O‘zbekiston Respublikasi Prezidentining “Yerlarning meliorativ holatini yaxshilash tizimini tubdan takomillashtirish chora-tadbirlari to‘g‘risida” 2007-yil 29-oktabrdagi PF-3932-son Farmoniga muvofiq hamda sug‘oriladigan yerlarning meliorativ holatini yaxshilash dasturlarini sifatli shakllantirishni va o‘z vaqtida amalga oshirishni ta’minlash maqsadida Vazirlar Mahkamasi qaror qiladi:

1. Quyidagilar:

Sug‘oriladigan yerlarning meliorativ holatini yaxshilash bo‘yicha loyihalarni shakllantirish, ishlab chiqish, ekspertizadan o‘tkazish, tasdiqlash va amalga oshirish tartibi to‘g‘risidagi nizom 1-ilovaga muvofiq;

3. O‘zbekiston Respublikasi “Davarxitektqurilish” qo‘mitasi, Moliya vazirligi, Qishloq va suv xo‘jaligi vazirligi ikki oy muddatda o‘z normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. Ushbu Nizom O‘zbekiston Respublikasi Vazirlar Mahkamasi huzuridagi Sug‘oriladigan yerlarning meliorativ holatini yaxshilash jamg‘armasi (keyingi o‘rinlarda Jamg‘arma deb ataladi) mablag‘lari hisobiga moliyalashtiriladigan meliorativ obyektlarini qurish, rekonstruksiya qilish, ta’mirlash va tiklash bo‘yicha loyihalarni shakllantirish, ishlab chiqish, ekspertizadan o‘tkazish, tasdiqlash va amalga oshirish tartibini belgilaydi.

2. Meliorativ obyektlarini qurish, rekonstruksiya qilish, ta’mirlash va tiklash Hukumatning yoki O‘zbekiston Respublikasi Prezidentining qarori bilan tasdiqlangan Sug‘oriladigan yerlarning meliorativ holatini yaxshilash davlat dasturi (keyingi o‘rinlarda Davlat dasturi deb ataladi) asosida amalga oshiriladi.

Davlat dasturi besh yil muddatga ishlab chiqiladi.

3. Ushbu Nizomda quyidagi asosiy tushunchalar qo‘llaniladi:

meliorativ obyektlar — kollektor-drenaj va yuza tashlama suvlarni to‘plash hamda ularni sug‘oriladigan yerlardan tashqariga chiqarib tashlashga ko‘maklashadigan, kollektorlar va kollektor-drenaj tarmog‘ini (inshootlar bilan birga), vertikal drenaj quduqlarini, meliorativ nasos stansiyalari va kuzatuv tarmog‘ini o‘z ichiga oladigan suv xo‘jaligi obyektlari;

drenaj (ochiq va yopiq) — drenaj suvlarini to‘plash va ularni sug‘oriladigan yer uchastkasidan tashqariga chiqarib tashlashga ko‘maklashadigan suv xo‘jaligi obyekti;

yopiq gorizontal drenaj — drenaj suvlarini to‘plashga va sug‘oriladigan maydon uchastkasidan tashqariga chiqarib tashlashga mo‘ljallangan yopiq quvurli tarmoqlar tizimi;

vertikal drenaj qudug‘i — yer osti bosimli va sizot suvlarni chiqarishga xizmat qiladigan, suv qabul qilgich, elektr nasos, quvurlar, shuningdek boshqarish stansiyasi bilan jihozlangan hamda xizmat ko‘rsatilayotgan maydonning meliorativ holatini yaxshilash uchun barpo etiladigan quduqdan iborat bo‘lgan inshoot;

ochiq drenaj — drenaj suvlarini to‘plash va ularni sug‘oriladigan maydon uchastkasidan tashqariga chiqarib tashlashga mo‘ljallangan kanal (inshootlar bilan birga);

kollektor — asosan drenaj tarmog‘idan drenaj va tashlama suvlarni qabul qilish va uzatishga, shuningdek ularni sug‘oriladigan hudud tashqarisiga chiqarib tashlashga mo‘ljallangan kanal (inshootlar bilan birga). Xizmat ko‘rsatish hududi bo‘yicha kollektorlar magistral (viloyatlararo), tumanlararo kollektorlar va xo‘jaliklararo kollektor-drenaj tarmoqlariga bo‘linadi;

magistral (viloyatlararo) kollektor — bir viloyatdan ortiq hududni kesib o‘tadigan ochiq kollektor;

tumanlararo kollektor — bir viloyat chegarasida bittadan ortiq tuman hududini kesib o‘tadigan ochiq kollektor;

xo‘jaliklararo kollektor-drenaj tarmog‘i — bir tuman hududida joylashgan ochiq va yopiq kollektorlar va drenaj tarmog‘i;

meliorativ nasos stansiyasi (agregat) — drenaj-tashlama suvlarni olish va chiqarib tashlash joyiga ko‘tarish yo‘li bilan kollektorning loyihadagi suv o‘tkazish qobiliyatini ta’minlaydigan mashinali suv ko‘tarish gidrotexnik inshootlar majmui;

kuzatuv tarmog‘i — sug‘oriladigan yerlarda sizot suvlar sathini o‘lchash va ularning sifatini o‘rganish maqsadida namuna olish uchun barpo etiladigan kuzatuv quduqlari tarmog‘i;

meliorativ obyektlarni ta’mirlash va tiklash — meliorativ obyektlarning loyihaviy parametrlarini ta’minlashga, shu jumladan kollektor o‘zanlarini cho‘kindilar, o‘tlar va butalardan tozalashga, ulardagi inshootlarni va yon qiyaliklaridagi ayrim yemirilishlarni ta’mirlashga, yopiq gorizontal drenajni ta’mirlash, yuvishga hamda asbob-uskunalar, inshootlar va boshqa meliorativ obyektlarni ta’mirlash hamda ularning tez eskiradigan ayrim qismlari va uzellarini almashtirishga mo‘ljallangan ishlar;

