Ўзбекистон Республикаси Вазирлар Маҳкамасининг

қарори

Ёшларнинг ўқув марказларида хорижий тилларни ўқиш харажатлари учун субсидия ажратиш ҳамда ўқув марказларини рағбатлантириш чора-тадбирлари тўғрисида

Ўзбекистон Республикаси Президентининг «Ўзбекистон Республикаси Президентининг ёшлар билан очиқ мулоқотида белгиланган вазифаларни амалга оширишга доир чора-тадбирлар тўғрисида» 2025 йил 26 мартдаги ПФ-61-сон Фармони ва «Ёшларни хорижий тилларга ўқитиш тизими самарадорлигини ошириш бўйича қўшимча чора-тадбирлар тўғрисида» 2024 йил 27 июндаги ПҚ-239-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш тартиби тўғрисидаги низом 1-иловага мувофиқ;

Ўқув марказлари рейтингини шакллантириш ва рейтинг асосида ўқув марказларини рағбатлантириш тартиби тўғрисидаги низом 2-иловага мувофиқ тасдиқлансин.

2. Белгилансинки, Ўзбекистон Республикаси Ёшлар ишлари агентлиги томонидан 2025 — 2030 йилларда 100 минг нафаргача ёшларнинг ўқув марказларида хорижий тилларни ўқиш харажатлари учун субсидия ажратилади.

3. Ўзбекистон Республикаси Ёшлар ишлари агентлиги, «Ўзбекистон Республикаси Президентининг 5 та ташаббуси лойиҳа офиси» нодавлат нотижорат ташкилоти томонидан ўқув марказлари ҳақида маълумотлар юритиладиган «yonda.uz» электрон платформаси ва унинг мобил иловаси (кейинги ўринларда — электрон платформа) яратилгани маълумот учун қабул қилинсин.

4. Ўзбекистон Республикаси Ёшлар ишлари агентлиги Ёшларга оид давлат сиёсатини қўллаб-қувватлаш жамғармасига ажратилган маблағлар доирасида электрон платформа орқали қуйидаги имкониятларни яратсин ҳамда электрон платформанинг доимий иш фаолиятида бўлишини таъминласин:

ўқув марказларида ёшларнинг хорижий тилларни ўрганиш учун ўқув машғулотида қатнашишини қайд этиб бориш;

ўқиш харажати учун тўловларни онлайн тўлов тизимлари орқали амалга ошириш;

ўқув марказлари рейтингини шакллантириш ва эълон қилиш.

5. Ўзбекистон Республикаси Ёшлар ишлари агентлиги Рақамли технологиялар вазирлиги билан биргаликда икки ой муддатда «Рақамли ҳукумат» тизими идоралараро интеграциялашув платформаси орқали:

Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг «Миллий сертификатлар» электрон платформасини;

Солиқ қўмитасининг «Тадбиркорларнинг барқарорлик рейтинги» ҳамда «Ижара шартномаларини ҳисобга қўйиш» электрон платформаларини;

Камбағалликни қисқартириш ва бандлик вазирлигининг «Ягона миллий меҳнат тизими» идоралараро дастурий-аппарат комплексини;

Адлия вазирлигининг «Лицензия» ахборот тизимини белгиланган тартибда электрон платформага интеграция қилиш чораларини кўрсин.

6. Вазирлар Маҳкамасининг «Халқаро имтиҳон тизимлари бўйича юқори балл (даража) тўплаган ёшларга ўқиш ва имтиҳон топшириш харажатларини тўлиқ қоплаб бериш тартибини жорий этиш тўғрисида» 2021 йил 13 апрелдаги 209-сон қарорига 3-иловага мувофиқ ўзгартиришлар ва қўшимча киритилсин.

7. Ўзбекистон Республикаси Ёшлар ишлари агентлиги манфаатдор вазирлик ва идоралар билан биргаликда 2026 йил 1 августга қадар ушбу қарорга мувофиқ жорий этиладиган ёшларнинг хорижий тилларни ўқиш харажатлари учун субсидия ажратиш ҳамда ўқув марказларини рағбатлантириш билан боғлиқ жараёнларни пухта таҳлил қилган ҳолда, уни такомиллаштириш юзасидан асосланган таклифларни Вазирлар Маҳкамасига киритсин.

8. Ушбу қарорнинг бажарилишини назорат қилиш Ўзбекистон Республикаси Ёшлар ишлари агентлиги директори А.З. Саъдуллаев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2025 йил 8 октябрь,

632-сон

Вазирлар Маҳкамасининг 2025 йил 8 октябрдаги 632-сон қарорига
1-ИЛОВА

Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш тартиби тўғрисида

НИЗОМ

1-боб. Умумий қоидалар

1. Ушбу Низом хорижий тиллар (инглиз, немис, француз, япон, корейс ва хитой тили)ни ўрганаётган ёшларнинг нодавлат таълим ташкилотларида офлайн шаклда амалга ошириладиган ўқиш харажатларининг бир қисми учун субсидия ажратиш тартибини белгилайди.

