PQ-248-сон 14.08.2025. Qoraqalpogʻiston Respublikasini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish toʻgʻrisida

O‘zbekiston Respublikasi Prezidentining

qarori

Qoraqalpog‘iston Respublikasini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida

Qoraqalpog‘iston Respublikasida tadbirkorlik subyektlarini qo‘llab-quvvatlashni yanada kuchaytirish, qulay investitsiya muhitini yaratish va infratuzilmani yaxshilash, zamonaviy yondashuvlar asosida moliyaviy xizmatlar ko‘rsatish ko‘lamini kengaytirish hamda yuqori daromadli ish o‘rinlarini yaratishga qaratilgan loyihalarni amalga oshirishni jadallashtirish maqsadida qaror qilaman:

I. Maqsadlar

1. Quyidagilar 2025-2026-yillarda Qoraqalpog‘iston Respublikasini barqaror ijtimoiy-iqtisodiy rivojlantirishning asosiy maqsadli ko‘rsatkichlari etib belgilansin:

(a) yalpi hududiy mahsulot hajmi o‘rtacha 6 — 6,5 foizga;

(b) sanoat ishlab chiqarishi hajmi 5-6 foizga;

(v) bozor xizmatlari hajmi 15 — 17 foizga;

(g) qishloq xo‘jaligi ishlab chiqarishi 4-5 foizga o‘sishini ta’minlash.

II. Dasturiy hujjatlar va ularni amalga oshirish mexanizmlari

2. Belgilansinki:

(a) “Boston Consulting Group” konsalting kompaniyasi bilan ishlab chiqilayotgan Qoraqalpog‘iston Respublikasini 2035-yilgacha rivojlantirish bo‘yicha strategiya 5 yillik batafsil dastur (keyingi o‘rinlarda — Dastur) asosida amalga oshiriladi;

(b) Dasturni moliyalashtirish uchun natijaga asoslangan moliyalashtirish tizimi (PforR) bo‘yicha 150 — 200 million AQSH dollari miqdoridagi xorijiy mablag‘lar jalb qilinadi.

Oldingi tahrirga qarang.

3. Iqtisodiyot va moliya vazirligi hamda “Qoraqalpog‘iston Respublikasida loyihalarni amalga oshirish markazi” loyiha ofisi (keyingi o‘rinlarda — Loyiha ofisi) 2026-yil may oyiga qadar aniq chora-tadbirlar ko‘rsatilgan Dasturni ishlab chiqib, Vazirlar Mahkamasiga kiritsin.

(3-band O‘zbekiston Respublikasi Prezidentining 2025-yil 26-dekabrdagi PQ-388-sonli qarori tahririda — Qonunchilik ma’lumotlari milliy bazasi, 29.12.2025-y., 07/25/388/1235-son)

III. Sanoatni rivojlantirish

4. Belgilansinki, Qoraqalpog‘iston Respublikasida:

(a) yuklatilgan majburiyatlarni to‘liq bajargan kichik va yoshlar sanoat zonalari ishtirokchilariga ularga berilgan bino-inshootlarni (yoki ularning bir qismini), sanoat zonalaridagi faoliyati muddatidan qat’i nazar, to‘g‘ridan-to‘g‘ri xususiylashtirish huquqi beriladi;

(b) sanoat zonalaridagi yuridik shaxslar uchun xususiylashtirilayotgan yer uchastkasini sotib olish qiymati yuridik shaxslardan olinadigan yer solig‘i bazaviy soliq stavkasining Nukus shahrida 1 baravari, boshqa hududlarda 0,5 baravari miqdoridan kelib chiqib aniqlanadi;

(v) 2025-yil 1-oktabrdan boshlab noruda foydali qazilmalarni qayta ishlashni tashkil qilgan tadbirkorlik subyektlariga yer qa’ri uchastkalaridan foydalanish huquqi uchun ruxsatnomalar berishga oid auksionda g‘olib bo‘lish uchun taklif etilgan summani bo‘lib-bo‘lib to‘lashga ruxsat etiladi.

5. Tog‘-kon sanoati va geologiya vazirligi huzuridagi “Yer qa’ridan foydalanish markazi” davlat muassasasining Qoraqalpog‘iston Respublikasi boshqarmasi tashkil etilsin. Bunda unga:

(a) budjetdan tashqari Pensiya jamg‘armasi hududiy tuzilmalarining qisqartirilgan shtat birliklari hisobidan 7 ta shtat birligi ajratilsin;

(b) “Yer qa’ridan foydalanish markazi” davlat muassasasining yer qa’ridan foydalanish sohasida davlat xizmatlarini ko‘rsatishga doir vakolatlarini axborot tizimlaridan foydalangan holda hududning o‘zida amalga oshirish huquqi berilsin.

