Oʻzbekiston Respublikasi Vazirlar Mahkamasining 1994-yil 10-dekabrdagi 594-son qarorining 4-bandi ijrosini davom ettirish maqsadida Oʻzbekiston Respublikasi Mehnat va aholini ijtimoiy muhofaza qilish vazirligi va Oʻzbekiston Respublikasi Moliya vazirligi qaror qiladi:

1. Uchquduq, Zarafshon, Nurobod shaharlari va shahar tipidagi Zafarobod posyolkasi budjet muassasalari va tashkilotlari xodimlariga muayyan davr ishlaganlik uchun oylik toʻlovlar toʻlash tartibi toʻgʻrisidagi Nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

3. Oʻzbekiston Respublikasi Mehnat va Moliya vazirligi tomonidan 1995-yil 7-apreldagi 175/03-1, 21-2/119-son bilan tasdiqlangan “Uchquduq, Zaravshon, Nurobod shaharlari va shahar tipidagi Zafarobod posyolkasi budjet muassasalari va tashkilotlari xodimlariga muayyan davr ishlaganlik uchun maxsus toʻlov tizimini joriy etish toʻgʻrisida”gi Nizom oʻz kuchini yoʻqotgan deb topilsin.

Ushbu Nizom Oʻzbekiston Respublikasi Vazirlar Mahkamasining 1994-yil 10-dekabrdagi 594-son “Qizilqumnodirmetaloltin” konserni va Olmaliq kon-metallurgiya kombinati korxonalarini yuqori malakali mutaxassislar va ishchilar bilan taʼminlash chora-tadbirlari toʻgʻrisida”gi qarorning 4-bandiga asosan ishlab chiqilgan.

Nizom Uchquduq, Zaravshon, Nurobod shaharlari va shahar tipidagi Zafarobod posyolkasi hududida joylashgan budjet muassasalari va tashkilotlari xodimlariga muayyan davr uchun ishlaganlik uchun oylik toʻlovlar toʻlash tartibini belgilaydi.

1. Uchquduq, Zarafshon, Nurobod shaharlari va shahar tipidagi Zafarobod posyolkasi budjet tashkilotlari xodimlariga muayyan davr ishlaganlik uchun oylik toʻlovlar, xodimning yuqorida keltirilgan shaharlardagi budjet tashkilotlarida ishlagan ish stajidan kelib chiqib, quyidagi miqdorlarda belgilanadi:

2. Muayyan davr ishlaganlik uchun belgilangan miqdordagi oylik toʻlovlarning toʻlanish huquqi, xodimlar budjet muassasalari va tashkilotlarida ishlay boshlagan paytidan boshlab kelib chiqadi.

Misol uchun, xodim 2000-yilning 1-iyulidan ishga qabul qilingan va 2000-yilning 1-iyuldan unga muayyan davr uchun stavka (oklad)ning 0,25 foiz miqdorida oylik haq toʻlanadi.

3. Muayyan davr ishlaganlik uchun oylik toʻlovlarni amalga oshirish huquqini beruvchi ish stajiga quyidagilar kiritiladi:

1) Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida ishlagan davri;

2) Xodim haqiqatda ishlamagan boʻlsa ham, lekin amaldagi qonunchilikka asosan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida xodimning ish joyi (lavozimi) saqlangan davr.

3¹. Mulkchilik shaklidan qatʼi nazar boshqa tashkilotdan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlariga ishga kirganda, ish staji saqlanib qolinadi.

Bunda, mulkchilik shaklidan qatʼi nazar boshqa tashkilotdagi (Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlari, shuningdek Vazirlar Mahkamasining 2020-yil 8-yanvardagi 5-F-son farmoyishiga asosan “Navoiy kon-metallurgiya kombinati” davlat korxonasi tizimidan Maktabgacha taʼlim vazirligi tizimiga oʻtkazilgan maktabgacha taʼlim tashkilotlaridan tashqari) ish staji, budjet tashkilotlari xodimlariga muayyan davr ishlaganlik uchun oylik toʻlovlar toʻlanishi huquqini beradigan ish stajiga kiritilmaydi.

4. “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan, QR-kod bilan tasdiqlangan elektron mehnat daftari xodimning mehnat stajini tasdiqlovchi asosiy hujjat hisoblanadi.

Mehnat daftarchasida aks ettirilmagan ish staji, xodim ishlagan muassasa va tashkilot rahbari tomonidan imzolangan maʼlumotnoma bilan tasdiqlanishi mumkin.

5. Muayyan davr ishlaganlik uchun oylik toʻlovlar xodimning oylik tarif stavkasi yoki lavozim okladidan kelib chiqib hisoblanadi.

6. Muayyan davr ishlaganlik uchun oylik toʻlovlar shu oy davomida ishlagan vaqti, mehnat taʼtili va vaqtinchalik mehnatga layoqatsizlik davri uchun ham, shuningdek, amaldagi qonunchilikka asosan xodimning toʻliq yoki qisman oylik ish haqi saqlangan davrlari uchun toʻlanadi.

7. Agar xodim kalendar oyi davomida ish muayyan davr ishlaganlik uchun oylik toʻlov olish huquqi paydo boʻlsa, ushbu toʻlovni birinchi hisoblash ushbu toʻlovni olish huquqi paydo boʻlgandan keyin ishlagan vaqt uchun amalga oshiriladi.

8. Muayyan davr ishlaganlik uchun oylik toʻlovlar rayon koeffitsiyentlari va choʻl, suvsiz, baland togʻ hududlarida ishlaganlik uchun belgilangan koeffitsiyentlar qoʻllaniladigan mehnat haqiga qoʻshib hisoblanadi.

9. Muayyan davr ishlaganlik uchun oylik toʻlovlar pensiyalar, mehnat taʼtili uchun beriladigan haq, ishdan boʻshatish nafaqasi, xodimning oʻz mehnat vazifalarini bajarishi vaqtida tan jarohati yoki sogʻligʻining boshqacha tarzda shikastlanishi sababli yetkazilgan zararni qoplashda oʻrtacha oylik ish haqini hisoblash, shuningdek, oʻrtacha oylik ish haqini hisoblab chiqarish talab etiladigan holatlarda inobatga olinadi.