Ўзбекистон Республикаси Вазирлар Маҳкамасининг
қарори
Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш маркази фаолияти самарадорлигини ошириш чора-тадбирлари тўғрисида
Ўзбекистон Республикаси Президентининг «Маъмурий ислоҳотлар доирасида олий таълим, фан ва инновациялар соҳасида давлат бошқарувини самарали ташкил қилиш чора-тадбирлари тўғрисида» 2023 йил 3 июлдаги ПҚ-200-сон қарорида белгиланган вазифалар ижросини таъминлаш, талаба ва ўқувчиларнинг ижтимоий фаоллигини мунтазам ошириб бориш, талабалар томонидан илгари сурилаётган илғор ташаббусларни қўллаб-қувватлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Маъмурий ислоҳотлар доирасида олий таълим, фан ва инновациялар соҳасида давлат бошқарувини самарали ташкил қилиш чора-тадбирлари тўғрисида» 2023 йил 3 июлдаги ПҚ-200-сон қарорига мувофиқ Ўзбекистон Республикаси Олий ва ўрта махсус таълим вазирлиги ҳузуридаги Талаба ва ўқувчиларнинг маънавий юксалишига кўмаклашиш маркази Олий таълим, фан ва инновациялар вазирлиги ҳузурига ўтказилганлиги ҳамда Талаба ва ўқувчиларнинг ижтимоий фаоллигини ошириш маркази (кейинги ўринларда — Марказ) деб қайта номланганлиги маълумот учун қабул қилинсин.
2. Қуйидагилар Марказ фаолиятининг асосий йўналишлари этиб белгилансин:
талаба ва ўқувчиларнинг бўш вақтини мазмунли ташкил этиш ва уларнинг истеъдодини рўёбга чиқаришга қаратилган ижтимоий-маданий тадбирлар, спорт мусобақалари ҳамда интеллектуал танловлар, фестивалларни ташкил этиш, талаба ва ўқувчиларнинг ижтимоий фаоллигини қўллаб-қувватлаш, шу жумладан, ижодий лойиҳаларни амалга ошириш;
талаба ва ўқувчиларнинг ижтимоий фаоллигини ҳамда интеллектуал салоҳиятини оширишда илмий асосланган тарғиботнинг замонавий ва таъсирчан методларини ишлаб чиқиш ҳамда мунтазам янгилаб бориш;
талаба ва ўқувчиларнинг муаммоларини доимий ўрганиш бўйича ижтимоий тадқиқотларни ўтказиш ва таҳлил қилиш, руҳий-психологик ҳолатини баҳолаш, улар ўртасида содир этилаётган нохуш ҳолатларни ва муаммоларни ўрганиш, бу борада амалга оширилаётган психодиагностик, даволаш-профилактика ишларини мувофиқлаштириш;
ижтимоий тармоқларда мамлакатимиз ва дунёда юз бераётган ижтимоий-иқтисодий, маданий-маърифий воқеаларни холисона баҳолаш мақсадида тарғибот ишларини амалга ошириш, медиа лабораториялар фаолиятини йўлга қўйиш;
олий таълим муассасаларида фаолият юритаётган тьюторлар малакасини мунтазам ошириб бориш;
олий, ўрта махсус ва профессионал таълим тизимининг ёшлар масалалари ҳамда маънавий-маърифий ишлар йўналишида фаолият юритаётган барча даражадаги ходимлар иши самарадорлигини ошириш, уларни баҳолаш (KPI) ва рағбатлантириб бориш юзасидан таклифлар ишлаб чиқиш;
олий ва профессионал таълим муассасалари талаба ва ўқувчиларининг маданий мерос объектларига туристик ташрифларини ташкил этишга кўмаклашиш.
 LexUZ шарҳи
Қаранг: Ўзбекистон Республикасининг «Таълим тўғрисида»ги Қонуни.
3. Қуйидагилар:
Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш марказининг тузилмаси 1-иловага мувофиқ;
Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш маркази фаолиятини такомиллаштириш бўйича чора-тадбирлар дастури 2-иловага мувофиқ тасдиқлансин.
4. Ўзбекистон Республикаси олий таълим, фан ва инновациялар вазирига, зарур ҳолларда, Марказ тузилмасига ходимларнинг умумий белгиланган чекланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.
5. Қуйидагилар Марказ фаолиятини молиялаштириш манбалари этиб белгилансин:
Ўзбекистон Республикаси Давлат бюджети маблағлари;
хўжалик ва шартнома асосида методик фаолиятдан ҳамда пулли хизматлар кўрсатишдан тушадиган маблағлар;
халқаро молия ташкилотларининг грантлари;
жисмоний ва юридик шахсларнинг ҳомийлик хайриялари;
қонунчилик ҳужжатлари билан тақиқланмаган бошқа манбалар.
6. Белгилаб қўйилсинки, Ўзбекистон Республикаси Олий таълим, фан ва инновациялар вазирлиги Олий таълим, фан ва инновациялар вазирлигининг олий таълим муассасаларини ривожлантириш жамғармаси маблағлари ҳисобидан талаба ва ўқувчиларнинг ижтимоий фаоллигини ошириш мақсадида ўтказиладиган оммавий-маданий, спорт-соғломлаштириш, маънавий-маърифий тадбирлар, ижодий ишлар (шеърий тўплам ва бадиий китоблар) ҳамда танловларни мақсадли молиялаштиради.
7. Ўзбекистон Республикаси Олий таълим, фан ва инновациялар вазирлиги:
бир ой муддатда Марказнинг янгиланган уставини тасдиқласин ва унинг белгиланган тартибда давлат рўйхатидан ўтказилишини таъминласин;
Марказни зарур назарий билимлар ва амалий кўникмалар, юкланган вазифалар ижросини профессионал даражада таъминлаш қобилиятига эга бўлган юқори малакали кадрлар билан тўлдириш чораларини кўрсин.
8. Марказ:
талаба ва ўқувчиларнинг беш муҳим ташаббус доирасида бўш вақтини мазмунли ташкил этиш ҳамда истеъдодларини рўёбга чиқаришга қаратилган танловлар, маданий-маърифий, маънавий-тарбиявий ва спорт мусобақалари, соғломлаштириш тадбирлари, фан-таълим-маданият йўналишида ҳамкорликда талаба ва ўқувчилар фестивалларини ташкил этсин;
олий таълим муассасаларида фаолият юритаётган тьюторларнинг малакасини мунтазам ошириб бориш мақсадида шартнома асосида малака ошириш курслари фаолиятини йўлга қўйсин.
9. Тошкент шаҳар Олмазор тумани Талабалар шаҳарчасида жойлашган собиқ «Фудзияма» кафеси биноси тегишли ҳудуди билан ҳамда Талабалар шаҳарчасининг Университет кўчасидаги 70-уй манзилида жойлашган бино ва иншоотлар тегишли ҳудуди билан биргаликда Марказда оператив бошқарув ҳуқуқи асосида қолдирилсин.
10. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.
11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда олий таълим, фан ва инновациялар вазирининг биринчи ўринбосари К.Х. Каримов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 20 январь,
36-сон

