Oʻzbekiston Respublikasi Suv xoʻjaligi vazirligining suv xoʻjaligi tashkilotlari isteʼmol qiladigan elektr energiya uchun toʻlovlarning asoslanganligi, toʻliqligi va oʻz vaqtida toʻlanishi ustidan nazoratni kuchaytirish maqsadida:

1. 2008-yilning 1-yanvaridan quyidagi tartib oʻrnatilsin, unga muvofiq:

davlat budjetining Oʻzbekiston Respublikasi Suv xoʻjaligi vazirligi uchun nazarda tutiladigan xarajatlarida suv xoʻjaligi tashkilotlari isteʼmol qiladigan elektr energiya toʻlovlari uchun alohida satr bilan mablagʻ ajratiladi;

Oʻzbekiston Respublikasi Moliya vazirligi Gʻaznachiligida va uning hududiy boʻlinmalarida Oʻzbekiston Respublikasi Suv xoʻjaligi vazirligining hududiy suv xoʻjaligi tashkilotlari uchun shaxsiy hisobvaraqlar ochiladi;

hududiy suv xoʻjaligi tashkilotlarining xarajatlar smetasi Oʻzbekiston Respublikasi Suv xoʻjaligi vazirligi tomonidan tasdiqlanganidan hamda Moliya vazirligida belgilangan tartibda roʻyxatga olinganidan soʻng, Moliya vazirligi Gʻaznachiligi va uning hududiy boʻlinmalarining yagona maʼlumotlar bazasida qayd etiladi;

suv xoʻjaligi tashkiloti bilan energiya taʼminoti tashkiloti oʻrtasida roʻyxatga olingan xarajatlar smetasi doirasida tuzilgan shartnomalar Oʻzbekiston Respublikasi Moliya vazirligi Gʻaznachiligining hududiy boʻlinmalarida roʻyxatdan oʻtkazilishi shart;

Oʻzbekiston Respublikasi Suv xoʻjaligi vazirligining suv xoʻjaligi tashkilotlari isteʼmol qiladigan elektr energiya uchun toʻlovlar ularning shaxsiy hisobvaraqlaridan Moliya vazirligi Gʻaznachiligi va uning hududiy boʻlinmalari orqali “Hududiy elektr tarmoqlari” AJning maxsus bank hisobvaragʻiga oʻtkaziladi;

Gʻaznachilikning hududiy boʻlinmalari hisoblagich asboblar koʻrsatkichlari bilan tasdiqlangan elektr energiyasini isteʼmol qilishning fizik hajmlari toʻgʻrisidagi maʼlumotlar bilan suv xoʻjaligi tashkiloti va energiya taʼminoti tashkiloti oʻrtasida roʻyxatga olingan shartnomalar, hisobvaraq-fakturalar, shuningdek oʻzaro hisob-kitoblarni qiyoslab tekshirish hujjatlari asosida isteʼmol qilingan elektr energiya toʻlovlarini amalga oshirish uchun elektron toʻlov hujjatlarini shakllantiradi.

Bunda qiyoslab tekshirish hujjatlari Qoraqalpogʻiston Respublikasi va viloyatlardagi hududiy suv xoʻjaligi tuzilmalari hamda Moliya vazirligi Gʻaznachiligi boshqarmalarining birinchi rahbarlari tomonidan birgalikda tasdiqlanadi.

2. Belgilansinki, quyidagilar:

suv xoʻjaligi tashkilotlari tomonidan davrlar boʻyicha elektr energiyasini isteʼmol qilishning fizik hajmlari toʻgʻri aniqlanishi va ulardan maqsadli, aniq foydalanilishi ustidan — suv xoʻjaligi tashkilotlari idoraviy mansub boʻlgan tegishli mintaqaviy tuzilmalar tomonidan;

isteʼmol qilingan elektr energiya uchun toʻlanadigan summaning asosliligi ustidan — Qoraqalpogʻiston Respublikasi va viloyatlardagi Moliya vazirligi Gʻaznachiligi boshqarmalari tomonidan tizimli nazorat amalga oshiriladi.

3. Oʻzbekiston Respublikasi Moliya vazirligi, Qishloq va suv xoʻjaligi vazirligi “Oʻzbekenergo” DAK bilan birgalikda ikki hafta muddatda Oʻzbekiston Respublikasi Qishloq va suv xoʻjaligi vazirligining suv xoʻjaligi tashkilotlari isteʼmol qiladigan elektr energiya uchun toʻlovlarni amalga oshirish tartibi toʻgʻrisidagi nizomni ilova qilingan sxema asosida belgilangan tartibda ishlab chiqsin va tasdiqlasin.

4. Oʻzbekiston Respublikasi Moliya vazirligining Nazorat-taftish bosh boshqarmasi zimmasiga Qishloq va suv xoʻjaligi vazirligining suv xoʻjaligi tashkilotlari isteʼmol qiladigan elektr energiya uchun toʻlangan summalarning asosliligini muntazam ravishda yoppasiga va tanlab tekshirishlarni oʻtkazish vazifasi yuklansin.

5. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

1) Moliya vazirligi tomonidan belgilangan tartibda roʻyxatga olingan xarajatlar smetasini Moliya vazirligi Gʻaznachiligi boʻlinmalariga taqdim etish;

2) tasdiqlangan xarajatlar smetasi doirasida suv xoʻjaligi tashkilotlari va “Hududiy elektr tarmoqlari” AJ boʻlinmalari oʻrtasida elektr energiyasini yetkazib berish boʻyicha shartnomalar tuzish;

3) suv xoʻjaligi tashkilotlari tomonidan shartnomalarni tegishli gʻaznachilik boʻlinmalariga roʻyxatdan oʻtkazish uchun taqdim etish;

4) “Hududiy elektr tarmoqlari” AJ boʻlinmalari tomonidan suv xoʻjaligi tashkilotlariga yetkazib beriladigan elektr energiyasi hajmi va toʻlanishi lozim boʻlgan summalar boʻyicha schet-fakturalarni taqdim etish;

5) suv xoʻjaligi tashkilotlari tomonidan gʻaznachilikning tegishli hududiy boʻlinmalariga schet-fakturalar taqdim etish;

6) hududiy gʻaznachilik boʻlinmalari tomonidan schet-fakturalarni tekshirish va elektr energiyasi uchun toʻlovlarni amalga oshirish maqsadida ular maʼlumotlarini Moliya vazirligi Gʻaznachiligining yagona maʼlumotlar bazasiga kiritish;

7) Moliya vazirligi Gʻaznachiligi tomonidan “Hududiy elektr tarmoqlari” AJ boʻlinmalarining maxsus bank hisobvaraqlariga elektr energiyasi uchun toʻlovni amalga oshirish;

8) hududiy gʻaznachilik boʻlinmalari tomonidan suv xoʻjaligi tashkilotlariga isteʼmol qilingan elektr energiyasi uchun haq toʻlash boʻyicha toʻlov topshiriqnomalaridan koʻchirma va nusxalarni taqdim etish.