Oʻzbekiston Respublikasining “Auditorlik faoliyati toʻgʻrisida”gi Qonuniga muvofiq hamda auditorlik faoliyatini yanada takomillashtirish, auditorlik tashkilotlarining moliyaviy barqarorligini oshirish maqsadida:

1. 2008-yilning 1-avgustidan shunday tartib oʻrnatilsinki, unga koʻra auditorlik tashkiloti ustav kapitalining kamida ellik foizi muassislar (ishtirokchilar)ning pul mablagʻlaridan, qolgan qismi esa auditorlik faoliyatini amalga oshirishda bevosita foydalaniladigan moddiy boyliklardan shakllantiriladi.

2. Ishlab turgan auditorlik tashkilotlari 2009-yilning 1-avgustigacha boʻlgan muddatda ustav kapitalining tuzilmasini mazkur qarorning 1-bandida koʻrsatilgan talabga muvofiqlashtirsin.

3. Oʻzbekiston Respublikasi Moliya vazirligi va Adliya vazirligi Oʻzbekiston Respublikasi Davlat soliq qoʻmitasi bilan birgalikda 2009-yilning 1-avgustidan boshlab ushbu qaror talablariga javob bermaydigan auditorlik tashkilotlarining litsenziyalari amal qilishini belgilangan tartibda toʻxtatish va bekor qilish choralarini koʻrsin.

4. Oʻzbekiston Respublikasi Prezidenti va Oʻzbekiston Respublikasi Hukumatining ayrim qarorlariga ilovaga muvofiq oʻzgartish va qoʻshimchalar kiritilsin.

5. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Oʻzbekiston Respublikasi Prezidentining “Auditorlik tashkilotlari faoliyatini yanada takomillashtirish hamda ular koʻrsatayotgan xizmatlar sifati uchun javobgarlikni oshirish toʻgʻrisida” 2007-yil 4-apreldagi PQ-615-son qarori bilan tasdiqlangan Auditorlik tashkilotlari toʻgʻrisidagi nizomning:

12-bandi quyidagi mazmundagi beshinchi-oltinchi xatboshilari bilan toʻldirilsin:

“Mazkur bandning auditorlik tashkilotiga uning shtatidagi auditorlarning eng kam soniga nisbatan qoʻyilgan talabi mazkur auditorlik tashkiloti asosiy ish joyi hisoblangan auditorlik shtati auditorlarning belgilangan eng kam soni bilan toʻliq toʻldirilishini nazarda tutadi.

Auditorlik tashkiloti ustav kapitalining kamida ellik foizi muassislar (ishtirokchilar)ning pul mablagʻlaridan, qolgan qismi esa auditorlik tashkiloti faoliyatini amalga oshirishda bevosita foydalaniladigan moddiy boyliklardan shakllantiriladi”.

2. Oʻzbekiston Respublikasi Vazirlar Mahkamasining “Auditorlik faoliyatini takomillashtirish va auditorlik tekshirishlarining ahamiyatini oshirish toʻgʻrisida” 2000-yil 22-sentabrdagi 365-son qarorining (Oʻzbekiston Respublikasi QT, 2000-y., 9-son, 62-modda):

a) 3-bandi:

quyidagi mazmundagi oltinchi xatboshi bilan toʻldirilsin:

“qonun hujjatlarida belgilangan tartibda auditorlarga malaka sertifikatlarini berish, amal qilishini toʻxtatish va bekor qilish”;

oltinchi xatboshi yettinchi xatboshi deb hisoblansin;

b) 2-ilovasidagi 10-bandi quyidagi tahrirda bayon etilsin:

“10. Soliq organlari quyidagilar:

majburiy auditorlik tekshiruvi oʻtkaziladigan xoʻjalik yurituvchi subyektlar;

har bir xoʻjalik yurituvchi subyektlar boʻyicha auditorlik tekshiruvi oʻtkazgan auditorlik tashkilotini koʻrsatib oʻtgan holda majburiy auditorlik tekshiruvi oʻtkazilgan xoʻjalik yurituvchi subyektlar;

majburiy auditorlik tekshiruvi oʻtkazilishidan boʻyin tovlagan xoʻjalik yurituvchi subyektlar;

majburiy auditorlik tekshiruvi oʻtkazilishidan boʻyin tovlagan xoʻjalik yurituvchi subyektlarga va ularning mansabdor shaxslariga nisbatan qoʻllanilgan jarima sanksiyalari toʻgʻrisida maʼlumotlar bazasini olib boradi.