Вазирлар Маҳкамасининг 2024 йил 20 январдаги 36-сон қарорига

1-ИЛОВА

Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш марказининг
ТУЗИЛМАСИ

Директор

Директорнинг иқтисодий ва ташкилий масалалар бўйича ўринбосари

1

Бухгалтерия бўлими

3

Директорнинг ижтимоий-сиёсий масалалар бўйича биринчи ўринбосари

1

Бош юрисконсульт

1

Ижодий-инновацион лойиҳалар бўлими

3

Ижтимоий тадқиқотлар ва таҳлил бўлими

3

Умумий бўлим

2

Матбуот ва медиа лаборатория бўлими

5

Тарғибот технологияларини жорий қилиш, методик қўллаб-қувватлаш ва журнал таҳририяти бўлими

4

Психолог-консультант

1

Тьюторлар билан ишлаш ва профилактика тадбирларини ташкил этиш бўлими

3

Ахборот хавфсизлиги бўйича мутахассис

1

Талабалар ижтимоий фаоллигини қўллаб-қувватлаш бўлими

3

Малака ошириш бўлими

2

Техник фойдаланиш ва хўжалик бўлими мудири

1

Изоҳ. Марказ бошқарув ходимларининг умумий чекланган сони (техник ва хизмат кўрсатувчи ходимлардан ташқари) — 35 нафар, шу жумладан, бошқарув ходимлари сони — 12 нафар.
Техник ва хизмат кўрсатувчи ходимлар сони олий таълим муассасалари учун ўрнатилган нормативлар асосида белгиланади.
Вазирлар Маҳкамасининг 2024 йил 20 январдаги 36-сон қарорига
2-ИЛОВА
Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш маркази фаолиятини такомиллаштириш бўйича
ЧОРА-ТАДБИРЛАР ДАСТУРИ

