Oʻzbekiston Respublikasi Prezidentining “Toshkent shahri va Toshkent viloyatida yoʻlovchilar tashish xavfsizligini taʼminlashga doir qoʻshimcha chora-tadbirlar toʻgʻrisida” 2006-yil 28-fevraldagi PQ-294-son qarorini bajarish yuzasidan, shuningdek aholiga yoʻlovchi tashish transportida transport xizmatlari koʻrsatishni yanada takomillashtirish, yoʻlovchilar tashishda buyurtmachi va pudratchi funksiyalarini chegaralash maqsadida Vazirlar Mahkamasi qaror qiladi:

1. Toshkent viloyati hokimligining eksperiment tariqasida Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamentini (keyingi oʻrinlarda Departament deb ataladi) tashkil etish toʻgʻrisidagi taklifiga rozilik berilsin.

2. Quyidagilar Departamentning asosiy va ustuvor vazifalari etib belgilansin:

yoʻlovchi transportining barcha turlari harakatini muvofiqlashtirish, yoʻnalishlar tarmogʻini tartibga solish va maqbullashtirish, shaharlarda va shaharlar atrofida yoʻlovchilar tashish faoliyatini litsenziyalash huquqi bilan yoʻlovchi tashish boʻyicha buyurtmachi funksiyalarini bajarish, shuningdek Toshkent viloyati doirasida yoʻlovchilarni shaharlarda, shaharlar atrofida va shaharlararo tashish yoʻnalishlarini joylashtirish uchun ochiq tendyerlarni tashkil etish;

raqobat muhitini shakllantirish va barcha yoʻlovchi tashuvchilarning transport xizmatlari bozoriga kirishi uchun teng shart-sharoitlar yaratish, jamoat transporti ishi samaradorligini va natijadorligini baholash, yoʻlovchi tashish xavfsizligi normalari va qoidalariga rioya etilishini nazorat qilish;

Toshkent viloyati hokimligiga shahar avtobus va elektr transportida yoʻlovchilar tashishga cheklangan tariflarni belgilash toʻgʻrisida moliya organlari bilan kelishilgan takliflar kiritish, ularga qatʼiy rioya etilishini nazorat qilish;

yoʻlovchi tashish transporti subyektlari (taksidan tashqari) uchun chipta tizimini joriy etish, yoʻl chiptalarini, kartochkalarini, shuningdek amaldagi qonun hujjatlariga muvofiq fuqarolarning ayrim toifalariga transportda imtiyozli yurish huquqini beruvchi hujjatlarni tayyorlash;

Toshkent viloyati shaharlarida yoʻlovchi tashishni boshqarishning avtomatlashtirilgan tizimini joriy etish, shu jumladan yer usti yoʻlovchi transportida haq toʻlanishini hisobga olish va shahar yoʻlovchi tashish transporti yoʻnalishlarida nazorat tizimini avtomatlashtirish.

3. Quyidagilar:

Departament ijro etuvchi apparatining tuzilmasi 1-ilovaga muvofiq;

Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamenti toʻgʻrisidagi nizom 2-ilovaga muvofiq tasdiqlansin.

4. Quyidagilar Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamenti faoliyatini moliyalashtirish manbalari etib belgilansin:

yoʻlovchi tashuvchilardan shahar yoʻlovchi tashish transporti obyektlari tomonidan koʻrsatilayotgan xizmatlar va ulardan foydalanganlik uchun kontraktlarda nazarda tutilgan miqdorlarda tushadigan mablagʻlar;

litsenziyalar berilganligi uchun davlat bojining bir qismi, litsenziya berish toʻgʻrisidagi arizalar koʻrib chiqilganligi uchun yigʻimlar;

tender hujjatlari paketlarini sotib olganlik uchun yoʻlovchi tashuvchilardan tushadigan mablagʻlar;

qonun hujjatlarida taqiqlanmagan boshqa manbalar.