Davlat soliq qoʻmitasi har yili 20-fevralgacha va 20-iyulgacha litsenziya beruvchi organga ushbu xoʻjalik yurituvchi subyektlar va ularga nisbatan oʻtgan yil va joriy yilning birinchi yarmi uchun qoʻllanilgan jarima sanksiyalari toʻgʻrisida umumlashma axborot taqdim etadi. Bunda har bir majburiy auditorlik tekshiruvidan oʻtkazilgan xoʻjalik yurituvchi subyekt boʻyicha mazkur tekshiruvni olib borgan auditorlik tashkiloti koʻrsatib oʻtiladi.

Majburiy auditorlik tekshiruvi oʻtkazmagan xoʻjalik yurituvchi subyektga nisbatan qonun hujjatlarida nazarda tutilgan jazo choralarini qoʻllamaganligi uchun soliq organlarining mansabdor shaxslari qonun hujjatlarida belgilangan tartibda javobgar boʻladilar”;

v) 3-ilovasidagi:

4-bandi:

quyidagi mazmundagi toʻrtinchi xatboshi bilan toʻldirilsin:

“mehnat daftarchalarining notarial tasdiqlangan nusxalari va asosiy ish joyi boʻyicha shtatdagi auditorlarni ushbu Nizomda nazarda tutilgan shtatdagi auditorlarning eng kam soniga toʻgʻri keladigan miqdorda ishga qabul qilish toʻgʻrisidagi buyruqlarning tasdiqlangan nusxalari”;

toʻrtinchi — oltinchi xatboshilar tegishli ravishda beshinchi — yettinchi xatboshi deb hisoblansin;

26-1-bandi quyidagi mazmundagi beshinchi-oltinchi xatboshilar bilan toʻldirilsin:

“Mazkur bandning auditorlik tashkilotiga uning shtatidagi auditorlarning eng kam soniga nisbatan qoʻyilgan talabi mazkur auditorlik tashkiloti asosiy ish joyi hisoblangan auditorlik shtati auditorlarning belgilangan eng kam soni bilan toʻliq toʻldirilishini nazarda tutadi.

Litsenziya olingandan soʻng ushbu band talablariga toʻgʻri kelmagan taqdirda auditorlik tashkiloti nomuvofiqlik yuzaga kelgandan boshlab 5 kun davomida litsenziya beruvchi organni yozma ravishda xabardor qiladi hamda koʻrsatilgan sanadan boshlab kamida 3 oy muddatda yuzaga kelgan nomuvofiqlikni bartaraf etishi, yoki boshqa turdagi auditorlik tekshiruvini amalga oshirish huquqiga litsenziya olish yoxud belgilangan tartibda oʻz faoliyatini tugatish toʻgʻrisida qaror qabul qilishi shart. Auditorlik tashkiloti tomonidan ushbu bandning talablariga nomuvofiqlik bartaraf etilgunga qadar auditorlik tekshiruvini oʻtkazish qonun hujjatlariga muvofiq javobgarlikni keltirib chiqaradi”;

quyidagi mazmundagi 26-2-band bilan toʻldirilsin:

“26-2. Auditorlik tashkiloti ustav kapitalining kamida ellik foizi muassislar (ishtirokchilar)ning pul mablagʻlaridan, qolgan qismi esa auditorlik tashkiloti faoliyatini amalga oshirishda bevosita foydalaniladigan moddiy boyliklardan shakllantiriladi”.