulot yetkazib beruvchilari oʻrtasida tuzilgan xoʻjalik shartnomalariga tomonlarning yuridik majburiyatlari aynan bir xilda koʻpaytirilishini koʻzda tutadigan oʻzgartirishlar kiritish mumkin.

17. Budjet tashkilotlari tashabbusi bilan xarajatlar smetalariga kiritilayotgan kamaytirishlarning gʻaznachilik boʻlinmalari bilan kelishuvi quyidagi tartibda amalga oshiriladi:

1) budjet tashkiloti tegishli xat bilan xizmat koʻrsatuvchi gʻaznachilik boʻlinmasiga xarajatlar smetasiga oʻzgartirish soʻrovini (keyingi oʻrinlarda — soʻrov) taqdim qiladi;

2) gʻaznachilik boʻlinmasi:

tuzilgan va roʻyxatga olingan (hisobga olingan) shartnomalar (kassa xarajatlari) summalarini taklif qilinayotgan aniqliklarni hisobga olgan holda aniqlangan (taklif qilinayotgan) mablagʻlar summalaridan oshmaganligi boʻyicha soʻrovni tekshiradi;

kamaytirish rejalashtirilayotgan mablagʻlar boʻyicha budjet tashkilotining tegishli xarajatlar moddalari boʻyicha yuridik majburiyatlarni roʻyxatga olish (hisobga olish) va xarajatlar toʻlovlarini amalga oshirishni vakolatli organ tomonidan budjet tashkilotining xarajatlar smetasiga oʻzgartirishlar kiritish toʻgʻrisidagi tegishli qarori qabul qilingunga qadar (kamaytirish koʻzlanayotgan summalar qismida), toʻxtatib qoʻyadi;

bir ish kunidan oshmagan muddatda soʻrovga “KELISHILDI” shtamp, imzo va roʻyxatga olingan sana qoʻyilgan holda budjet tashkilotiga qaytariladi.

3) gʻaznachilik boʻlinmasiga kelishuv uchun taqdim qilingan oʻzgartirish soʻrovi asosli sabablarga koʻra qondirilishi mumkin boʻlmagan hollarda, gʻaznachilik boʻlinmasi bir kun muddatda qaytarish sabablarini koʻrsatgan holda yozma ravishda qaytaradi.

18. Budjet tashkiloti kelishilgan soʻrovni olgandan soʻng ikki ish kuni mobaynida uni ajratilgan budjet mablagʻlarini bosh taqsimlovchisi orqali tegishli iqtisodiyot va moliya organiga yuboradi.

Iqtisodiyot va moliya organi oʻzgartirish kiritishni rad qilgan holatda, budjet tashkiloti majburiyatlar olish va xarajatlarni amalga oshirishni toʻxtatib qoʻyilishini bekor qilish uchun tegishli iqtisodiyot va moliya organining xatini ilova qilgan holda xizmat koʻrsatuvchi gʻaznachilik boʻlinmasiga xat yuboradi.

20. Budjet tashkilotlarining tasdiqlangan mablagʻlariga kamaytirishlar kiritilishi zarur boʻlganda, mazkur Nizomning 17-bandida koʻrsatilgan holatlardan tashqari, iqtisodiyot va moliya organlari budjet tashkilotlarining xarajatlar smetalariga oʻrnatilgan tartibda kiritilayotgan oʻzgartirishlarni gʻaznachilik boʻlinmasiga ular tuzilgan kundan soʻng ikki ish kunidan kechikmagan muddatda kelishish uchun taqdim qiladi (taqdimnoma, maʼlumotnoma-bildirishnoma va boshqalar).

22. Gʻaznachilik boʻlinmalari mazkur Nizomning 20-bandida koʻrsatilgan, taklif qilinayotgan oʻzgartirishlarni kiritish mumkinligi yuzasidan tegishli budjetlarda turuvchi budjet tashkilotlari boʻyicha amalga oshirilgan kassa xarajatlari, shuningdek band qilinmagan yuridik majburiyatlarni tasdiqlangan mablagʻlar bilan solishtirish orqali koʻrib chiqadi.