Т/р

Чора-тадбирлар

Амалга ошириш механизми

Ижро муддати

Масъул ижрочилар

I. Талаба ва ўқувчиларнинг ижтимоий фаоллиги, интеллектуал салоҳиятини қўллаб-қувватлаш мақсадида ижодий лойиҳалар танловларини ташкил этиш

1.

Талаба ва ўқувчиларнинг замонавий рақамли технологияларни ўзлаштириш даражасини аниқлаш ҳамда улар орасида ижодий рақобатни шакллантириш мақсадида «Энг яхши дастурчи» республика танловини ўтказиш.

1. Танловни ўтказиш бўйича ишчи гуруҳ таркибини шакллантириш.

2024 йил март

Олий таълим, фан ва инновациялар вазирлиги,

Ёшлар ишлари агентлиги

2. Танлов низомини ишлаб чиқиш ва тасдиқлаш.

2024 йил апрель

3. Танловни юқори савияда ўтказиш ва ОАВда кенг ёритиш.

ҳар йили белгиланган муддатда

2.

Иқтидорли талаба ва ўқувчиларнинг мақсадли фаолиятини тизимли ташкил этиш ҳамда уларни янги марралар сари йўналтириш мақсадида «Йилнинг энг фаол талабаси», «Йилнинг энг фаол ўқувчиси» ва «Ислоҳотлар билимдони» республика танловларини доимий равишда ўтказиш.

1. Танловларни ўтказиш бўйича қўшма қарор ва низомни тасдиқлаш.

2024 йил апрель

Олий таълим, фан ва инновациялар вазирлиги,

Ёшлар ишлари агентлиги,

Фанлар академияси,

Бадиий академия,

Маданият вазирлиги

2. Танловни юқори савияда ўтказиш ва ОАВда кенг ёритиш.

ҳар йили белгиланган муддатларда

3.

Талаба ва ўқувчиларнинг жамият тараққиётига муносабатини аниқлаш, уларда нотиқлик маҳорати ва илмий салоҳиятни намоён қилиш, хорижий талабалар билан Ўзбекистон талабаларининг илмий мулоқотини ташкил этиш учун «Дунёқарашлар мулоқоти: ёшларнинг жамият келажагига муносабати» мавзусида халқаро илмий-амалий конференцияни ўтказиш.

1. Конференцияни ўтказиш бўйича ташкилий қўмита таркибини тасдиқлаш ва конференция материалларини шакллантириш.

2024 йил сентябрь

Олий таълим, фан ва инновациялар вазирлиги,

Ёшлар ишлари агентлиги,

Ўзбекистон ёшлар иттифоқи,

Республика Маънавият ва маърифат маркази, манфаатдор вазирлик ва идоралар

2. Конференция дастури ва материалларини чоп этиш ҳамда тарқатиш.

2024 йил октябрь

3. Конференцияни юқори савияда ўтказиш ва ОАВда кенг ёритиш.

2024 йил ноябрь

4.

Талаба ва ўқувчиларнинг ижтимоий-сиёсий жараёнларга муносабати ва танқидий фикрлаш маҳоратини аниқлаш мақсадида Ўзбекистон Миллий телерадио-компаниясининг «Ёшлар» телеканалида «Ёшлар дебати» доимий кўрсатувини ташкил этиш.

1. Ўзбекистон Миллий телерадиокомпаниясининг «Ёшлар» телеканали билан ҳамкорлик меморандумини имзолаш.

2024 йил май

Олий таълим, фан ва инновациялар вазирлиги,

Маданият вазирлиги,

Ўзбекистон Миллий телерадиокомпанияси

2. Талаба ва ўқувчиларнинг ижтимоий-сиёсий фаоллигини ошириш.