5. Shaharda va shahar atrofida yoʻlovchilar tashish uchun Oʻzbekiston avtomobil va daryo transporti agentligining hududiy boʻlinmalari tomonidan berilgan litsenziyalar ularning muddati tugagunga qadar Toshkent viloyati doirasida ishlash uchun haqiqiydir.

6. Departament Oʻzbekiston avtomobil va daryo transporti agentligi bilan kelishgan holda bir oy muddatda Toshkent viloyatida shaharlarda va shaharlar atrofida yoʻlovchilar tashishni litsenziyalash uchun litsenziya va litsenziya kartochkalari namunalarini tayyorlasin.

7. Quyidagilar:

“Toshviltrans” Toshkent viloyati yuk va yoʻlovchilar tashish hududiy uyushmasi qatnashchilari tomonidan uyushmani 3-ilovaga muvofiq qatnashchilar tarkibiga va tashkiliy tuzilmaga ega boʻlgan “Toshviltransterminal” Toshkent viloyati avtomobilda yoʻlovchi va yuk tashuvchilar hamda avtoterminallar uyushmasi etib qayta tashkil etish toʻgʻrisida qaror qabul qilinganligi;

Uyushma tarkibiga kiruvchi korxonalar va tashkilotlarning ixtiyoriy badallari hamda qonun hujjatlarida taqiqlanmagan boshqa manbalar uning ijro etuvchi apparati taʼminoti manbalari hisoblanishi;

quyidagilar:

bozor islohotlarini yanada chuqurlashtirishni taʼminlash, aholining yoʻlovchi va yuk tashish avtotransporti xizmatlariga boʻlgan ehtiyojlarini qondirish, iqtisodiyot va aholiga barqaror avtotransport xizmatlari koʻrsatish uchun shart-sharoitlar yaratish;

avtomobil transportining harakatdagi tarkibini yangilash, zamonaviy texnika va texnologiyani joriy etish, taʼmirlash bazasini rivojlantirish va modernizatsiya qilish, harakatdagi tarkibdan foydalanish samaradorligini oshirish boʻyicha investitsiya loyihalarini shakllantirish va roʻyobga chiqarish;

yuk va yoʻlovchilar tashish xavfsizligi, harakatdagi tarkibni texnik jihatdan soz holatda saqlash, avtotransport vositalarini texnik koʻrikdan hamda haydovchilarni tibbiy koʻrikdan oʻtkazish boʻyicha talablarning uyushma qatnashchilari boʻlgan korxonalar tomonidan bajarilishini taʼminlash;

transport korxonalari mol-mulki, shu jumladan avtotransport vositalari saqlanishi hamda ulardan maqsadli foydalanishi monitoringini olib borish;

yoʻlovchilarga xizmat koʻrsatish madaniyati va sifatini oshirish, avtotransport xizmatlari servisini kengaytirish Uyushmaning asosiy vazifalari etib belgilanganligi maʼlumot uchun qabul qilinsin.

8. Toshkent viloyati hokimligi:

Departamentni tashkil etish va uning faoliyati bilan bogʻliq masalalar bir oy muddatda hal etilishini taʼminlasin;

2008-yildagi ishlar yakunlari boʻyicha ushbu qarorning bajarilishi va eksperiment natijalari toʻgʻrisida Oʻzbekiston Respublikasi Vazirlar Mahkamasiga axborot bersin.

9. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirish va qoʻshimchalar kiritilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.

1. Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamenti (keyingi oʻrinlarda Departament deb ataladi) Toshkent viloyati hokimligining yoʻlovchilar tashish boʻyicha faoliyatni litsenziyalash, yoʻlovchilar tashish transporti sohasidagi faoliyatni boshqarish va muvofiqlashtirish, marketing tadqiqotlarini tashkil etish hamda yoʻnalishlar va tarmoqlarni maqbullashtirish, yoʻlovchilar tashish bozorida yoʻlovchi tashuvchilarning erkin raqobati uchun shart-sharoitlar yaratish, yoʻlovchilar tashish xavfsizligini taʼminlagan holda koʻrsatilayotgan xizmatlarning sifat standartlariga va yoʻnalishlarning ish jadvallariga rioya qilish, haydovchilar tarkibining transport vositalarini saqlashdan manfaatdorligini oshirish masalalarini hal qilish uchun vakolatli tarkibiy boʻlinmasi hisoblanadi.