2. Ушбу Низомда қуйидаги асосий тушунчалардан фойдаланилади:

ариза берувчи — хорижий тилларни ўқиш харажати учун субсидия олиш истагидаги ўн тўрт ёшга тўлган ва ўттиз ёшдан ошмаган Ўзбекистон Республикаси фуқаролари ёки фуқаролиги бўлмаган шахслар;

«2+6» дастури — ушбу Низомга 1-иловада белгиланган хорижий тилларни билиш бўйича баллнинг (даражанинг) камида минимал кўрсаткичли сертификатига эга бўлган ариза берувчи ўқув маркази томонидан унга хорижий тилни ўқитиш хизматини кўрсатгани учун дастлабки икки ой учун ўқиш харажатини ўз ҳисобидан тўлаганда, кейинги олти ойгача ўқиш харажати учун Ўзбекистон Республикаси Ёшлар ишлари агентлиги (кейинги ўринларда — Ёшлар ишлари агентлиги)нинг Ёшларга оид давлат сиёсатини қўллаб-қувватлаш жамғармасига ажратилган маблағлар доирасида субсидия ажратилишини назарда тутувчи дастур;

давомат — ўқув марказларида таҳсил олаётган ёшларнинг дарсларга қатнашганини кунлик электрон назорат қилиш тизими;

сертификат — ушбу Низомга 1-иловадаги хорижий тилларни билиш даражасини белгиловчи, махсус серия рақамига эга ҳужжат;

ўқув маркази — Ўзбекистон Республикаси ҳудудида белгиланган тартибда давлат рўйхатидан ўтказилган ҳолда хорижий тилларни ўқитиш фаолиятини амалга оширувчи нодавлат таълим ташкилоти;

ўқиш харажати — ўқув марказига ариза берувчини хорижий тилга ўқитиш хизматини кўрсатганлик учун тўланадиган тўлов;

электрон платформа — ариза берувчиларнинг ўқув марказларида хорижий тилни ўрганиш учун ўқув машғулотида қатнашишини қайд этиб борувчи, уларнинг хорижий тилни ўқиш харажати учун субсидия ажратиладиган ўқув марказлари рўйхати, шунингдек, ушбу ўқув марказлари рейтинги эълон қилиб бориладиган электрон платформа ва унинг мобил иловаси.

3. «2+6» дастурига мувофиқ ёшларга ҳар ой якуни бўйича қуйидаги миқдорда субсидия ажратилади:

Тошкент шаҳрида — базавий ҳисоблаш миқдорининг 2 бараваригача;

Қорақалпоғистон Республикаси ва вилоятлар марказларида — базавий ҳисоблаш миқдорининг 1,5 бараваригача;

туман (шаҳар)ларда — базавий ҳисоблаш миқдорининг 1 бараваригача.

4. Ёшлар ишлари агентлиги томонидан 2025-2026 йилларда ўқув марказларида хорижий тилларни ўрганадиган 20 минг нафаргача, 2031 йилга қадар ҳар йили 20 минг нафаргача ёшларга ўқиш харажатлари учун субсидия ажратилади.

Бунда тегишли йилда субсидия ажратилган ёшлар сони 20 минг нафардан ошган тақдирда, ўша йил учун субсидия ажратиш кейинги йилга қадар тўхтатилади.

5. Ариза берувчига қуйидаги давлат ижтимоий ёрдамлари доирасида муқаддам хорижий тилни ўрганиш учун маблағ ажратилган бўлса, ушбу ариза берувчига «2+6» дастури доирасида айнан шу хорижий тилни ўрганиш харажати учун субсидия ажратиш рад этилади:

Вазирлар Маҳкамасининг «Халқаро имтиҳон тизимлари бўйича юқори балл (даража) тўплаган ёшларга ўқиш ва имтиҳон топшириш харажатларини тўлиқ қоплаб бериш тартибини жорий этиш тўғрисида» 2021 йил 13 апрелдаги 209-сон қарорига мувофиқ ариза берувчига ушбу хорижий тил бўйича имтиҳон топшириш харажатлари қоплаб берилган бўлса;

Вазирлар Маҳкамасининг «Ёшлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида» 2022 йил 7 июндаги 312-сон қарорига мувофиқ ариза берувчига хорижий тилни ўқиш харажати учун «Ёшлар дафтари» жамғармаси ҳисобидан субсидия ажратилган бўлса.

6. Ушбу Низомга мувофиқ ариза берувчиларга фақат битта хорижий тилни ўқиш харажати учун субсидия ажратилади.

2-боб. Ёшларнинг хорижий тилларни ўқиш харажати учун субсидия ажратиладиган ўқув марказлари рўйхатини шакллантириш

7. Ариза берувчиларнинг хорижий тилни ўқиш харажати учун:

ўқув марказларининг рейтингини шакллантириш учун белгиланган тартибда электрон платформа орқали рўйхатдан ўтган;

ариза берувчиларнинг ўқув машғулотларида қатнашганини кунлик электрон назорат қилиш имконини берувчи электрон платформага интеграция қилинган ўқув марказларига «2+6» дастури доирасида субсидия ажратилади.

8. Ариза берувчиларнинг хорижий тилни ўқиш харажати учун субсидия ажратиладиган ўқув марказлари рўйхати Ёшлар ишлари агентлиги томонидан шакллантирилади ва электрон платформа орқали эълон қилиб борилади.