meliorativ obyektlarni joriy ta’mirlash — meliorativ obyektlarni ish holatida saqlashga mo‘ljallangan, muntazam ravishda amalga oshiriladigan ta’mirlash ishlari. Bunda foydalaniladigan moddiy-texnika resurslari (temir-beton, metall konstruksiya, sement, metall va hokazolar), ehtiyot qismlar va asbob-uskunalar qiymati ta’mirlash-tiklash ishlari jami qiymatining 20 foizidan ortiq bo‘lmasligi kerak;

meliorativ obyektlarni mukammal ta’mirlash — jarayon davomida obyekt yoki uning ayrim elementlarini to‘liq yoki qisman tiklash, inshootlarning eskirgan konstruksiyalari va asbob-uskunalarini almashtirish yoki ularni mustahkamroq va tejamlilari bilan yangilashga doir ishlar. Bunda foydalaniladigan moddiy-texnika resurslari, ehtiyot qismlar va asbob-uskunalar qiymati ta’mirlash-tiklash ishlari jami qiymatining 20 foizidan ortiqni tashkil qiladi;

meliorativ obyektlarda avariya-tiklash va ta’mirlash — avariya natijasida kelib chiqqan barcha shikastlanishlarni shoshilinch tartibda bartaraf etish ishlari;

meliorativ obyektlardagi oldindan ko‘rib bo‘lmaydigan ishlar — meliorativ obyektlardan foydalanish davomida aniqlangan Davlat dasturi bilan qamrab olinmagan bajarilishi zarur bo‘lgan ta’mirlash-tiklash ishlari;

meliorativ obyektlarni rekonstruksiya qilish va qurish — meliorativ obyektlarni to‘liq yoki qisman qayta qurish va qurish. Obyekt rekonstruksiya qilingandan keyin uning dastlabki loyiha parametrlari va inshootlar tarkibi yangi loyihaga muvofiq qisman yoki to‘liq o‘zgarishi mumkin;

meliorativ kadastr — sug‘oriladigan yerlarning meliorativ holati va meliorativ tizimlarning texnik holatini tavsiflovchi asosiy miqdoriy ko‘rsatkichlarning tizimlashtirilgan ma’lumotlari to‘plami;

tizimli loyiha — loyihalashtirilayotgan obyektning xizmat ko‘rsatish zonasida joylashgan kollektor-drenaj tarmoqlari, ulardagi inshootlar va boshqa meliorativ obyektlarni meliorativ tizimlar bo‘yicha rekonstruksiya qilish, ta’mirlash va tiklash ishlarini o‘z ichiga oladigan meliorativ obyektlarni rekonstruksiya qilish, ta’mirlash va tiklash loyihasi.

4. Sug‘oriladigan yerlarning meliorativ holatini yaxshilash quyidagi prinsipial qoidalar asosida amalga oshiriladi:

meliorativ tarmoqlarning samarali ishlashini ta’minlovchi mexanizmni sifat jihatidan takomillashtirish hamda kollektor-drenaj tarmoqlari orqali drenaj va tashlama suvlarni normativ miqdorda chiqarib tashlash;

sug‘oriladigan yerlarning meliorativ holatini yaxshilash muammosi umuman kompleks holda, irrigatsiya-drenaj tizimi bilan birgalikda, eng kam ekologik oqibatlar bilan yuqori hosil olishga qaratilgan sug‘orishning yuvish rejimi va sug‘oriladigan yerlarning qishloq xo‘jaligi ishlab chiqarish tizimi yaratilishi sifatida qaralishi zarur;

sug‘oriladigan yerlarning meliorativ holatini hamda qishloq xo‘jaligi ishlab chiqarish tizimini yaxshilash bo‘yicha barcha chora-tadbirlar tashkiliy-texnologik, iqtisodiy va qurilish-texnik choralarni ko‘zda tutgan holda, suvni tejash orqali, shuningdek aniq tabiiy-texnik tizimlarda maqbul meliorativ rejimlarni barpo etish yo‘li bilan iqtisodiy maqsadga muvofiqlikni hisobga olgan holda asoslanishi kerak;

sug‘oriladigan yerlarning meliorativ holatini yaxshilash tizimi har xil tabiiy shart-sharoitlar uchun talab qilinadigan tuproqqa ishlov berish texnologiyalarini ta’minlovchi agrotexnik usullarni — takroriy va oraliq ekinlar ekishni joriy qilib almashlab ekishni tashkil qilish, tuproq unumdorligini oshiruvchi dukkakli don ekinlari ekishni rag‘batlantirish, aralash ekinlarni madaniylashtirib, tuproqni mulchalashni o‘z ichiga olishi kerak;

sug‘oriladigan yerlarning meliorativ holatini yaxshilashga va unumdorligini oshirishga yo‘naltirilgan ekinlarni almashlab ekishning yuqorida ko‘rsatib o‘tilgan tizimini amalga oshirish, suvni hisobga olish, rejalashtirish hamda suvni sug‘orish va kollektor drenaj tarmog‘ida taqsimlashning mukammal tizimini yaratish, kollektor-drenaj suvlaridan konturlar ichida sug‘orishga ishlatishda foydalanish, sho‘rlangan yerlarning sho‘rini yuvishni takomillashtirish yo‘li bilan ta’minlanishi kerak;

meliorativ va tabiiy-xo‘jalik shart-sharoitlari o‘zgarishlarini hisobga olgan holda qo‘llaniladigan meliorativ chora-tadbirlar kompleksiga tuzatish kiritish;

irrigatsiya-melioratsiya tizimining ishonchli ishlashini hisobga olish va baholash, ularni ta’mirlash, tiklash, qurish va rekonstruksiya qilish zaruriyatini aniqlash sug‘oriladigan yerlarning maqbul meliorativ holatini ta’minlash va saqlash nuqtai nazaridan amalga oshirilishi kerak.

