Ўзбекистон Республикаси Қишлоқ ва сув хўжалиги вазирлиги Ўзбекистон Республикаси Молия вазирлиги Ўзбекистон Республикаси Иқтисодиёт вазирлигининг
Қарори
Пахта хом ашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисидаги низомни тасдиқлаш ҳақида
[Ўзбекистон Республикаси Адлия вазирлиги томонидан 2013 йил 18 октябрда рўйхатдан ўтказилди, рўйхат рақами 2518]
LexUZ шарҳи
Мазкур қарор Ўзбекистон Республикаси адлия вазирининг 2020 йил 9 мартдаги 60-мҳ-сонли «Идоравий норматив-ҳуқуқий ҳужжатларни давлат реестридан чиқариш тўғрисида»ги буйруғига (рўйхат рақами 2518-2, 09.03.2020 й.) асосан давлат реестридан чиқарилган.
Ўзбекистон Республикасининг «Фермер хўжалиги тўғрисида»ги Қонуни (Ўзбекистон Республикаси қонун ҳужжатлари тўплами, 2004 й., 40-41-сон, 433-модда), Ўзбекистон Республикаси Президентининг 2012 йил 22 октябрдаги ПФ–4478-сон «Ўзбекистонда фермерлик фаолиятини ташкил қилишни янада такомиллаштириш ва уни ривожлантириш чора-тадбирлари тўғрисида»ги Фармонига мувофиқ, Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлиги қарор қиладилар:
1. Пахта хом ашёсини етиштиришда юқори ҳосилдорликка эришган фермер хўжаликларини имтиёзли рағбатлантириш тартиби тўғрисидаги низом иловага мувофиқ тасдиқлансин.
2. Мазкур қарор расмий эълон қилинган кундан эътиборан кучга киради.
Қишлоқ ва сув хўжалиги вазири З. РЎЗИЕВ
Тошкент ш.,
2013 йил 26 сентябрь,
179а-сон
Молия вазири Р. АЗИМОВ
Тошкент ш.,
2013 йил 26 сентябрь,
96-сон
Иқтисодиёт вазири Г. САИДОВА
Тошкент ш.,
2013 йил 26 сентябрь,
49-сон
Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2013 йил 26 сентябрдаги 179а, 96, 49-сонли қарорига ИЛОВА
Пахта хом ашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисидаги
НИЗОМ
Мазкур Низом Ўзбекистон Республикасининг «Фермер хўжалиги тўғрисида»ги Қонуни (Ўзбекистон Республикаси қонун ҳужжатлари тўплами, 2004 й., 40-41-сон, 433-модда) ва Ўзбекистон Республикаси Президентининг 2012 йил 22 октябрдаги ПФ–4478-сон «Ўзбекистонда фермерлик фаолиятини ташкил қилишни янада такомиллаштириш ва уни ривожлантириш чора-тадбирлари тўғрисида»ги Фармонига (Ўзбекистон Республикаси қонун ҳужжатлари тўплами, 2012 й., 43-сон, 493-модда) мувофиқ, пахта хом ашёсини етиштиришда юқори ҳосилдорликка эришган фермер хўжаликларини рағбатлантириш тартибини белгилайди.
I боб. Умумий қоидалар
1. Мазкур Низомда қуйидаги асосий тушунчалардан фойдаланилади:
комиссия — рағбатлантириш учун тақдим этилган фермер хўжаликларининг ҳужжатларини кўриб чиқиш ҳамда уларга хулоса бериш бўйича туман (шаҳар) ҳокимининг қарорига асосан ташкил этиладиган доимий комиссия;
хулоса — комиссия томонидан бериладиган ва фермер хўжалигининг юқори ҳосилдорликка эришганлигини тасдиқловчи ҳужжат;
сертификат — юқори ҳосилдорликка эришган фермер хўжаликларининг унда кўрсатилган имтиёзлардан фойдаланиш ҳуқуқини тасдиқловчи ва тегишли туман Фермерлари кенгаши томонидан бериладиган бир йил давомида амал қиладиган ҳужжат;
имтиёз — бир йил давомида пахта хом ашёсини етиштириш бўйича юқори ҳосилдорликка эришган фермер хўжаликларига фойдаланиш учун тақдим этиладиган бир марталик рағбатлантириш.
2. Рағбатлантириладиган фермер хўжаликларини аниқлаш ва уларга имтиёзларни тақдим этиш мазкур Низомнинг 1-иловасида келтирилган схема асосида амалга оширилади.