9. Ушбу рўйхатга киритиш учун ўқув марказлари электрон платформа орқали Ёшлар ишлари агентлигига қуйидаги ҳужжатларни юборади:

нодавлат таълим хизматларини кўрсатиш фаолияти бўйича лицензия ёки хабарнома қабул қилингани тўғрисидаги тасдиқнома (интеграциялашган ахборот тизимлари орқали);

хорижий тилни ўқитиш учун мулк ҳуқуқи ёки ижара ҳуқуқи асосида фаолият юритиши (бино ёки хонанинг кадастр рақами) тўғрисидаги маълумотлар (pdf форматда);

ўқув марказида хорижий тилни ўқитиш фаолиятини амалга оширувчи камида «B2» даражадаги ёки унга тенглаштирилган даражадаги миллий ёхуд халқаро сертификатга эга бўлган ўқитувчилар, шунингдек, таҳсил олаётган ўқувчилари ҳақидаги маълумотлар (pdf форматда);

хорижий тилни ўқитиш фаолиятини амалга оширишда фойдаланиладиган ўқув хоналари, жиҳозлари ва инвентарлар (номи ва сони) тўғрисида маълумот (pdf форматда).

10. Ўқув маркази томонидан юборилган ҳужжатлар ва маълумотлар ушбу Низомнинг 7 ва 9-бандларига мувофиқ бўлган тақдирда, Ёшлар ишлари агентлиги электрон платформа орқали ўқув марказига бу ҳақида хабарнома юборади.

11. Ўқув марказининг ўқувчилар давоматини кунлик назорат қилиш тизими электрон платформа билан интеграция қилиниб, ўқув маркази томонидан оммавий оферта шартлари қабул қилингандан сўнг ушбу ўқув маркази ариза берувчиларни хорижий тилга ўқитиш харажати учун субсидия ажратиладиган ўқув марказлари рўйхатига киритилади.

3-боб. Ёшларнинг хорижий тилларни ўқиш харажати учун субсидия ажратиш тартиби

12. Ўқув марказларида ёшларнинг хорижий тилларни ўқиш харажати учун субсидия ушбу Низомга 2-иловадаги схемага мувофиқ ажратилади.

13. Ариза берувчи ўз хоҳишига кўра ягона идентификация тизими (One ID) орқали электрон платформага кириб, авторизациядан ўтади ва сертификатни юборади.

Бунда ушбу сертификатни у берилган санадан бошлаб бир календарь йил ичида юбориш талаб этилади, ушбу муддат ўтгандан сўнг юборилганда «2+6» дастури доирасида ўқиш харажати учун субсидия ажратилиши рад этилади.

14. Сертификат ушбу Низомга 1-иловадаги рўйхатга мувофиқ бўлганда, унинг ҳақиқийлиги тасдиқланганда ва ушбу Низомда белгиланган муддатда юборилганда, ариза берувчи хорижий тилни ўқитиш фаолиятини амалга оширувчи ўқув марказларидан бирини ва унда фаолият юритувчи ўқитувчини ихтиёрий равишда танлайди ва ўзи ўрганишни истаган хорижий тилнинг номи, хорижий тилни ўрганиш вақти ва умумий муддатини белгилаб, хорижий тилни ўқитиш хизматини кўрсатиш ҳақидаги шартномани (кейинги ўринларда — шартнома) бир томонлама имзолайди.

15. Ариза берувчининг таклифи ўқув маркази томонидан маъқулланганда, ўқув маркази етти кун ичида шартномани имзолайди.

16. Ариза берувчининг хорижий тилни ўрганиш учун ўқув машғулотига қатнашиши электрон платформада қайд этиб борилади.

Бунда ариза берувчи дастлабки икки ой давомида хорижий тилни ўқиш харажатини ўз ҳисобидан электрон платформа орқали ўқув марказининг тегишли банк ҳисобварағига тўлаганда, унинг кейинги олти ойгача бўлган ўқиш харажати ўқув маркази томонидан электрон платформа орқали юборилган ҳисоб-фактурага асосан, ариза берувчининг давоматига мутаносиб равишда Ёшлар ишлари агентлигининг Ёшларга оид давлат сиёсатини қўллаб-қувватлаш жамғармасига ажратилган маблағлар доирасида ўқув марказининг тегишли банк ҳисобварағига шартномада белгиланган муддатларда ўтказиб борилади.

Ушбу тўловларнинг амалга оширилгани ҳақида ариза берувчининг электрон платформадаги шахсий кабинетига хабарнома юборилади.

4-боб. Якунловчи қоидалар

17. Ариза берувчи ушбу Низом талаблари ижросига масъул давлат органлари ва бошқа ташкилотлар ходимларининг хатти-ҳаракатлари (ҳаракатсизлиги) юзасидан қонунчилик ҳужжатларида белгиланган тартибда шикоят қилиши мумкин.

18. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш тартиби тўғрисидаги низомга
1-ИЛОВА

Ёшларнинг «2+6» дастури доирасида ўқув марказларида хорижий тилларни ўқиш харажатига субсидия ажратилиши учун ушбу ёшлар томонидан тақдим этиладиган сертификатлар

РЎЙХАТИ

Т/р	Сертификатлар номи	Мувофиқлик даражалари						Ўқиш харажати қопланиши учун лозим бўлган баллнинг (даражанинг) минимал кўрсаткичи
		Common European Framework of Reference (CEFR) шкаласи бўйича
		A1	A2	B1	B2	C1	C2
I. Инглиз тили
1.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
2.	International English Language Testing System — IELTS	2.0	3.0	4.0-5.0	5.5-6.5	7.0-8.0	8.5-9.0	4.0-5.0
3.	Cambridge Assessment English (KET, PET, FCE, CAE, CPE)		KET 120 — 139	PET 140 — 159	FCE 160 — 179	CAE 180 — 199	CPE 200 — 220	PET 140 — 159
4.	Cambridge Assessment English Linguaskill	A1	A2	B1	B2	C1		B1
5.	International Test of English Proficiency iTEP Academic — Plus	A1	A2	B1	B2	C1	C2	B1
6.	«Ибрат фарзандлари» лойиҳасининг махсус сертификати	A1	A2	B1	B2			B2
II. Француз тили
7.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
8.	Diplôme dʼEtudes en Langue Française (DELF)			B1	B2			B1
9.	Test de Connaissance du Français (TCF)	A1	A2	B1	B2	C1	C2	B1
10.	«Ибрат фарзандлари» лойиҳасининг махсус сертификати	A1	A2	B1	B2			B1
III. Немис тили
11.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
12.	Goethe-Zertifikat	A1	A2	B1	B2	C1	C2	B1
13.	Test Deutsch als Fremdsprache (Test DAF)				TDN 3 (B2.1), TDN 4 (B2.2 — C1.1)	TDN 5 (C1.2)		TDN 3
14.	«Ибрат фарзандлари» лойиҳасининг махсус сертификати	A1	A2	B1	B2			B1
IV. Хитой тили
15.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
16.	Hanyu Shuiping Kaoshi (HSK)			HSK 3	HSK 4	HSK 5	HSK 6	HSK 3
17.	«Ибрат фарзандлари» лойиҳасининг махсус сертификати	A1	A2	B1	B2			B1
V. Япон тили
18.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
19.	Japanese-Language Proficiency Test (JLPT)		N5	N4	N3	N2	N1	N4
20.	«Ибрат фарзандлари» лойиҳасининг махсус сертификати	A1	A2	B1	B2			B1
VI. Корейс тили
21.	Чет тилини билиш даражасини аниқлаш бўйича миллий сертификат (Билим ва малакаларни баҳолаш агентлиги)			B1	B2	C1		B1
22.	Test of Proficiency in Korean (TOPIK II)			Level 3 120 — 149	Level 4 150 — 189	Level 5 190 — 229	Level 6 230 — 300	Level 3 120 — 149
23.	«Ибрат фарзандлари» лойиҳасининг махсус сертификати	A1	A2	B1	B2			B1

Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш тартиби тўғрисидаги низомга
2-ИЛОВА

Ёшларнинг ўқув марказларида хорижий тилларни ўқиш харажатлари бир қисми учун субсидия ажратиш

СХЕМАСИ

Босқичлар	Субъектлар	Тадбирлар	Бажариш муддати
Босқичлар	Субъектлар	Тадбирлар	Бажариш муддати

1-босқич	Ўқув маркази	Ариза берувчиларнинг хорижий тилни ўқиш харажати учун субсидия ажратиладиган ўқув марказлари рўйхатига киритишни сўраб электрон платформа орқали ариза юборади.	Ўз хоҳишига кўра

2-босқич	Ёшлар ишлари агентлиги	Ариза қолдирган ўқув марказлари томонидан тақдим этилган ҳужжатларни ўрганиб, белгиланган талабларга мувофиқ деб топилган ўқув марказларига ўқувчиларининг ўқув машғулотларида қатнашганини кунлик назорат қилиш имконини берувчи электрон тизимини Ёшлар ишлари агентлигининг электрон платформасига интеграция қилинганидан сўнг ўқиш харажати учун субсидия ажратилиши ҳақида хабарнома юборади.	10 кун ичида

3-босқич	Ёшлар ишлари агентлиги	Ўқув маркази ўқувчиларининг ўқув машғулотларида қатнашганини кунлик назорат қилиш имконини берувчи электрон тизимини белгиланган тартибда Ёшлар ишлари агентлигининг электрон платформасига интеграция қилиб, оммавий оферта шартлари маъқуллангандан сўнг ушбу ўқув марказини ариза берувчиларни хорижий тилга ўқитиш харажати учун субсидия ажратиладиган ўқув марказлари рўйхатига киритади.	Доимий

4-босқич	Ариза берувчи	Хорижий тилни билиш даражасини тасдиқловчи сертификатни илова қилган ҳолда ўқув марказида хорижий тилни ўқиш харажатлари учун субсидия ажратишни сўраб электрон платформа орқали ариза юборади.	Сертификат берилган санадан бошлаб бир йил мобайнида

5-босқич	Ёшлар ишлари агентлиги	Ариза берувчи томонидан юборилган сертификатни верификациядан ўтказади. Сертификатнинг ҳақиқийлиги тасдиқлангандан сўнг ариза берувчига ўқув маркази билан икки томонлама шартнома имзолаш имконини яратиб беради.	7 иш куни ичида

