O‘zbekiston Respublikasi Prezidentining 2008-yil 21-maydagi PQ-872-sonli “Sug‘urta xizmatlari bozorini yanada isloh qilish va rivojlantirishga oid qo‘shimcha chora-tadbirlar to‘g‘risida”gi qarorining ijrosini ta’minlash maqsadida va O‘zbekiston Respublikasi Vazirlar Mahkamasining 1992-yil 23-noyabrdagi 553-sonli qarori bilan tasdiqlangan O‘zbekiston Respublikasi Moliya vazirligi to‘g‘risidagi nizomga muvofiq (O‘zbekiston Respublikasi Hukumat qarorlari to‘plami, 1992-yil, 11-son, 37-modda) buyuraman:

1. Ilova qilinayotgan Sug‘urtalovchining (sug‘urta brokerining) rahbariga va bosh buxgalteriga qo‘yiladigan malaka talablari to‘g‘risidagi nizom tasdiqlansin.

2. O‘zbekiston Respublikasi moliya vazirining 2004-yil 25-martdagi 52-sonli “Sug‘urtalovchining ijro etuvchi organi rahbariga va bosh buxgalteriga qo‘yiladigan malaka talablari to‘g‘risidagi nizomni tasdiqlash haqida”gi buyrug‘i (2004-yil 16-aprel, ro‘yxat raqami 1338 — O‘zbekiston Respublikasi qonun hujjatlari to‘plami, 2004-y., 15-son, 183-modda) o‘z kuchini yo‘qotgan deb hisoblansin.

3. Mazkur buyruq O‘zbekiston Respublikasi Adliya vazirligida davlat ro‘yxatidan o‘tgan kundan boshlab o‘n kundan keyin kuchga kiradi.

Mazkur Nizom “Sug‘urta faoliyati to‘g‘risida”gi O‘zbekiston Respublikasi Qonuni va O‘zbekiston Respublikasi Prezidentining 2008-yil 21-maydagi PQ-872-sonli “Sug‘urta xizmatlari bozorini yanada isloh qilish va rivojlantirishga oid qo‘shimcha chora-tadbirlar to‘g‘risida”gi qaroriga muvofiq, sug‘urtalovchining (sug‘urta brokerining) rahbariga va bosh buxgalteriga qo‘yiladigan malaka talablarini belgilaydi.

Mazkur Nizom sug‘urtalovchilarning (sug‘urta brokyerlarining) O‘zbekiston Respublikasi Hukumati qarori bilan tayinlanadigan rahbarlariga tatbiq etilmaydi.

1. Mazkur Nizom maqsadlarida qo‘llaniladigan asosiy tushunchalar:

sug‘urtalovchining (sug‘urta brokerining) rahbari — qonunchilik va sug‘urtalovchining (sug‘urta brokerining) ta’sis hujjatlariga muvofiq tayinlanishi yoki saylanishi natijasida, tuzilgan mehnat shartnomasiga asosan sug‘urtalovchining (sug‘urta brokerining) yagona ijro etuvchi organi bo‘lib hisoblanadigan yoki sug‘urtalovchining (sug‘urta brokerining) kollegial ijro etuvchi organi ustidan boshqaradigan jismoniy shaxs;

sug‘urtalovchining (sug‘urta brokerining) bosh buxgalteri — sug‘urtalovchining (sug‘urta brokerining) buxgalteriya hisobi va moliyaviy boshqaruvi funksiyalarini amalga oshiruvchi, buxgalteriya hisobini tashkillashtirishni hamda moddiy va moliyaviy resurslarni oqilona, tejamkorlik bilan ishlatilishini nazorat qilishni ta’minlaydigan jismoniy shaxs.

2. Sug‘urtalovchilarning (sug‘urta brokyerlarining) rahbarlari va bosh buxgaltyerlari lavozimlariga tavsiya etilayotgan nomzodlar (bundan buyon matnda nomzodlar deb yuritiladi) mazkur Nizomda belgilangan malaka talablariga mos kelgan taqdirda tayinlanadi (saylanadi).

3. Sug‘urtalovchi (sug‘urta brokeri) O‘zbekiston Respublikasi Moliya vazirligiga (bundan buyon matnda Moliya vazirligi deb yuritiladi) nomzodlarning mazkur Nizomda belgilangan malaka talablariga mos kelishini tasdiqlovchi hujjatlarni ular sug‘urtalovchining (sug‘urta brokerining) rahbari va bosh buxgalteri lavozimlariga tayinlanishidan (saylanishidan) avval taqdim etishga majbur.