6. Tog‘-kon sanoati va geologiya vazirligi Iqtisodiyot va moliya vazirligi bilan birgalikda 2025-yil 1-noyabrga qadar Qoraqalpog‘iston Respublikasida 2026 — 2028-yillarda tabiiy resurslarning yangi zaxiralarini aniqlash va ishga tushirish uchun geologiya-qidiruv ishlarini olib borish dasturini ishlab chiqsin va Vazirlar Mahkamasiga kiritsin.

IV. Ijtimoiy obyektlar, infratuzilmani yaxshilash va turizmni rivojlantirish

7. Qoraqalpog‘iston Respublikasida:

(a) “yashil” tamoyil asosida 11 ta ijtimoiy soha obyektini qurish-ta’mirlash ishlari 1-ilovaga muvofiq manzilli ro‘yxat asosida amalga oshirilsin;

(b) 151 km avtomobil yo‘lini ta’mirlash ishlari 2-ilovaga muvofiq manzilli ro‘yxat asosida amalga oshirilsin.

8. Mazkur qarorning 7-bandida ko‘zda tutilgan chora-tadbirlarni moliyalashtirish uchun:

(a) Iqtisodiyot va moliya vazirligi bir oy muddatda Qoraqalpog‘iston Respublikasi mahalliy budjetlarining reja bo‘yicha maqbullashtiriladigan mablag‘lari hisobidan 60 milliard so‘m mablag‘larni teng ulushlarda 2025-2026-yillarda markazlashgan investitsiya xarajatlarini oshirish orqali 11 ta ijtimoiy soha obyektini qurish-ta’mirlash ishlari uchun yo‘naltirsin;

(b) Avtomobil yo‘llari qo‘mitasi hamda Iqtisodiyot va moliya vazirligi 151 km avtomobil yo‘lini ta’mirlash ishlari uchun jami 36 milliard so‘m mablag‘ ajratsin.

9. Davlat aktivlarini boshqarish agentligi 2026-yil 1-yanvarga qadar “A-380” G‘uzor — Buxoro — Nukus — Beyneu xalqaro ahamiyatdagi avtomobil yo‘lining Qoraqalpog‘iston Respublikasi hududidan o‘tuvchi qismida 3 ta yo‘lbo‘yi servis obyekti qurilishi va tayyor biznes shaklida realizatsiya qilinishini ta’minlasin.

10. Qoraqalpoq davlat universiteti, Urganch davlat universiteti hamda Fanlar akademiyasining tarixchi olimlari, tadqiqotchilari va soha mutaxassislaridan iborat tadqiqot guruhi tuzilsin. Bunda:

(a) tadqiqot guruhi turizm obyektlari sonini ko‘paytirish maqsadida Qoraqalpog‘iston Respublikasi va Xorazm viloyatidagi tarixiy obyektlarni aniqlasin va tiklash ishlarini olib borsin;

(b) Fanlar akademiyasi Tarix instituti, Milliy arxeologiya markazi tadqiqot guruhining faoliyatini ilmiy-uslubiy jihatdan muvofiqlashtirib borsin;

(v) Bosh vazir o‘rinbosari J. Qo‘chqorov, Oliy ta’lim, fan va innovatsiyalar vazirligi ushbu ishlar uchun 2025-yilda Ilm-fanni moliyalashtirish va innovatsiyalarni qo‘llab-quvvatlash jamg‘armasidan Qoraqalpoq davlat universiteti hamda Urganch davlat universitetiga 5 milliard so‘mdan mablag‘ ajratsin.

11. Qoraqalpog‘iston Respublikasining qadimiy, tog‘ va daryo bo‘yi hududlarida yangi turistik marshrutlar (keyingi o‘rinlarda — turistik majmualar) 3-ilovaga muvofiq manzilli dastur asosida yo‘lga qo‘yilsin. Bunda:

(a) Qoraqalpog‘iston Respublikasi Vazirlar Kengashi ikki hafta muddatda turistik majmualarni zarur infratuzilmalar bilan ta’minlash bo‘yicha manzilli dasturni ishlab chiqib, tasdiqlash uchun Qoraqalpog‘iston Respublikasi Jo‘qorg‘i Kengesiga kiritsin;

(b) Iqtisodiyot va moliya vazirligi 2025-yilda O‘zbekiston Respublikasi respublika budjetidan turistik majmualarni infratuzilma obyektlari bilan ta’minlash uchun 25 milliard so‘m mablag‘ ajratsin.