доимий

3. Кўрсатувни юқори савияда ташкил этиш.

режа асосида

5.

Ёш тадқиқотчилар ва талаба-ўқувчиларнинг маънавий-маърифий дунёқарашини юксалтириш, уларнинг илмий изланишларини оммалаштириш, янги ва замонавий илмий лойиҳаларни кенг тарғиб қилиш ҳамда талаба-ўқувчиларнинг ижтимоий фаоллигини оширишга доир тарғиботларнинг замонавий, таъсирчан методларини доимий янгилаб бориш мақсадида «Ёшлар ва илм-фан» номли илмий-оммабоп, ўқув-методик ва маънавий-маърифий журнални ташкил этиш ва ҳар чоракда нашр қилиш.

1. Журнал таҳририяти таркибини шакллантириш.

2024 йил июнь

Олий таълим, фан ва инновациялар вазирлиги,

Олий аттестация комиссияси

2. Ёш тадқиқотчилар ва талаба-ўқувчиларнинг илмий-тадқиқот ишлари ва мақолаларни журналда кенг ёритиш.

доимий

3. Журнални нашр қилиб бориш.

ҳар чоракда

6.

Олий ва профессионал таълим муассасалари талабалари ва ўқувчиларининг эгаллаган билим ва малакаларини, ижтимоий жараёнларга муносабатини ҳамда сиёсий билим даражаларини ошириш мақсадида «Мушоира клуби»ни ташкил этиш.

1. Клубнинг низомини ишлаб чиқиш ҳамда барча олий ва профессионал таълим муассасаларида клуб фаолиятини йўлга қўйиш.

2024 йил сентябрь

Олий таълим, фан ва инновациялар вазирлиги, Ўзбекистон Ёзувчилар уюшмаси

2. Фаол клуб аъзоларини моддий ва маънавий рағбатлантириш.

ҳар чоракда

II. Беш муҳим ташаббус доирасида талабалар ва ўқувчиларнинг дарсдан бўш вақтини мазмунли ташкил этишга қаратилган маънавий-маърифий ва спорт тадбирларини ташкил этиш

7.

Олий таълим муассасалари талабаларининг ижодий фаолиятини рағбатлантириш ва бўш вақтини мазмунли ташкил этиш мақсадида талаба ёшлар ўртасида «Талабалар театр студиялари» республика кўрик-танловини доимий равишда ўтказиш.

1. Танлов низомини ишлаб чиқиш ва тасдиқлаш.

2024 йил сентябрь

Олий таълим, фан ва инновациялар вазирлиги,

Маданият вазирлиги,

Ёшлар ишлари агентлиги

2. Танловнинг саралаш босқичларини ўтказиш.

режа асосида

3. Танловнинг республика босқичини юқори савияда ўтказиш ва ОАВда кенг ёритиш.

2024 йил май-июнь

8.

Таълим муассасаларида ёшларнинг бўш вақтини мазмунли ўтказишни таъминлаш, барча олий ва профессионал таълим муассасаларида Ўзбекистон Республикаси Президентининг бешта муҳим ташаббуси доирасида «Ижодкор ёшлар» клуби, «Ёш спортчилар» клуби, «Ёш дастурчилар» клуби, «Ёш китобхонлар» клуби, «Чевар қизлар» тўгарагини ташкил этиш ва ҳар йили ушбу клуб ва тўгаракда тайёрланган ишланмаларнинг республика кўргазма-тақдимотини ташкил этиш ва уларни молиялаштириш.

1. Клублар фаолиятини йўлга қўйиш учун тавсиялар ишлаб чиқиш.

2024 йил сентябрь

Олий таълим, фан ва инновациялар вазирлиги

2. Талаба ва ўқувчиларни клубларга аъзо қилиш.

2024 йил октябрдан бошлаб

3. Клублар фаолиятини самарали йўлга қўйиш.

2024 йил ноябрь

4. Клуб ва тўгаракда тайёрланган ишланмаларнинг республика кўргазма-тақдимотини юқори савияда ўтказиш.

ҳар йили белгиланган муддатларда

9.

Талаба ва ўқувчиларнинг ўзбек ва жаҳон мумтоз ҳамда замондошлар асарларининг ҳозирги даврдаги тарбиявий аҳамиятини тушуниши ва улардан ижтимоий фаолиятида фойдаланиш мақсадида «Китоб менинг дўстим» республика кўрик-танловини ташкил этиш.

