O‘zbekiston Respublikasi Vazirlar Mahkamasining 2007-yil 25-sentabrdagi 202-sonli “Davlat aktivlarini sotishdan tushgan, xo‘jalik boshqaruvi ayrim organlari ustav fondini shakllantirish uchun berilgan mablag‘larni taqsimlash tartibi to‘g‘risida”gi (O‘zbekiston Respublikasi qonun hujjatlari to‘plami, 2007-y., 39-son, 403-modda) qaroriga muvofiq O‘zbekiston Respublikasi Moliya vazirligi va Davlat mulkini boshqarish davlat qo‘mitasi qaror qiladi:

1. “Paxtasanoat” hududiy aksiyadorlik birlashmalari ustav fondlariga berilgan davlat aktivlarini sotishdan tushgan mablag‘larni “O‘zpaxtasanoat” uyushmasi tomonidan jamlanishi va ishlatilishi tartibi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgach kuchga kiradi.

Mazkur Nizom O‘zbekiston Respublikasi Vazirlar Mahkamasining 2007-yil 25-sentabrdagi 202-sonli “Davlat aktivlarini sotishdan tushgan, xo‘jalik boshqaruvi ayrim organlari ustav fondini shakllantirish uchun berilgan mablag‘larni taqsimlash tartibi to‘g‘risida”gi (O‘zbekiston Respublikasi qonun hujjatlari to‘plami, 2007-y., 39-son, 403-modda) qaroriga muvofiq “Paxtasanoat” hududiy aksiyadorlik birlashmalari ustav fondlariga berilgan davlat aktivlari (keyingi o‘rinlarda — davlat aktivlari) sotilishidan “O‘zpaxtasanoat” uyushmasi (keyingi o‘rinlarda — Uyushma) ixtiyoriga kelib tushadigan mablag‘larni jamlash va ishlatish tartibini belgilaydi.

1. O‘zbekiston Respublikasi Davlat mulkini boshqarish davlat qo‘mitasi (keyingi o‘rinlarda — Davlat mulki qo‘mitasi) davlat aktivlarini qonunchilikda belgilangan tartibda sotishni amalga oshiradi.

2. Davlat aktivlarini sotishdan tushadigan mablag‘lar Davlat mulki qo‘mitasining maxsus hisob raqamida jamlanadi va davlat aktivlarini oldi-sotdi shartnomasiga muvofiq sotib oluvchi tomonidan sotib olish to‘lovlari to‘liq amalga oshirilgandan keyin quyidagi tartibda taqsimlanadi:

“Paxtasanoat” XABning (keyingi o‘rinlarda — Birlashma) yozma murojaati, shuningdek Qimmatli qog‘ozlarning Davlat Markaziy depozitariysi tasdiqlovchi ma’lumoti asosida Birlashmalar ustav fondlariga kiritilgan davlat aktivlarining qiymatiga teng bo‘lgan mablag‘lar ularning hisob raqamiga o‘tkazib beriladi;

mablag‘larning qolgan qismi 100 foiz deb qabul qilinadi va qonunchilikda belgilangan tartibda Davlat mulki qo‘mitasi ixtiyorida qoldiriladigan mablag‘lar chegirilgandan so‘ng, Uyushmaning tijorat banklarida ochilgan “22626 — korxona va tashkilotlarning maqsadli mablag‘lari” maxsus hisob raqamiga o‘tkazib beriladi.

3. Uyushma Davlat mulki qo‘mitasidan tegishli shartnoma asosida kelib tushgan mablag‘larni keyinchalik paxta tozalash korxonalarini modernizatsiyalash va rekonstruksiya qilish bo‘yicha aniq loyihalarni amalga oshirish bo‘yicha maqsadli ishlatilish uchun muddatli, qaytarish va to‘lash sharti bilan yo‘naltiradi.

Davlat mulki qo‘mitasi va Uyushma o‘rtasida har bir sotilgan davlat aktivi bo‘yicha alohida shartnoma tuziladi.

4. Mazkur Nizomga asosan mablag‘larni jamlash va ishlatish bo‘yicha alohida hisob yuritish maqsadida Uyushma va paxta tozalash korxonalari, xizmat ko‘rsatuvchi bankda “22626-korxona va tashkilotlarning maqsadli mablag‘lari” maxsus hisob raqami ochadilar.