V. Aholini kasb-hunarga o‘rgatish va yoshlarning ta’lim olish imkoniyatlarini kengaytirish

12. Belgilansinki, 2025-yil 1-sentabrdan boshlab “Tadbirkorlikni rivojlantirish kompaniyasi” aksiyadorlik jamiyati tomonidan Qoraqalpog‘iston Respublikasida ro‘yxatdan o‘tib, ushbu hududda 12 oydan ortiq faoliyat yuritayotgan hamda bir yil davomida kamida 10 nafar kishini doimiy ish bilan ta’minlagan tadbirkorlik subyektlariga o‘tgan yil yakunlari bo‘yicha jami daromadining 50 foizgacha miqdorida ulush kiritish shaklidagi moliyaviy yordam ko‘rsatish tartibi joriy qilinadi.

13. Kambag‘allikni qisqartirish va bandlik vazirligi, Loyiha ofisi, Qishloq xo‘jaligi vazirligi va Qoraqalpog‘iston Respublikasi Vazirlar Kengashining:

Oldingi tahrirga qarang.

(a) 2026-yil mart oyiga qadar Xitoy tajribasi asosida Kambag‘allik va mehnat sohasidagi loyihalarni boshqarish markazi tomonidan 5 gektar yer maydonida kamida 5 sotixli issiqxona xo‘jaliklaridan iborat bo‘lgan issiqxona majmualarini tashkil qilish;

(13-bandning “a” kichik bandi O‘zbekiston Respublikasi Prezidentining 2025-yil 26-dekabrdagi PF-258-sonli Farmoni tahririda — Qonunchilik ma’lumotlari milliy bazasi, 27.12.2025-y., 06/25/258/1223-son)

(b) issiqxona majmualarini tashkil qilish uchun 5 gektar zaxiradagi qishloq xo‘jaligiga mo‘ljallangan sug‘oriladigan yer uchastkasini 49 yil muddatga ijara huquqi asosida Kambag‘allik va mehnat sohasidagi loyihalarni boshqarish markaziga ajratish;

(v) issiqxona majmualarini qurish va saqlash xarajatlarini Kambag‘allikni qisqartirish davlat maqsadli jamg‘armasi mablag‘lari hisobidan moliyalashtirish;

Oldingi tahrirga qarang.

(g) Ijtimoiy reyestrga kiritilgan oilalardan talabgorlarni aniqlab, issiqxona xo‘jaliklarini 2 yil muddatga ijara shartnomasi asosida foydalanishga topshirish;

(13-bandning “g” kichik bandi O‘zbekiston Respublikasi Prezidentining 2025-yil 26-dekabrdagi PF-258-sonli Farmoni tahririda — Qonunchilik ma’lumotlari milliy bazasi, 27.12.2025-y., 06/25/258/1223-son. Kuchga kirish sanasi — 2026-yil 1-fevral)

(d) bir yil uchun ijara to‘lovini yer maydoni hajmidan kelib chiqib, yuridik shaxslardan olinadigan yer solig‘i bo‘yicha hisoblangan summaning 10 foizi miqdorida belgilash;

(j) issiqxona xo‘jaliklari ijara muddati tugagandan so‘ng boshqa kambag‘al oilalarga ijara asosida berilishini ta’minlash;

(z) tashkil etiladigan issiqxona xo‘jaliklariga malakali agronomlarni biriktirish to‘g‘risidagi takliflari ma’qullansin.

14. Maktabgacha va maktab ta’limi vazirligi Istiqbolli kadrlarni tayyorlash bo‘yicha “El-yurt umidi” jamg‘armasi bilan birgalikda “Prezident iqtidorli farzandlari” tashabbusi doirasida:

(a) har yili talabdan kelib chiqib, Qoraqalpog‘iston Respublikasida doimiy yashaydigan va umumiy o‘rta ta’lim muassasalarini tamomlagan 50 nafargacha yoshlarning xorijda ta’lim olishini ta’minlasin;

(b) ushbu talabalarning o‘qish davri tugaganidan so‘ng Qoraqalpog‘iston Respublikasida kamida 4 yil ishlab berish majburiyati nazarda tutilsin.