Bunda hududlarda joylashgan, respublika budjetidan mablagʻ oluvchi budjet tashkilotlari oʻzgartirish boʻyicha yuqorida koʻrsatilgan hujjatlarni joylardagi tegishli gʻaznachilik boʻlinmasiga taqdim qiladi.

23. Tekshiruvlar ijobiy natijalar berganda va koʻrsatilgan xarajatlar turlari boʻyicha xarajatlar smetasiga taklif qilinayotgan oʻzgartirishlar kiritishning imkoni mavjud boʻlganda, gʻaznachilik boʻlinmalari:

gʻaznachilikning dasturiy majmuida kamaytirilishi koʻzlanayotgan tegishli budjet tashkilotlarining keyingi yuridik majburiyatlarini roʻyxatga olish (hisobga olish) va kassa xarajatlarini amalga oshirishni toʻxtatib qoʻyadi;

hujjatlar taqdim qilingan kunning keyingi kunidan kechikmagan muddatda, ijobiy xulosani taqdim qilingan hujjatlar bilan birgalikda tegishli iqtisodiyot va moliya organiga yoʻllaydi.

Bunda gʻaznachilik boʻlinmalari tomonidan yuridik majburiyatlarni qabul qilish, shuningdek budjet tashkilotlarining keyingi kassa xarajatlarini amalga oshirishni toʻxtatib qoʻyishni bekor qilish iqtisodiyot va moliya organlari tomonidan gʻaznachilik boʻlinmalariga, gʻaznachilik boʻlinmalari bilan oʻrnatilgan tartibda kelishilgan asosda barcha tasdiqlangan va roʻyxatga olingan, budjet tashkilotlarining tasdiqlangan tegishli yakka tartibdagi smetalariga kiritilgan oʻzgartirishlar roʻyxati nusxalari taqdim qilingandan soʻng amalga oshiriladi.

24. Yuridik majburiyatlar bilan band boʻlmagan ajratilgan mablagʻlar mavjud boʻlmaganda hamda iqtisodiyot va moliya organlariga taqdim qilingan hujjatlarda taklif qilinayotgan oʻzgartirishlar kiritishning imkoni boʻlmagan hollarda, gʻaznachilik boʻlinmalari ularni iqtisodiyot va moliya organlari tomonidan hujjatlar taqdim qilingan kundan boshlab ikki ish kunidan kechikmagan muddatda, taklif qilinayotgan oʻzgartirishlarni kiritish imkoni yoʻqligi sabablarini koʻrsatgan holda yozma xulosa tuzadi va moliya organiga qaytaradi.

25. Hujjatlar loyihasi va hisob-kitoblar boʻyicha iqtisodiyot va moliya organi gʻaznachilik boʻlinmasidan salbiy xulosa olgandan soʻng, iqtisodiyot va moliya organi oʻrnatilgan tartibda hujjatlarni qayta ishlash va budjet tashkilotlarining tasdiqlangan mablagʻlariga oʻzgartirishlar kiritishga toʻsqinlik qiluvchi sabablarni bartaraf qilish boʻyicha choralar koʻradi.

31. Budjet tashkilotlarining tovar (ish, xizmat) yetkazib beruvchilar bilan shartnomalari, shuningdek, Davlat budjeti hisobidan kapital qurilish buyurtmachilarining shartnomalari gʻaznachilik boʻlinmalarida majburiy roʻyxatga olinadi.

Bunda, budjet tashkilotlarining tovar (ish, xizmat) yetkazib beruvchilar bilan budjet mablagʻlari hisobidan tuzadigan shartnomalarida qonunchilik hujjatlarida koʻzda tutilgan holatlardan tashqari, belgilangan tartibda 15 foiz miqdorida oldindan toʻlov amalga oshirilishi koʻzda tutiladi.