5. Meliorativ chora-tadbirlarni amalga oshirishning ustuvorligi va navbatliligi hududning meliorativ, ekologik va boshqa tabiiy-xo‘jalik shart-sharoitlari hisobga olingan holda belgilanadi.

6. Sug‘oriladigan yerlarning meliorativ holatini yaxshilash Davlat dasturining tasdiqlangan parametrlari asosida har yili:

meliorativ obyektlarni qurish, rekonstruksiya qilish, ta’mirlash va tiklash loyihalarining;

loyiha-qidiruv va ilmiy-tadqiqot ishlarining;

meliorativ va boshqa texnika, mashinalar, uskunalar va boshqa mexanizatsiya vositalari sotib olishning;

kelgusi yildagi boshqa meliorativ chora-tadbirlarning hududiy aniq dasturlari ishlab chiqiladi va tasdiqlanadi.

7. Davlat dasturi:

meliorativ obyektlarni qurish va rekonstruksiya qilish;

meliorativ obyektlarda ta’mirlash-tiklash ishlari (joriy va mukammal ta’mirlash);

meliorativ va boshqa suv xo‘jaligi ishlarini bajarishga ixtisoslashtirilgan qurilish tashkilotlari, suv xo‘jaligi ekspluatatsiya tashkilotlari, suv iste’molchilari uyushmalari va fermer xo‘jaliklari, shuningdek, boshqa tashkilotlarning meliorativ va boshqa texnika, mashinalar, uskunalar va boshqa mexanizatsiya vositalari parkini mustahkamlash;

sug‘oriladigan yerlarning meliorativ holatini yaxshilash bo‘yicha boshqa chora-tadbirlar prognoz parametrlarini o‘z ichiga oladi.

8. Davlat dasturi sug‘oriladigan yerlarning meliorativ holatini yaxshilash vazifalarini hal etishga kompleks va tizimli yondashish asosida ishlab chiqilgan hududiy dasturlar asosida shakllantiriladi va Hukumatning yoki O‘zbekiston Respublikasi Prezidentining qarori bilan tasdiqlanadi.

9. Hududlarning meliorativ, ekologik va boshqa tabiiy-xo‘jalik shart-sharoitlarining o‘zgarishi mumkinligi, meliorativ obyektlarning asoslashlari va ustuvorligi hisobga olingan holda Jamg‘arma Kengashining qarori bilan Davlat dasturiga tegishli o‘zgartirish va qo‘shimchalar kiritilishi mumkin.

10. Davlat dasturining tasdiqlangan maqsadli parametrlari asosida, aniq hududlardagi real meliorativ shart-sharoitlar, shuningdek meliorativ ishlarni moliyaviy ta’minlash prognozi hisobga olingan holda, kelgusi yil uchun sug‘oriladigan yerlarning meliorativ holatini yaxshilash chora-tadbirlarining obyektlar bo‘yicha ro‘yxatini o‘z ichiga oladigan loyihalarning hududiy aniq dasturlari ishlab chiqiladi.

11. Meliorativ obyektlarni qurish, rekonstruksiya qilish, ta’mirlash va tiklash, loyiha-qidiruv hujjatlarini va ilmiy-tadqiqot ishlarini ishlab chiqish, shuningdek kelgusi yilda meliorativ va boshqa texnika, mashinalar, uskunalar va boshqa mexanizatsiya vositalari sotib olish loyihalarining hududiy aniq dasturlari Jamg‘arma Kengashi tomonidan tasdiqlanadi.

12. Joylarda haqiqiy meliorativ shart-sharoitlarni o‘rganish, meliorativ obyektlarni qurish, rekonstruksiya qilish, ta’mirlash va tiklash, meliorativ va boshqa texnika, mashinalar, uskunalar va boshqa mexanizatsiya vositalari xarid qilish va boshqa meliorativ chora-tadbirlar bo‘yicha loyihalarning aniq dasturlarini shakllantirish bo‘yicha takliflarni tayyorlash uchun har yili Qoraqalpog‘iston Respublikasi Vazirlar Kengashi va viloyatlar hokimliklarining qarorlari bilan maxsus ishchi guruhlar tashkil etiladi. Ishchi guruhlar alohida meliorativ tizimlar bo‘yicha tuziladi.

Ishchi guruhlar tarkibiga:

O‘zbekiston Respublikasi Suv xo‘jaligi vazirligining irrigatsiya tizimlari havza boshqarmalari (keyingi o‘rinlarda havza boshqarmalari deb ataladi);

havza boshqarmalari huzuridagi meliorativ ekspeditsiyalar (keyingi o‘rinlarda meliorativ ekspeditsiyalar deb ataladi);

havza boshqarmalari huzuridagi nasos stansiyalari va energetika boshqarmalari (keyingi o‘rinlarda nasos stansiyalari va energetika boshqarmalari deb ataladi);

O‘zbekiston Respublikasi Suv xo‘jaligi vazirligining “Suvqurilishinvest” davlat unitar korxonasi (keyingi o‘rinlarda “Suvqurilishinvest” DUK deb ataladi);

Qoraqalpog‘iston Respublikasi Qishloq xo‘jaligi vazirligi, viloyatlar qishloq va suv xo‘jaligi boshqarmalari;

loyiha va ilmiy-tadqiqot tashkilotlari;

Yergeodezkadastr” davlat qo‘mitasi, Davlat tabiatni muhofaza qilish qo‘mitasi, “Davarxitektqurilish” qo‘mitasi, O‘zbekiston Fermer, dehqon xo‘jaliklari va tomorqa yer egalari kengashining hududiy organlari va boshqa manfaatdor tashkilotlar.