Departament oʻz faoliyatida Toshkent viloyati hokimligiga hamda Oʻzbekiston avtomobil va daryo transporti agentligiga hisob beradi.

2. Departament oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi Qonunchilik palatasi va Senati qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga hamda ushbu Nizomga muvofiq amalga oshiradi.

3. Departamentning toʻliq nomi:

davlat tilida — Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamenti;

rus tilida — Departament po litsenzirovaniyu i koordinatsii dvijeniya vsex vidov passajirskogo transporta xokimiyata Tashkentskoy oblasti.

4. Departament yuridik shaxs hisoblanadi, alohida mulkka, mustaqil balansga, bank muassasalarida hisob raqamlariga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, shtampga, ramzga va boshqa xizmat atributlariga, shuningdek oʻz faoliyati uchun zarur boʻlgan rekvizitlarga ega boʻladi.

5. Departament oʻz majburiyatlari boʻyicha oʻziga tegishli barcha mulk bilan javob beradi.

6. Quyidagilar Departamentning asosiy vazifalari hisoblanadi:

yoʻlovchi tashish transporti barcha turlari harakatini muvofiqlashtirish, yoʻnalishlar tarmogʻini tartibga solish va maqbul holga keltirish, Toshkent viloyati doirasida yoʻlovchilar tashish faoliyatiga litsenziyalar berish huquqiga ega boʻlgan holda yoʻlovchi tashish boʻyicha buyurtmachi funksiyalarini bajarish, shuningdek yoʻlovchilar tashish yoʻnalishlarini qatʼiy tender asosida belgilash;

raqobat muhitini shakllantirish va barcha yoʻlovchi tashuvchilar transport xizmatlari bozorida teng sharoitlar yaratish, jamoat transporti ishi samaradorligi va natijasini baholash;

Toshkent viloyati hokimligiga shaharlar avtobus va elektr transportida yoʻlovchilar tashishga cheklangan tariflar belgilash boʻyicha moliya organlari bilan kelishilgan takliflar kiritish va ularga rioya etilishini nazorat qilish;

yoʻlovchi tashish transporti subyektlari (taksidan tashqari) uchun chipta tizimini joriy etish, yoʻl chiptalarini, kartochkalarini, shuningdek amaldagi qonun hujjatlariga muvofiq fuqarolarning ayrim toifalariga transportda imtiyozli yurish huquqini beruvchi hujjatlarni tayyorlash;

Toshkent viloyati shaharlarida yoʻlovchilar tashishning avtomatlashtirilgan boshqaruv tizimini joriy etish, shu jumladan yerusti yoʻlovchi transportida yoʻl haqi toʻlash hisob-kitobi tizimini avtomatlashtirish va shaharlar yoʻlovchi tashish transporti harakat yoʻnalishlarida nazorat oʻrnatish.

7. Departament oʻziga yuklangan vazifalarni bajarish uchun quyidagi funksiyalarni amalga oshiradi:

Toshkent viloyatida yoʻlovchi tashish transporti barcha turlari faoliyatini muvofiqlashtiradi;

yoʻlovchi tashishning yagona buyurtmachisi vazifasini bajaradi, yoʻlovchilar oqimi boʻyicha marketing tadqiqotlari olib borish asosida viloyat ichidagi shahar, shahar atrofi va shaharlararo yoʻnalishlarning zarur miqdorini belgilaydi, yoʻnalishli va yengil avtomobil taksilarning maqbul soni bilan uzviy bogʻlagan holda asosiy yoʻlovchilar oqimlarini tartibga soladi, yoʻnalishlarni belgilangan tartibda tasdiqlaydi;

Toshkent viloyatida avtomobil transportida shaharlarda va shahar atrofida yoʻlovchilar tashish faoliyatiga litsenziya beradi;