6-босқич	Ариза берувчи / ўқув маркази	1. Ариза берувчи электрон платформа орқали шартнома шаклини (хорижий тил йўналиши, ўқув маркази, ўқитувчи, дарс кунларини танлаш орқали) тўлдиради ва ягона идентификация тизими (One ID) орқали шартномани бир томонлама имзолаб, ўқув марказига юборади.	1. Доимий.
6-босқич	Ариза берувчи / ўқув маркази	2. Ўқув маркази ариза берувчи томонидан бир томонлама имзолаб юборилган шартномани кўриб чиқиб, шартномани имзолайди ёки асослантирилган ҳолда рад этади.	2. 7 кун ичида.

7-босқич	Ариза берувчи	Ўқув маркази билан тузилган шартнома шартларига мувофиқ дастлабки икки ойлик ўқиш харажатини ўз ҳисобидан электрон платформа орқали ўқув марказига тўлайди.	Шартномада белгиланган муддатда

8-босқич	Ёшлар ишлари агентлиги	Ўз маблағлари ҳисобидан ўқув марказида икки ой давомида таҳсил олган ариза берувчиларнинг учинчи ойдан бошлаб тўловларини ўқув маркази томонидан электрон платформа орқали юборилган ҳисоб-фактурага асосан ариза берувчининг давоматига мутаносиб равишда Ёшларга оид давлат сиёсатини қўллаб-қувватлаш жамғармаси маблағлари ҳисобидан ўқув марказининг тегишли банк ҳисобварағига шартномада белгиланган муддатларда ўтказиб боради. Ушбу тўловларнинг амалга оширилганлиги ҳақида ариза берувчининг электрон платформадаги шахсий кабинетига хабарнома юборади.	Шартномада белгиланган муддатда

Вазирлар Маҳкамасининг 2025 йил 8 октябрдаги 632-сон қарорига
2-ИЛОВА

Ўқув марказлари рейтингини шакллантириш ва рейтинг асосида ўқув марказларини рағбатлантириш тартиби тўғрисида

НИЗОМ

1-боб. Умумий қоидалар

1. Ушбу Низом хорижий тилларни ўқитишга ихтисослашган нодавлат таълим ташкилотлари (кейинги ўринларда — ўқув марказлари) рейтингини шакллантириш, юритиш ва ушбу рейтингда юқори ўринларни эгаллаган ўқув марказларини рағбатлантириш тартибини белгилайди.

2. Ушбу Низомда қуйидаги асосий тушунчалардан фойдаланилади:

«2+6» дастури — ўқиш харажати қопланиши учун хорижий тилларни билиш бўйича лозим бўлган баллнинг (даражанинг) минимал кўрсаткичли сертификатига эга бўлган ёш фуқаро ўқув маркази томонидан унга хорижий тилни ўқитиш хизматини кўрсатгани учун дастлабки икки ой учун ўқиш харажатини ўз ҳисобидан тўлаганда, кейинги олти ойгача ўқиш харажати учун Ўзбекистон Республикаси Ёшлар ишлари агентлиги (кейинги ўринларда — Ёшлар ишлари агентлиги)нинг Ёшларга оид давлат сиёсатини қўллаб-қувватлаш жамғармасига ажратилган маблағлар доирасида субсидия ажратилишини назарда тутувчи дастур;

барқарорлик рейтинги — Ўзбекистон Республикаси Солиқ қўмитасининг «Тадбиркорларнинг барқарорлик рейтинги» электрон платформаси орқали аниқланадиган ўқув марказларининг барқарорлик рейтинги;

компенсация — Вазирлар Маҳкамасининг 2021 йил 13 апрелдаги 209-сон қарорига мувофиқ Ёшлар ишлари агентлиги томонидан халқаро имтиҳон тизимлари бўйича юқори балл (даража) тўплаган ёшларга имтиҳон топшириш харажатларини қоплаш учун тўлаб бериладиган тўлов;

олис ва чекка ҳудудлар — Вазирлар Маҳкамасининг 2025 йил 10 июлдаги 426-сон қарори билан тасдиқланган Ёшлар ишлари агентлиги ҳузуридаги Ёшлар тадбиркорлигини ривожлантириш давлат мақсадли жамғармаси маблағлари ҳисобидан бизнес лойиҳаларни молиялаштириш тартиби тўғрисидаги низомга 3-иловага мувофиқ белгиланган Қорақалпоғистон Республикаси ва вилоятлардаги олис ва чекка ҳудудлар;

электрон платформа — ариза берувчиларнинг ўқув марказларида хорижий тилни ўрганиши учун ўқув машғулотида қатнашишини қайд этиб борувчи, уларнинг хорижий тилни ўрганиш харажати учун субсидия ажратиладиган ўқув марказлари рўйхати, шунингдек, ушбу ўқув марказлари рейтинги эълон қилиб бориладиган электрон платформа ва унинг мобил иловаси;

3. Ушбу Низомга мувофиқ Ёшлар ишлари агентлиги томонидан электрон платформа орқали ўқув марказлари рейтинги (кейинги ўринларда — рейтинг) юритилади ва эълон қилиб борилади (мактабгача, умумий ўрта, ўрта махсус, касбий, олий, олий таълимдан кейинги таълим бериш фаолиятини амалга оширувчи нодавлат таълим ташкилотлари бундан мустасно).

