Oʻzbekiston Respublikasi Vazirlar Mahkamasining “Navoiy” erkin industrial-iqtisodiy zonasi faoliyatini tashkil etish chora-tadbirlari toʻgʻrisida” 2009-yil 27-yanvardagi 21-son qarorini bajarish yuzasidan Vazirlar Mahkamasi qaror qiladi:

1. “Navoiy” erkin industrial-iqtisodiy zona direksiyasi” Davlat unitar korxonasining Ustavi ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. “Navoiy” erkin industrial-iqtisodiy zona direksiyasi” Davlat unitar korxonasi (keyingi oʻrinlarda Direksiya deb ataladi) tezkor boshqaruv uchun oʻziga berilgan davlat mulki boʻlgan mulk bazasida Davlat unitar korxonasi shaklida tashkil etilgan tijorat tashkiloti hisoblanadi, u oʻziga birkitilgan mulkka nisbatan, qonunda belgilangan doirada, oʻz faoliyati maqsadlariga, Muassis topshiriqlariga muvofiq egalik qilish, foydalanish va tasarruf etish huquqini amalga oshiradi.

2. Direksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, farmoyishlariga, boshqa normativ-huquqiy hujjatlarga, shuningdek ushbu Ustavga amal qiladi.

3. Direksiya yuridik shaxs hisoblanadi, alohida mulkka, mustaqil balansga, banklarda hisob raqamlariga, shu jumladan valyuta hisob raqamlariga, ramzga, shtamplar va blankalarga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.

4. Korxonaning rasmiy nomi:

a) davlat tilida:

toʻliq nomi — “Navoiy” erkin industrial-iqtisodiy zona direktsiyasi” Davlat unitar korxonasi;

qisqartirilgan nomi — “Navoiy” EIIZ direktsiyasi” DUK;

b) rus tilida:

toʻliq nomi — Gosudarstvennoye unitarnoye predpriyatiye “Direksiya svobodnoy industrialno-ekonomicheskoy zoni “Navoi”;

qisqartirilgan nomi — GUP “Direksiya SIEZ “Navoi”;

v) ingliz tilida:

toʻliq nomi — “Directorate of the free industrial-economic zone “Navoi” State Unitary Company;

qisqartirilgan nomi — “Directorate of FIEZ “Navoi” SUC.

5. Direksiyaning joylashgan joyi (pochta manzili): 210100, Navoiy shahri, A. Temur koʻchasi, 4-uy.

6. Oʻzbekiston Respublikasi Vazirlar Mahkamasi Direksiyaning muassisi (keyingi oʻrinlarda Muassis deb ataladi) hisoblanadi.

7. Direksiya oʻz nomidan qonun hujjatlarida belgilangan tartibda mulkiy va shaxsiy nomulkiy huquqlarni olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.

8. Direksiya Muassisning roziligiga koʻra tijorat tashkilotlarining, shuningdek qonun hujjatlariga muvofiq yuridik shaxslarning qatnashishiga yoʻl qoʻyiladigan notijorat tashkilotlarda qatnashchi (aʼzo) boʻlishi mumkin.

9. Direksiya davlat boshqa korxonasining muassisi boʻlishi mumkin emas.

10. “Navoiy” erkin industrial-iqtisodiy zonasi (keyingi oʻrinlarda “Navoiy” EIIZ” deb ataladi) faoliyatini, shu jumladan “Navoiy” EIIZni rivojlantirish davlat dasturlarining toʻliq va oʻz vaqtida bajarilishini taʼminlash yoʻli bilan tezkor boshqarish, “Navoiy” EIIZ hududida alohida huquqiy rejimga rioya etilishini taʼminlash, shuningdek “Navoiy” EIIZ hududidagi xoʻjalik faoliyati qatnashchilariga (keyingi oʻrinlarda “Navoiy” EIIZ qatnashchilari” deb ataladi) xizmatlar koʻrsatishdan hamda ushbu Ustavda nazarda tutilgan boshqa ishlar va xizmatlardan foyda olish Direksiya faoliyatining maqsadi hisoblanadi.