13. Meliorativ ekspeditsiyalar tomonidan manfaatdor tashkilotlar bilan birgalikda quyidagilarni nazarda tutadigan materiallar tayyorlanadi va ishchi guruhlarga ko‘rib chiqish uchun taqdim etiladi:

meliorativ tizimga kiradigan meliorativ obyektlarning ro‘yxati va parametrlari ko‘rsatilgan sxematik xaritalar;

meliorativ tizimning xizmat ko‘rsatish zonasi (viloyat, tumanlar, suv iste’molchilari uyushmalari, fermer xo‘jaliklari va boshqa suv iste’molchilari) va uning tarkibiga kiruvchi alohida meliorativ obyektlar;

meliorativ kadastr, sug‘oriladigan yerlarning meliorativ holati, meliorativ obyektlarning texnik holati, meliorativ chora-tadbirlarning bajarilishi, suv resurslaridan foydalanish va ularning sifati, kollektor-drenaj suv oqimlari, meliorativ nasos stansiyalar va vertikal drenaj quduqlarining ish rejimlari to‘g‘risidagi oxirgi uch yillik axborotlar, shu jumladan yer resurslaridan foydalanish bo‘yicha statistik materiallar hamda meliorativ obyektlar to‘g‘risidagi boshqa ma’lumotlar.

14. Taqdim etilgan materiallar asosida har bir ishchi guruh:

sug‘oriladigan yerlarning meliorativ jihatdan nobopligi va past samaradorligining asosiy sabablarini, hudud tuprog‘i sho‘rlanishiga olib keladigan omillarni aniqlaydi;

meliorativ obyektlar va irrigatsiya tizimlarining foydalanuvchi xodimlari, suv iste’molchilari uyushmalari va fermer xo‘jaliklari rahbarlari bilan birgalikda meliorativ obyektlarning hamda yerlarning sho‘rlangan uchastkalari holatini o‘rganadi va xatlovdan o‘tkazadi;

meliorativ obyektlarning qoniqarsiz uchastkalarini aniqlaydi;

meliorativ obyektlarning texnik holatini va sug‘oriladigan yerlarning melioratsiyasini yaxshilash bo‘yicha asoslangan takliflarni ishlab chiqadi;

kollektor-drenaj tizimlarini qurish, rekonstruksiya qilish, ta’mirlash va tiklash bo‘yicha loyihalar ro‘yxatini, quriladigan, rekonstruksiya qilinadigan, ta’mirlanadigan va tiklanishi kerak bo‘lgan meliorativ nasos stansiyalari (agregatlar), vertikal drenaj quduqlari, kuzatish tarmoqlari ro‘yxatini ishlab chiqadi;

meliorativ va boshqa suv xo‘jaligi ishlarini bajarishga ixtisoslashtirilgan qurilish tashkilotlari, suv xo‘jaligi ekspluatatsiya tashkilotlari, suv iste’molchilari uyushmalari va fermer xo‘jaliklari, shuningdek, boshqa tashkilotlarning moddiy-texnika bazasini o‘rganadi hamda meliorativ va boshqa texnika, mashinalar, uskunalar va boshqa mexanizatsiya vositalarini xarid qilishga doir takliflar ishlab chiqadi;

amalga oshirilayotgan loyihalarga o‘zgartirish va tuzatishlar kiritish bo‘yicha takliflar tayyorlaydi;

Ishchi guruhlar meliorativ obyektlar holatini har yili kuzgi-qishki tadbirlardan keyin 1-apreldan 1-maygacha bo‘lgan davrda o‘rganib chiqadilar. Bundan tashqari, meliorativ ekspeditsiyalar, nasos stansiyalari, va energetika boshqarmalarining foydalanuvchi xodimlari, suv iste’molchilari uyushmalari mutaxassislari tomonidan fermerlar, shuningdek boshqa suvdan foydalanuvchilar va suv iste’molchilari bilan birgalikda har yili sug‘orish mavsumidan keyin, 1-sentabrdan 20-sentabrgacha bo‘lgan davrda meliorativ obyektlar belgilangan tartibda qo‘shimcha ravishda o‘rganib chiqiladi.

15. Meliorativ obyektlar va sug‘oriladigan hududni ko‘zdan kechirish va o‘rganib chiqish tugallangandan keyin ishchi guruhlar:

barcha materiallarni birgalikda tahlil qiladi, sug‘oriladigan yerlarning sho‘rlanganligi va meliorativ jihatdan nobopligi, meliorativ obyektlarning qoniqarsiz ishlashi sabablarini aniqlashtiradi, shuningdek ularni yaxshilash bo‘yicha tavsiyalar ishlab chiqadi;

kelgusi yil uchun sug‘oriladigan yerlarning meliorativ holatini yaxshilash bo‘yicha takliflar kiritgan holda har bir loyihaning ustuvorligini asoslaydi va belgilaydi;

har bir tizimli loyiha uchun annotatsiya va pasport (asosiy ko‘rsatkichlarni) tayyorlaydi;

har bir tuman va viloyat bo‘yicha tizimli loyihalarni, ularni amalga oshirish bosqichlarini, bajariladigan asosiy meliorativ chora-tadbirlarni, shuningdek ularning xizmat ko‘rsatish chegaralarini ko‘rsatgan holda irrigatsiya-melioratsiya tizimi xaritasini tuzadi.

Ishchi guruhlar meliorativ obyektlar, hududning meliorativ, ekologik va boshqa tabiiy-xo‘jalik shart-sharoitlari holatini yillik xatlovdan o‘tkazish natijalarini hisobga olgan holda, tasdiqlangan Davlat dasturining prognoz parametrlari doirasida kelgusi yil uchun aniq takliflar kiritadi.

