Xalq taʼlimi muassasalarini moliyalashtirish mexanizmini takomillashtirish, moliyaviy-iqtisodiy masalalarni hal etishda taʼlim muassasalarining mustaqilligini kengaytirish va masʼuliyatini oshirish, budjet mablagʻlaridan maqsadli va samarali foydalanish, shuningdek taʼlim-tarbiya jarayonini muvofiqlashtirish va uslubiy rahbarlik qilishni kuchaytirish maqsadida:

1. Xalq taʼlimi muassasalarini hisob-kitob — moliyaviy jihatdan taʼminlash, ularning sarf-xarajatlarini hisobga olish va nazorat qilish funksiyalari hamda tuzilmalarini Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, xalq taʼlimi tuman va shahar boʻlimlaridan tegishli hududiy moliya organlariga topshirish toʻgʻrisida Oʻzbekiston Respublikasi Xalq taʼlimi vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining taklifi qabul qilinsin.

Belgilansinki, xalq taʼlimi muassasalarining faoliyatini moliyalashtirish bevosita hududiy moliya organlari tomonidan amalga oshiriladi.

2. Oʻzbekiston Respublikasi Moliya vazirligi bir oy muddatda hududiy moliya organlari tuzilmasida Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, xalq taʼlimi tuman va shahar boʻlimlarining topshirilayotgan markazlashtirilgan buxgalteriyalari va markazlashtirilgan xoʻjalik xizmati koʻrsatish guruhlari negizida xalq taʼlimi muassasalarini moliyalashtirish boʻlimlari tashkil qilinsin.

Hududiy moliya organlari zimmasiga qoʻshimcha ravishda quyidagi asosiy vazifa va funksiyalar yuklansin:

xalq taʼlimi muassasalari bilan birgalikda xarajatlar smetasi va shtat jadvallarini ishlab chiqish, ularni moliyalashtirish, shuningdek ish haqi va unga tenglashtirilgan toʻlovlarni hisoblash;

gʻaznachilik hududiy boʻlinmalari bilan hamkorliqda xalq taʼlimi muassasalarining topshiriqlari boʻyicha hisob-kitob operatsiyalarini amalga oshirish, shuningdek ularning faoliyati boʻyicha hisob va hisobotlarni yuritish;

xalq taʼlimi muassasalarida budjet mablagʻlaridan maqsadli va samarali foydalanishni hamda budjet intizomiga rioya etishni, shu jumladan xalq taʼlimi xodimlari mehnatiga haq toʻlashning takomillashtirilgan tizimi talablarini bajarishni taʼminlash;

xalq taʼlimi muassasalarining xarajatlar smetasi doirasida xalq taʼlimi muassasalarining buyurtmalariga muvofiq va ularning ehtiyojlaridan kelib chiqqan holda tovarlar xarid qilish va xizmatlar koʻrsatish uchun shartnomalar tuzish, shuningdek isteʼmol limitlari va sarf-xarajat normalariga rioya etilishini monitoring qilib borish;

3. Oʻzbekiston Respublikasi Xalq taʼlimi vazirligi, Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, xalq taʼlimi muassasalari faoliyatini metodik taʼminlash va tashkil etish tuman va shahar boʻlimlari maktabgacha tarbiya, umumiy oʻrta va maktabdan tashqari taʼlim muassasalaridagi uslubiy va taʼlim-tarbiya ishlarini takomillashtirish masalalarini oʻz faoliyati markazida tutsin va bunda quyidagilarga asosiy eʼtiborni qaratsin:

xalq taʼlimi muassasalari tomonidan Oʻzbekiston Respublikasining “Taʼlim toʻgʻrisida”gi Qonuni qoidalariga hamda umumiy oʻrta taʼlimning belgilangan davlat taʼlim standartlariga rioya etilishi monitoringini amalga oshirish;

idoraviy boʻysunishi va mulkchilik shaklidan qati nazar, taʼlim muassasalariga uslubiy rahbarlikni takomillashtirish, zamonaviy taʼlim shakllarini, yangi pedagogik va axborot texnologiyalari, maʼnaviy-axloqiy tarbiyaning samarali shakl va usullarini taʼlim-tarbiya jarayoniga tatbiq etish;

respublika yetakchi oʻkituvchilari va umumtaʼlim muassasalarining ijobiy ish tajribasini oʻrganish va umumlashtirish hamda uning umumtaʼlim maktablari oʻquv-uslubiy va tarbiyaviy ishida keng ommalashuviga koʻmaklashish;

2004—2009-yillarda Maktab taʼlimini rivojlantirish davlat umummilliy dasturida nazarda tutilgan chora-tadbirlarning viloyatlar, shahar va tumanlarda roʻyobga chiqarilishini taʼminlash borasidagi tadbirlar kompleksini amalga oshirish.

4. Oʻzbekiston Respublikasi Adliya vazirligi va Moliya vazirligi bir oy muddatda manfaatdor vazirliklar va idoralar bilan birgalikda qonun hujjatlariga mazkur Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

5. Ushbu Farmonning ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.