32. Gʻaznachilik boʻlinmalari tomonidan budjet tashkilotlarining shartnomalari:

budjetdan ajratiladigan mablagʻlar boʻyicha — roʻyxatdan oʻtkaziladi;

vazirliklar, davlat qoʻmitalari va idoralarning budjetdan tashqari jamgʻarmalari mablagʻlari boʻyicha — hisobga olinadi.

33. Budjet tashkilotlari tomonidan yuridik majburiyatlarning qabul qilinishi, ularning xarajatlar smetalarida Davlat budjeti xarajatlarining iqtisodiy tasnifining tegishli moddalari boʻyicha koʻzda tutilgan, ajratiladigan mablagʻlari hajmi doirasida amalga oshiriladi.

37. Budjet tashkilotlari tomonidan tashqi qarzlarning jalb qilinishi, ssuda va kreditlar olinishi, shuningdek budjetdan ajratiladigan mablagʻlar hisobiga lizing shartnomalarini tuzish taqiqlanadi, qonunchilik hujjatlarida nazarda tutilgan hollar bundan mustasno.

39. Tovar (ish, xizmat)lar toʻlovi bir nechta manbalar mablagʻi hisobidan amalga oshirilishi koʻzda tutilgan hollarda, shartnomalarda majburiy ravishda ushbu manbalar boʻyicha rekvizitlar va ular hisobidan toʻlanishi lozim boʻlgan summalar alohida koʻrsatiladi.

43. Budjet tashkilotlarining ichki xoʻjalik yurituvchi boʻlinmalari tomonidan tovarlar yetkazib berish, ishlar bajarish yoki xizmatlar koʻrsatish (Oʻzbekiston Respublikasi Mudofaa vazirligi va Ichki ishlar vazirligining kir yuvish boʻlinmalari, mehmonxonalari, taʼmirlash-qurilish guruhlari (brigadalari) va qishloq xoʻjaligi mahsulotlarini yetishtirish va goʻsht-sut mahsulotlarini ishlab chiqarish bilan shugʻullanadigan yordamchi xoʻjaliklari) qonunchilik hujjatlarida belgilangan tartibga muvofiq budjet mablagʻlari hisobidan ichki xoʻjalik shartnomalari va toʻlovlarni amalga oshirish uchun asos boʻladigan, ichki xoʻjalik shartnomalari boʻyicha tovar (ish, xizmat)lar yetkazib berilganligini tasdiqlovchi hujjatlar asosida amalga oshiriladi.

Bunda budjet tashkilotlari tomonidan taqdim qilingan hujjatlar asosida toʻlovlarni oʻtkazish gʻaznachilik boʻlinmalari tomonidan Oʻzbekiston Respublikasi Mudofaa vazirligi va Ichki ishlar vazirligining, qoidaga koʻra, budjetdan tashqari hisobvaraqlariga keyinchalik ularni qonunchilik hujjatlariga muvofiq koʻzda tutilgan maqsadlarga ishlatish bilan amalga oshiriladi.

44. Shartnomalar tuzmasdan, mazkur Nizomning 3-ilovasidagi shakl boʻyicha ikki nusxada Soʻrovnoma va toʻlov topshiriqnomalari asosida mablagʻlar quyidagilarga:

sud qarorlari boʻyicha toʻlovlar, davlat bojlari, yigʻimlar toʻlaganda, yuridik majburiyatlar qabul qilinishi boshqa tasdiqlovchi hujjatlar (hisobvaraqlar, kvitansiyalar, Hukumat qarorlari va boshqalar) asosida shartnomalar tuzmasdan amalga oshirilishi mumkin;

hisobot choragi (yili) yakuni boʻyicha budjet mablagʻlarining iqtisod qilingan qismida Budjet tashkilotlarining rivojlantirish jamgʻarmasiga oʻtkaziladi.

kapital qoʻyilma buyurtmachilarining buyurtmachi xizmatini saqlab turishga mablagʻlarni oʻtkazish.