16. Navbatdagi yil uchun aniq takliflar:

meliorativ obyektlarni qurish va rekonstruksiya qilish loyihalari ro‘yxati;

meliorativ obyektlarni, shu jumladan nasos stansiyalari (agregatlar), vertikal drenaj quduqlari hamda kuzatish tarmoqlarini ta’mirlash va tiklash loyihalari ro‘yxati;

loyiha-qidiruv va ilmiy-tadqiqot ishlari ro‘yxati;

ilgari tasdiqlangan ustuvor loyihalar ro‘yxatiga o‘zgartirish va qo‘shimchalar kiritish;

meliorativ va boshqa texnika, mashinalar, uskunalar va boshqa mexanizatsiya vositalarini lizingga oluvchilar (meliorativ va boshqa suv xo‘jaligi ishlarini bajarishga ixtisoslashtirilgan qurilish tashkilotlari, suv xo‘jaligi ekspluatatsiya tashkilotlari, suv iste’molchilari uyushmalari va fermer xo‘jaliklari, shuningdek, boshqa tashkilotlar) ro‘yxati bo‘yicha;

17. Ishchi guruhlar tomonidan tayyorlangan kelgusi yil uchun sug‘oriladigan yerlarning meliorativ holatini yaxshilash bo‘yicha takliflar har yili 15-maygacha suv iste’molchilari uyushmalari, fermer xo‘jaliklari, barcha manfaatdor tashkilotlar ishtirokida muhokama qilinadi.

Kelgusi yil uchun tumandagi sug‘oriladigan yerlarning meliorativ holatini yaxshilash bo‘yicha ishchi guruh takliflari tuman hokimi bilan kelishiladi.

18. Meliorativ ekspeditsiya bilan birgalikda “Suvqurilishinvest” DUK tumanlar hokimlari bilan kelishilgan takliflar asosida kelgusi yil uchun Qoraqalpog‘iston Respublikasi, viloyatning sug‘oriladigan yerlari meliorativ holatini yaxshilashning hududiy aniq dasturini ishlab chiqadi hamda Qoraqalpog‘iston Respublikasi Qishloq xo‘jaligi vazirligi va tegishli viloyat qishloq xo‘jaligi boshqarmasi bilan kelishib oladi.

Meliorativ ekspeditsiya bilan birgalikda “Suvqurilishinvest” DUK sug‘oriladigan yerlarning meliorativ holatini yaxshilashning hududiy aniq dasturi loyihasi taqdimotini kengaytirilgan majlisda Qoraqalpog‘iston Respublikasi Vazirlar Kengashi, tegishli viloyatlar, tumanlar hokimliklari rahbarlari, havza boshqarmasi suv xo‘jaligi kengashi a’zolari, shuningdek manfaatdor tashkilotlar rahbarlari ishtirokida o‘tkazadi.

Bunda Qoraqalpog‘iston Respublikasi Vazirlar Kengashi, tegishli viloyatlar, tumanlar hokimliklari, Qoraqalpog‘iston Respublikasi, viloyatlar hamda tumanlar Fermer, dehqon xo‘jaliklari va tomorqa yer egalari kengashlari rahbarlari, havza boshqarmalari va meliorativ ekspeditsiyalar, nasos stansiyalari va energetika boshqarmalari boshliqlari, “Suvqurilishinvest” DUK boshliqlari, shuningdek, ishchi guruhlar a’zolari joriy meliorativ holatga xolisona baho bergan holda, taklif etilayotgan kompleks chora-tadbirlarni puxta ishlab chiqishi zarur;

Sug‘oriladigan yerlarning meliorativ holatini yaxshilash chora-tadbirlari muhokamasi bo‘yicha barcha majlislar yakunlari Qoraqalpog‘iston Respublikasi Vazirlar Kengashining hamda viloyatlar va tumanlar hokimliklarining tegishli bayonnomalari bilan rasmiylashtiriladi.

Kelgusi yil uchun sug‘oriladigan yerlarning meliorativ holatini yaxshilash bo‘yicha hududiy aniq dasturlar Qoraqalpog‘iston Respublikasi Vazirlar Kengashining Raisi va tegishli viloyat hokimi tomonidan tasdiqlanadi.

19. Kelgusi yil uchun sug‘oriladigan yerlarning meliorativ holatini yaxshilashning hududiy aniq dasturi har yili 25-maygacha bo‘lgan muddatda havza boshqarmasi tomonidan rasmiy ravishda belgilangan tartibda ko‘rib chiqish uchun O‘zbekiston Respublikasi Suv xo‘jaligi vazirligiga yuboriladi.

O‘zbekiston Respublikasi Suv xo‘jaligi vazirligiga taqdim etiladigan hujjatlar ro‘yxati:

kelgusi yil uchun Qoraqalpog‘iston Respublikasi va tegishli viloyat sug‘oriladigan yerlarining meliorativ holatini yaxshilash bo‘yicha hududiy aniq dastur, shu jumladan tumanlarning takliflari;

sug‘oriladigan yerlarning meliorativ holatini yaxshilash dasturlarini muhokama qilish bo‘yicha majlislarning tasdiqlangan bayonnomalarini;

har bir tumanning asosiy meliorativ tizimlari, meliorativ obyektlarni qurish, rekonstruksiya qilish, ta’mirlash va tiklash bo‘yicha tizimli loyihalarga kiradigan meliorativ nasos stansiyalar (agregatlar), vertikal drenaj quduqlar, kuzatish tarmoqlari ko‘rsatilgan sxematik xaritasini;

hududdagi sug‘oriladigan yerlarning meliorativ holati to‘g‘risidagi tahliliy ma’lumotnoma, har bir loyihaning ustuvorligini asoslash, ularning dastlabki texnik ko‘rsatkichlari hamda amalga oshirishdan kutilayotgan natijalarni o‘z ichiga oladi.