5. Sotib olish to‘lovlarining to‘liq miqdori Davlat mulki qo‘mitasining maxsus hisob raqamiga kelib tushgan sanadan keyingi oyning 15-sanasigacha Davlat mulki qo‘mitasi va Uyushma o‘rtasida tegishli shartnoma tuziladi va shartnomada ko‘rsatilgan mablag‘lar ushbu shartnoma kuchga kirgan kundan boshlab 3 (uch) bank kunidan ko‘p bo‘lmagan muddatda Uyushmaning maxsus hisob raqamiga o‘tkazilishi lozim.

6. Davlat mulki qo‘mitasi tomonidan Uyushmaga berilgan mablag‘larga Uyushma maxsus hisob raqamiga kelib tushgan kundan boshlab Davlat mulki qo‘mitasiga qaytarilish kuniga qadar O‘zbekiston Respublikasi Markaziy bankining qayta moliyalashtirish yillik stavkasining 50 foizi miqdorida kunlik foizlar hisoblanadi.

7. Uyushma unga berilgan mablag‘larni (asosiy qarzni) va ularga hisoblangan foizlarni alohida tarzda 2012-yilning 1-yanvaridan boshlab 3 yil davomida shartnomaga ilova qilinadigan jadval asosida teng yillik ulushlarda Davlat mulki qo‘mitasiga qaytaradi.

8. Paxta tozalash korxonalaridan mablag‘larga buyurtma bo‘lmaganda, ularni ko‘rib chiqish davrida va Uyushma maxsus hisob raqamidagi mablag‘lar qoldig‘i, buyurtmalarda ko‘rsatilgan mablag‘lar miqdoridan ko‘p bo‘lgan hollarda, Uyushma maxsus hisob raqamidagi vaqtinchalik bo‘sh mablag‘lar O‘zbekiston Respublikasining tijorat banklaridagi depozitlarga joylashtirilishi mumkin. Ulardan olingan daromadlar mablag‘larning Uyushma maxsus hisob raqamida turgan davriga hisoblangan foizlarni to‘lash uchun maqsadli yo‘naltiriladi.

Davlat mulki qo‘mitasi tomonidan mablag‘larning Uyushma maxsus hisob raqamida bo‘lgan davri uchun hisoblangan foizlar, to‘lovlar kechiktirilganligi uchun hisoblangan ustamalar va jarimalar (hisoblangan taqdirda), asosiy qarz, bank xizmatlari uchun to‘lovlar va berilgan mablag‘larni boshqarish xarajatlarini to‘lash uchun mablag‘larning yetmagan qismini Uyushma o‘z mablag‘lari hisobidan to‘lab beradi.

9. Modernizatsiyalash va rekonstruksiya qilish uchun mablag‘larga ehtiyoji bor paxta tozalash korxonalari, korxona tegishli boshqaruv organining qarz mablag‘larni jalb qilish to‘g‘risidagi qaroriga asosan unga tegishli hujjatlar va hisob-kitoblarni (paxta tozalash korxonalari tomonidan ishlab chiqilgan va o‘rnatilgan tartibda tasdiqlangan rekonstruksiya va modernizatsiya loyiha-smeta hujjatlarini va texnik-iqtisodiy hisob-kitoblarni hamda Uyushma tomonidan belgilangan boshqa hujjatlarni) ilova qilgan holda Uyushmaga yozma murojaat yuboradilar.

10. Uyushma tushgan murojaatlarning alohida hisobini yuritadi, paxta tozalash korxonalari tomonidan taqdim etilgan hujjatlarni malakali mutaxassislarni jalb qilgan holda ko‘rib chiqadi va ularni ko‘rib chiqish natijalari bo‘yicha murojaat etuvchiga murojaatni olgan kundan boshlab 20 ish kuni ichida mablag‘ ajratish yoki ajratmaslik (rad etishni asoslovchi dalillarni ko‘rsatgan holda) to‘g‘risida qabul qilingan qaror yuzasidan yozma bildirishnoma yuboradi.

11. Paxta tozalash korxonalarini modernizatsiyalash va rekonstruksiya qilish bo‘yicha barcha loyihalarni Uyushma tomonidan tuzilgan Komissiya tomonidan ekspertiza qilinishi, so‘ngra loyihalar O‘zbekiston Respublikasi Iqtisodiyot vazirligi va Moliya vazirligida ekspertizadan o‘tkazilishi lozim. Komissiyani tuzish va uning ishini tashkil qilish tartibi Uyushma tomonidan belgilanadi.