Toshkent viloyatida yoʻlovchi transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonunda belgilangan oʻz fuqarolik javobgarligini majburiy sugʻurta qilish boʻyicha majburiyati bajarilishini nazorat qilish;

Toshkent viloyati doirasida shaharlar, shahar atrofi va shaharlararo yoʻlovchi tashish yoʻnalishlarini joylashtirish boʻyicha ochiq tendyerlar tashkil qiladi, tender gʻoliblari bilan yoʻnalishda yoʻlovchilar tashish boʻyicha xizmatlar koʻrsatish yuzasidan kontraktlar tuzadi;

Toshkent viloyatida yoʻlovchi tashish transportini rivojlantirish kompleks dasturlarini ishlab chiqishni tashkil etadi va ularning amalga oshirilishini nazorat qiladi;

yoʻlovchi tashuvchilarga yoʻlovchi terminallarining samarali faoliyat koʻrsatishi va rivojlanishi, yagona tizim sifatida transport jarayoniga dispetcherlik rahbarligi hamda harakatdagi tarkib sigʻimidan samarali foydalanish, shuningdek yoʻlovchi, bagaj tashish norma va qoidalariga rioya qilish va yoʻlovchilarni tashish xavfsizligini taʼminlash boʻyicha koʻmaklashadi;

xalqaro normalarni hisobga olgan holda yoʻlovchilar tashish faoliyatini tartibga solish standartlari, qoidalari, shakllari va metodlari boʻyicha maʼlumotlarning yagona axborot bazasini shakllantiradi;

Toshkent viloyati hokimligi bilan birgalikda, moliya organlari hamda xususiylashtirilgan korxonalarga koʻmaklashish va raqobatni rivojlantirish hududiy boshqarmasi bilan kelishgan holda yoʻlovchi transportida yoʻl haqi tariflarini shakllantiradi;

yoʻlovchi transportining barcha turlari uchun (taksidan tashqari) yoʻl chiptalari, kartochkalari, shuningdek qonun hujjatlariga muvofiq fuqarolarning ayrim toifalariga avtobuslar va trolleybuslarda imtiyozli yurish huquqini beradigan hujjatlarning yagona shakllarini belgilangan tartibda ishlab chiqadi va tasdiqlaydi, yoʻl kartochkalari miqdori va turlarini, shuningdek yoʻl kartochkalarini tarqatuvchi korxonalar roʻyxatini kelishadi;

harakatdagi tarkib parkini yangilash boʻyicha loyihalarning texnik-iqtisodiy asoslashlarini ishlab chiqishda, xizmatning normativ amortizatsiya muddatida yuqori darajada faol foydalanishni hisobga olgan holda transport vositalarining oʻz xarajatlarini oʻzi qoplashi boʻyicha prognoz hisob-kitoblarni amalga oshirishda yoʻlovchi tashuvchilarga metodologik va konsultativ yordam koʻrsatadi;

yoʻlovchi tashuvchilarning belgilangan shakllar boʻyicha hisobotlarini yigʻish va umumlashtirishni, ular tomonidan shartnomaviy majburiyatlarning bajarilishini tashkil qiladi, yoʻlovchi tashuvchilarning transportdan foydalanish va moliya-xoʻjalik faoliyati koʻrsatkichlarini kelishilgan shakllar va muddatlar boʻyicha Toshkent viloyati hokimligiga hamda Oʻzbekiston avtomobil va daryo transporti agentligiga tegishli hisobotlarni taqdim etadi.