11. Quyidagilar Direksiya faoliyatining asosiy yoʻnalishlari hisoblanadi:

11.1. Belgilangan tartibda tanlangan investorlar bilan “Navoiy” EIIZ hududida investitsiyalash toʻgʻrisida bitimlar tuzish;

11.2. “Navoiy” EIIZ qatnashchilarini roʻyxatdan oʻtkazish va ularning reyestrini yuritish, ularga tegishli guvohnomalar berish;

11.3. “Navoiy” EIIZ hududida “Navoiy” EIIZ qatnashchilari hisoblanmaydigan boshqa xoʻjalik yurituvchi subyektlar hisobini yuritish;

11.4. Belgilangan tartibda tanlangan investorlar tomonidan oʻz zimmasiga qabul qilgan majburiyatlarning zarur darajada bajarilishini nazorat qilish, keyinchalik ularning natijalarini “Navoiy” EIIZning Maʼmuriy kengashiga (keyingi oʻrinlarda Maʼmuriy kengash deb ataladi) taqdim etadi;

11.5. “Navoiy” EIIZ qatnashchilariga va boshqa xoʻjalik yurituvchi subyektlarga “Navoiy” EIIZ hududida yer uchastkalarini ijaraga berish;

11.6. “Navoiy” EIIZ hududida joylashgan davlat mulki boʻlgan obyektlardagi koʻchmas mulkni oʻziga berilgan vakolatlar doirasida boshqarish;

11.7. “Navoiy” EIIZ faoliyatini tezkor boshqarish boʻyicha boshqa funksiyalarni amalga oshirish.

Ushbu Ustavda nazarda tutilgan tegishli faoliyatning qonun hujjatlarida litsenziyalanishi zarurligi belgilangan taqdirda Direksiya faoliyatning ushbu turini litsenziya olmasdan, tegishli litsenziyalovchi organ bilan tuzilgan litsenziya bitimi asosida amalga oshirishga haqlidir.

12. Direksiya qonun hujjatlarida taqiqlanmagan faoliyatning boshqa turlarini ham amalga oshirishi mumkin.

13. Direksiya Muassisga va Maʼmuriy kengashga hisob beradi.

14. Muassis quyidagi huquqlarga ega:

Direksiya faoliyatining maqsadi, predmeti va turlarini belgilash;

Direksiya Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

Direksiyani qayta tashkil etish yoki tugatish toʻgʻrisida qaror qabul qilish, tugatish komissiyasini tayinlash va tugatish balansini tasdiqlash;

Direksiyaning ortiqcha, foydalanilmayotgan yoxud belgilangan maqsadda foydalanilmayotgan mulkini olib qoʻyish va ularni tasarruf etish;

Direksiya tomonidan oʻziga berilgan mulkdan foydalanishdan olingan sof foydaning bir qismini yoki hammasini olish;

Direksiya mulki bilan amalga oshirilgan bitishuvlarni haqqoniy emas deb eʼtirof etish toʻgʻrisida sudga daʼvo arizasi bilan murojaat qilish;

Direksiya yetkazgan zararlarni undirish toʻgʻrisida Direksiyaning ijro etuvchi organiga daʼvo arizasi taqdim etish.

Muassis qonun hujjatlariga muvofiq boshqa huquqlarga ham ega boʻlishi mumkin.

15. Maʼmuriy kengash Direksiya faoliyatiga rahbarlikni va uni nazorat qilishni, shuningdek “Navoiy” EIIZning mustaqil budjeti hamda “Navoiy” EIIZni rivojlantirish jamgʻarmasi mablagʻlaridan maqsadli foydalanilishi ustidan nazoratni amalga oshiradi.

