Ҳужжат кучини йўқотган " " 13.12.2019
Ўзбекистон Республикаси Президентининг
Қарори
Тадбиркорлик субъектлари ва кенг аҳоли қатламига микрокредитлар ажратиш тизимини янада соддалаштириш чора-тадбирлари тўғрисида
 LexUZ шарҳи
Мазкур қарор Ўзбекистон Республикаси Президентининг 2019 йил 12 декабрдаги ПФ-5893-сонли «Ўзбекистон Республикаси Президенти ва Ҳукуматининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида»ги Фармонига асосан ўз кучини йўқотган.
Тадбиркорлик субъектлари ва барча аҳоли қатламининг имтиёзли микрокредитлардан кенг фойдаланишини таъминлаш, шунингдек, якка тартибдаги меҳнат фаолиятини рағбатлантириш орқали аҳоли бандлигини янада ошириш мақсадида:
1. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Ўзбекистон Республикаси Иқтисодиёт вазирлиги, Молия вазирлиги, шунингдек, тижорат банкларининг юридик шахсни ташкил этмасдан янги рўйхатга олинган якка тартибдаги тадбиркорлар ва оилавий тадбиркорлик субъектларига микрокредит ажратиш бўйича қуйидагилар кўзда тутилган соддалаштирилган механизмни жорий этиш тўғрисидаги таклифи маъқуллансин:
янги рўйхатдан ўтган юридик шахс ташкил этмаган якка тартибдаги тадбиркорлар ва оилавий тадбиркорлик субъектларига фаолиятини амалга ошириш учун олинган товарларни гаров сифатида ҳисобга олган ҳолда энг кам иш ҳақининг 20 баробаригача миқдорда микрокредитлар ажратиш;
янги давлат рўйхатидан ўтган юридик шахс ташкил этмаган якка тартибдаги тадбиркорлар ва оилавий тадбиркорларга тадбиркорлик фаолиятини амалга ошириш учун энг кам иш ҳақининг 60 баробаригача миқдорда микрокредитлар кредитлашга оид қонун ҳужжатларида назарда тутилган таъминот турлари билан бир қаторда фуқароларнинг ўзини ўзи бошқариш органларининг «Фуқароларнинг ўзини ўзи бошқариш органлари тўғрисида»ги Ўзбекистон Республикаси Қонунининг 11-моддасида кўрсатилган ваколатлар доирасида кафиллиги асосида ажратишни кенгайтириш.
2. Белгилаб қўйилсинки, 2021 йил 1 январга қадар мазкур қарорнинг 1-иловасида қайд этилган фаолият турлари билан шуғулланадиган янги рўйхатга олинган юридик шахс ташкил этмаган ҳолда фаолият юритаётган якка тартибдаги тадбиркорлар ва оилавий тадбиркорлик субъектлари ушбу қарорнинг 1-бандида кўзда тутилган қоидаларга биноан микрокредитларни расмийлаштиришда 6 ой муддатга қатъий белгиланган солиқ тўловларидан озод этилади.
Қарорнинг мазкур бандида назарда тутилган имтиёзлардан фойдаланадиган қатъий белгиланган солиқ тўловчилар улар давлат рўйхатига олинган кундан эътиборан ўн икки ой ичида тугатилса ёки уч ёхуд ундан кўп ой муддатга фаолиятини тўхтатса, фаолият кўрсатган даври учун қатъий белгиланган солиқларни тўлайди.
3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари манфаатдор вазирлик, идора ва хўжалик бирлашмалари билан биргаликда:
тижорат банклари кредити ҳисобидан сотиб олинадиган қорамол, қўй-эчки, қуён, парранда, балиқ, асалари уяси, мевали дарахт ва ток кўчатлари, уруғ, минерал ўғит, ўсимликларни кимёвий ҳимоя қилиш воситалари, маиший техника, ускуналар, қурилиш материаллари ва бошқа товарларни ҳеч қандай чекловларсиз нақд пулсиз ҳисоб-китоб йўли билан етказиб беришни ташкил этишга кўмаклашсин;
бир ой муддатда ҳудуддаги жорий ҳолатни танқидий таҳлил қилиш асосида тегишли қишлоқ хўжалиги товарлари, маиший техника, ускуналар, қурилиш материаллари ва бошқа турдаги маҳсулотлар етказиб беришга ихтисослаштирилган хўжалик субъектларини ташкил этсин.
4. Белгилансинки, тижорат банклари Имтиёзли кредит бериш махсус жамғармаси маблағлари ҳисобидан мазкур қарорнинг 2-иловасида қайд этилган узоқ ва бориш қийин бўлган, шунингдек, меҳнат ресурслари ортиқча бўлган ҳудудларда янги рўйхатга олинган юридик шахс ташкил этмасдан фаолият юритаётган якка тартибдаги тадбиркорлар ҳамда оилавий тадбиркорлик субъектларига энг кам иш ҳақининг 100 баробаригача миқдорда кредитлар ажратади.
5. Ўзбекистон Республикаси Марказий банкига:
бир ой муддатда ушбу қарорнинг 1-банди талабларидан келиб чиққан ҳолда, янги рўйхатга олинган юридик шахс ташкил этмасдан фаолият юритаётган якка тартибдаги тадбиркорлар ва оилавий тадбиркорлик субъектларига микрокредитлар ажратишнинг соддалаштирилган тартибини тасдиқлаш;
Ўзбекистон Миллий ахборот агентлиги, Ўзбекистон Миллий телерадиокомпанияси, Матбуот ва ахборот агентлиги билан ҳамкорликда босма ва электрон оммавий ахборот воситалари, жумладан, Интернет тармоғидан кенг фойдаланган ҳолда, аҳоли ўртасида мазкур қарорнинг мақсад ва вазифаларини тизимли асосда ҳар томонлама мунтазам ёритиш;
Ўзбекистон Республикаси Иқтисодиёт вазирлиги, Молия вазирлиги, Меҳнат вазирлиги ва Адлия вазирлиги билан биргаликда бир ой муддатда Ўзбекистон Республикаси Вазирлар Маҳкамасига қонунчиликка мазкур қарордан келиб чиқадиган ўзгартиш ва қўшимчалар киритиш ҳақида таклифлар киритиш тавсия этилсин.
6. Ушбу қарор ижросини назорат қилиш Ўзбекистон Республикаси Бош вазири ўринбосари Р. Азимов ва Ўзбекистон Республикаси Марказий банки раиси Ф. Муллажонов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2017 йил 17 март,
ПҚ-2844-сон
Ўзбекистон Республикаси Президентининг 2017 йил 17 мартдаги ПҚ-2844-сон қарорига
1-ИЛОВА
Қатъий белгиланган солиқ бўйича имтиёзлар жорий этиладиган фаолият турлари
РЎЙХАТИ