45. Budjet tashkilotlari soʻmdagi qiymatiga qayta hisoblangan, chet el valyutasidagi import qilinayotgan tovar-moddiy boyliklar uchun shartnomalar tuzishda yuzaga kelishi mumkin boʻlgan kurs farqini qoplash uchun yetarli mablagʻlar zaxirasini koʻzda tutishlari shart.

Yuzaga kelishi mumkin boʻlgan kurs farqini qoplash uchun yetarli mablagʻlarning zaxirasi har bir shartnoma boʻyicha yakka tartibda budjet tashkilotlari va gʻaznachilik boʻlinmalari tomonidan, zarur boʻlganda — tegishli iqtisodiyot va moliya organi ishtirokida shartnomaning tuzilgan sanasi, koʻzda tutilayotgan muddatlari va valyuta kursining kutilayotgan oʻzgarishlari bilan bogʻliq holda aniqlanadi.

46. Summasi chet el valyutasida koʻrsatilgan shartnomalar va hisobvaraq-fakturalar asosida import qilingan tovarlar (ishlar, xizmatlar) boʻyicha yuridik va moliyaviy majburiyatlar gʻaznachilik boʻlinmalari tomonidan oxirgi toʻlov sanasida ushbu vaqtgacha hosil boʻlgan kassa xarajatlari yigʻindisining oʻrtacha kursi boʻyicha amalga oshiriladi.

47. Budjet tashkilotlarining mahsulot yetkazib beruvchilar bilan tuzgan shartnomalari Oʻzbekiston Respublikasining “Xoʻjalik yurituvchi subyektlar faoliyatining shartnomaviy-huquqiy bazasi toʻgʻrisida”gi Qonuniga muvofiq, tomonlarning yuridik xizmatlari (jalb qilingan advokatlar) tomonidan majburiy tartibda qonunchilik hujjatlariga muvofiqligi tekshirilishi shart.

Bunda shartnomalarda tomonlar yuridik xizmatlarining yoki jalb qilingan advokatlarning imzosi boʻlishi shart.

48. Shartnomalar, shuningdek, ularga qoʻshimcha kelishuvlar aniq va ravshan, siyoh yoki sharikli ruchka yoki (yozuv, hisoblash) mashinada yozilgan holda toʻldirilishi lozim. Hech qanday tuzatishlar, oʻchirib yozishlar yoki toʻgʻrilashlarga oldindan kelishib olingan boʻlsa ham yoʻl qoʻyilmaydi.

50. Budjet tashkilotlari va mahsulot yetkazib beruvchilar bilan budjet mablagʻlari hisobi qismidan tuzilgan shartnomalar, faqat ularning gʻaznachilik boʻlinmalarida roʻyxatga olinganidan soʻng kuchga kiradi.

51. Budjet tashkilotlari bilan mahsulot yetkazib beruvchilar oʻrtasida tuziladigan shartnomalar tegishli gʻaznachilik boʻlinmalarida ularga berilgan tegishli raqam va roʻyxatga olingan (hisobga olingan) sana koʻrsatilgan holda majburiy roʻyxatga olinishi (hisobga olinishi) lozim.

52. Budjet tashkilotlari gʻaznachilik boʻlinmalariga shartnomani roʻyxatga olish (hisobga olish) uchun shartnomaning ikki asl nusxasi va bitta koʻchirma nusxasi bilan birgalikda quyidagi hujjatlarni taqdim qiladi:

mazkur Nizomning 1-ilovasiga muvofiq shaklda toʻlov jadvali;

xarid qilish tartib-taomillarini tashkil etish va oʻtkazish chogʻida xarid komissiyasini shakllantirish talab etiladigan hollarda gʻolibni aniqlash boʻyicha xarid komissiyasi majlisining bayonnomasi nusxasi;

agar shartnoma qonunchilikka muvofiq toʻgʻridan-toʻgʻri tuzilgan boʻlsa, mazkur shartnoma tuzish uchun asos boʻlgan hujjatning nusxasi;

tegishli faoliyat turini amalga oshirish uchun qonunchilikda litsenziyalash yoki ruxsat etish xususiyatiga ega boshqa hujjat olish yoxud vakolatli organga faoliyatni boshlaganlik haqida xabarnoma yuborish talabi mavjud boʻlgan hollarda tegishli ravishda litsenziya yoki ruxsat etish xususiyatiga ega boshqa hujjat yoxud faoliyatni boshlaganlik haqidagi xabarnomaning nusxasi.