1. Танловни ўтказиш бўйича ишчи гуруҳ таркибини тасдиқлаш.

2024 йил июль

Олий таълим, фан ва инновациялар вазирлиги,

Ўзбекистон Ёзувчилар уюшмаси,

Ўзбекистон ёшлар иттифоқи, Республика Маънавият ва маърифат маркази,

Ўзбекистон Миллий телерадиокомпанияси

2. Танлов низомини ишлаб чиқиш ва тасдиқлаш.

2024 йил сентябрь

3. Танлов тўғрисида ОАВ ва ижтимоий тармоқлар орқали тарғибот-ташвиқот ишларини амалга ошириш.

2024 йил сентябрдан бошлаб доимий

4. Танловни юқори савияда ўтказиш.

ҳар йили белгиланган муддатларда

10.

Талаба ва ўқувчиларда ўзбек тилининг туркий халқлар тили сифатидаги аҳамияти, унинг тарихий шаклланиш босқичлари, эски ўзбек тилининг замонавий ўзбек тили ва имлосидан фарқи, ҳозирги давр ўзбек тилидаги янги сўзларнинг пайдо бўлиш сабабларини билиш ва уни оммалаштириш, бадиий тилда мулоқот маҳоратини шакллантириш мақсадида талаба ва ўқувчилар ўртасида «Тил билимдонлари» республика танловини доимий равишда ўтказиш.

1. Танлов низомини ишлаб чиқиш ва тасдиқлаш.

2024 йил август

Олий таълим, фан ва инновациялар вазирлиги, Ўзбекистон Миллий телерадиокомпанияси

2. Танловнинг саралаш ва республика босқичини юқори савияда ўтказиш.

2024 йил сентябрь — декабрь

3. Танловни ОАВ ва ижтимоий тармоқлар орқали кенг ёритиш.

доимий

11.

Олий таълим муассасалари талаба ёшлари ўртасида «Маърифат майдони» ва «Юртим қадриятлари» кўрик-танловлари ҳамда «Менинг Ўзбекистоним» видеоролик танловини доимий равишда ўтказиб бориш.

1. Танловлар низомларини ишлаб чиқиш ва тасдиқлаш.

2024 йил сентябрь-октябрь

Олий таълим, фан ва инновациялар вазирлиги, Ўзбекистон Ёзувчилар уюшмаси

2. Танловларнинг саралаш ва республика босқичларини юқори савияда ўтказиш.

ҳар йили белгиланган муддатларда

3. Танловларни ОАВда кенг ёритиш.

режа асосида

12.

Талаба ёшларнинг ҳуқуқий саводхонлигини оширишга қаратилган «Ҳуқуқий ёрдам» ижтимоий волонтёр-талабалар ҳаракатини ташкил этиш.

1. «Ҳуқуқий ёрдам» волонтёр-талабалар ҳаракатининг низоми ва йўриқномасини ишлаб чиқиш.

2025 йил январь

Олий таълим, фан ва инновациялар вазирлиги,

Ёшлар ишлари агентлиги,

Адлия вазирлиги

2. Ҳаракат дастурини тасдиқлаш.

2025 йил апрель-май

3. Ҳаракатнинг волонтёр-талабалар аъзолари рўйхатини шакллантириш.

2025 йил июнь

4. Ҳаракат фаолиятини мониторинг қилиб бориш.

доимий

13.

«Волонтёрлик клуби», интеллектуал клублар, «Экоклуб» фаолиятини ташкил этиш орқали талабаларнинг фаоллигини ошириш, уларда жамият ривожланишига дахлдорлик ҳиссини кучайтириш.

1. Ёш волонтёрлар рўйхатини шакллантириш.

2025 йил сентябрь

Олий таълим, фан ва инновациялар вазирлиги,

Ёшлар ишлари агентлиги,

Адлия вазирлиги,

Экология, атроф-муҳитни муҳофаза қилиш ва иқлим ўзгариши вазирлиги

2. Волонтёрлик фаолияти бўйича тарғибот-ташвиқот ишларини ташкил этиш.