16. Maʼmuriy kengash vakolatiga quyidagilar kiradi:

“Navoiy” EIIZni rivojlantirish boʻyicha Direksiya faoliyatining strategik vazifalari va yoʻnalishlarini belgilash hamda “Navoiy” EIIZni rivojlantirishning tegishli oʻrta muddatli va uzoq muddatli dasturlarini ishlab chiqishni tashkil etish;

“Navoiy” EIIZning samarali faoliyatini taʼminlash uchun zarur boʻlgan har yilgi investitsiya dasturlarini va boshqa tashkiliy-texnik tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Direksiyaning moliya-xoʻjalik faoliyatini har chorakda oʻrganishni tashkil etish;

Direksiya faoliyati toʻgʻrisida ijro etuvchi organning hisobotini har chorakda eshitish va tasdiqlash;

Direktorning yollash toʻgʻrisidagi mehnat shartnomasini Muassis nomidan tuzish va bekor qilish;

Direksiyaning tashkiliy tuzilmasini va boshqaruv apparati tuzilmasini maʼqullash;

Direksiyaning shtatlar roʻyxatini va xarajatlari smetasini tasdiqlash;

ichki audit xizmatini tashkil etish va uning xodimlarini tayinlash;

ijro etuvchi organ faoliyati tartibini belgilaydigan hujjatlarni tasdiqlash.

Maʼmuriy kengash qonun hujjatlariga muvofiq boshqa vakolatlarga ham ega boʻlishi mumkin.

17. Maʼmuriy kengash oʻziga yuklangan vazifalarni bajarish uchun Direksiya faoliyatiga taalluqli hujjatlarni talab qilib olish huquqiga ega. Olingan hujjatlardan Maʼmuriy kengash va uning aʼzolari tomonidan faqat xizmat maqsadlarida foydalaniladi.

18. Direksiyaning joriy faoliyatiga rahbarlikni Maʼmuriy kengash tomonidan lavozimga tayinlanadigan va lavozimdan ozod etiladigan Direktor amalga oshiradi.

19. Direktor yakka ijro etuvchi organ hisoblanadi.

20. Direktor Maʼmuriy kengash bilan kelishgan holda Direksiya xodimlarini lavozimga tayinlaydi va lavozimdan ozod qiladi.

21. Direktor:

Direksiya xodimlari mehnat sharoitlarini muhofaza qilish va yaxshilash, atrof muhitni muhofaza qilish va tabiiy resurslardan oqilona foydalanish sohasidagi norma va qoidalarga qatʼiy rioya etilishini taʼminlash maqsadida “Navoiy” EIIZ boʻyicha qonun hujjatlari talablarini bajarishga yoʻnaltirilgan tadbirlarni ishlab chiqadi va joriy etadi;

rivojlantirish dasturlari amalga oshirilishini tashkil qiladi;

Direksiyaning asosiy faoliyatini takomillashtirishga, boshqaruvning eng yangi uslublarini joriy etishga yoʻnaltirilgan tadbirlarni amalga oshirish chora-tadbirlarini koʻradi;

Direksiya nomidan ishonchnomasiz harakat qiladi, mamlakatimizdagi va xorijiy barcha korxonalar, muassasalar va tashkilotlarda uning manfaatlarini ifodalaydi;

xodimlarni ishga qabul qiladi, ular bilan mehnat shartnomalari tuzadi va ularni oʻzgartiradi va toʻxtatadi;

qonun hujjatlarida belgilangan tartibda ishonchnomalar beradi;

kadrlarni tayyorlash va oʻqitish, ularning malakasini oshirish chora-tadbirlarini koʻradi;

Direksiyaning barcha xodimlari uchun majburiy boʻlgan buyruqlar, farmoyishlar va koʻrsatmalar chiqaradi;

Direksiyaning ichki tartibini va xoʻjalik faoliyatini reglamentlaydigan hujjatlarni tasdiqlaydi;

Direksiya tomonidan Oʻzbekiston Respublikasi qonun hujjatlariga rioya qilinishini tashkil etish va nazorat qilishni taʼminlaydi;

belgilangan maqsadlarni, Direksiyaga yuklangan vazifalarni amalga oshirish uchun zarur boʻlgan boshqa funksiyalarni amalga oshiradi.