II боб. Рағбатлантириладиган фермер хўжаликларининг рўйхатини шакллантириш
3. Рағбатлантириладиган фермер хўжаликлари рўйхати (бундан буён матнда Рўйхат деб юритилади) ҳар йили 10 январга қадар пахта тозалаш корхоналарининг пахта хом ашёсини қабул қилиш варақалари (ПК-17-шакл) ҳамда туман (шаҳар) статистика бўлимларининг «Фермер хўжалиги фаолияти тўғрисида»ги давлат статистика ҳисоботи (1-FX shakli) маълумотлари асосида шакллантирилади.
(3-банд Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
4. Рўйхат шакллантирилгандан сўнг, пахта тозалаш корхонаси томонидан икки иш куни ичида контрактация шартномалари ҳамда имзо ва муҳр билан тасдиқланган пахта хом ашёсини қабул қилиш варақаларининг (ПК-17-шакл) нусхалари Рўйхатга илова қилинган ҳолда комиссияга тақдим этилади.
5. Рўйхатнинг ҳаққонийлиги ва белгиланган муддатда тақдим этилиши учун пахта тозалаш корхонаси ҳамда тегишли туман (шаҳар) статистика бўлими раҳбарлари масъул ҳисобланади.
III боб. Ҳужжатларни кўриб чиқиш ҳамда сертификат бериш
6. Комиссияга келишув асосида туман Фермерлари кенгаши раиси раҳбарлик қилади ҳамда комиссия таркибига, қоида тариқасида, туман қишлоқ ва сув хўжалиги, ер ресурслари ва давлат кадастри, туман (шаҳар) статистика бўлимлари, тижорат банклари ва пахта тозалаш корхоналари раҳбарлари киритилади.
7. Юқори ҳосилдорликка эришган фермер хўжаликлари тўғрисидаги ҳужжатлар (туман ер ресурслари ва давлат кадастри бўлими томонидан берилган фермер хўжалигининг пахта экин майдонлари ҳажми тўғрисидаги маълумотнома ва тегишли пахта тозалаш корхонаси томонидан берилган далолатнома) уч иш куни ичида комиссия томонидан ўрганиб чиқилади.
8. Ҳисобот йилида пахта хом ашёсини етиштиришда камида 20 гектар майдонда 40 ц/га дан ҳосилдорликка эришган фермер хўжаликлари юқори ҳосилдорликка эришган фермер хўжаликлари ҳисобланади.
9. Ўрганиш натижалари асосида комиссия томонидан юқори ҳосилдорликка эришган ҳар бир фермер хўжалиги бўйича мазкур Низомнинг 2-иловасига мувофиқ шаклда хулоса тайёрланиб, имзоланади.
10. Туман Фермерлари кенгаши томонидан уч иш куни ичида комиссия хулосасига асосан мазкур Низомнинг 3-иловасига мувофиқ шаклда сертификат расмийлаштирилади. Сертификат фермер хўжалиги бошлиғи ёки у вакил қилган шахсга сертификатни олганлиги тўғрисида имзо қўйдирган ҳолда берилади.
11. Берилган хулоса ва сертификатлар фермерлар кенгашлари томонидан алоҳида китобга қайд этиб борилади. Мазкур китоб рақамланган, ип ўтказиб тикилган ва муҳрланган ҳолда туман Фермерлари кенгашида сақланади.
12. Сертификат мазкур Низомнинг 13-бандида назарда тутилган ҳар бир имтиёздан бир мартадан фойдаланиш ҳуқуқини беради.