8. Departament oʻziga yuklangan vazifalar va funksiyalarni bajarish uchun quyidagi huquqlarga ega:

tender savdolari natijalari boʻyicha tuzilgan kontraktlar shartlariga rioya etilishini nazorat qilish;

favqulodda vaziyatlarda, shuningdek xizmat koʻrsatish huquqini yoʻqotgan bitta tashuvchidan yoʻnalishlarga xizmat koʻrsatish huquqlarini tender asosida aniqlanadigan boshqa tashuvchiga berish oʻrtasidagi davrda koʻrsatib oʻtilgan yoʻnalishlarga (tendersiz) toʻliq yoxud qisman xizmat koʻrsatish huquqini vakolatli tashuvchilarga uch oydan koʻp boʻlmagan muddatga vaqtinchalik berish;

yoʻlovchi tashuvchiga aniqlangan qoida buzilishlarini bartaraf etish vazifasini yuklaydigan qarorlar chiqarish va ularni bartaraf etish muddatlarini belgilash;

transport vositalaridan foydalanish qoidalari buzilishida aybdor boʻlgan shaxslarni qonun hujjatlarida nazarda tutilgan javobgarlikka tortish toʻgʻrisida davlat tegishli organlariga takliflar kiritish.

Toshkent viloyatida yoʻlovchi transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonun hujjatlarida nazarda tutilgan oʻz fuqarolik javobgarligini majburiy sugʻurta qilish boʻyicha majburiyati bajarilmaganligi uchun aybdor shaxslarni qonun hujjatlarida nazarda tutilgan javobgarlikka tortish haqida sud organlariga taqdimnomalar kiritish.

9. Departamentni Oʻzbekiston avtomobil va daryo transporti agentligi taqdimnomasiga koʻra, Oʻzbekiston Respublikasi Vazirlar Mahkamasi bilan kelishgan holda Toshkent viloyati hokimi tomonidan lavozimga tayinlanadigan va lavozimdan ozod qilinadigan boshliq boshqaradi. Boshliqning ikki nafar oʻrinbosari boʻladi, ularni boshliq Toshkent viloyati hokimi bilan kelishgan holda lavozimga tayinlaydi va lavozimdan ozod qiladi.

10. Departament boshligʻi:

Departament faoliyatiga yakkaboshchilik asosida umumiy rahbarlik qiladi hamda Departamentga yuklangan vazifalar va funksiyalarning bajarilishi uchun shaxsan javob beradi;

zarurat boʻlganda, Departamentning boshqaruv apparati tuzilmasiga tasdiqlangan xodimlar soni va ularning taʼminoti xarajatlari smetasi doirasida oʻzgartirishlar kiritadi;

Departament xodimlarini belgilangan tartibda lavozimga tayinlaydi va lavozimdan ozod qiladi.

Boshliq qonun hujjatlariga muvofiq boshqa vakolatlarni ham amalga oshiradi.

11. Departamentning boʻlimlari va xizmatlari oʻz faoliyatini Departament boshligʻi tomonidan tasdiqlanadigan nizomlar va lavozim yoʻriqnomalariga muvofiq amalga oshiradi.

12. Departament Toshkent viloyati hokimligi bilan kelishgan holda Departament xodimlarining shtat jadvalini tasdiqlaydi, qonun hujjatlariga muvofiq xodimlarni moddiy ragʻbatlantirish tizimi va shaklini belgilaydi.

13. Departament oʻziga birkitilgan davlat mulkiga nisbatan qonun hujjatlarida belgilangan tartibda egalik qilish va foydalanish huquqlarini amalga oshiradi.

14. Quyidagilar Departament faoliyatini moliyalashtirish manbalari hisoblanadi:

yoʻlovchi tashuvchilardan shahar va shahar atrofi yoʻlovchi tashish transporti infratuzilmasi obyektlari tomonidan koʻrsatiladigan xizmatlar va ulardan foydalanganlik uchun kontraktlarda nazarda tutilgan miqdorlardagi toʻlov hisobiga tushadigan mablagʻlar;

litsenziyalar berilganligi uchun davlat bojining bir qismi, litsenziya berish toʻgʻrisidagi arizalar koʻrib chiqilganligi uchun yigʻimlar;

tender hujjatlari paketlarini sotib olish uchun yoʻlovchi tashuvchilardan tushadigan mablagʻlar;

qonun hujjatlarida taqiqlanmagan boshqa tushumlar.

15. Departament oʻz faoliyati natijalarining tezkor va buxgalteriya hisobini amalga oshiradi, statistika hisobotini yuritadi.