22. Direktor oʻz huquqlarini amalga oshirishda va vazifalarini bajarishda Direksiya manfaatlarini koʻzlagan holda harakat qiladi.

23. Direktor “Navoiy” EIIZning Oʻzbekiston Respublikasi Moliya vazirligi bilan kelishgan holda Maʼmuriy kengash tomonidan tasdiqlanadigan mustaqil budjet mablagʻlarining tasarruf etuvchisi hisoblanadi.

24. Direktor “Navoiy” EIIZning mustaqil budjeti ijrosi toʻgʻrisidagi hisobotni kelishish uchun Oʻzbekiston Respublikasi Moliya vazirligiga belgilangan tartibda taqdim etadi.

Direktor oʻz zimmasiga yuklangan vazifalarning bajarilishi, shuningdek Direksiyaga berilgan davlat mulkining saqlanishi va undan maqsadli foydalanilishi yuzasidan qonun hujjatlarida belgilangan tartibda javob beradi.

25. Direksiyaning ustav fondi “Navoiy” EIIZ faoliyatini tezkor boshqarishni amalga oshirish uchun Muassis tomonidan oʻziga berilgan mablagʻlar, mulklar va boshqa aktivlardan iborat boʻladi.

26. Direksiya ustav fondining miqdori 4,89 mlrd. soʻmni tashkil qiladi.

27. Direksiya ustav fondini koʻpaytirish yoki kamaytirish qonun hujjatlarida belgilangan tartibda Muassis qaroriga binoan amalga oshiriladi.

28. Muassis tomonidan Direksiyaga tezkor boshqaruv huquqi bilan birkitilgan asosiy fondlar va aylanma mablagʻlar Direksiya mulkini tashkil qiladi.

29. Direksiyaning asosiy fondlari va aylanma mablagʻlari boʻlinmaydi va ulushlar (hissalar, paylar) boʻyicha taqsimlanishi mumkin emas.

30. Maʼmuriy kengash Muassis nomidan Direksiyaga berilgan davlat mulkidan belgilangan maqsadda foydalanilishini va uning saqlanishini, shuningdek oʻzgaga berilishini nazorat qiladi.

31. Direktor Muassis bilan kelishgan holda Direksiya mulkini quyidagi hollarda:

asosiy vositalarni sotishda, ularni ijaraga yoki garovga topshirishda;

mulkni boshqa xoʻjalik jamiyatining ustav fondiga ulush sifatida kiritishda;

boshqa xoʻjalik jamiyatlarining aksiyalari (ulushlari)ni sotib olishda va sotishda;

xoʻjalik jamiyatlaridagi Direksiyaga tegishli aksiyalar (ulushlar)ni sotishda;

mulkdan Direksiya faoliyatining maqsadlariga nomuvofiq tarzda foydalanilganda tasarruf etishi mumkin.

32. Direksiya daromadi:

xizmatlar koʻrsatishdan olingan daromadlar;

Oʻzbekiston Respublikasi Moliya vazirligi bilan kelishgan holda, Maʼmuriy kengash foydalanilishida va boshqaruvida boʻlgan yer uchastkalari, binolar va ishnootlarni ijaraga topshirganlik uchun tushumlarning bir qismi;

qonun hujjatlarida taqiqlanmagan boshqa tushumlar hisobiga shakllantiriladi.

33. Direksiyada qoladigan sof foyda barcha soliqlar hamda budjetga va budjetdan tashqari jamgʻarmalarga boshqa majburiy toʻlovlar toʻlangandan keyin Direksiya tasarrufida qoladi va Maʼmuriy kengash qaroriga koʻra foydalaniladi.

