Oʻzbekiston Respublikasi Mehnat kodeksi, Oʻzbekiston Respublikasining “Kasaba uyushmalari toʻgʻrisida”gi Qonuni, Oʻzbekiston Respublikasi Prezidentining 2006-yil 18-dekabrdagi PQ-532-sonli “Oʻzbekiston Respublikasining 2007-yilgi asosiy makroiqtisodiy koʻrsatkichlari prognozi va davlat budjeti parametrlari toʻgʻrisida”gi qaroriga muvofiq Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi, Davlat soliq qoʻmitasi va Markaziy bank Boshqaruvi qaror qiladilar:

1. Kasaba uyushmalari organlarining xodimlar va ularning oila aʼzolarini sogʻlomlashtirish uchun yoʻnaltirilgan mablagʻlarni sarflash tartibi toʻgʻrisidagi nizom ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatiga olingan kundan oʻn kundan soʻng amalga kiritilsin.

Mazkur Nizom kasaba uyushmalari organlarining xodimlar va ularning oila aʼzolarini sogʻlomlashtirish uchun yoʻnaltirilgan mablagʻlarini sarflash tartibini belgilaydi.

1. Oʻzbekiston kasaba uyushmalari Federatsiyasining ijtimoiy sugʻurta budjeti quyidagi manbalar hisobiga shakllantiriladi:

Oʻzbekiston Respublikasining qonunchilik hujjatlari bilan belgilanadigan, Oʻzbekiston kasaba uyushmalari Federatsiyasiga xodimlar va ularning oila aʼzolarini sogʻlomlashtirish uchun ijtimoiy soliqdan yoʻnaltirilgan ajratmalar hisobiga;

belgilangan tartibda xodimlarga davolanish va dam olish uchun berilgan yoʻllanmalar uchun ulardan olingan mablagʻlar hisobiga;

qonunchilik hujjatlari bilan taqiqlanmagan boshqa mablagʻlar hisobiga.

2. Kasaba uyushmalari organlarining ijtimoiy sugʻurta mablagʻlari Oʻzbekiston Respublikasi banklarida depozit va tranzit hisobvaraqlarida saqlanadi.

Banklarda depozit va tranzit hisobvaraqlarini ochish Bank hisobvaraqlarini ochish, yuritish va yopish tartibi toʻgʻrisidagi yoʻriqnomaga (roʻyxat raqami 3420, 2023-yil 8-fevral) muvofiq amalga oshiriladi.

3. Kasaba uyushmalari organlari Qoraqalpogʻiston, viloyatlar, Toshkent shahar kengashlariga (keyingi oʻrinlarda — hududiy kengashlar deb yuritiladi) banklarda quyidagi bank hisobvaraqlari ochiladi:

202112 “Nodavlat notijorat tashkilotlarining talab qilib olinguncha saqlanadigan depozitlari” balans hisobvaragʻida ijtimoiy sugʻurta mablagʻlarini, shu jumladan ijtimoiy sugʻurta mablagʻlari hisobiga olingan yoʻllanmalarni sotib olishdan tushgan mablagʻlarni hisobga olish uchun ijtimoiy sugʻurta boʻyicha tranzit hisobvaraqlar ochiladi, ularning 30 foizi belgilangan tartibda taqsimlangunga qadar — Oʻzbekiston kasaba uyushmalari Federatsiyasiga, 70 foizi hududiy kengashlarga yoʻnaltiriladi;

xuddi shu 20212 balans hisobvaragʻida tasdiqlangan budjetga muvofiq xodimlar va ularning oila aʼzolarini sogʻlomlashtirish uchun hududiy kengashlar ixtiyoriga 70 foiz miqdordagi ijtimoiy sugʻurta mablagʻlarini taqsimlashdan tranzit hisobvaraqlaridan kelib tushgan mablagʻlarni hisobga olish uchun joriy hisobvaraqlari ochiladi.