20. Kelgusi yil uchun sug‘oriladigan yerlarning meliorativ holatini yaxshilashning hududiy aniq dasturlari har yili 30-maygacha bo‘lgan muddatda:

O‘zbekiston Respublikasi Suv xo‘jaligi vazirligining tegishli boshqarmalarida ko‘rib chiqilishi;

O‘zbekiston Respublikasi Suv xo‘jaligi vazirligining Tarmoq ilmiy-texnik kengashi (keyingi o‘rinlarda TITK deb ataladi) majlisida muhokama qilinishi kerak;

Majlis yakunlari bo‘yicha tegishli bayonnomalar rasmiylashtiriladi.

21. O‘zbekiston Respublikasi Suv xo‘jaligi vazirligi har yili:

1-iyungacha bo‘lgan muddatda — TITK mulohazalari va tavsiyalari hisobga olingan holda qayta ishlangan kelgusi yil uchun sug‘oriladigan yerlarning meliorativ holatini yaxshilashning hududiy aniq dasturlarini umumlashtiradi;

5-iyungacha bo‘lgan muddatda — O‘zbekiston Respublikasi Moliya vazirligi, Iqtisodiyot vazirligi, Investitsiyalar bo‘yicha davlat qo‘mitasi, O‘zbekiston Respublikasi Vazirlar Mahkamasi huzuridagi Sug‘oriladigan yerlarning meliorativ holatini yaxshilash jamg‘armasini boshqarish departamenti (keyingi o‘rinlarda Departament deb ataladi), “O‘zmeliomashlizing” davlat unitar korxonasiga (keyingi o‘rinlarda “O‘zmeliomashlizing” DUK deb ataladi) kelgusi yil uchun respublikaning sug‘oriladigan yerlari meliorativ holatini yaxshilash bo‘yicha takliflar kiritadi.

22. O‘zbekiston Respublikasi Suv xo‘jaligi vazirligi tomonidan kiritilgan kelgusi yil uchun respublikaning sug‘oriladigan yerlari meliorativ holatini yaxshilash bo‘yicha takliflar:

meliorativ obyektlarni qurish va rekonstruksiya qilish bo‘yicha loyihalarning aniq dasturini;

meliorativ obyektlarni ta’mirlash va tiklash loyihalarining aniq dasturini;

loyiha-qidiruv va ilmiy-tadqiqot ishlarining aniq dasturini;

istisno tariqasida, avval qabul qilingan davlat dasturiga o‘zgartirish va qo‘shimchalar kiritish bo‘yicha asoslangan takliflarni;

meliorativ obyektlardagi avariya-tiklash ishlari va oldindan ko‘rish mumkin bo‘lmagan ishlarning xarajatlari smetalari bo‘yicha takliflar;

meliorativ va boshqa texnika, mashinalar, uskunalar va boshqa mexanizatsiya vositalarini “O‘zmeliomashlizing” DUK bilan kelishilgan holda, viloyatlar va texnika turlari bo‘yicha taqsimlash takliflari.

23. O‘zbekiston Respublikasi Iqtisodiyot vazirligi, Moliya vazirligi va Investitsiyalar bo‘yicha davlat qo‘mitasi Suv xo‘jaligi vazirligining kelgusi yil uchun sug‘oriladigan yerlarning meliorativ holatini yaxshilash yuzasidan takliflari bo‘yicha o‘z xulosalarini har yili 15-iyungacha Departamentga yuboradi.

24. “O‘zmeliomashlizing” DUK meliorativ va boshqa texnika, mashinalar, uskunalar va boshqa mexanizatsiya vositalarini lizingga oluvchilarning manzili dasturi bo‘yicha O‘zbekiston Respublikasi Suv xo‘jaligi vazirligi takliflari asosida har bir tashkilotning buyurtmanomasi va moliyaviy ahvolini, ularning lizing mablag‘larini qaytarish qobiliyatini o‘rganadi hamda ularga meliorativ va boshqa texnika, mashinalar, uskunalar va boshqa mexanizatsiya vositalarini lizing asosida yetkazib berishning maqsadga muvofiqligini aniqlaydi.

25. Departament 20-iyungacha bo‘lgan muddatda kelgusi yil uchun sug‘oriladigan yerlarning meliorativ holatini yaxshilash bo‘yicha O‘zbekiston Respublikasi Suv xo‘jaligi vazirligining takliflarini, Iqtisodiyot vazirligi, Moliya vazirligi, Investitsiyalar bo‘yicha davlat qo‘mitasi, “O‘zmeliomashlizing” DUKning xulosalarini o‘rganadi va umumlashtirilgan takliflar tayyorlaydi.

26. Departament:

O‘zbekiston Respublikasi Moliya vazirligi bilan kelishgan holda Iqtisodiyot vazirligiga — kelgusi yil va keyingi yillar uchun Investitsiya dasturini shakllantirish maqsadida melioratsiya obyektlarini qurish va rekonstruksiya qilish loyihalarining manzilli dasturi bo‘yicha takliflar kiritadi;

Jamg‘arma Kengashiga — 1-iyulgacha bo‘lgan muddatda kelgusi yil uchun umumlashtirilgan takliflar kiritadi.

27. Muhokama natijalari Jamg‘arma Kengashining bayonnomasi bilan rasmiylashtiriladi.

28. Navbatdagi besh yillik muddat uchun Davlat dasturi ushbu Nizomda belgilangan har yilgi hududiy aniq dasturlarni shakllantirish tartibiga muvofiq shakllantiriladi.