34. Muassis oʻz qarori bilan muruvvat maqsadlariga hamda begona yuridik va jismoniy shaxslarga homiylik yordami koʻrsatishga yoʻnaltiriladigan pul mablagʻlarining cheklangan summasini, ularni tasarruf etish huquqini Direktorga bergan holda belgilaydi.

35. Direksiyaning xoʻjalik faoliyati natijasida koʻrilgan zararlarini qoplash ushbu maqsadlar uchun tashkil etilgan zaxira fondi mablagʻlari hisobiga amalga oshirilishi mumkin.

36. Direksiya oʻz tasarrufida qoladigan sof foyda hisobiga zaxira fondini, shuningdek boshqa fondlarni tashkil etishi mumkin, ularning miqdori va shakllantirish tartibi Muassis tomonidan tasdiqlanadi.

37. Direksiya hisobot davri tugagach vakolatli organlarga moliya hisobotini va roʻyxati qonun hujjatlarida belgilangan boshqa hujjatlarni taqdim etadi hamda hujjatlarning saqlanishi va ularning davlat tomonidan saqlashga berilishi yuzasidan belgilangan tartibda javob beradi.

38. Direksiyaning xoʻjalik subyekti sifatidagi faoliyatini nazorat qilish Muassis va boshqa vakolatli organlar tomonidan, qonun hujjatlarida belgilangan tartibda amalga oshiriladi.

39. Direktor har chorakda faoliyati natijalari va tasdiqlangan rivojlantirish dasturlarining amalga oshirilishi toʻgʻrisida Maʼmuriy kengashga hisob beradi.

40. Direksiya oʻz majburiyatlari boʻyicha oʻziga tegishli mulk bilan javob beradi. Muassis Direksiyaning mulki yetarli boʻlmagan taqdirda uning majburiyatlari boʻyicha subsidiar javobgarlikni amalga oshiradi.

41. Direksiya Muassis majburiyatlari boʻyicha javob bermaydi.

42. Direksiya Muassis bilan kelishgan holda Oʻzbekiston Respublikasi hududida ham, uning tashqarisida ham qonun hujjatlari talablariga rioya qilgan holda filiallar tashkil etishi va vakolatxonalar ochishi mumkin.

43. Direksiyaning filiallari va vakolatxonalari Direksiya tomonidan tasdiqlangan Nizom asosida faoliyat koʻrsatadi.

44. Oʻzbekiston Respublikasidan tashqarida joylashgan vakolatxonalar va filiallar Direksiya tomonidan tasdiqlangan Nizom asosida hamda hududida oʻzlari joylashgan mamlakatlarning qonun hujjatlariga muvofiq faoliyat koʻrsatadi.

45. Direksiya filiali yoki vakolatxonasining rahbari Maʼmuriy kengash bilan kelishgan holda Direktor tomonidan tayinlanadi va ular bergan ishonchnoma asosida faoliyat koʻrsatadi, ishonchnoma ushbu rahbar bilan tuzilgan mehnat shartnomasi toʻxtatilgan taqdirda Direktor tomonidan bekor qilinishi kerak.

46. Direksiya tomonidan tashkil etiladigan filiallar va vakolatxonalarning majburiyatlari boʻyicha Direksiya javob beradi.

47. Direksiya Muassisning qaroriga koʻra, qonun hujjatlarida nazarda tutilgan tartibda yoki sud qaroriga binoan tugatilishi yoki qayta tashkil etilishi mumkin.

48. Direksiyani tugatish uning faoliyatining huquq va majburiyatlar huquqiy vorislik tartibida boshqa shaxslarga oʻtmagan holda toʻxtatilishiga sabab boʻladi, Direksiya qayta tashkil etilgan taqdirda huquq va majburiyatlar huquqiy vorisga oʻtadi.