режа асосида

3. Волонтёрлар иштирокида ижтимоий аҳамиятга молик тадбирлар, лойиҳалар ва акциялар ўтказиш.

2025 йилдан бошлаб белгиланган муддатларда

14.

Талаба ва ўқувчиларнинг ифодали ўқиш маҳоратини шакллантириш, маънавий онгини ривожлантириш, бадиий асарлардаги образларнинг хулқ-атворига баҳо бериш, уларнинг кечинмаларини ҳис қилиш ва салбий образларнинг иллатларини аниқлаш мақсадида «Китобхон ёшлар лигаси» онлайн китобхонлик танловини ўтказиш.

1. Танлов низомини ишлаб чиқиш ва тасдиқлаш.

2025 йил январь

Олий таълим, фан ва инновациялар вазирлиги, Ўзбекистон Миллий телерадиокомпанияси

2. Танловни юқори савияда ўтказиш.

ҳар чоракда

3. Танлов ғолибларини тантанали тақдирлаш ва ОАВда кенг ёритиш.

ҳар йили белгиланган муддатларда

15.

Талаба ва ўқувчи ёшлар онгида ватанпарварлик туйғусини шакллантириш, огоҳликка даъват сифатида «Бу азиз Ватан барчамизники» шиори остида республика фестивалини ўтказиш.

1. Фестивални ташкил этиш ва ўтказиш бўйича ишчи гуруҳ таркибини шакллантириш.

2025 йил март

Олий таълим, фан ва инновациялар вазирлиги,

Маданият вазирлиги

2. Фестиваль низомини ишлаб чиқиш ва тасдиқлаш.

2025 йил апрель

3. Фестивални ҳудудий ва республика босқичларини юқори савияда ўтказиш.

2025 йил май-июнь

4. Фестивални ОАВ орқали кенг ёритиш.

режа асосида

16.

Талабалар турар жойларида таълим муассасасининг ички имкониятларидан келиб чиққан ҳолда талабалар учун барча шароит ва имкониятларга эга бўлган замонавий касб турлари ва ахборот технологияларини ўргатадиган «Касбим — менинг фахрим» тўгарагини ташкил этиш.

1. Олий таълим муассасаларининг талабалар турар жойларида тўгараклар фаолиятини йўлга қўйиш.

2025 йил сентябрь

Олий таълим, фан ва инновациялар вазирлиги

2. Тўгаракларга талаба ва ўқувчиларни аъзо қилиш мақсадида тарғибот-ташвиқот ишларини амалга ошириш.

2025 йил октябрь

3. Тўгараклар фаолиятини мониторинг қилиб бориш.

доимий

17.

Талаба ва ўқувчиларнинг тадбиркорлик соҳасига оид билим ва кўникмаларини ошириш, уларни касбга йўналтириш бўйича тадбиркор ва ҳунармандлар иштирокида ўқув-тренинглар ташкил этиш.

1. Ҳамкор ташкилотлар билан ўқув-тренинглар режасини ишлаб чиқиш.

2025 йил май

Олий таълим, фан ва инновациялар вазирлиги, Камбағалликни қисқартириш ва бандлик вазирлиги

2. Ўқув-тренингларда иштирок этадиган тадбиркор ва ҳунармандлар рўйхатини шакллантириш.

2025 йил июнь-июль

3. Ўқув-тренингларни юқори савияда ташкил этиш ва ОАВда кенг ёритиш.

2025 йил август-сентябрь

18.

Талаба ва ўқувчиларда ўз юртининг қадимий тарихи, моддий ва маънавий бойликларини, Ўзбекистоннинг шаҳар ва қишлоқларидаги бунёдкорлик ишларини кўриш ва улар қалбида миллий ғурур туйғусини шакллантириш мақсадида «Ватан бўйлаб саёҳат қиламиз» шиори остида талабаларнинг Ўзбекистон бўйлаб саёҳатини ташкил этиш ва саёҳат натижалари бўйича «Менинг юртим» мавзусида эсселар танловини ўтказиш.

1. Талаба ва ўқувчиларнинг туризм масканларига ижодий ташрифи бўйича режа-жадвал ишлаб чиқиш.

2025 йил январь

Олий таълим, фан ва инновациялар вазирлиги,

Ёшлар ишлари агентлиги,

Туризм қўмитаси

2. Танлов низомини ишлаб чиқиш ва тасдиқлаш.

