Oʻzbekiston Respublikasi Prezidentining “2006 — 2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturi toʻgʻrisida” 2006-yil 13-noyabrdagi PQ-510-son qarorining bajarilishini taʼminlash maqsadida Vazirlar Mahkamasi qaror qiladi:

1. Quyidagilar:

“Gurlan” aksiyadorlik jamiyati bazasidagi “MURUVVAT-TEKS” xorijiy shuʼba korxonasi toʻqimachilik kompleksini tashkil etish” loyihasi Oʻzbekiston Respublikasi Prezidentining “2006 — 2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturi toʻgʻrisida” 2006-yil 13-noyabrdagi PQ-510-son qarori 1-ilovasiga kiritilganligi;

ushbu loyiha doirasida “MURUVVAT-TEKS” xorijiy shuʼba korxonasi bilan “Zeromax GmbH” (Shveysariya) kompaniyasi oʻrtasida umumiy summasi 12526846 AQSh dollari boʻlgan texnologik va yordamchi asbob-uskunalar, ehtiyot qismlar hamda texnologik jihozlar yetkazib berish yuzasidan 2006-yil 17-noyabrdagi № ZM/MT-001 raqamli import kontrakti tuzilganligi;

Yengil sanoat korxonalarini qurish, qayta ixtisoslashtirish va modernizatsiya qilishga doir takliflarni koʻrib chiqish boʻyicha idoralararo ekspert kengashi tomonidan ushbu kontrakt doirasida chetdan keltirilgan va bojxona toʻlovlari toʻlashdan ozod qilinadigan texnologik va yordamchi asbob-uskunalar, ehtiyot qismlar hamda texnologik jihozlar roʻyxati yuzasidan ijobiy xulosa berilganligi maʼlumot uchun qabul qilinsin.

2. Mazkur kontrakt doirasida olib kirish vaqtida “Gurlan” aksiyadorlik jamiyati bazasidagi “MURUVVAT-TEKS” xorijiy shuʼba korxonasi Oʻzbekiston Respublikasi Prezidentining “2006 — 2008-yillarda toʻqimachilik sanoati korxonalarini modernizatsiya qilish va texnikaviy qayta jihozlash Dasturi toʻgʻrisida” 2006-yil 13-noyabrdagi PQ-510-son qarorining 5-bandiga muvofiq bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod qilinadigan texnologik va yordamchi asbob-uskunalar, ehtiyot qismlar hamda texnologik jihozlar roʻyxati ilovaga* muvofiq tasdiqlansin.

3. Oʻzbekiston Respublikasi Moliya vazirligi, Davlat soliq qoʻmitasi boʻshab qoladigan mablagʻlardan “Gurlan” aksiyadorlik jamiyati bazasidagi “MURUVVAT-TEKS” xorijiy shuʼba korxonasi tomonidan ishlab chiqarishni texnikaviy qayta jihozlash va modernizatsiya qilish, tayyor mahsulotlarning yangi turlarini oʻzlashtirish, oʻz aylanma mablagʻlarini toʻldirish uchun maqsadli foydalanilishi ustidan qatʼiy nazorat oʻrnatsinlar. Ushbu mablagʻlardan belgilangan maqsadda foydalanilmagan taqdirda ular korxonaga nisbatan qonun hujjatlarida nazarda tutilgan jarima sanksiyalari qoʻllagan holda toʻliq hajmda davlat budjetiga undiriladi.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.