Бунда ушбу рейтинг республика, ҳудуд, туман (шаҳар) ҳамда олис ва чекка ҳудудлардаги ўқув марказлари кесимида шакллантирилади.

2-боб. Рейтингни шакллантириш учун ўқув марказларини электрон платформа орқали рўйхатдан ўтказиш

4. Ўқув марказларининг рейтингини шакллантириш учун уларни рўйхатдан ўтказишда барқарорлик рейтинги шкаласи бўйича камида «С» кўрсаткичга эга бўлиши талаб этилади.

Ўқув марказлари электрон платформа орқали рўйхатдан ўтказиш учун Ёшлар ишлари агентлигига қуйидаги ҳужжатларни юборади:

ўқув марказида хорижий тилни ўқитиш фаолиятини амалга оширувчи ўқитувчилар ҳақидаги маълумотлар (pdf форматда).

Ушбу бандда назарда тутилган ҳужжатлар ва маълумотларни юборган ўқув марказлари электрон платформа орқали рўйхатдан ўтказилади ва ушбу Низомда белгиланган тартибда уларнинг рейтинги шакллантириб борилади.

3-боб. Ўқув марказлари рейтингини шакллантириш тартиби

5. Ўқув марказлари рейтинги қуйидаги кўрсаткичлар асосида ҳар ой якуни бўйича балларни жамлаш орқали шакллантириб борилади:

а) «2+6» дастури доирасида хорижий тилни ўқиш харажати учун Ёшлар ишлари агентлиги томонидан субсидия ажратилган ҳар бир ёш фуқаро компенсация олганда — 3 балл;

б) «2+6» дастури доирасида хорижий тилни ўқиш харажати учун Ёшлар ишлари агентлиги томонидан субсидия ажратилган ҳар бир ёш фуқаро камида «B2» даражадаги ёки унга тенглаштирилган даражадаги миллий ёхуд халқаро сертификат олганда — 3 балл;

в) ўқув марказида ўз ҳисобидан таҳсил олган ҳар бир ёш фуқаро компенсация олганда — 2 балл;

г) ўқув марказида фаолият олиб бораётган ҳар бир ўқитувчи малака тоифаси ҳамда хорижий тилни билиш бўйича камида «B2» даражадаги ёки унга тенглаштирилган даражадаги миллий ёхуд халқаро сертификатга эга бўлганда — 1 балл;

д) барқарорлик рейтинги бўйича — жами 100 баллгача.

Бунда ушбу банднинг «а», «б», «в» ва «г» кичик бандларида назарда тутилган баллар доимий равишда ўзаро қўшиб борилади, «д» кичик бандидаги ҳар бир календарь кунда шаклланган балларнинг бир ой давомидаги ўртача кўрсаткичини «а», «б», «в» ва «г» кичик бандларидаги балларга қўшиш орқали рейтинг аниқланади ҳамда ушбу бир ойлик рейтинг баллари ой якуни бўйича электрон платформа орқали жамоатчиликка эълон қилиб борилади.

Ушбу бандда назарда тутилган балл бериш учун асос бўлган ҳолатлар юзага келганда, тегишли ахборот тизимлари билан электрон платформанинг интеграцияси орқали ўқув марказининг баллари реал вақт режимида автоматик тарзда шакллантирилади.

6. Ўқув марказларининг бир йиллик рейтинги ҳар йили 1 январь ҳолатига кўра аниқланади.

Бунда ўқув марказининг йиллик рейтинги ушбу Низомнинг 5-банди «а», «б», «в» ва «г» кичик бандларида назарда тутилган балларнинг йил давомидаги ўзаро йиғиндисига «д» кичик бандидаги ҳар ойда шаклланадиган балларнинг ўртача кўрсаткичини қўшиш орқали аниқланади.

Ушбу бир йиллик рейтинг баллари электрон платформа орқали жамоатчиликка эълон қилинади ҳамда ҳар йили 1 январдан бошлаб рейтинг баллари «0» баллдан бошлаб қайта шакллантирилади.

4-боб. Эътирозларни кўриб чиқиш

7. Рейтинг балларининг шакллантирилиши бўйича ўқув марказида эътирозлар мавжуд бўлганда, электрон платформадаги ўз шахсий кабинети орқали Ёшлар ишлари агентлигига мурожаат қилади.

8. Ушбу эътирозлар Ёшлар ишлари агентлиги томонидан ўн иш куни давомида белгиланган тартибда кўриб чиқилади ва натижаси бўйича:

эътирозлар асосли деб топилганда, электрон платформадаги маълумотларга тегишли тузатишлар киритилган ҳолда ўқув марказининг баллари қайта шакллантирилади;

эътирозлар асоссиз деб топилганда, рейтинг баллари ўзгаришсиз қолдирилиб, бу ҳақида ўқув марказининг шахсий кабинетига тегишли тушунтириш юборилади.

