LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Jismoniy va ma’naviy sog‘lom yosh avlodni kamol toptirishga yo‘naltirilgan ommaviy bolalar sportini keng rivojlantirish borasida kompleks chora-tadbirlarni amalga oshira borish, shuningdek bolalar sport komplekslarini 2004—2009-yillarda Maktab ta’limini rivojlantirish Davlat umummilliy dasturini amalga oshirish bilan chambarchas bog‘liq holda qurish, rekonstruksiya qilish va sport anjomlari bilan jihozlash maqsadida:
O‘zbekiston Respublikasi Moliya vazirligi, Xalq ta’limi vazirligi, Iqtisodiyot vazirligi tomonidan ishlab chiqilgan O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasining 2007-yilgi daromadlari va xarajatlarining prognoz parametrlari 1 va 2-ilovalarga* muvofiq;
* 1 va 2-ilovalar rus tilidagi matnda berilgan.
O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi tomonidan “Davarxitektqurilish” qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda tayyorlangan, Bolalar sportini rivojlantirish jamg‘armasi mablag‘lari hisobidan moliyalashtiriladigan bolalar sporti obyektlarini qurish va rekonstruksiya qilish aniq manzilli dasturi 3-ilovaga* muvofiq tasdiqlansin.
* 3-ilova rus tilidagi matnda berilgan .
respublika hamda hududiy tashkilotlar va korxonalarning, shuningdek xorijiy investorlarning O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasiga ixtiyoriy ravishda homiylik yordami ko‘rsatish to‘g‘risidagi tashabbusi 4—6-ilovalarga* muvofiq;
* 4—6-ilovalar rus tilidagi matnda berilgan.
O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi tomonidan taqdim etilgan, bolalar sporti obyektlarini jihozlash uchun 2007-yilda import qilinadigan, respublikada ishlab chiqarilmaydigan sport anjomlari va uskunalari ro‘yxati 7-ilovaga* muvofiq ma’qullansin.
* 7-ilova rus tilidagi matnda berilgan.
3. Qoraqalpog‘iston Respublikasi Vazirlar Kengashi Raisi, viloyatlar va Toshkent shahri hokimlari zimmasiga:
2007-yilning 20-yanvarigacha pudrat tashkilotlarining moddiy-texnika bazasi, ish tajribasi mavjudligi va moliyaviy barqarorligiga alohida e’tibor qaratgan holda bolalar sporti obyektlarini qurish va rekonstruksiya qilishning aniq manzilli dasturiga kiritilgan obyektlar bo‘yicha tender savdolarini yakunlash;
bolalar sporti obyektlarida qurilish-montaj ishlarini olib borishda namunaviy loyihalarga, shuningdek tasdiqlangan qurilish me’yorlari va qoidalariga qatiy amal qilish;
bolalar sporti obyektlarini ixtiyoriy ravishda homiylar hisobidan tashabbuskorlik bilan va nazoratsiz qurish oqibatida belgilangan standartlarga amal qilmaslik va mazkur obyektlardan foydalanish me’yorlarini buzish hollariga olib keluvchi faktlarga yo‘l qo‘ymaslikda shaxsiy javobgarlik yuklansin.
4 O‘zbekiston Respublikasi Xalq ta’limi vazirligi, Bolalar sportini rivojlantirish jamg‘armasi 2007-yilda ishga tushiriladigan bolalar sport komplekslarini belgilangan talab va standartlarga muvofiq zarur sport uskunalari hamda anjomlari bilan o‘z vaqtida jihozlashni, shuningdek bolalar, ayniqsa qizlar, ijtimoiy madadga muhtoj oilalardan bo‘lgan o‘quvchilarni ommaviy sportga keng jalb etish maqsadida ular uchun sport formalari va jihozlarini xarid qilishni ta’minlasin.
5. O‘zbekiston Respublikasi Iqtisodiyot vazirligi Xalq ta’limi vazirligi, Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda mablag‘larning O‘zbekiston Respublikasi Moliya vazirligi huzuridagi Bolalar sportini rivojlantirish jamg‘armasi hisobvarag‘iga o‘z vaqtida kelib tushishini ta’minlasin.
6. O‘zbekiston Respublikasi Moliya vazirligi 2007-yilning har choragi yakunlari bo‘yicha ajratilgan mablag‘lardan Bolalar sportini rivojlantirish jamg‘armasining hududiy bo‘limlari maqsadli foydalanishi va bolalar sporti inshootlari qurilishi obyektlarida xarajatlar smetasiga amal qilishini tekshirishni ta’minlasin va olib borilgan ishlar to‘g‘risida Jamg‘armaning Vasiylik kengashiga axborotnoma bersin.
7. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.