2025 йил февраль

3. Талабаларнинг туризм масканларига ижодий ташрифини ташкил этиш.

режа-жадвал асосида

4. Танловни юқори савияда ўтказиш ва ОАВда кенг ёритиш.

доимий

19.

Талаба ва ўқувчиларга оиланинг муҳим қадрият сифатидаги аҳамияти, эрта никоҳнинг оқибатларини тушунтириш, қизлар ва йигитларнинг оилавий муаммоларини бартараф этиш бўйича психологлар ва тегишли соҳалар бўйича шифокорларнинг «Маслаҳат соатлари»ни ташкил этиш.

1. «Сиз мустақил ҳаётга тайёрмисиз?» мавзусида соҳа мутахассислари билан учрашув-мулоқотлар ташкил этиш.

2025 йил сентябрь

Олий таълим, фан ва инновациялар вазирлиги,

Оила ва хотин-қизлар қўмитаси,

Соғлиқни сақлаш вазирлиги

2. Ёшлар ўртасида «Уч авлод учрашуви» мавзусида ҳаётий тажрибага эга ва намунали оилалар вакиллари иштирокида давра-суҳбатлари ташкил этиш.

режа асосида

3. Ёшлар ўртасида тиббиёт соҳаси вакиллари иштирокида эрта ва қариндошлар ўртасидаги никоҳларнинг ижтимоий-салбий оқибатлари тўғрисида профилактика семинарларини ташкил этиш ва ижтимоий роликлар намойиш қилиш.

2025 йил октябрдан бошлаб доимий

20.

«Соғлом турмуш тарзи — тўғри яшаш рамзи» мавзусида тарғибот тадбирларини ташкил этиш.

1. Тиббиёт ва спорт соҳаси мутахассислари иштирокида соғлом турмуш тарзининг аҳамиятини кенг тарғиб қилиш мақсадида туркум учрашувлар ташкил этиш.

2024 йил сентябрдан бошлаб доимий

Соғлиқни сақлаш вазирлиги,

Олий таълим, фан ва инновациялар вазирлиги,

Ёшлар ишлари агентлиги

2. Талабалар турар жойларида яшовчи талабалар учун эрталабки бадантарбия машқларини ўтказиш.

доимий

3. Мавзуга доир ижтимоий ролик тайёрлаш ва олий таълим муассасаларига етказиш.

режа асосида

21.

Талаба ёшларнинг бўш вақтини мазмунли ташкил этиш ҳамда спортга бўлган қизиқишларини янада ошириш мақсадида Кураш спорт тури бўйича «Вазир кубоги» мусобақасини ўтказиш.

1. Мусобақа Ҳакамлар ҳайъати таркибини шакллантириш.

2025 йил февраль

Олий таълим, фан ва инновациялар вазирлиги,

Ёшлар ишлари агентлиги,

Талабалар спорти ассоциацияси

2. Мусобақа низомини ишлаб чиқиш ва тасдиқлаш.

2025 йил март

3. Мусобақани юқори савияда ўтказиш ҳамда ғолибларни муносиб рағбатлантириш.

2025 йил апрель-май

4. Мусобақани ОАВда кенг ёритиш.

доимий

III. Ижтимоий тадқиқотлар, психодиагностик, профилактик даволаш ишлари

22.

Талаба ва ўқувчиларнинг ижтимоий-психологик ҳолатини янада яхшилаш мақсадида ҳар бир олий таълим муассасасида мутахассислардан иборат ижтимоий ва педагогик-психологик хизмат гуруҳини ташкил этиш.

1. Ҳар бир олий таълим муассасасида мутахассислардан иборат ижтимоий ва педагогик-психологик хизмат гуруҳини ташкил этиш.

2025 йил февраль

Олий таълим, фан ва инновациялар вазирлиги,

«Ижтимоий фикр» маркази

2. Талаба ва ўқувчиларнинг ижтимоий-психологик ҳолати юзасидан ижтимоий сўровномалар (тадқиқотлар) ўтказиш.

2025 йил март ойидан бошлаб режа асосида

3. Ижтимоий ва педагогик-психологик хизмат гуруҳи фаолиятини мониторинг қилиб бориш.