53. Gʻaznachilik boʻlinmasi budjet tashkiloti tomonidan shartnoma taqdim qilingan kundan boshlab uch ish kuni davomida shartnomada koʻrsatilgan summani budjet tashkilotining xarajatlar smetasida koʻzda tutilgan tegishli rejali ajratilgan mablagʻlarning mavjudligini tekshiradi.

Agar tuzilgan shartnomaga muvofiq toʻlanishi lozim boʻlgan pul mablagʻlari summasi budjet tashkilotining xarajatlar smetasida koʻzda tutilgan tegishli rejali ajratilgan mablagʻlar summasidan oshsa, ushbu shartnoma budjet tashkilotiga uni gʻaznachilik boʻlinmasi tomonidan roʻyxatga olinmasdan (hisobga olinmasdan) qaytariladi.

54. Shartnomalarni roʻyxatga olish, shartnomaning ikkita asli va nusxasining barcha varaqlariga roʻyxatdan oʻtkazish raqami va sanasini koʻrsatib “Roʻyxatdan oʻtkazildi” shtampini va shaxsiy imzosini qoʻyish, shuningdek gʻaznachilik boʻlinmasining vakolatli shaxsi tomonidan shaxsiy imzosini va “Yuridik majburiyatlarni roʻyxatdan oʻtkazish” muhrini qoʻyish yoʻli orqali amalga oshiriladi.

Shartnomalarni hisobga olish, shartnomaning ikkita asli va nusxasining barcha varaqlariga hisobga olish raqami va sanasini koʻrsatgan holda “Shartnoma boʻyicha toʻlovlar shaxsiy gʻazna hisobvaragʻi qoldigʻi doirasida amalga oshiriladi” yozuvi bilan “Hisobga olindi” shtampini va shaxsiy imzosini qoʻyish hamda vakolatli shaxs tomonidan shaxsiy imzosini qoʻyish yoʻli orqali amalga oshiriladi.

Roʻyxatga va hisobga olinganidan soʻng shartnomaning koʻchirma nusxasi gʻaznachilik boʻlinmasida hisob yuritish va saqlash uchun qoldiriladi.

55. Shartnomalar hisobi Gʻaznachilik dasturiy majmuida elektron tarzda budjet tashkiloti va mahsulot yetkazib beruvchining nomi va rekvizitlari, shuningdek shartnoma summasi, uning raqami va tuzilgan sanasi, gʻaznachilik boʻlinmasi tomonidan uni roʻyxatga olish (hisobga olish) raqami va sanasi koʻrsatilgan holda budjet tashkilotlarining tovar (ish, xizmat)lar yetkazib beruvchilar bilan tuzgan shartnomalarini roʻyxatga olish (hisobga olish) Kitobida mazkur Nizomning 2-ilovasiga muvofiq shakl boʻyicha amalga oshiriladi.

56. Maxfiy xarajatlar boʻyicha yuridik majburiyatlarni roʻyxatga olish (hisobga olish) uchun budjet tashkiloti tomonidan gʻaznachilik boʻlinmasiga shartnomaning asl nusxasi, mazkur Nizomning 3-ilovasidagi shakl boʻyicha ikki nusxada soʻrovnoma hamda mazkur Nizomning 52-bandida koʻrsatilgan hujjatlar taqdim qilinadi.

57. Gʻaznachilik boʻlinmasining masʼul xodimi budjet tashkilotining vakolatli vakili ishtirokida soʻrovnomada koʻrsatilgan maʼlumotlarni shartnomaning asl nusxasida koʻrsatilgan maʼlumotlar bilan, shuningdek mazkur Nizomning 52-bandida koʻrsatilgan hujjatlarni shartnoma bilan solishtiradi.