12. Loyihalarni ekspertizadan o‘tkazishda ishlab chiqarishning texnik darajasini oshirishga, birinchi navbatda, korxonalarning texnik paxta chigiti tejalishini, sifatli, raqobatga bardoshli paxta mahsulotlari ishlab chiqarilishini ta’minlaydigan zamonaviy asbob-uskunalar bilan jihozlanishiga alohida e’tibor qaratiladi.

Paxta tozalash korxonalarini modernizatsiyalash va rekonstruksiya qilish dasturini amalga oshirishda qatnashuvchi pudrat tashkilotlari belgilangan tartibda tanlov (tender) asosida aniqlanadi.

13. Agarda Uyushma tomonidan mablag‘ ajratish to‘g‘risida rad etish qarori qabul qilingan taqdirda, rad etish sabablarini to‘g‘rilash imkoniyati mavjud bo‘lsa, paxta tozalash korxonasi ularni bartaraf etgandan so‘ng, takroran Uyushmaga murojaat qilishga haqli. Takroran taqdim etilgan hujjatlar Uyushma tomonidan mazkur Nizomning 10-bandida qayd etilgan muddatda ko‘rib chiqiladi.

14. Mablag‘ ajratish to‘g‘risida qaror qabul qilingan taqdirda, Uyushma ushbu qaror qabul qilingan kundan boshlab 10 ish kuni ichida paxta tozalash korxonasi bilan mazkur Nizomda belgilangan shartlar asosida tegishli shartnoma tuzadi.

Uyushma maxsus hisob raqamida jamlangan mablag‘lar hisobidan moliyalashtirish korxonalarga modernizatsiyalash va rekonstruksiya qilish uchun bosqichma-bosqich avans berish bilan, keyingi hisob-kitoblar esa o‘rnatilgan tartibda haqiqatda bajarilgan ish hajmlari uchun paxta tozalash korxonalari tegishli hujjatlarni taqdim etgan kundan boshlab 3 bank kuni ichida amalga oshiriladi.

Shu bilan birga, avans to‘lovlari tegishli shartnoma tuzilgan kundan keyin 3 bank kuni ichida amalga oshiriladi.

15. Uyushma tomonidan ajratilgan mablag‘larga ushbu mablag‘lar paxta tozalash korxonasining maxsus hisob raqamiga kelib tushgan kundan boshlab va Uyushmaning maxsus hisob raqamiga qaytariladigan kunga qadar O‘zbekiston Respublikasi Markaziy bankining qayta moliyalashtirish yillik stavkasining 50 foizi miqdorida kunlik foizlar hisoblanadi.

16. Paxta tozalash korxonasi Uyushma tomonidan berilgan mablag‘larni va ularga hisoblangan foizlarni 2012-yil 1-yanvardan boshlab 3 yil davomida shartnomaga ilova qilinadigan jadval asosida teng yillik ulushlarda Uyushmaga qaytaradi.

17. Mablag‘ olgan paxta tozalash korxonalari ushbu mablag‘larni Uyushmaga o‘rnatilgan tartibda muddatidan oldin qaytarishga haqlidirlar.

18. Uyushmadan Davlat mulki qo‘mitasiga kelib tushgan asosiy qarz, foizlar, ustamalar va jarimalar (hisoblangan taqdirda) qaytarilgan vaqtda amal qiladigan qonunchilikda belgilangan tartibda taqsimlanadi.

Bunda asosiy qarz, foizlar, ustamalar va jarimalar (hisoblangan taqdirda) 100 foiz deb qabul qilinadi va Davlat mulki qo‘mitasiga tegishli qismi hisoblanmaydi.

Birlashmalar ustav fondiga berilgan davlat aktivlarini sotishdan tushadigan mablag‘lar va Uyushma tomonidan Davlat mulki qo‘mitasiga o‘tkazilgan asosiy qarz, foizlar, ustamalar va jarimalar (hisoblangan taqdirda) taqsimoti mazkur Nizomning ilovasidagi misolda keltirilgan.

19. Ushbu Nizomga asosan Davlat mulki qo‘mitasi o‘zining maxsus hisob raqamiga kelib tushayotgan mablag‘larni o‘z vaqtida va to‘g‘ri taqsimlanishiga javob beradi.