5-боб. Рейтингда юқори натижаларни қайд этган ўқув марказларини рағбатлантириш

9. Олис ва чекка ҳудудлардаги ўқув марказлари кесимида шакллантириладиган рейтингнинг йиллик натижалари бўйича энг юқори балл олган 100 тагача ўқув марказларига келаси олти ой давомида ўз фаолиятини амалга ошириш мақсадида ижара шартномасига асосан ҳар бир ой учун базавий ҳисоблаш миқдорининг 10 бараваригача миқдорда ижара тўловлари ҳар ой якуни билан ўқув маркази томонидан тақдим этиладиган ижара тўловини тасдиқловчи ҳужжатларга мувофиқ Ёшларга оид давлат сиёсатини қўллаб-қувватлаш жамғармасига ажратилган маблағлар доирасида компенсация қилинади.

Бунда ушбу бандда назарда тутилган ижара шартномасининг ҳақиқийлиги тегишлигича Ўзбекистон Республикаси Солиқ қўмитасининг «Ижара шартномаларини ҳисобга қўйиш» электрон тизими маълумотлари асосида тасдиқланган бўлиши лозим.

6-боб. Якунловчи қоидалар

10. Ўқув марказлари ушбу Низом талаблари ижросига масъул давлат органлари ва бошқа ташкилотлар ходимларининг хатти-ҳаракатлари (ҳаракатсизлиги) юзасидан қонунчилик ҳужжатларида белгиланган тартибда шикоят қилиши мумкин.

11. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2025 йил 8 октябрдаги 632-сон қарорига
3-ИЛОВА

Вазирлар Маҳкамасининг «Халқаро имтиҳон тизимлари бўйича юқори балл (даража) тўплаган ёшларга ўқиш ва имтиҳон топшириш харажатларини тўлиқ қоплаб бериш тартибини жорий этиш тўғрисида» 2021 йил 13 апрелдаги 209-сон қарорига киритилаётган ўзгартиришлар ва қўшимча

1. Номидаги «ўқиш ва» сўзлари чиқариб ташлансин.

2. 1-бандда:

иккинчи хатбошидаги «ўқиш ва» сўзлари чиқариб ташлансин;

учинчи хатбошидаги «Ўқиш ва имтиҳон» сўзлари «Имтиҳон» сўзи билан алмаштирилсин.

3. 2-бандда:

иккинчи хатбошидаги «ўқиш ва» сўзлари чиқариб ташлансин;

тўртинчи хатбоши чиқариб ташлансин;

бешинчи хатбоши тўртинчи хатбоши деб ҳисоблансин.

4. 1-иловада:

а) номи ва 1-банддаги «ўқиш ва» сўзлари чиқариб ташлансин;

б) 2-бандда:

иккинчи ва тўртинчи хатбошилардаги «ўқиш ва» сўзлари чиқариб ташлансин;

олтинчи хатбоши чиқариб ташлансин;

еттинчи — тўққизинчи хатбошилар тегишлича олтинчи — саккизинчи хатбошилар деб ҳисоблансин;

в) 3-бандда:

биринчи хатбошидаги «ўқиш ва» сўзлари чиқариб ташлансин;

«в» кичик бандининг биринчи хатбошисидаги «ўқиш ёки» сўзлари чиқариб ташлансин;

г) 5-банднинг биринчи хатбошисидаги «Ўқиш ва имтиҳон» сўзлари «Имтиҳон» сўзи билан алмаштирилсин;

д) 6-бандда:

биринчи хатбошидаги «ва ўқиш учун» сўзлари чиқариб ташлансин;

«в» кичик банднинг иккинчи хатбошиси қуйидаги таҳрирда баён этилсин:

«ўн олти ёшга тўлмаган шахснинг ота-онаси томонидан берилса — ўн олти ёшга тўлмаган шахснинг туғилганлик тўғрисидаги гувоҳномаси маълумотлари ва жисмоний шахснинг шахсий идентификация рақами (ЖШШИР) Ёшлар ишлари агентлиги томонидан интеграциялашган маълумотлар базаси орқали текширилади;»;

«г» кичик банд чиқариб ташлансин;

е) 13-бандда:

биринчи хатбошидаги «ўқиш ва» сўзлари чиқариб ташлансин;

«б» кичик банди чиқариб ташлансин;

ж) 15-банддаги «ўқиш ва» сўзлари чиқариб ташлансин;

з) 16-банддаги «15 календарь кун» сўзлари «12 иш куни» сўзлари билан алмаштирилсин;

и) 17-банднинг «б» кичик банди чиқариб ташлансин;

к) 18-банднинг иккинчи хатбошиси қуйидаги таҳрирда баён этилсин:

«Бунда махсус сертификат ҳақиқийлиги масъул ваколатли ташкилот томонидан 30 кун муддат ўтиб тасдиқланганда, ариза берувчи мазкур Регламент талабларига мувофиқ такроран мурожаат қилгандан сўнг унга имтиҳон учун компенсация тўлаб берилади.»;

л) 1-иловада:

номидаги «Ўқиш ва имтиҳон» сўзлари «Имтиҳон» сўзи билан алмаштирилсин;

3-босқичда:

«Тадбирлар» устунидаги «ўқиш ва» сўзлари чиқариб ташлансин;

«Бажариш муддати» устунидаги «15 кунда» сўзлари «12 иш кунида» сўзлари билан алмаштирилсин;

4-босқичнинг «Тадбирлар» устунидаги «ўқиш ва» сўзлари чиқариб ташлансин;

м) 2-иловада:

«II. Ўн олти ёшга тўлмаган шахс ва унинг қонуний вакили ҳақидаги маълумотлар:» бўлими қуйидаги мазмундаги 2.1.4-банд билан тўлдирилсин:

«
2.1.4. 16 ёшга тўлмаган шахснинг шахсий идентификация рақами (ЖШШИР):	-
	»;

IV бўлим чиқариб ташлансин.