13. Юқори ҳосилдорликка эришган фермер хўжаликлари бир йил давомида қуйидаги имтиёзлардан фойдаланиши мумкин:
а) фермер хўжалигининг пахта экиладиган жами ер майдонининг камида 5 фоизига қонун ҳужжатлари билан тақиқланмаган бошқа турдаги қишлоқ хўжалиги экинларини экиш. Мазкур имтиёзнинг тақдим этилиши учун тегишли туман (шаҳар) ҳокимлиги, қишлоқ ва сув хўжалиги ҳамда ер ресурслари ва давлат кадастри бўлимлари масъул ҳисобланади;
б) қонун ҳужжатлари билан тақиқланмаган бошқа турдаги қишлоқ хўжалиги экинларини экиш учун ажратилган ер майдонларида агротехник тадбирларни амалга ошириш учун таъминотчи ташкилотлар билан тўғридан-тўғри шартнома тузиш орқали мазкур ер майдонининг ҳар бир гектарига экилган экин тури учун амалдаги технологик карталарда тавсия этилган меъёрлар бўйича дизель ёқилғиси ва минерал ўғитларни Ўзбекистон Республикаси Молия вазирлиги томонидан декларация қилинган нархларда (таъминотчи устамаси билан) олдиндан 100 фоиз тўловни амалга оширган ҳолда тегишли шохобчалар орқали харид қилиш. Мазкур имтиёзнинг тақдим этилиши учун «Ўзнефтмаҳсулот» АК тизимидаги нефть унитар корхоналари ҳамда «Ўзкимёсаноат» АЖ тизимидаги «Қишлоқхўжаликкимё» ҳудудий акциядорлик жамиятларининг туман ва туманлараро филиаллари масъул ҳисобланади;
(13-банднинг «б» кичик банди Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
в) туман (шаҳар) ҳокимлиги захирасидаги ер майдонлари бўйича ўтказиладиган танловларда фермер хўжалигига 10 баллгача тақдим этиш. Бунда фермер хўжалиги томонидан ҳисобот даврида камида 20 гектар бўлган майдонда юқори ҳосилдорликка эришилганда 2 балл, юқори ҳосилдорликка эришилган майдон ҳар 10 гектарга кўпайганда қўшимча 1 баллдан, 100 гектар ва ундан ортиқ майдонда юқори ҳосилдорликка эришилганда 10 балл тақдим этилади. Мазкур имтиёзнинг тақдим этилиши учун ер участкаларини бериш (реализация қилиш) масалаларини кўриб чиқувчи доимий туман (шаҳар) комиссияси масъул ҳисобланади;
г) қишлоқ хўжалиги техникаларини харид қилиш учун тижорат банклари томонидан имтиёзли кредитлар бериш;
д) фермер хўжалигига Ўзбекистон Республикасида ишлаб чиқарилган енгил автотранспорт воситаларидан («GM Oʼzbekiston» АЖ маҳсулоти) хоҳлаган битта моделини фермер хўжалигининг асосий талаб қилиб олингунча депозит ҳисобварағидан пул маблағларини ўтказиш йўли билан навбатсиз шартномавий буюртма бериш орқали харид қилиш. Бунда фермер хўжаликлари томонидан тегишли сертификатга асосан «Ўзавтосаноат» АК тизимидаги корхоналарга мурожаат этилгандан кейин бир ой муддатда шартномалар тузишни якунлаш ҳамда «Ўзпахтасаноат» АЖ тизимидаги корхоналар томонидан фермер хўжаликларининг пахта якуний ҳисоб-китоб маблағларидан тўлиқ тўлаб берилади. Мазкур имтиёзнинг тақдим этилиши учун «Ўзпахтасаноат» АЖ ва «Ўзавтосаноат» АК тизимидаги дилер корхоналар автотранспорт воситасини шартномавий муддатларда етказиб бериш учун масъул ҳисобланади;
(13-банднинг «д» кичик банди Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
е) қишлоқ жойларида қурилаётган намунавий уй-жойлардан бирини навбатсиз харид қилиш. Мазкур имтиёзнинг тақдим этилиши учун туман (шаҳар) ҳокимлиги ва «Қишлоқ қурилиш банк» АТБ масъул ҳисобланади;
(13-банднинг «е» кичик банди Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
ж) суперэлита, элита ва кейинги авлодларга мансуб уруғлик пахта етказиб бериш ҳуқуқига эга бўлиш учун хўжаликлар ўртасида ўтказиладиган танловда барча шартлар бўйича тенг балл тўпланган ҳолларда юқори ҳосилдорликка эришган фермер хўжаликлари имтиёзга эга бўладилар. Мазкур имтиёзнинг тақдим этилиши учун суперэлита, элита ва кейинги авлодларга мансуб уруғлик етказиб бериш ҳуқуқига эга бўлиш учун хўжаликлар ўртасида тендер ўтказувчи тегишли комиссиялар масъул ҳисобланадилар.
14. Фермер хўжалиги сертификат олган кундан бошлаб бир йил давомида имтиёзларни олиш учун масъул бўлган ташкилот ва идораларга мурожаат қилиш ҳуқуқига эга. Имтиёзларни тақдим этилиши учун масъул бўлган ташкилот ва идоралар фермер хўжаликлари уларга мурожаат этган кундан бошлаб уч ой давомида имтиёзларни тақдим этадилар. Имтиёзлар учун тўловлар фермер хўжалигининг ўз маблағлари ҳисобидан амалга оширилади.