5. Oʻzbekiston kasaba uyushmalari Federatsiyasining mablagʻlari tegishli kasaba uyushmalari organlarining qarorlari bilan tasdiqlanadigan budjet va smetalarida belgilangan maqsadlarga muvofiq xodimlar va ularning oila aʼzolarini sogʻlomlashtirish uchun sarflanadi. Ular:

sanatoriy-kurortlarda davolanish, pansionat va dam olish uylariga yoʻllanmalar olishga;

korxonalar va oʻquv muassasalaridagi sanatoriy-profilaktoriylarda, sanatoriy-profilaktoriylarning ijtimoiy sugʻurta uchun tasdiqlangan smetasiga muvofiq, xodimlar yoki talabalarni sogʻlomlashtirish xarajatlarini qisman qoplashga (xodimlarning mehnatiga haq toʻlashga, davolanuvchilarning ovqatlanishi, davolanishi, ularga madaniy xizmat koʻrsatishga);

tashkiliy-huquqiy shaklidan qatʼi nazar Oʻzbekiston Respublikasi hududida faoliyat yuritayotgan bolalar sogʻlomlashtirish oromgohlari yoʻllanmalari narxining bir qismini qoplash uchun ijtimoiy soliq tushumidan ajratmani hisobga olgan holda oromgohlarga yoki kasaba uyushmalari tashkilotlari orqali uning aʼzolariga bazaviy hisoblash miqdorining kamida 50 foizi miqdorida kompensatsiya berishga;

kasaba uyushmalari huzuridagi bolalar va oʻsmirlar sport maktablari (keyingi oʻrinlarda — BOʻSM deb yuritiladi) xodimlarining mehnatiga haq toʻlash, sport anjomlarini xarid qilish, oʻquv-sport tadbirlarini oʻtkazish uchun mablagʻ ajratishga;

oʻz sport bazalari boʻlmagan taqdirda, hududiy kengashlar tomonidan tasdiqlangan BOʻSMning smetasiga muvofiq, istisno tariqasida, binolarni ijaraga olishga;

ijtimoiy sugʻurta boʻyicha tashkiliy-maʼmuriy xarajatlarni moliyalashtirishga, kadrlarni tayyorlash, oʻqitish, sogʻlomlashtirish tadbirlarida ishtirok etuvchi shifokorlar va boshqa kadrlarning taʼminotiga;

Oʻzbekiston kasaba uyushmalari Federatsiyasining tasdiqlangan smetasi, qurilish va rekonstruksiya qilinadigan obyektlarning manzilli roʻyxatiga muvofiq kasaba uyushmalari sogʻlomlashtirish muassasalari va BOʻSM sport inshootlarini rekonstruksiya qilinishiga;

Oʻzbekiston kasaba uyushmalari Federatsiyasi tizimidagi sport majmualari abonementlarini sotib olishga;

Oʻzbekiston kasaba uyushmalari Federatsiyasi Ijroiya qoʻmitasi tomonidan tasdiqlangan ijtimoiy sugʻurta budjeti yoki smetasi doirasidagi ijtimoiy sugʻurta mablagʻlari hisobiga amalga oshiriladigan xodimlar va ularning oila aʼzolarini sogʻlomlashtirish bilan bogʻliq boshqa tadbirlarga sarflanadi.

6. Ijtimoiy sugʻurta boʻyicha xarajatlarni toʻlash kredit taqsimlovchilari tomonidan imzolangan toʻlov hujjatlari bilan mablagʻlarni oʻtkazish yoʻli bilan, quyidagi qoidalarga rioya qilgan holda amalga oshiriladi:

a) ijtimoiy sugʻurta mablagʻlari hisobiga olingan sanatoriylar, pansionat va dam olish uylariga yoʻllanmalarining toʻlovlari yoʻllanmalar olingan tegishli tashkilotlarning tuzilgan shartnomalari va yuk xatlari, hisob-fakturalariga asosan amalga oshiriladi. Shartnoma tuzilmasdan yoʻllanmalarni olish uchun mablagʻlarni oʻtkazishga yoʻl qoʻyilmaydi;