5. 2-илова қуйидаги таҳрирда баён этилсин:

«Вазирлар Маҳкамасининг 2021 йил 13 апрелдаги 209-сон қарорига
2-ИЛОВА

Имтиҳон топшириш харажати компенсация қилинадиган халқаро имтиҳон тизимлари

РЎЙХАТИ

Т/р	Халқаро имтиҳон тизимларининг номи	Билиш даражаси аниқланадиган хорижий тил	Умумий имтиҳон балли (даражаси)	Имтиҳон топшириш харажати компенсация қилиниши учун тўпланиши лозим бўлган юқори баллнинг (даражанинг) минимал кўрсаткичи	Имтиҳон топшириш харажатини компенсация қилувчи
2021 йил 1 майдан бошлаб имтиҳон топшириш харажати компенсация қилинадиган халқаро имтиҳон тизимлари
1.	International English Language Testing System (IELTS)	Инглиз тили	1 — 9	7	Ёшлар ишлари агентлиги
2.	Test of English as a Foreign Language internet Based Test (TOEFL) iBT	Инглиз тили	0 — 120	94*
3.	Graduate Management Admission Test (GMAT)	-	Verbal/Quantative (200 — 800) Integrated reasoning (1 — 8) Analytical writing (0,5 — 6)	Имтиҳон натижалари (Verbal/Quantative) бўйича нисбат кўрсаткичи (percentile) 75 ва ундан юқори бўлганда
4.	Graduate Record Examinations (GRE)	-	Verbal (0 — 170) Quantative (0 — 170) Writing (0,5 — 6)	Имтиҳон натижаларининг ҳар бири (Verbal, Quantative, Writing) бўйича нисбат кўрсаткичи (percentile) 75 ва ундан юқори бўлганда
5.	Scholastic Assessment Test (SAT)**	-	400 — 1600	1200
2022 йил 1 январдан бошлаб имтиҳон топшириш харажати компенсация қилинадиган халқаро имтиҳон тизимлари
6.	Cambridge Assessment English (CAE, CPE, BEC)	Инглиз тили	A1-С1	C1 (CAE advanced, CPE proficiency, BEC higher)	Ёшлар ишлари агентлиги
7.	Test DAF	Немис тили	TDN 3 — 5	TDN 4
8.	Goethe-Zertifikat	Немис тили	A1-С1	C1
9.	DELF/DALF	Француз тили	DELF A1-DALF C2	DALF C1
10.	Test de Connaissance du Français (TCF)	Француз тили	A1-С1	С1
11.	DELE/SIELE	Испан тили	A1-С1	C1
12.	CELI/CILS/AIL	Итальян тили	-	CELI 4, CILS Tre, DALI C1
13.	Türkçe Yeterlik Sınavı (TYS)	Турк тили	A1-С1	C1 (71 — 88)
14.	Test of Proficiency in Korean (TOPIK I-II)	Корейс тили	Level 1 — 6	Level 5 (190 — 229)
15.	Japanese-Language Proficiency Test (JLPT)	Япон тили	N5-N1	N2
16.	Chinese Proficiency Test (HSK)	Хитой тили	HSK 1 — 6	HSK 5
17.	ALPT/APT/E-TOAFL/ACTFL	Араб тили	A1-С1	C1
18.	Test of Russian as a Foreign Language (TORFL/ ТРКИ)	Рус тили	A1-С1	ТРКИ III-IV (C1)

Изоҳ.

*Ушбу имтиҳон тури бўйича ариза берувчи таълим соҳасида хизмат кўрсатувчи ваколатли халқаро ташкилотларнинг расмий рўйхатидан ўтган тест марказларига (authorized test centers) ташриф буюрмасдан, ташкилот вакилларининг бевосита назорати остида топширмасдан, масофадан (Remote, Home Edition ва бошқа турлари) имтиҳон топширганда нутқ қобилияти (speaking) бўйича имтиҳон натижаси 16 балл ва ундан юқори бўлганда компенсация тўлаб берилади.

** Ариза берувчининг ушбу сертификат бўйича қўлга киритилган натижаларини верификация қилиш учун электрон платформа (www.collegeboard.org) орқали Ёшлар ишлари агентлигига юбориш билан боғлиқ харажатлари тўлов квитанциясига мувофиқ Агентлик томонидан ариза берувчига имтиҳон топшириш харажатига қўшиб тўлаб берилади.».

(Қонунчилик маълумотлари миллий базаси, 09.10.2025 й., 09/25/632/0914-сон)