4. Sug‘urtalovchining (sug‘urta brokerining) rahbari quyidagi malaka talablariga mos kelishi lozim:

a) O‘zbekiston Respublikasi oliy ta’lim muassasalarida olingan oliy ma’lumotga yoki xorijiy davlatlarning ta’lim muassasalarida olingan, hamda qonun hujjatlariga muvofiq, O‘zbekiston Respublikasidagi oliy ma’lumotga ekvivalent deb tan olingan oliy ma’lumotga ega bo‘lishi;

b) sug‘urta sohasida 2 yildan kam bo‘lmagan ish stajiga ega bo‘lishi (sug‘urta agenti sifatidagi, shuningdek, yordamchi, texnik va xizmat ko‘rsatuvchi xodimlar lavozimlaridagi ish staji hisobga olinmaydi).

5. Sug‘urtalovchining (sug‘urta brokerining) bosh buxgalteri quyidagi malaka talablariga mos kelishi lozim:

a) O‘zbekiston Respublikasi oliy ta’lim muassasalarida olingan oliy (buxgalterlik, moliyaviy, iqtisodiy) ma’lumotga yoki xorijiy davlatlarning ta’lim muassasalarida olingan, hamda qonun hujjatlariga muvofiq, O‘zbekiston Respublikasidagi oliy ma’lumotga ekvivalent deb tan olingan oliy (buxgalterlik, moliyaviy, iqtisodiy) ma’lumotga ega bo‘lishi;

b) buxgalter sifatida 3 yildan kam bo‘lmagan ish stajiga ega bo‘lishi, shundan sug‘urta sohasida buxgalter sifatida bir yildan kam bo‘lmagan ish stajiga ega bo‘lishi.

6. Sug‘urtalovchining (sug‘urta brokerining) rahbari (bosh buxgalteri) etib, rahbar (bosh buxgalter) tomonidan amalga oshirilgan harakatlar yuridik shaxsni bankrotlikka yoki uni majburiy tugatish to‘g‘risida sud tomonidan qaror chiqarilishiga olib kelganligi bo‘yicha ma’lumotlar mavjud bo‘lgan hollarda, bankrot deb topilgan yoki sud tomonidan uni majburiy tugatish to‘g‘risidagi qaror chiqarilgan paytgacha bir yil mobaynida yuridik shaxsning rahbari (bosh buxgalteri) bo‘lib hisoblangan shaxs tayinlanishi (saylanishi) mumkin emas.

7. Sug‘urtalovchi (sug‘urta brokeri) Moliya vazirligiga quyidagi hujjatlarni taqdim etadi:

a) mazkur Nizomning ilovasiga muvofiq keltirilgan shakl bo‘yicha to‘ldirilgan anketa;

b) oliy ma’lumot to‘g‘risidagi diplomning notarial tasdiqlangan nusxasi yoki oliy ma’lumot to‘g‘risidagi xorijiy hujjatning ekvivalentligini tan olish to‘g‘risida vakolatli davlat organi guvohnomasining notarial tasdiqlangan nusxasi (xorijiy davlatlarning ta’lim muassasalarida olingan oliy ma’lumot mavjud bo‘lgan taqdirda);

v) mehnat daftarchasining notarial tasdiqlangan nusxasi. O‘rindoshlik bo‘yicha mehnat staji mavjud bo‘lgan taqdirda, bu haqda mehnat daftarchasida qayd qilingan bo‘lishi lozim.

Ko‘rsatilgan hujjatlar bir nusxada taqdim qilinadi.

8. Nomzodlar mazkur Nizomda belgilangan malaka talablariga mos kelgan taqdirda, Moliya vazirligi bu haqda sug‘urtalovchiga (sug‘urta brokeriga) 3 kunlik muddatda yozma ravishda xabar beradi.

9. Nomzodlar mazkur Nizomda belgilangan malaka talablariga mos kelmagan taqdirda, Moliya vazirligi bu haqda sug‘urtalovchiga (sug‘urta brokeriga) mos kelmaganlik sabablarini ko‘rsatgan holda 3 kunlik muddatda yozma ravishda xabar beradi.

10. Sug‘urtalovchi (sug‘urta brokeri) mazkur Nizom talablarini buzgan taqdirda, sug‘urtalovchiga (sug‘urta brokeriga) qonun hujjatlariga muvofiq choralar ko‘riladi.

11. Mazkur Nizom talablarining buzilishida aybdor bo‘lgan shaxslar qonun hujjatlarida belgilangan tartibda javobgarlikka tortiladilar.

Anketa nomzodning o‘z qo‘li bilan, tushunarli dastxatda, siyoh yoki qora, ko‘k, binafsha rangli pastali sharikli ruchkada to‘ldirilishi lozim. Barcha sanalar arab raqamlarida keltirilishi shart.

Anketaning barcha savollariga to‘liq va aniq javoblar berilishi, hamda anketaning biror qismi to‘ldirilmasdan qolmasligi shart. Hatto bitta to‘ldirilmay qolgan qismining mavjudligi, butun anketaning to‘liq to‘ldirilmaganligini anglatadi va u sug‘urtalovchiga (sug‘urta brokeriga) qaytariladi. Zarur bo‘lgan taqdirda, to‘liq ma’lumot keltirish uchun anketaga qo‘shimcha varaqlar ilova qilinishi mumkin.