Т/р

Фаолият тури номи

1.

Сартарошлик хизматлари, маникюр, педикюр, косметолог хизматлари ва бошқа шунга ўхшаш хизматлар.

2.

Тикув, мўйна, чарм ва трикотаж буюмларни, бош кийимлари, тўқимачилик ва галантерея буюмларини таъмирлаш ва тикиш, шу жумладан дераза ва эшик пардаларини тикиш, трикотаж буюмларини тўқиш, каштачилик

3.

Ҳайвонлар терилари, мўйна, тўқимачилик, чарм буюмлар ва бошқа буюмларни ошлаш ва бўяш

4.

Якка тартибдаги буюртмалар бўйича пойабзал тайёрлаш ва тикиш, пойабзал таъмирлаш, бўяш ва тозалаш.

5.

Атторлик буюмларини тайёрлаш ва таъмирлаш.

6.

Бижутерия ва жевакларни тайёрлаш ва таъмирлаш.

7.

Калитлар ясаш.

8.

Инвентарни (хўжалик, спорт, балиқчилик ва ҳоказо) таъмирлаш ва тайёрлаш.

9.

Кесувчи буюмлар ва асбобларни чархлаш.

10.

Тайёр мебелни йиғиш, таъмирлаш ва драпировка қилиш.

11.

Оптика, соатларни таъмирлаш, ўймакорлик ишлари

12.

