Ўзбекистон Республикаси Президентининг «Ўзбекистон Болалар спортини ривожлантириш жамғармасини тузиш тўғрисида»ги Фармонида белгиланган вазифаларни амалга ошириш, ёшларда спортга бўлган ҳавас ва интилишни, жамиятимизда соғлом турмуш тарзи тамойилларини янада кучайтириш, мамлакатимизда ўқувчи ва талабаларни спорт машғулотларига узлуксиз жалб қилишга қаратилган спорт мусобақалари тизимини Кадрлар тайёрлаш миллий модели ва дастурига мувофиқ ташкил этиш ҳамда ушбу тизимнинг самарали ишлашини таъминлаш мақсадида Вазирлар Маҳкамаси қарор қилади:

1. Умумтаълим мактаблари, академик лицей ва касб-ҳунар коллежлари ўқувчилари ҳамда олий таълим муассасалари талабаларининг «Умид ниҳоллари», «Баркамол авлод» ва «Универсиада» спорт мусобақалари ўзаро боғлиқ ҳолда ривожланиши Ўзбекистон Республикаси Халқ таълими, Олий ва ўрта махсус таълим вазирликлари, Маданият ва спорт ишлари вазирлиги, Миллий Олимпия қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, тегишли вазирликлар, давлат қўмиталари ва жамоат ташкилотлари томонидан таъминлансин.

2. Ўзбекистон ўқувчи ва талаба ёшларининг «Умид ниҳоллари», «Баркамол авлод» ва «Универсиада» спорт мусобақаларининг республика финал босқичларини ўтказиш режаси 1-иловага, Ташкилий қўмиталар таркиби 2, 3, 4-иловаларга* мувофиқ тасдиқлансин.

3. Мусобақалар, маданий-маърифий тадбирлар ўтадиган ҳамда қатнашчилар яшайдиган жойларда жамоат ва транспорт ҳаракати хавфсизлигини таъминлаш ва анжуманларни кўнгилли ўтказиш вазифаси Ўзбекистон Республикаси Ички ишлар вазирлиги ва Миллий хавфсизлик хизматига юклатилсин.

4. Ўзбекистон Республикаси Соғлиқни сақлаш вазирлиги спорт мусобақалари иштирокчиларини тиббий кўрикдан ўтказишни ва мусобақалар даврида тиббий хизмат кўрсатишни ташкил этсин, спортчиларнинг дам олиш, овқатланиш жойларида санитария ва гигиена қоидаларига қатъий риоя қилинишини таъминласин.

5. Ташкилий қўмиталар мазкур мусобақаларни ўтказиш тўғрисида алоҳида дастурлар ишлаб чиқиб Ўзбекистон Республикаси Вазирлар Маҳкамасига тасдиқлаш учун киритсин. Бунда спорт ўйинлари Ўзбекистон Республикаси Халқ таълими вазирлиги, Ўрта махсус, касб-ҳунар таълими маркази, Олий ва ўрта махсус таълим вазирлигига спорт ва жисмоний тарбия соҳасига ажратиладиган маблағлар доирасида, шунингдек, ҳомийларнинг маблағлари ва бюджетдан ташқари маблағларни жалб этган ҳолда ўтказилиши назарда тутилсин.

6. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикаси Олий ва ўрта махсус таълим вазирлиги, Халқ таълими вазирлиги, Ўрта махсус, касб-ҳунар таълими маркази, Маданият ва спорт ишлари вазирлиги, Миллий Олимпия қўмитаси, Касаба уюшмалари Федерацияси Кенгаши, «Камолот» ёшлар ижтимоий ҳаракати, «Ўзбекнаво» бирлашмаси, «Ватанпарвар» ташкилоти, Ўзбекистон болалар спортини ривожлантириш жамғармаси, «Соғлом авлод учун» жамғармасига бошқа манфаатдор вазирликлар ва идоралар билан биргаликда:

мазкур спорт мусобақаларининг республика финал ўйинлари бўлиб ўтадиган иншоотларни халқаро талаблар даражасида тайёрлаш ва уларни замонавий спорт анжомлари билан жиҳозлаш;

мусобақалар давомида ўқувчи ёшларда ўз она юрти билан фахр-ифтихор туйғуларини камол топтиришга, уларнинг ватанпарварлик руҳини кўтаришга хизмат қиладиган маданий-маърифий тадбирлар дастурини амалга ошириш топширилсин.

7. «Ўзбекистон ҳаво йўллари» миллий авиакомпанияси, «Ўзбекистон темир йўллари» компанияси Ташкилий қўмиталар буюртмасига биноан спорт мусобақалари иштирокчилари ва ижодий гуруҳ аъзоларининг йўл харажатлари учун имтиёзли тариф қўлласинлар.

8. Ўзбекистон Миллий ахборот агентлиги, «Ўзтелерадио» компанияси ва бошқа оммавий ахборот воситаларига мазкур спорт мусобақаларига тайёргарлик кўриш ва уларни ўтказиш жараёнини кенг ёритиб бориш тавсия этилсин.

9. Мазкур қарор ижросини назорат қилиш Ўзбекистон Республикаси Президентининг Давлат маслаҳатчиси Т.Т. Рисқиев ва Бош вазир ўринбосари Ҳ.С. Кароматов зиммасига юклансин.