Vazirlar Mahkamasining ““O‘zbekkino” davlat-aksionerlik kompaniyasini tashkil etish va uning faoliyati masalalari to‘g‘risida” 1996-yil 12-iyuldagi 247-son qarorini bajarish maqsadida:

1. “Aholiga kinovideoxizmati ko‘rsatish qoidalari” ilovaga muvofiq tasdiqlansin.

2. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari “Aholiga kinovideoxizmati ko‘rsatish qoidalari”ga amal qilinishini ta’minlasinlar.

1. Mazkur qoidalar O‘zbekiston Respublikasining “Iste’molchilar huquqlarini himoya qilish to‘g‘risida”gi Qonuni, Vazirlar Mahkamasining “O‘zbekkino” davlat-aksionerlik kompaniyasini tashkil etish va uning faoliyati masalalari to‘g‘risida” 1996-yil 12-iyuldagi 247-son qaroriga muvofiq ishlab chiqilgan.

2. Mazkur qoidalar aholiga kinovideoxizmati ko‘rsatuvchi yuridik hamda jismoniy shaxslar — Kinovideotomosha muassasalari va ushbu xizmat iste’molchilari — kinotomoshabinlar o‘rtasidagi munosabatlarni muvofiqlashtiradi.

3. Qoidalar O‘zbekiston Respublikasi hududidagi mulkchilik shaklidan va idoraviy bo‘ysunishidan qat’i nazar, belgilangan tartibda kinovideofaoliyati bilan shug‘ullanuvchi yoki kinovideo xizmatini amalga oshiruvchi barcha yuridik va jismoniy shaxslar uchun majburiydir.

4. Yuridik va jismoniy shaxslar Vazirlar Mahkamasining 215-son qarorida belgilangan kinovideofaoliyati turlari bilan “O‘zbekkino” davlat-aksionerlik kompaniyasi tomonidan berilgan maxsus ruxsatnoma (litsenziya)lar asosida shug‘ullanishlari mumkin.

5. O‘zbekiston Respublikasi hududidagi faqat O‘zbekiston Respublikasida ishlab chiqarilgan, shuningdek Vazirlar Mahkamasining “Tashqi iqtisodiy faoliyatni yanada erkinlashtirish va takomillashtirish chora-tadbirlari to‘g‘risida” 1995-yil 25-iyuldagi 287-son qaroriga muvofiq respublika hududiga keltirilgan, ro‘yxatdan o‘tkazilgan va belgilangan nusxadagi ijara berish ruxsatnomasiga ega bo‘lgan kinovideofilmlar ko‘paytirilishi, tarjima qilinishi, sotilishi, namoyish etilishi, ijaraga berilishi mumkin.

6. Badiiy, ilmiy-ommabop, o‘quv, multiplikatsion kinovideofilmlarni ro‘yxatdan o‘tkazish, ularga davlat ijara ruxsatnomasi berish va Davlat ro‘yxat daftarini olib borishni “O‘zbekkino” davlat-aksionerlik kompaniyasi amalga oshiradi.

7. Kinovideofilmlarni O‘zbekiston Respublikasi hududiga olib kelish, ro‘yxatdan o‘tkazish va ularga davlat ijara ruxsatnomasini berish “O‘zbekkino” davlat-aksionerlik kompaniyasi tomonidan belgilanadigan tartibda amalga oshiriladi.

8. Kinovideotomosha muassasalari o‘z nomi, ish tartibi, yuridik manzili yozilgan ko‘rsatkichga ega bo‘lishi shart.

9. Kinovideotomosha muassasalari tomoshabinlarga mazkur qoidalar bilan tanishish imkoniyatini yaratishlari lozim.

10. Kinovideotomosha muassasalari:

— kinovideofilmlarning sifatli namoyish etilishini, texnik jihatdan yuqori darajada jihozlanilishini, tomoshabinlar uchun barcha qulayliklarni, xizmat ko‘rsatish xavfsizligini;

— kinovideotomosha muassasalari va unga yondosh hududlarda yong‘in xavfsizligi, sanitariya holatiga rioya etilishini;

— namoyish etilayotgan va namoyish etilishi rejalashtirilgan filmlar haqidagi ma’lumotni — uning suratga olingan vaqti, studiyasi, mualliflari va bosh rollar ijrochilari hamda filmning qaysi yoshdagi tomoshabinga mo‘ljallanganligi, chiptalar bahosi, tomosha zali rejasi, namoyishlarning boshlanish vaqti, davomiyligi, tomoshabinlarga qo‘shimcha xizmat ko‘rsatish turlari va ularning narxlari, ayrim toifadagi tomoshabinlarga beriladigan imtiyozlar, bolalar uchun namoyish etish rejasi, narxlarni arzonlashtirish tartibi va boshqa ma’lumotlar bilan tanishtirishni;

— tomoshabinlarga nisbatan xushmuomala va e’tiborli bo‘lishni ta’minlashlari kerak.

11. Kinovideotomosha muassasalari tomoshabinlarga film namoyish etilishidan oldin qo‘shimcha xizmatlarni — musiqiy tomoshalar va artistlarning chiqishi, kinojurnallar namoyishini uyushtirishi mumkin.

12. Kinovideotomosha muassasalarida badiiy, xronikal-hujjatli, ilmiy-ommabop, multiplikatsion kinovideofilmlar “O‘zbekkino” davlat-aksionerlik kompaniyasi tomonidan belgilangan daraja ko‘rsatkichiga muvofiq narxlardagi chiptalar tarqatish yo‘li bilan namoyish etiladi.