IV боб. Имтиёзлар тақдим этилишини назорат қилиш
15. Туман Фермерлари кенгаши томонидан ҳар йили 25 январга қадар Рўйхат ҳамда берилган хулоса ва сертификатлар тўғрисида Қорақалпоғистон Республикаси ва ҳудудий Фермерлар кенгашига ҳисобот тақдим қилинади.
(15-банд Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
16. Қорақалпоғистон Республикаси ва ҳудудий Фермерлар кенгаши томонидан ҳисоботлар фермер хўжаликлари кесимида умумлаштирилиб, ҳар йили 30 январга қадар Ўзбекистон Фермерлари кенгашига тегишли ахборот тақдим қилинади.
(16-банд Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
17. Тақдим этилган ҳисоботлар Ўзбекистон Фермерлари кенгаши томонидан умумлаштирилиб, тегишли вазирлик ва идоралар билан биргаликда тасдиқлаган ҳолда Ўзбекистон Республикаси Вазирлар Маҳкамасига киритилади.
18. Ўзбекистон Фермерлари кенгаши тегишли вазирлик ва идоралар билан биргаликда юқори ҳосилдорликка эришган фермер хўжаликларини рағбатлантириш тўғрисида тизимли мониторинг юритади ва амалга оширилган ишлар юзасидан ҳар ойнинг 5-санасигача Ўзбекистон Республикаси Вазирлар Маҳкамасига ахборот киритади.
19. Имтиёзларнинг тақдим қилиниши ҳолати тегишли фермерлар кенгашлари томонидан доимий равишда ўрганиб борилади. Имтиёзларни тақдим этишда белгиланган тартибнинг бузилганлиги ҳолатлари аниқланган тақдирда, тегишли фермерлар кенгашлари томонидан Ўзбекистон Фермерлари кенгашига тезкор маълумот тақдим қилинади. Ўзбекистон Фермерлари кенгаши ҳам, ўз навбатида, имтиёзларни тақдим этишда белгиланган тартибнинг бузилганлиги ҳолатлари юзасидан Ўзбекистон Республикаси Вазирлар Маҳкамасига ахборот киритади.
20. Мазкур Низомда белгиланган имтиёзларнинг тақдим этилиши ва ижроси аҳволи адлия органлари томонидан мунтазам равишда ўрганиб борилади.
V боб. Якуний қоидалар
21. Имтиёзларнинг ўз вақтида тақдим этилиши ва уларнинг ижроси учун тегишли ташкилот ва идоралар раҳбарлари жавобгар ҳисобланади.
22. Мазкур Низом талабларининг бузилишида айбдор бўлган шахслар қонун ҳужжатларида белгиланган тартибда жавоб берадилар.
23. Мазкур Низом Ўзбекистон Республикаси Давлат статистика қўмитаси, «Ергеодезкадастр» давлат қўмитаси, Марказий банк, «Ўзнефтмаҳсулот» АК, «Ўзпахтасаноат» уюшмаси, «Ўзкимёсаноат» ДАК, «Ўзавтосаноат» АК, Ўзбекистон Фермерлари кенгаши билан келишилган.
Давлат статистика қўмитаси раиси Б. ТЎРАЕВ
2013 йил 21 сентябрь
«Ергеодезкадастр» давлат қўмитаси раиси С. АРАБОВ
2013 йил 20 сентябрь
Марказий банки раиси Ф. МУЛЛАЖОНОВ
2013 йил 20 сентябрь
«Ўзнефтмаҳсулот» АК бош директори Б. СУЛТОНОВ
2013 йил 18 сентябрь
«Ўзпахтасаноат» уюшмаси раиси Ф. ОМОНОВ
2013 йил 18 сентябрь
«Ўзкимёсаноат» ДАК раиси Х. ШЕРМАТОВ
2013 йил 19 сентябрь
«Ўзавтосаноат» АК раисининг ўринбосари Т. ЖАЛИЛОВ
2013 йил 19 сентябрь
Ўзбекистон Фермерлари кенгаши раиси С. ТУРДИЕВ
2013 йил 17 сентябрь
Пахта хом ашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисидаги низомга 1-ИЛОВА
Юқори ҳосилдорликка эришган хўжаликларни аниқлаш ва уларга имтиёзларни тақдим этиш
СХЕМАСИ
(1-илова Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг 2016 йил 26 майдаги 26, 29, 114-сонли (рўйхат рақами 2518-1, 20.06.2016 й.) қарори таҳририда — ЎР ҚҲТ, 2016 й., 25-сон, 311-модда)
Пахта хом ашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисидаги низомга 2-ИЛОВА
____________________________________________________________________ (Қорақалпоғистон Республикаси, вилоят ва туман (шаҳар) номи) фермер хўжалиги томонидан пахта хом ашёси етиштириш бўйича эришилган юқори ҳосилдорликни тасдиқлаш тўғрисида
Х У Л О С А ____-сон
20____ йил «___» ___________
______________ туман (шаҳар)
20_____ йил ҳосилидан давлатга пахта хом ашёси сотиш бўйича ____________ фермер хўжалиги билан 20___ йил _____________ куни тузилган ___-сонли контрактация шартномасида ___ гектар ер майдонида ___ тонна маҳсулот топшириш белгиланган.