Радиоэлектрон аппаратлар, маиший машиналар, маиший буюмлар, офис машиналари ва ҳисоблаш техникасини таъмирлаш, ўрнатиш ва уларга техник хизмат кўрсатиш.

13.

Санитария-техника хизматлари ва пайвандлаш ишлари.

14.

Шиша ва ойналарни кесиш, шишага бадиий ишлов бериш.

15.

Миллий ширинликлар, пишлоқ ва қурт маҳсулотлари, нонбулка ва қандолат маҳсулотлари, попкорн, фрезерда музқаймоқ, салатлар ва тузламалар тайёрлаш ва сотиш, шунингдек, уй шароитида доналаб сотиладиган таомларнинг айрим турларини тайёрлаш ва ўтириб истеъмол қилиш жойлари ташкил этмасдан ёки маҳаллий давлат ҳокимияти органларининг қарори билан ажратилган махсус жойларда сотиш.

16.

Дизайн бўйича хизматлар (график, интерьер, мебель ва ҳоказолар), шунингдек, чизмачилик-графика ишлари, шунингдек, рассомлик санъати.

17.

Аквариум балиқлари, декоратив қушлар ва бошқа ҳайвонларни кўпайтириш ва сотиш.

18.

Пахта (илгари истеъмолда бўлган) ва жун тозалаш ҳамда титиш хизматлари.

 LexUZ шарҳи
1-илова норасмий таржима.
Ўзбекистон Республикаси Президентининг 2017 йил 17 мартдаги ПҚ-2844-сон қарорига
2-ИЛОВА
Тижорат банклари Имтиёзли кредит бериш жамғармаси маблағлари ҳисобидан янги рўйхатга олинган юридик шахс ташкил этмасдан фаолият юритаётган якка тартибдаги тадбиркорлар ҳамда оилавий тадбиркорлик субъектларига кредитлар ажратадиган, олис ва бориш қийин бўлган, шунингдек, меҳнат ресурслари ортиқча ҳудудлар
РЎЙХАТИ

Т/р

Ҳудудларнинг номланиши

Республика бўйича жами 47 та туман, жумладан:

Қорақалпоғистон Республикаси

1.

Тахтакўпир тумани

2.

Қонликўл тумани

3.

Мўйноқ тумани

4.

Чимбой тумани

5.

Қораўзак тумани

6.

Шуманай тумани

Андижон вилояти

1.

Пахтаобод тумани

2.

Бўз тумани

3.

Улуғнор тумани

Бухоро вилояти

1.

Шофиркон тумани

2.

Қоракўл тумани

3.

Олот тумани

Жиззах вилояти

1.

Бахмал тумани

2.

Зомин тумани

3.

Фориш тумани

4.

Янгиобод тумани

Қашқадарё вилояти

1.

Деҳқонобод тумани

2.

Чироқчи тумани

3.

Миришкор тумани

Навоий вилояти

1.

Хатирчи тумани

2.

Нурота тумани

3.

Конимех тумани

4.

Томди тумани

5.

Учқудуқ тумани

Наманган вилояти

1.

Мингбулоқ тумани

2.

Чортоқ тумани

Самарқанд вилояти

1.

Каттақўрғон тумани

2.

Қўшработ тумани

3.

Пахтачи тумани

4.

Ургут тумани

Сурхондарё вилояти

1.

Узун тумани

2.

Қизириқ тумани

3.

Олтинсой тумани

4.

Бойсун тумани

5.

Музрабод тумани

Сирдарё вилояти

1.

Сардоба тумани

2.

Гулистон тумани

3.

Боёвут тумани

4.

Ховос тумани

Тошкент вилояти

1.

Бўстонлиқ тумани

2.

Паркент тумани

Фарғона вилояти

1.

Қўштепа тумани

2.

Ёзёвон тумани

3.

Сўх тумани

Хоразм вилояти

1.

Қўшкўпир тумани

2.

Янгиариқ тумани

3.

Янгибозор тумани

 LexUZ шарҳи
2-илова норасмий таржима.
(Ўзбекистон Республикаси қонун ҳужжатлари тўплами, 2017 й., 12-сон, 187-модда)