доимий

23.

Талаба-ўқувчилар ўртасида «Биз қоррупцияга қаршимиз!», «Гиёҳвандлик аср вабоси», «Одам савдоси давр муаммоси», «ОИТС ҳақида билиш муҳим», «Чекиш ва зарарли одатлар оқибати» мавзуларида онлайн сўровномалар ўтказиш.

1. Сўровнома саволларини шакллантириш.

2025 йил февраль

Олий таълим, фан ва инновациялар вазирлиги,

Ёшлар ишлари агентлиги,

Соғлиқни сақлаш вазирлиги,

Ички ишлар вазирлиги

2. Махсус бот ва платформалар орқали сўровномаларни ташкил этиш.

2025 йил март ойидан бошлаб режа асосида

3. Сўровнома натижаларини таҳлил қилиш ва тавсиялар ишлаб чиқиш.

белгиланган муддатларда

24.

«Жаҳолатга қарши маърифат», «Экстремизм ва терроризм нима?», «Жиноят бу...» каби мавзуларда қисқа метражли видеороликлар тайёрлаш ҳамда намойиш этиш.

1. Видеороликлар сценарийсини ишлаб чиқиш.

2025 йил март

Олий таълим, фан ва инновациялар вазирлиги,

Ички ишлар вазирлиги

2. Видеороликлар тайёрлаш ҳамда ОАВ ва ижтимоий тармоқларда намойиш этиш.

режа асосида

25.

Ҳар бир талаба билан унинг дунёқараши, мақсади, қизиқишлари, руҳияти ҳақида «Ўзингизни таърифланг», «Аслида қандай инсонсиз?» йўналишида сўровнома ўтказиш.

1. Талаба дунёқараши, мақсади, қизиқишлари, руҳиятини ўрганишга қаратилган сўровномалар тузиш.

2025 йил апрель

Олий таълим, фан ва инновациялар вазирлиги,

«Ижтимоий фикр» маркази,

Республика Маънавият ва маърифат маркази

2. Олий таълим муассасаларида талабалар ўртасида сўровномалар ўтказиш ва натижаларини таҳлил қилиш.

2025 йил май

3. Сўровнома натижалари таҳлили асосида тегишли чора-тадбирлар белгилаш ва уларнинг амалга оширилишини таъминлаш.

белгиланган муддатларда

26.

Олий, профессионал ва ўрта махсус таълим муассасаларида фаолият юритаётган маънавий-маърифий соҳа вакилларини ўқув, методик қўлланмалар, тавсиялар ва тақдимот материаллари билан таъминлаш.

1. Ўқув-методик қўлланмалар, тавсиялар ва тақдимотлар тайёрлаш бўйича Ишчи гуруҳ таркибини шакллантириш.

2025 йил октябрь

Олий таълим, фан ва инновациялар вазирлиги,

Ёшлар ишлари агентлиги,

Республика Маънавият ва маърифат маркази

2. Олий, профессионал ва ўрта махсус таълим муассасалари учун керакли материалларни аниқлаш мақсадида сўровномалар ўтказиш.

2025 йил ноябрь

3. Сўровнома якунлари бўйича мавзулар кетма-кетлигини аниқлаш ҳамда ўқув-методик материалларни тайёрлаш ва нашр этиш ҳамда таълим муассасаларига етказиш.

2025 йил декабрь

Вазирлар Маҳкамасининг 2024 йил 20 январдаги 36-сон қарорига
3-ИЛОВА
Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари
РЎЙХАТИ
1. Вазирлар Маҳкамасининг «Таълим тизимида маънавий-маърифий ишлар самарадорлигини ошириш чора-тадбирлари тўғрисида» 2018 йил 17 сентябрдаги 736-сон қарори.
2. Вазирлар Маҳкамасининг «Ўзбекистон Республикаси Дин ишлари бўйича қўмитаси қайта ташкил этилганлиги муносабати билан Ўзбекистон Республикаси Ҳукуматининг айрим қарорларига ўзгартиришлар киритиш тўғрисида» 2023 йил 8 майдаги 193-сон қарорига илованинг 14-банди.
(Қонунчилик маълумотлари миллий базаси, 22.01.2024 й., 09/24/36/0055-сон)