Barcha solishtirishlar tugaganidan soʻng shartnoma va unga ilova qilingan mazkur Nizomning 52-bandida koʻrsatilgan barcha hujjatlar budjet tashkilotining vakolatli vakiliga qaytariladi.

Gʻaznachilik boʻlinmasi xodimlari tomonidan taqdim qilingan shartnomaning va unga ilova qilingan hujjatlarning asl nusxasidan nusxa olish qatʼiyan man qilinadi;

58. Taqdim qilingan soʻrovnomada xato va (yoki) kamchiliklar mavjud boʻlmagan holda soʻrovnomada koʻrsatilgan shartnomani roʻyxatga olish (hisobga olish) boʻyicha keyingi tadbirlarni amalga oshirish uchun soʻrovnoma qabul qilinadi.

Aks holda, soʻrovnoma budjet tashkilotiga mavjud xato va (yoki) kamchiliklarni bartaraf qilish uchun qaytariladi;

59. Gʻaznachilik boʻlinmasi budjet tashkiloti tomonidan soʻrovnomani qabul qilgan kundan boshlab uch ish kuni davomida shartnomada koʻrsatilgan summani budjet tashkilotining xarajatlar smetasida koʻzda tutilgan tegishli rejali ajratilgan mablagʻlarining mavjudligini tekshiradi.

Agar soʻrovnoma va tuzilgan shartnomaga muvofiq toʻlanishi lozim boʻlgan pul mablagʻlari summasi budjet tashkilotining xarajatlar smetasida koʻzda tutilgan tegishli rejali ajratilgan mablagʻlar summasidan oshsa, ushbu shartnoma gʻaznachilik boʻlinmasida roʻyxatga olinmaydi (hisobga olinmaydi), tegishli soʻrovnoma esa budjet tashkilotiga qaytariladi.

60. Maxfiy xarajatlar boʻyicha shartnomalarni roʻyxatga olish (hisobga olish), soʻrovnomalar asosida soʻrovnomalarning old tomoniga “Roʻyxatdan oʻtkazildi” (“Hisobga olindi”) shtampi qoʻyilgan va roʻyxatga olingan (hisobga olish) raqam va sanasi koʻrsatilgan kundan boshlab uch ish kuni davomida gʻaznachilik boʻlinmasining mansabdor shaxsi oʻzining shaxsiy imzosi va gʻaznachilik boʻlinmasining muhr izi bilan tasdiqlash orqali amalga oshiriladi.

Roʻyxatga olingandan (hisobga olingandan) soʻng soʻrovnomaning ikki nusxasi budjet tashkilotiga qaytariladi, bir nusxasi esa gʻaznachilik boʻlinmasida hisob yuritish va saqlash uchun qoldiriladi;

61. Oʻzbekiston Respublikasi Vazirlar Mahkamasi, Qoraqalpogʻiston Respublikasi, viloyatlar va Toshkent shahar budjetlarining Zaxira jamgʻarmalari hisobidan maxfiy xarakterga ega boʻlgan xarajatlar toʻlovlari budjet tashkilotlarining soʻrovnomasi boʻyicha mazkur Nizomda budjet tashkilotlarining maxfiy xarajatlari amalga oshirish uchun koʻzda tutilgan tartib bilan bir xilda amalga oshiriladi.

63. Budjet tashkilotlari tomonidan ikkinchi taraf oldida moliyaviy majburiyatlar ularga yetkazib beriladigan tovar (ish, xizmat)lar uchun oʻtkazilishi lozimligini tasdiqlovchi hujjatlar, hisoblangan ish haqi va unga tenglashtirilgan xarajatlar boʻyicha qarzdorlik asosida qabul qilinadi.