Sug‘oriladigan yerlarning meliorativ holatini yaxshilash dasturlarini shakllantirish va amalga oshirish sxemasi ushbu Nizomga ilovada keltirilgan.

29. Sug‘oriladigan yerlarning meliorativ holatini yaxshilash va meliorativ va boshqa texnika, mashinalar, uskunalar va boshqa mexanizatsiya vositalarini lizingga oluvchilar bo‘yicha loyihalarning Jamg‘arma Kengashi tomonidan tasdiqlangan aniq dasturlari, shuningdek Hukumat yoki O‘zbekiston Respublikasi Prezidentining tegishli qarori ushbu loyihalarni belgilangan tartibda Jamg‘arma mablag‘lari hisobiga amalga oshirish va moliyalashtirish uchun asos hisoblanadi.

30. Quyidagilar:

magistral, tumanlararo kollektorlarni va xo‘jaliklararo kollektor-drenaj tarmoqlarini, vertikal drenaj quduqlarni, nasos stansiyalarini, kuzatish tarmoqlarini qurish va rekonstruksiya qilish, shuningdek magistral kollektorlarni ta’mirlash va tiklash loyihalari bo‘yicha — Departament;

tumanlararo va xo‘jaliklararo kollektorlarni va ulardagi inshootlarni, vertikal drenaj quduqlarni, nasos stansiyalarini, kuzatish tarmoqlarini, yopiq gorizontal drenaj tarmoqlarini tiklash va ta’mirlash, shuningdek meliorativ obyektlardagi avariya-tiklash ishlari va oldindan ko‘rish mumkin bo‘lmagan ishlar — “Suvqurilishinvest” DUK;

31. Loyiha-qidiruv hujjatlarini ishlab chiqishga topshiriqlar:

meliorativ obyektlarni qurish va rekonstruksiya qilish bo‘yicha — Departament tomonidan;

meliorativ obyektlarni ta’mirlash va tiklash bo‘yicha — “Suvqurilishinvest” DUK tomonidan meliorativ ekspeditsiyalar bilan birgalikda tayyorlanadi.

Loyiha-qidiruv hujjatlarini ishlab chiqish bo‘yicha topshiriqlar Qoraqalpog‘iston Respublikasi Vazirlar Kengashi, viloyatlar va tumanlar hokimliklarining mutasaddi rahbarlari, havza boshqarmalari, nasos stansiyalari va energetika boshqarmalari, “Yergeodezkadastr” davlat qo‘mitasi, zarur bo‘lganda — Tabiatni muhofaza qilish davlat qo‘mitasi hududiy organlarining rahbarlari bilan kelishiladi.

32. Loyiha-qidiruv hujjatlarini ishlab chiqish yuzasidan topshiriq:

meliorativ obyektlarni qurish va rekonstruksiya qilish, shuningdek magistral kollektorlarni ta’mirlash va tiklash bo‘yicha — Departament;

meliorativ obyektlarni ta’mirlash va tiklash bo‘yicha (magistral kollektorlar bundan mustasno) — O‘zbekiston Respublikasi Suv xo‘jaligi vazirligi tomonidan tasdiqlanadi.

33. Loyiha-qidiruv hujjatlarini ishlab chiqish yuzasidan topshiriq tasdiqlangandan keyin tegishli buyurtmachilar tomonidan loyiha korxonalarini tanlash bo‘yicha tanlov o‘tkaziladi.

Davlat dasturidagi obyektlar bo‘yicha tanlov hujjatlarini ishlab chiqish, ularni ekspertizadan o‘tkazish, tanlov savdolarini tashkil etish va o‘tkazish qonunchilikda belgilangan tartibda amalga oshiriladi.

34. Meliorativ obyektlarni qurish va rekonstruksiya qilishning yangidan boshlangan loyihalari bo‘yicha loyiha qiymati ekvivalentda:

1 mln. AQSH dollarigacha bo‘lganda — buyurtmachi tomonidan tasdiqlanadigan ishchi loyiha ishlab chiqiladi;

1 mln. AQSH dollaridan 10 mln. AQSH dollarigacha bo‘lganda — Jamg‘arma Kengashi tomonidan tasdiqlanadigan texnik-iqtisodiy hisob-kitob va ishchi hujjatlar ishlab chiqiladi;

10 mln. AQSH dollaridan ortiq bo‘lganida — texnik-iqtisodiy hisob-kitob va ishchi hujjatlar ishlab chiqiladi. Bunda texnik-iqtisodiy hisob-kitob Vazirlar Mahkamasining qarori bilan tasdiqlanadi.

Loyiha xalqaro moliya institutlarining mablag‘lari hisobiga birgalikda moliyalashtirilgan taqdirda texnik-iqtisodiy hisob-kitob belgilangan tartibda O‘zbekiston Respublikasi Hukumatining yoki O‘zbekiston Respublikasi Prezidentining tegishli qarori bilan tasdiqlanadi.

Meliorativ obyektlarni qurish va rekonstruksiya qilish, shuningdek magistral kollektorlarni ta’mirlash va tiklash bo‘yicha texnik-iqtisodiy hisob-kitob, ishchi loyihalar va ish hujjatlari belgilangan tartibda tarmoq ekspertizasidan va O‘zbekiston Respublikasi Davlat arxitektura va qurilish qo‘mitasida ekspertizadan o‘tadi.

35. Meliorativ obyektlarni ta’mirlash va tiklash loyihalari bo‘yicha faqat ishchi loyihalar ishlab chiqiladi.

Meliorativ obyektlarni ta’mirlash va tiklash bo‘yicha tizimli loyihaning cheklangan qiymatining ekvivalentda 1 mln. AQSH dollarigacha, magistral kollektorlarni ta’mirlash va tiklash bo‘yicha esa — ekvivalentda 10 mln. AQSH dollarigacha bo‘lishiga yo‘l qo‘yiladi.