20. Uyushma:

Davlat mulki qo‘mitasiga mablag‘larni o‘z vaqtida va to‘liq qaytarilishi uchun;

paxta tozalash korxonalari tomonidan mablag‘larni maqsadli ishlatilishi, o‘z vaqtida va to‘liq qaytarilishi uchun javob beradi.

21. Shartnoma asosida Davlat mulki qo‘mitasi tomonidan Uyushmaga berilgan pul mablag‘larining maqsadli va samarali ishlatilishi ustidan nazorat qonunchilik va shartnomalarga muvofiq O‘zbekiston Respublikasi Moliya vazirligi tomonidan Davlat mulki qo‘mitasi bilan birgalikda amalga oshiriladi.

22. Shartnoma asosida Uyushma tomonidan paxta tozalash korxonalariga berilgan pul mablag‘larining maqsadli va samarali ishlatilishi ustidan nazorat qonunchilik va shartnomalarga muvofiq Uyushma tomonidan hamda o‘rnatilgan tartibda O‘zbekiston Respublikasi Moliya vazirligi tomonidan amalga oshiriladi.

23. Paxta tozalash korxonasi Uyushma tomonidan shartnomaga muvofiq berilgan pul mablag‘larni maqsadsiz ishlatgan taqdirda, paxta tozalash korxonasi maqsadsiz ishlatilgan mablag‘lar qiymatining 10 foizi miqdorida Uyushmaga jarima to‘laydi.

Paxta tozalash korxonalari tomonidan maqsadsiz ishlatilgan pul mablag‘lari Uyushma tomonidan undiriladi va keyinchalik ularni ishlatish uchun Uyushmaning maxsus hisob raqamiga o‘tkaziladi yoki Davlat mulki qo‘mitasiga o‘rnatilgan tartibda qaytariladi.

24. Uyushma Davlat mulki qo‘mitasi tomonidan shartnomaga muvofiq berilgan pul mablag‘larni maqsadsiz ishlatgan taqdirda, Uyushma maqsadsiz ishlatilgan mablag‘lar qiymatining 10 foizi miqdorida Davlat mulki qo‘mitasiga jarima to‘laydi.

Uyushma tomonidan maqsadsiz ishlatilgan pul mablag‘lari Davlat mulki qo‘mitasi tomonidan undiriladi va amaldagi qonunchilikka asosan taqsimlash uchun Davlat mulki qo‘mitasining maxsus hisob raqamiga o‘tkaziladi.

25. Shartnomalar asosida berilgan pul mablag‘lari asosiy qarzi va foizlari o‘z vaqtida qaytarilmagan taqdirda, Uyushma Davlat mulki qo‘mitasiga, paxta tozalash korxonalari esa Uyushmaga to‘lov muddati kechiktirilgan har bir kun uchun mablag‘lar qiymatining 0,4 foiz miqdorida ustama to‘laydilar, lekin bu ustama miqdori kechiktirilgan to‘lovlar qiymatining 50 foizidan oshmasligi kerak.

26. Ushbu Nizomga asosan Davlat mulki qo‘mitasiga qaytarilishi lozim bo‘lgan barcha mablag‘lar, shu jumladan foizlar, hisoblangan ustamalar va jarimalar davlat tasarrufidan chiqarish va xususiylashtirish mablag‘larining qismi hisoblanadi.

27. Uyushma va paxta tozalash korxonalarini ustama va jarima to‘lashi, shartnoma bo‘yicha to‘lanadigan asosiy qarz va foiz to‘lovi majburiyatlaridan ozod etmaydi.

28. Sotib oluvchi o‘z zimmasiga olgan investitsion majburiyatlarni bajarmasligi va/yoki shartnoma bekor qilinishiga olib keladigan shartnomani boshqa shartlari bajarilmagan taqdirda, sotib oluvchi tomonidan to‘langan mablag‘larni qaytarish Davlat mulki qo‘mitasi tomonidan qonunchilik bilan belgilangan tartibda amalga oshiriladi.

29. Mazkur Nizom O‘zbekiston Respublikasi Iqtisodiyot vazirligi, Markaziy banki Boshqaruvi va “O‘zpaxtasanoat” uyushmasi bilan kelishilgan.