64. Moliyaviy majburiyatlar, oldin tuzilgan shartnomalar — qabul qilingan yuridik majburiyatlar doirasida qabul qilinadi, ish haqi va unga tenglashtirilgan xarajatlar boʻyicha moliyaviy majburiyatlar, shuningdek, davlat boji, yigʻimlar, badallar, majburiy toʻlovlar va shunga oʻxshash moliyaviy majburiyatlar bundan mustasno.

65. Maxfiy xarajatlar boʻyicha toʻlovlarni amalga oshirish uchun budjet tashkilotlari tomonidan gʻaznachilik boʻlinmalariga toʻlov hujjatlarini hisobvaraq-faktura bilan birga taqdim qilinadi.

Bunda hisobvaraq-faktura gʻaznachilik boʻlinmasi tomonidan yuridik majburiyatga muvofiqligiga tekshiriladi va budjet tashkilotiga qaytarib beriladi.

Hisobvaraq-fakturalardan nusxa olish va gʻaznachilik boʻlinmasida saqlash qatʼiyan man etiladi.

65¹. Budjet tashkilotlari tomonidan toʻlov hujjatlarining taqdim qilinishi va gʻaznachilik boʻlinmalarida rasmiylashtirilishi tartibi Oʻzbekiston Respublikasi budjet tizimi budjetlarining gʻazna ijrosi qoidalarining (roʻyxat raqami 2850, 2016-yil 22-dekabr) 1 va 2-ilovalaridagi shakllar va 183 — 186-bandlarida belgilangan tartibda amalga oshiriladi.

Bunda budjet tashkiloti tomonidan taqdim qilinadigan toʻlov hujjatlarining toʻlov maqsadida tegishli shaxsiy gʻazna hisobvaraq raqami, tashkilot nomi, STIR, budjet tasnifiga muvofiq xarajatlar moddasi, hamda yuridik va moliyaviy majburiyat sanasi va tartib raqami koʻrsatiladi.

65². Toʻlovlar amalga oshirib boʻlinganidan soʻng toʻlov hujjatlarining birinchi va ikkinchi nusxalari gʻaznachilik boʻlinmalarining tegishli boʻlimlarida saqlanadi.

65³. Ish haqi va unga tenglashtirilgan toʻlovlar boʻyicha mablagʻlar xarajatlar smetasining tegishli moddasida nazarda tutilgan mablagʻlar doirasida ularning tegishli banklardagi 23404, 23432, 23430, 23426 balans hisobvaraqlariga oʻtkaziladi.

Bunda toʻlov hujjatining gʻaznachilik boʻlinmalarida qoldiriladigan birinchi va ikkinchi nusxalarining toʻlov maqsadida “Maxfiy” yozuvi yoziladi, budjet tashkilotlariga mazkur Nizomning 6-ilovasida keltirilgan shakldagi koʻchirma bilan qaytarib beriladigan uchinchi nusxasida tegishli xarajat moddalari va ularning summalari koʻrsatiladi.

78. Gʻaznachilik boʻlinmasi budjet tashkilotlarining toʻlov topshiriqnomalari asosida gʻazna hisobvaraqlaridan xarajatlar toʻlovini budjet tashkilotlarining xarajatlar smetalarining tegishli moddalarida koʻzda tutilgan mablagʻlar doirasida amalga oshiradi.

79. Budjet tashkilotlarining xarajatlari toʻlovi toʻlov topshiriqnomalari asosida quyidagi hollarda amalga oshiriladi:

budjet tashkilotlarining tegishli moddalari boʻyicha mablagʻlar qoldiqlari summalari doirasida;

agar toʻlov topshiriqnomasida koʻrsatilgan summa gʻaznachilik boʻlinmasida roʻyxatga olingan (hisobga olingan) shartnomaga muvofiq toʻlanishi lozim boʻlgan pul mablagʻlari summasidan oshmasa;