Пахта тозалаш корхонаси томонидан 20___ йилда берилган ____________________________________________________________-сонли маҳсулотни қабул қилиш варақаларига (ПК-17-шакл) ва «Фермер хўжалиги фаолияти тўғрисида»ги давлат статистика ҳисоботига (1-FX shakli) асосан фермер хўжалиги томонидан 20____ йил ___ _________ куни ҳолатига __________ тонна маҳсулот топширилди ва ҳар бир гектардан ўртача ______ центнердан ҳосилдорликка эришилди.
Пахта хом ашёсини етиштиришда юқори ҳосилдорликка эришган фермер хўжалигига имтиёзларни тақдим этиш ҳақида
С Е Р Т И Ф И К А Т
20____ йил «_____» _________________
-сон
____________________ туман (шаҳар)
Ушбу ҳужжат __________туман (шаҳар) комиссиясининг 20__ йил»___» ________ даги _____-сонли хулосасига асосан ___________________ фермер хўжалигига пахта хом ашёсини етиштиришда 20__ йил ҳосилидан _________ гектар ер майдонидан ____центнер ҳосилдорликка эришганлиги учун берилди.
Мазкур сертификат орқали _________________________ фермер хўжалигига қуйидаги бир марталик имтиёзлар тақдим этилади:
а) фермер хўжалигининг пахта экиладиган жами ер майдонининг камида 5 фоизига қонун ҳужжатлари билан тақиқланмаган бошқа турдаги қишлоқ хўжалиги экинларини экиш; б) қонун ҳужжатлари билан тақиқланмаган бошқа турдаги қишлоқ хўжалиги экинларини экиш учун ажратилган ер майдонларида агротехник тадбирларни амалга ошириш учун таъминотчи ташкилотлар билан тўғридан-тўғри шартнома тузиш орқали мазкур ер майдонининг ҳар бир гектарига экилган экин тури учун амалдаги технологик карталарда тавсия этилган меъёрлар бўйича дизель ёқилғиси ва минерал ўғитларни Ўзбекистон Республикаси Молия вазирлиги томонидан декларация қилинган нархларда (таъминотчи устамаси билан) олдиндан 100 фоиз тўловни амалга оширган ҳолда тегишли шохобчалар орқали харид қилиш; в) туман (шаҳар) ҳокимлиги захирасидаги ер майдонлари бўйича ўтказиладиган танловларда фермер хўжалигига 10 баллгача тақдим этиш. Бунда фермер хўжалиги томонидан ҳисобот даврида камида 20 гектар бўлган майдонда юқори ҳосилдорликка эришилганда 2 балл, юқори ҳосилдорликка эришилган майдон ҳар 10 гектарга кўпайганда қўшимча 1 баллдан, 100 гектар ва ундан ортиқ майдонда юқори ҳосилдорликка эришилганда 10 балл тақдим этилади; г) қишлоқ хўжалиги техникаларини харид қилиш учун тижорат банклари томонидан имтиёзли кредитлар бериш; д) фермер хўжалигига Ўзбекистон Республикасида ишлаб чиқарилган енгил автотранспорт воситаларидан («GM Oʼzbekiston» АЖ маҳсулоти) хоҳлаган битта моделини фермер хўжалигининг асосий талаб қилиб олгунча депозит ҳисобварағидан пул маблағларини ўтказиш йўли билан навбатсиз харид қилиш; е) қишлоқ жойларида қурилаётган намунавий уй-жойлардан бирини навбатсиз харид қилиш; ж) суперэлита, элита ва кейинги авлодларга мансуб уруғлик пахта етказиб бериш ҳуқуқига эга бўлиш учун хўжаликлар ўртасида ўтказиладиган танловда барча шартлар бўйича тенг балл тўпланган ҳолларда юқори ҳосилдорликка эришган фермер хўжаликлари имтиёзга эга бўладилар.
Сертификат фермер хўжалигининг гувоҳномаси тақдим этилганда ҳақиқий ҳисобланади.
LexUZ шарҳи