13. Namoyish etish dasturidagi film nusxasi ishdan chiqqan yoki yo‘qolgan holda boshqa kinovideofilm bilan almashtiriladi.

14. Dasturda rejalashtirilgan kinovideofilm tomoshabinlar soni kamida olti kishidan iborat bo‘lsa namoyish etiladi.

15. Chiptalarni sotish:

— chiptada — kinovideotomosha muassasasi nomi, chipta bahosi, o‘rindiq raqami, namoyish kuni va vaqti ko‘rsatilishi kerak;

— kassalar, namoyish etish boshlanishidan kechi bilan 30 daqiqa oldin ish boshlaydi, chiptalarni avvaldan sotish esa bir hafta ilgari boshlanadi;

— tomoshabinlar va kinovideotomosha muassasalari o‘rtasida hisob-kitob so‘mda, naqd va pul o‘tkazish yo‘li bilan amalga oshiriladi;

— chipta sotilgan vaqt kinovideoxizmati to‘g‘risida shartnoma tuzilgan vaqt hisoblanadi;

— kundalik namoyishlar (oddiy yoki uzaytirilgan dastur)ga chiptalarni sotish kinojurnal namoyish etilgach to‘xtatiladi;

— Ikkinchi jahon urushi nogironlari, qatnashchilari hamda ularga tenglashtirilgan shaxslar, Chernobil AES fojiasi oqibatlarini tugatishda ishtirok etganlar (“O‘zbekiston Respublikasida nogironlarni ijtimoiy himoya qilish haqida”gi Qonunga asosan), “Kinematografiya a’lochisi” nishoniga sazovor bo‘lganlar, O‘zbekiston Respublikasining Qahramonlari navbatsiz chipta sotib olish huquqiga ega bo‘ladilar.

16. Tomoshabinlar:

— kinozalga chiptalar asosida namoyishdan 30 daqiqa avval kiritila boshlanadi;

— namoyishga kech qolganlar kinojurnal yoki uzaytirilgan kinovideodasturdan keyingi tanaffus paytida zalga kiritiladi;

— chiptada ko‘rsatilgan joyga o‘tirishlari lozim.

17. Kinojurnal va asosiy kinovideofilm o‘rtasida tanaffus bo‘lishi kerak. Kinovideotomosha muassasasi huzuridagi bufet kinovideofilmga uchinchi qo‘ng‘iroq chalinganda yopiladi.

18. 12 yoshgacha bo‘lgan bolalar kinovideozalga namoyishi eng kechi bilan soat 21.30 da tamom bo‘ladigan seanslarga kiritiladi:

— bolalar seansiga 12 yoshgacha bo‘lgan bolalar maxsus mo‘ljallangan chiptalarni sotib oladilar. Kattalar esa bunday chiptalarni belgilangan miqdorda sotib olishlari mumkin;

— katta yoshdagi tomoshabin maktabgacha yoshdagi bir nafar bolani tomosha zaliga bepul olib kirishi mumkin, bunda bolaga alohida joy belgilanmaydi;

— o‘n olti yoshgacha bo‘lgan bolalar va o‘smirlar shu yoshdagi tomoshabinga taqiqlangan filmlarga kiritilmaydi.

19. O‘zbekiston Respublikasining “Aholiga kinovideoxizmati ko‘rsatish qoidalari” talablariga rioya etilishini nazorat qilish, kinovideoxizmati ko‘rsatish ishlarini tashkil etish “O‘zbekkino” davlat-aksionerlik kompaniyasining kinovideoxizmati hududiy organlari, hokimiyat ijroiya organlari va boshqa tegishli organlar tomonidan amalga oshiriladi.

20. Tomoshabin:

— kinovideoxizmatining barcha turlaridan erkin foydalanish;

— kinovideotomosha muassasasi va ko‘rsatilayotgan kinovideoxizmati turlari haqida to‘la ma’lumotga ega bo‘lish;

— namoyish bekor qilinganda, film o‘zgartirilganda yoki kinovideotomosha muassasi aybi bilan film sifatsiz namoyish etilganda, shuningdek, kinovideofilmning ko‘rigida yosh bo‘yicha cheklanish haqidagi ma’lumot to‘liq berilmaganda, yoxud boshqa sabablar bilan namoyishga kirishdan bosh tortsa chipta bahosi qiymatini qaytib olish;

— kinovideotomosha muassasasidan kinovideo faoliyatiga tegishli litsenziyani va kinofilmga berilgan davlat ijara ruxsatnomasini talab qilish huquqiga ega.

21. Tomoshabin Kinovideotomosha muassasasi ish faoliyatining qoidalariga rioya qilishi, muassasa jihozlari va mebelini asrab-avaylashi, jamoat tartibiga rioya qilishi shart.

22. Jamoat tartibini buzgan yoki muassasa mulkiga zarar yetkazgan tomoshabinni kinovideotomosha ma’muriyati namoyish zaliga kiritmaslikka yoki zaldan chiqarib yuborishga haqlidir.

23. Muassasa mulkiga zarar yetkazgan tomoshabin qonunlarda belgilangan tartibda javobgar bo‘ladi.

24. Tomoshabin chiptani seans oxirigacha saqlab qolishi va nazoratchi yoki ma’muriyat talabi bilan ko‘rsatishi lozim.