hisobvaraq-faktura yoki tovar (ish, xizmat)lar yetkazib berilganligini tasdiqlovchi boshqa hujjatlar mavjud boʻlganda va budjet tashkilotining maxsulot yetkazib beruvchi oldidagi qarzdorligini, shuningdek budjet tashkilotining maxsulot yetkazib beruvchiga avans toʻlovlari oʻtkazishini majburlovchi hujjatlar mavjud boʻlganida (bunda, davlat siriga taaluqli boʻlgan xoʻjalik operatsiyalari amalga oshirilganda, budjet tashkilotlari tomonidan hisobvaraq-fakturalar Iqtisodiyot va moliya vazirligi xuzuridagi Gʻaznachilik hizmati qoʻmitasiga yoki gʻaznachilik boʻlinmalariga qogʻoz shaklida taqdim etiladi);

toʻlov topshiriqnomasida koʻrsatilgan mol yetkazib beruvchining, shuningdek budjet tashkilotining nomi va rekvizitlari shartnoma va hisobvaraq-fakturalarda yoki tovar (ish, xizmat)lar yetkazib berganligini tasdiqlovchi boshqa hujjatlarda mol yetkazib beruvchining, shuningdek, budjet tashkilotining nomi va rekvizitlari muvofiq boʻlganida.

79¹. Budjet tashkilotlari tomonidan toʻlov hujjatlarining taqdim qilinishi va gʻaznachilik boʻlinmalarida rasmiylashtirilishi tartibi Oʻzbekiston Respublikasi budjet tizimi budjetlarining gʻazna ijrosi qoidalarining (roʻyxat raqami 2850, 2016-yil 22-dekabr) 1 va 2-ilovalaridagi shakllar va 183 — 186-bandlarida belgilangan tartibda amalga oshiriladi.

Bunda budjet tashkiloti tomonidan taqdim qilinadigan toʻlov hujjatlarining toʻlov maqsadida tegishli shaxsiy gʻazna hisobvaraq raqami, tashkilot nomi, STIR, budjet tasnifiga muvofiq xarajatlar moddasi va yuridik va moliyaviy majburiyat sanasi va tartib raqami koʻrsatiladi;

79². Toʻlovlar amalga oshirib boʻlinganidan soʻng toʻlov hujjatlarining birinchi va ikkinchi nusxalari gʻaznachilik boʻlinmalarining tegishli boʻlimlarida saqlanadi.

86. Budjet tashkilotlarining rahbarlari va bosh hisobchilari mahsulot yetkazib beruvchilar bilan tuzilgan shartnomalarning toʻgʻri rasmiylashtirishi, ularning asoslanganligi va amaldagi qonunchilik hujjatlariga muvofiqligi, narx qarorining amaldagi qonunchilik hujjatlariga muvofiqligi, birlamchi hujjatlar va tovar (ish, xizmat)lar yetkazib berilganligini tasdiqlovchi boshqa hujjatlarning haqqoniyligi, jumladan Budjet tashkilotlarining rivojlantirish jamgʻarmasiga oʻtkaziladigan, iqtisod qilingan mablagʻlarning va mahsulot yetkazib beruvchilar oldidagi qarzdorlikning toʻgʻri aniqlanganligiga javobgardir.

Chek daftarlari va chek nazorat markalarining yoʻqotilishi yoki oʻgʻirlanishi, shuningdek, chek daftarlarini va chek nazorat markalarini olishga vakolatli shaxslar tomonidan suiisteʼmol qilish natijasida yuzaga kelgan zarar uchun budjet tashkilotlarining masʼul shaxslari javobgardir.

87. Gʻaznachilik boʻlinmalari qonunchilikka muvofiq zarur maxfiylik rejimiga rioya qilish, mazkur Nizom talablariga muvofiq roʻyxatga olingan (hisobga olingan) shartnomalarning budjet tashkilotlari xarajatlari smetasida koʻzda tutilgan mablagʻlarga muvofiqligi va budjet tashkilotlari xarajatlari toʻlovi ustidan nazoratning toʻgʻri amalga oshirilishi uchun javobgardirlar.

88. Mazkur Nizom Oʻzbekiston Respublikasi Markaziy banki bilan kelishilgan.