Пул массаси устидан самарали назорат қилинишини таъминлаш, пул агрегатларини тартибга солишнинг замонавий усулларини амалиётга кенг жорий этиш, банк тизимига ишончни янада мустаҳкамлаш мақсадида Вазирлар Маҳкамаси қарор қилади:

1. Касса режаларини шакллантириш ҳамда нақд пул маблағлари эмиссияси даражасини пасайтириш прогнозлари бажарилганлиги учун раҳбарлар ва мансабдор шахсларни рағбатлантиришнинг шаклланган тизими 2003 йил 1 февралдан бошлаб бекор қилинсин.

2. Ўзбекистон Республикаси Марказий банкининг қуйидагиларни назарда тутувчи пул агрегатларини бошқаришнинг янги механизмини жорий этиш тўғрисидаги таклиф қабул қилинсин:

пул массаси устидан самарали назорат қилишни таъминлаш имконини берувчи пул агрегатлари, банк тизимининг ликвидлигининг ва пулга бўлган талабнинг факторлар бўйича таҳлили ва динамикасини моделлаштириш;

захира пуллар ва пул массаси ўзгаришининг чораклик ва йиллик мақсадли прогнозларини ишлаб чиқиш;

тижорат банкларининг ликвидлигини қисқа муддатли тартибга солишнинг бозор воситаларидан, шу жумладан фоиз ставкаларини ва мажбурий захиралар нормасини бошқаришдан, валюта депозитлари гарови, давлат қимматли қоғозлари ва бошқа биринчи классли активлар остида кредитлар бериш ва уларни жалб қилишдан кенг фойдаланиш.

Пул агрегатлари прогнозини моделлаштириш схемаси иловага мувофиқ маъқуллансин.

3. Ўзбекистон Республикаси Марказий банки:

пул агрегатлари ҳажмлари ва таркиби ўзгариши, пул бозорининг ҳолати ҳамда захира пуллар ва пул массаси ўзгаришининг мақсадли прогнозлари бажарилиши устидан доимий мониторингни амалга оширсин;

пул агрегатлари ўзгариши динамикаси ва тенденциялари тўғрисида йилнинг ҳар чорагида Вазирлар Маҳкамасига ахборот берсин.

4. Ўзбекистон Республикаси Адлия вазирлиги ва Марказий банки бошқа манфаатдор вазирликлар ва идоралар билан биргаликда бир ой муддатда идоравий норматив ҳужжатларга мазкур қарордан келиб чиқувчи ўзгартиришлар киритсин.

5. Вазирлар Маҳкамасининг «Нақд пул маблағлари эмиссиясини қисқартириш чора-тадбирлари тўғрисида» 1996 йил 2 июлдаги 230-сон қарори ва «Республика минтақаларида нақд пул маблағлари эмиссияси даражасини пасайтириш прогнозлари ва касса режалари бажарилиши учун раҳбарлар ва мансабдор шахсларнинг жавобгарлигини ошириш ва уларни рағбатлантириш тартиби тўғрисидаги Низомга ўзгартириш киритиш ҳақида» 1996 йил 12 сентябрдаги 315-сон қарори ўз кучини йўқотган деб ҳисоблансин.

6. Мазкур қарорнинг бажарилишини назорат қилиш Ўзбекистон Республикаси Марказий банкининг раиси Ф.М. Муллажонов зиммасига юклансин.