Oʻzbekiston Respublikasi hududida lotereyalar, totalizatorlar va tavakkalchilikka asoslangan boshqa oʻyinlar tashkil etish faoliyatini amalga oshirishni tartibga solish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga 2007-yil 1-yanvardan boshlab oʻzgartirishlar kiritilsin.

2. Vazirliklar va idoralar Oʻzbekiston Respublikasi Adliya vazirligi bilan birgalikda bir oy muddatda idoraviy normativ hujjatlarning ushbu qarorga muvofiqlashtirilishini taʼminlasinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Vazirlar Mahkamasining 1999-yil 5-fevraldagi 54-son qarori (Oʻzbekiston Respublikasi QT, 1999-y., 2-son, 9-modda) bilan tasdiqlangan Mahsulot (ishlar, xizmatlar)ni ishlab chiqarish va sotish xarajatlarining tarkibi hamda moliyaviy natijalarni shakllantirish tartibi toʻgʻrisida nizomga 1-ilova II boʻlimining nomi quyidagi tahrirda bayon qilinsin:

“Banklar, sugʻurta tashkilotlari, videosalonlar, videokoʻrsatuv, video va audioga yozish punktlari, kimoshdi savdolari, kazino, nodavlat organlari tomonidan oʻtkaziladigan lotereya oʻyinlari, ommaviy konsert-tomosha tadbirlari, shuningdek 1995-yil 1-yanvargacha amalda boʻlgan soliq solish tartibini saqlab qolgan xorijiy investitsiyalar ishtirokidagi ishlab chiqarish korxonalari uchun soliq olinadigan bazadan chiqarilmaydigan xarajatlarning qoʻshimcha moddalari”.

2. Vazirlar Mahkamasining “Pul-buyum lotereyalari oʻtkazishni tashkil etishni takomillashtirish chora-tadbirlari toʻgʻrisida” 2002-yil 15-noyabrdagi 396-son qaroriga ilovada (Oʻzbekiston Respublikasi QT, 2002-y., 11-son, 70-modda):

a) 2-bandning oltinchi xatboshi, 5-bandning “j” kichik bandi, 8-band, 39-bandning beshinchi xatboshi chiqarib tashlansin;

b) 6-bandning birinchi xatboshidagi “oʻyin avtomatlari zalini tashkil etishdan tashqari” soʻzlari chiqarib tashlansin.

3. Vazirlar Mahkamasining “Oʻzavtoyoʻl” davlat-aksiyadorlik kompaniyasi va Oʻzbekiston Respublikasi Moliya vazirligi huzuridagi Respublika yoʻl jamgʻarmasi faoliyatini tashkil etish masalalari toʻgʻrisida” 2003-yil 21-avgustdagi 361-son qaroriga 6-ilova 7-bandining “v” kichik bandidagi (Oʻzbekiston Respublikasi QT, 2003-y., 8-son, 74-modda) “pul yutuqli avtomatlardan foydalanishdan” soʻzlari chiqarib tashlansin.

4. Vazirlar Mahkamasining “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bilan bogʻliq axborotni berish tartibi toʻgʻrisida” 2006-yil 30-iyundagi 126-son qaroriga 2-ilova (Pul mablagʻlari va boshqa mulk bilan bogʻliq operatsiyalar toʻgʻrisida maʼlumotlar)ga 1-ilovadagi (Oʻzbekiston Respublikasi QT, 2006-y., 6-son, 47-modda) “Tavakkalchilikka asoslangan oʻyin avtomatlari zallari tashkil etish faoliyatini amalga oshiruvchi yuridik shaxslar” pozitsiyasi chiqarib tashlansin.