b) xodimlarni, talabalarni sanatoriy-profilaktoriylarda sogʻlomlashtirishga moʻljallangan mablagʻlar mazkur sanatoriy-profilaktoriylarining joriy hisobvaraqlariga tasdiqlangan smetalarga muvofiq oʻtkaziladi;

v) bolalarni sogʻlomlashtirish oromgohlariga yoki kasaba uyushmalari tashkilotlari orqali uning aʼzolariga bazaviy hisoblash miqdorining kamida 50 foizi miqdorida kompensatsiya mablagʻlari sogʻlomlashtirish oromgohlarining joriy hisobvaraqlariga yoki ixtiyorida bolalarni sogʻlomlashtirish oromgohlari boʻlgan birlashgan kasaba uyushmalari qoʻmitalarining qarorlariga muvofiq mazkur kasaba uyushmalari qoʻmitalarining joriy hisobvaraqlariga oʻtkazilishi mumkin;

d) tasdiqlangan smetaga muvofiq ijtimoiy sugʻurta mablagʻlaridan BOʻSMlarni taʼminlash uchun dotatsiyalar, BOʻSMlarni moliyalashtirish uchun ochilgan ijtimoiy sugʻurta boʻyicha joriy hisobvaraqlariga oʻtkaziladi;

e) ijtimoiy sugʻurta apparati xodimlarini taʼminlash, kadrlar tayyorlash uchun moʻljallangan mablagʻlar tasdiqlangan smetaga muvofiq hududiy kengashlarning tegishli joriy kasaba uyushmalari budjetlari hisobvaraqlariga oʻtkaziladi va zarur hujjatlarni ilova qilgan holda tasdiqlangan kasaba uyushmasi budjetiga muvofiq sarflanadi;

j) sport majmualari abonementlarini sotib olish uchun mablagʻlar, tasdiqlangan smetaga muvofiq Oʻzbekiston kasaba uyushmalari Federatsiyasi tizimidagi sport majmualarining joriy hisobvaraqlariga oʻtkaziladi.

7. Kasaba uyushmalari organlariga ijtimoiy sugʻurta mablagʻlaridan kasaba uyushmasi ehtiyojlari yoki ijtimoiy sugʻurta bilan bogʻliq boʻlmagan boshqa maqsadlarda foydalanish yoki ularni oʻzlashtirish qatʼiyan taqiqlanadi.

9. Sanatoriy-profilaktoriylarni, bolalarni sogʻlomlashtirish oromgohlarini taʼminlash, jihozlash, taʼmirlash, ularda qoʻshimcha ish oʻrinlarini tashkil etish, sogʻlomlashtirilayotganlarning Oʻzbekiston kasaba uyushmalari Federatsiyasi tomonidan belgilangan normalardan ortiqroq ovqatlanishini moliyalashtirish xarajatlari mazkur sanatoriy-profilaktoriy, bolalarni sogʻlomlashtirish oromgohlari balansida boʻlgan korxonalar, tashkilotlar, oʻquv muassasalari hisobidan, ular tomonidan tasdiqlangan smetalarga muvofiq amalga oshiriladi.

10. Hududiy kengashlar tegishli hududiy soliq organlaridan ijtimoiy soliqning hisoblanishi va toʻlanishi haqidagi maʼlumotlarni elektron tarzda olgandan soʻng, tegishli davr uchun ijtimoiy sugʻurta budjetining ijrosi haqidagi yigʻma moliyaviy hisobotni Oʻzbekiston kasaba uyushmalari Federatsiyasiga taqdim etadilar.

11. Oʻzbekiston kasaba uyushmalari Federatsiyasi respublika boʻyicha ijtimoiy sugʻurta budjeti ijrosi haqidagi yigʻma moliyaviy hisobotni har chorakda Oʻzbekiston Respublikasi Iqtisodiyot va moliya vazirligiga taqdim etadi.

12. Mazkur Nizom Oʻzbekiston kasaba uyushmalari Federatsiyasi Kengashi bilan kelishilgan.