Ўзбекистон Республикаси Президентининг «Қалмоқир конини реконструкция қилиш ва кенгайтириш» инвестиция лойиҳасини амалга ошириш чора-тадбирлари тўғрисида» 2009-йил 23-ноябрдаги ПҚ-1233-сон қарорига мувофиқ ҳамда «Олмалиқ КМК» очиқ акциядорлик жамияти томонидан ишлаб чиқарилаётган маҳсулотларга жаҳон бозорларида вужудга келаётган конюнктурани ҳисобга олган ҳолда Қалмоқир конини кенгайтириш ишларини жадаллаштириш мақсадида:

1. «Қалмоқир конини реконструкция қилиш ва кенгайтириш» инвестиция лойиҳасини амалга ошириш доирасида:

«Олмалиқ КМК» ОАЖ лойиҳанинг I босқичини (карерни реконструкция ва модернизация қилиш) 2011-йилнинг I ярим йиллигида ишларни якунлаган ҳолда муддатидан олдин амалга оширишни таъминласин;

лойиҳанинг I босқичини амалга ошириш якунларини ҳисобга олган ҳолда белгиланган тартибда лойиҳанинг умуман ва II босқичнинг (карерни кенгайтириш ва руда қазиб олишни кўпайтириш) тузатилган техник-иқтисодий асосланиши тайёрланди.

2. Умумий қиймати 43,84 млн АҚШ доллари эквиваленти бўлган «Қалмоқир конини реконструкция қилиш ва кенгайтириш» лойиҳасининг II босқичини амалга оширишни молиялаштириш манбалари этиб белгилансин:

«Олмалиқ КМК» ОАЖнинг 14,27 млн АҚШ долларига тенг бўлган ўз маблағлари, шу жумладан махсус инвестиция ҳисоб рақамлари маблағлари;

Ўзбекистон Республикаси Тикланиш ва тараққиёт жамғармасининг «Ипотека-банк» акциядорлик тижорат ипотека банки орқали қайта молиялаштириладиган 22,99 млн АҚШ доллари миқдоридаги, 7 йил муддатга, шу жумладан 3 йил имтиёзли давр билан йиллик 4,0 фоиз ставкада, шу жумладан қайта молиялаштирувчи банкнинг йиллик 1,0 фоиз миқдоридаги маржасини ҳисобга олган ҳолда бериладиган кредити маблағлари;

«Ипотека-банк» акциядорлик тижорат ипотека банкининг йиллик 6,0 фоиз ставкаси билан 7 йил муддатга, шу жумладан 2 йил имтиёзли давр билан ажратиладиган 6,57 млн АҚШ доллари миқдоридаги кредити маблағлари.

3. Қуйидагилар:

асосий техник-иқтисодий кўрсаткичлари 1* ва 1а-иловаларга* мувофиқ бўлган, II босқичда («Руда қазиб олишни 30 млн тоннагача кўпайтирган ҳолда рудникни кенгайтириш») амалга оширилаётган «Қалмоқир конини реконструкция қилиш ва кенгайтириш» инвестиция лойиҳасининг техник-иқтисодий асосланиши;

II босқичда қайта молиялаштириладиган Ўзбекистон Республикаси Тикланиш ва тараққиёт жамғармаси кредитини сўндиришнинг прогноз жадвали 2-иловага* мувофиқ тасдиқлансин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ғ.И. Ибрагимов зиммасига юклансин..