Kollektorlarning barcha turlarini va boshqa meliorativ obyektlarni ta’mirlash va tiklashning ishchi loyihalari O‘zbekiston Respublikasi Davlat arxitektura va qurilish qo‘mitasining hududiy ekspertiza boshqarmalarida ekspertizadan o‘tkaziladi va buyurtmachi tomonidan tasdiqlanadi.

36. Ishchi loyihalar zaruriyat bo‘lganda ixtisoslashtirilgan mustaqil kompaniyaga (yoki ekspertga) qo‘shimcha ekspertizaga berilishi mumkin, uning xulosasi O‘zbekiston Respublikasi Davlat arxitektura va qurilish qo‘mitasi bilan kelishilishi kerak.

37. Meliorativ nasos stansiyalari va vertikal drenaj quduqlarni ta’mirlash va tiklash ishlari ishchi loyihalar asosida amalga oshiriladi.

Meliorativ nasos stansiyalari va vertikal drenaj quduqlarni ta’mirlash va tiklash ishlari bo‘yicha ishchi loyihalar havza boshqarmasi tomonidan tashkil etilgan ishchi komissiyalar tomonidan tuzilgan nuqsonlar dalolatnomalari asosida amalga oshiriladi.

Ishchi komissiya tarkibiga “Suvqurilishinvest” DUK, meliorativ ekspeditsiya, nasos stansiyalari, energetika va aloqa boshqarmasi, Departament, tuman qishloq xo‘jaligi bo‘limi, tegishli suv iste’molchilari uyushmalari va boshqa manfaatdor tashkilotlarning vakillari kiritiladi.

Favqulodda hollarda meliorativ obyektlardagi avariya-tiklash ishlari va oldindan ko‘rish mumkin bo‘lmagan ishlar Departament bilan kelishgan holda alohida lokal smetalar bo‘yicha amalga oshirilishi mumkin.

Lokal smetalar loyiha tashkilotlari tomonidan tuziladi, “Davarxitektqurilish” qo‘mitasining hududiy ekspertiza boshqarmalarida ekspertizadan o‘tkaziladi va “Suvqurilishinvest” DUK tomonidan tasdiqlanadi.

54. Meliorativ obyektlarni qurish, rekonstruksiya qilish, ta’mirlash va tiklash bo‘yicha tugallangan loyihalarni foydalanishga qabul qilib olish belgilangan tartibda komissiyalar tomonidan amalga oshiriladi.

55. Meliorativ obyektlarni qurish va rekonstruksiya qilish, shuningdek magistral kollektorlarni ta’mirlash va tiklash bo‘yicha tugallangan loyihalarni qabul qilib olish komissiyalarining tarkibi Jamg‘arma Kengashi tomonidan tasdiqlanadi.

56. Meliorativ obyektlarni, magistral kollektorlar bundan mustasno, ta’mirlash va tiklash bo‘yicha tugallangan loyihalarni qabul qilish komissiyalarining tarkibi — Qoraqalpog‘iston Respublikasi Vazirlar Kengashi Raisi va viloyatlar hokimlari tomonidan tasdiqlanadi.

Komissiyalar manfaatdor vazirliklar, idoralar va tashkilotlarning, shuningdek yerdan foydalanuvchilarning va suv iste’molchilari uyushmalarining vakillaridan tashkil etiladi.

1. 1-maygacha melioratsiya obyektlarining texnik holatini va sug‘oriladigan yerlarning meliorativ holatini o‘rganish, yerlarning meliorativ holatini yaxshilash takliflarini tahlil qilish, umumlashtirish va ishlab chiqish, muhokama qilish, shuningdek, tumanlar hokimlari bilan kelishish.

2. Sug‘oriladigan yerlarning meliorativ holatini yaxshilash takliflarini umumlashtirish va 15-maygacha bo‘lgan muddatda “Suvqurilishinvest” DUK va meliorativ ekspeditsiyaga taqdim etish.

3. Ishchi guruhlar takliflarini tahlil qilish va umumlashtirish, kelgusi yil uchun hududiy manzilli dasturni shakllantirish va havza boshqarmasi suv xo‘jaligi kengashi a’zolari va boshqa manfaatdor tashkilotlar ishtirokida tumanlar hokimlari (viloyat hokimi, Qoraqalpog‘iston Respublikasi Vazirlar Kengashi Raisi) huzurida uning taqdimotini o‘tkazish.

4. 25-maygacha bo‘lgan muddatda hududiy manzilli dasturlarni Suv xo‘jaligi vazirligiga ko‘rib chiqish uchun taqdim etish.

5. 1-iyungacha bo‘lgan muddatda hududiy manzilli dasturlarni tahlil qilish, ekspertizadan o‘tkazish va umumlashtirish, Suv xo‘jaligi vazirligining TITK majlisida muhokama qilish.

6. 5-iyungacha bo‘lgan muddatda kelgusi yil uchun sug‘oriladigan yerlarning meliorativ holatini yaxshilash takliflarini ko‘rib chiqish uchun kiritish.

7. Ko‘rib chiqish va 15-iyungacha bo‘lgan muddatda xulosalar berish.

8. Sug‘oriladigan yerlarning meliorativ holatini yaxshilash takliflari va xulosalarini tahlil qilish hamda 1-iyulgacha bo‘lgan muddatda Jamg‘arma Kengashiga taqdim etish.

9. Kelgusi yil uchun manzilli dasturni muhokama qilish va tasdiqlash hamda amalga oshirish uchun yo‘naltirish.

10. Tasdiqlangan manzilli dasturga kiritilgan loyihani amalga oshirish.