“Sug‘urta to‘g‘risida” O‘zbekiston Respublikasining Qonuniga muvofiq Vazirlar Mahkamasi qaror qiladi:

1. 1994-yilning 1-yanvaridan boshlab fuqarolarga qarashli mol-mulkning davlat majburiy sug‘urtasi joriy etilsin.

Belgilab qo‘yilsinki, fuqarolarning kuyidagi xususiy mulklari davlat majburiy sug‘urtasidan o‘tkazilishi kerak:

— imoratlar (uy-joylar, kvartiralar, shu jumladan xususiylashtirilgan uy-joylar, shuningdek, xo‘jalik binolari);

— chorva mollari (qoramol — 6 oylikdan boshlab, yilqilar va tuyalar — 1 yoshdan boshlab).

Chorbog‘lar, eskirgan imoratlar, shuningdek, qayerdaligi noma’lum bo‘lgan fuqarolarga qarashli imoratlar davlat majburiy sug‘urtasidan o‘tkazilmaydi.

2. Fuqarolar xo‘jaliklaridagi imoratlar va chorva mollarining davlat majburiy sug‘urtasi bo‘yicha sug‘urta pullari 1-ilovaga muvofiq hamda bir yil uchun sug‘urta pulining har 100 “pulidan foizlar hisobidan” olinadigan sug‘urta to‘lovlarining tabaqalashtirilgan stavkalari miqdori 2-ilovaga muvofiq tasdiqlansin.

3. Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga fuqarolar xo‘jaliklaridagi imoratlarning sug‘urta pulini belgilangan sug‘urta pulidan 50 foizgacha oshirish yoki kamaytirishga, ayrim sug‘urtalanuvchilarni ularning arizasi bo‘yicha, tegishli komissiyalarning xulosasiga binoan sug‘urta to‘lovlarini to‘lashdan batamom yoki qisman ozod qilishga ruxsat berilsin.

4. Bir yil uchun hisoblangan miqdordagi sug‘urta to‘lovlarini to‘lash muddati 1-oktabrgacha qilib belgilansin.

Sug‘urta to‘lovlarini to‘lashning belgilangan muddati tugagach, to‘lanmagan summa to‘lanmay qolgan qarz deb hisoblansin va to‘lash muddati o‘tkazib yuborilgan har bir kun uchun qarzning 0,5 foizi miqdorida jarima (penya) qo‘shib hisoblangan holda undirib olinsin.

5. Fuqarolarga qarashli imoratlar va boshqa mol-mulkning nobud bo‘lishi va shikastlanishining oldini olish chora-tadbirlarini mablag‘ bilan ta’minlash uchun sug‘urta to‘lovlaridan ajratmalar miqdori 2 foiz qilib belgilansin.

6. Fuqarolarga qarashli mol-mulkni davlat majburiy sug‘urtasidan o‘tkazish bo‘yicha sug‘urta pullarining miqdori pulning qadrsizlanish darajasiga qarab O‘zbekiston Respublikasi Vazirlar Mahkamasi tomonidan indeksatsiya qilinadi.

7. O‘zbekiston Respublikasi Moliya vazirligi ikki hafta muddat ichida:

— fuqarolarga qarashli mol-mulkni sug‘urta qilish bo‘yicha hisobga olish, to‘lovlarni hisoblash va to‘lash hamda sug‘urta to‘lovini to‘lash tartibi to‘g‘risidagi Yo‘riqnomani chiqarsin;

— sug‘urtalangan mol-mulkning nobud bo‘lishi va shikastlanishining oldini olish chora-tadbirlari ro‘yxatini tasdiqlasin.

8. 3-ilovaga muvofiq normativ hujjatlar o‘z kuchini yo‘qotgan deb hisoblansin.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B. S. Hamidov zimmasiga yuklatilsin.

1. O‘zbekiston SSR Ministrlar Sovetining SSSR Ministrlar Sovetining “Fuqarolarga qarashli mol-mulkni davlat majburiy sug‘urtasidan o‘tkazish to‘g‘risida” 1981-yil 2-sentabrdagi 961 -son qarori yuzasidan 1981-yil 19-oktabrdagi 832-son qarori.

2. O‘zbekiston SSR Ministrlar Sovetining “SSSR Ministrlar Sovetining “Fuqarolarga qarashli mol-mulkni davlat majburiy sug‘urtasidan o‘tkazish to‘g‘risida” 1981-yil 2-oktabrdagi 961-son qarori yuzasidan O‘zbekiston SSR Ministrlar Sovetining 1981-yil 19-oktabrdagi 832-son qaroriga qisman o‘zgartirishlar kiritish haqida” 1985-yil 16-oktabrdagi 519-son qarori.

3. O‘zbekiston SSR Ministrlar Sovetining “Imoratlarni baholash uchun baholash normalariga tuzatishlar koeffitsiyentlarini tasdiqlash to‘g‘risida” 1986-yil 21-noyabrdagi 564-son qarori.

4. O‘zbekiston Respublikasi Prezidenti huzuridagi Vazirlar Mahkamasining 1992-yil 4-martdagi 72-f-son farmoyishi.