Buxgalteriya va statistika maʼlumotlari ishonchli boʻlishi hamda qonun hujjatlarida belgilangan hajmlarda, muddatlarda va shakllar boʻyicha taqdim etilishi kerak.

16. Departament faoliyatini tekshirish qonun hujjatlariga muvofiq vakolatli organlar tomonidan amalga oshiriladi.

17. Departamentni qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 2002-yil 28-iyundagi 236-son qarori (Oʻzbekiston Respublikasi QT, 2002-yil, 6-son, 36-modda) bilan tasdiqlangan Faoliyatning ayrim turlarini litsenziyalovchi organlar roʻyxatiga “Oʻzbekiston avtomobil va daryo transporti agentligi” boʻlimidan keyin quyidagi mazmundagi boʻlimlar qoʻshilsin:

Toshkent shahrida yoʻlovchilarni avtomobil transportida shaharda tashish.

Toshkent viloyati doirasida yoʻlovchilarni avtomobil transportida shaharlarda va shaharlar atrofida tashish”.

2. Vazirlar Mahkamasining 2006-yil 14-iyuldagi 138-son qarori bilan tasdiqlangan Avtomobil transportida yoʻlovchilarni hamda yuklarni shaharda, shahar atrofida, shaharlararo va xalqaro yoʻnalishlar boʻyicha tashish faoliyatini litsenziyalash toʻgʻrisidagi nizomda (Oʻzbekiston Respublikasi QT, 2006-yil, 7-son, 51-modda):

a) 3-band quyidagi tahrirda bayon qilinsin:

“3. Litsenziyalar berish, shuningdek qonun hujjatlarida belgilangan hollarda litsenziyalarning amal qilishini toʻxtatib turish, toʻxtatish va ularni bekor qilish toʻgʻrisidagi qarorlar litsenziyalovchi organlar tomonidan:

Oʻzbekiston Respublikasida yoʻlovchilar va yuklarni shaharlararo va xalqaro tashishlar boʻyicha — Oʻzbekiston avtomobil va daryo transporti agentligi (keyingi oʻrinlarda “Agentlik” deb yuritiladi) tomonidan;

yoʻlovchilar va yuklarni shaharda, shahar atrofida tashishlar boʻyicha (Toshkent shahrida va Toshkent viloyati shaharlarida yoʻlovchilarni tashish bundan mustasno) — Agentlikning hududiy boʻlimlari tomonidan;

Toshkent shahrida yoʻlovchilarni shaharda tashish boʻyicha — Toshkent shahar hokimligining Yoʻlovchilar tashish transportining barcha turlari harakatini litsenziyalash va muvofiqlashtirish departamenti (keyingi oʻrinlarda “Departament” deb yuritiladi) tomonidan;

Toshkent viloyati doirasida yoʻlovchilarni shaharda va shahar atrofida tashish boʻyicha — Toshkent viloyati hokimligining Yoʻlovchilar tashish transportining barcha turlari harakatini litsenziyalash va muvofiqlashtirish departamenti (keyingi oʻrinlarda “Departament” deb yuritiladi) tomonidan qabul qilinadi.

Avtomobil transportida yoʻlovchilar va yuklarni shaharlararo va xalqaro tashishlarni amalga oshirishga litsenziyalar berish toʻgʻrisidagi hujjatlarni koʻrib chiqish uchun Agentlikda ekspert komissiyasi tashkil etiladi. Ekspert komissiyasining faoliyati Agentlik tomonidan tasdiqlangan nizomga muvofiq tashkil etiladi”;

b) 9-bandning “j” kichik bandi quyidagi tahrirda bayon qilinsin:

“j) tendyerlar natijalari boʻyicha, vakolatli organlar bilan shartnoma asosida, shu jumladan Toshkent shahrida va Toshkent viloyati doirasida tegishli Departament bilan shartnoma asosida yoʻlovchilarni avtomobilda muntazam tashish (yoʻnalishli taksilardan tashqari)”.