15. Shunday tartib o‘rnatilsinki, unga muvofiq:

(a) Qoraqalpog‘iston Respublikasida doimiy yashaydigan hamda umumiy o‘rta, o‘rta maxsus va kasbiy ta’lim tashkilotlarini tamomlagan yoshlar uchun:

(i) davlat oliy ta’lim muassasalarida davlat granti asosida o‘qitish uchun 2025/2026 o‘quv yilidan boshlab kelgusi 3 o‘quv yili davomida qo‘shimcha 500 ta maqsadli kvota ajratiladi;

(ii) respublikada faoliyat yurituvchi nodavlat va xorijiy oliy ta’lim tashkilotlari hamda ularning filiallarida davlat granti asosida o‘qitish uchun har yili qo‘shimcha 200 ta maqsadli kvota ajratiladi;

(b) Qoraqalpog‘iston Respublikasi Vazirlar Kengashi har yili 20-iyulga qadar sohalar va tarmoqlarning oliy ma’lumotli kadrlarga bo‘lgan ehtiyojini aniqlab, ta’lim yo‘nalishlari va hududlar kesimidagi takliflarni O‘zbekiston Respublikasi ta’lim tashkilotlariga qabul qilish bo‘yicha davlat komissiyasiga taqdim etadi;

(v) O‘zbekiston Respublikasi ta’lim tashkilotlariga qabul qilish bo‘yicha davlat komissiyasi ajratilgan davlat granti asosidagi qo‘shimcha maqsadli kvotalar asosida davlat oliy ta’lim muassasalariga qabul qilishning aniq mexanizmlarini belgilaydi;

(g) maqsadli qabul kvotalari bo‘yicha oliy ta’lim tashkilotlarini tamomlagan yoshlar ushbu hududda 3 yil davomida ishlab berish majburiyatini oladi;

(d) Iqtisodiyot va moliya vazirligi qo‘shimcha kvotalarni ajratish bilan bog‘liq xarajatlar uchun zarur mablag‘lar ajratilishini ta’minlaydi.

VI. Hududni rivojlantirishga qaratilgan qo‘shimcha moliyaviy imkoniyatlar

16. Qoraqalpog‘iston Respublikasida infratuzilmani rivojlantirish loyihalarini moliyalashtirish, aholining kundalik hayotidagi kommunal va boshqa sohalardagi kechiktirib bo‘lmaydigan masalalarini tezkor hal etish maqsadida yuridik shaxs maqomiga ega bo‘lmagan Qoraqalpog‘iston Respublikasini ijtimoiy-iqtisodiy rivojlantirish jamg‘armasi (keyingi o‘rinlarda — Jamg‘arma) tashkil etilsin. Bunda:

(a) Jamg‘armaning vasiylik kengashi tarkibi 4-ilovaga muvofiq tasdiqlansin;

(b) Jamg‘arma vasiylik kengashi Jamg‘armaning oliy boshqaruv organi, Qoraqalpog‘iston Respublikasi Vazirlar Kengashi huzuridagi Tadbirkorlikni rivojlantirish direksiyasi uning ijro organi hisoblansin;

(v) Jamg‘arma mablag‘larini shakllantirish manbalari va sarflash yo‘nalishlari 5-ilovaga muvofiq tasdiqlansin;

(g) 2026-yildan boshlab Jamg‘armaga Qoraqalpog‘iston Respublikasi respublika budjetining umumiy xarajatlari summasining kamida 3 foizi miqdoridagi mablag‘lar yo‘naltirilsin;

(d) Jamg‘arma vasiylik kengashi tomonidan tasdiqlangan dasturlar asosida mazkur qarorga 5-ilovada nazarda tutilgan yo‘nalishlar Jamg‘arma mablag‘laridan moliyalashtirib borilsin;

(j) Jamg‘arma mablag‘larini oluvchilar va xarajatlar sarfining ochiqligi va shaffofligi ta’minlab borilsin;

(z) Jamg‘armaga nisbatan vazirlik va idoralarning budjetdan tashqari jamg‘armalariga kelib tushadigan tushumlar uchun belgilangan taqsimot me’yorlari qo‘llanilmasin.

VII. Qaror ijrosini tashkil etish, ta’minlash va nazorat qilish

17. 2025-2026-yillarda Qoraqalpog‘iston Respublikasini barqaror ijtimoiy-iqtisodiy rivojlantirish bo‘yicha asosiy maqsadli ko‘rsatkichlarga erishishga qaratilgan chora-tadbirlar dasturi 6-ilovaga muvofiq tasdiqlansin.

18. Bosh vazir o‘rinbosari J. Qo‘chqorov mazkur qarorda ajratilishi belgilangan mablag‘lar to‘liq va o‘z muddatida moliyalashtirilishini nazorat qilib borsin.

19. Belgilansinki, mazkur qaror ijrosi:

(a) har oyda Qoraqalpog‘iston Respublikasi Vazirlar Kengashi tomonidan Loyiha ofisi va Qoraqalpog‘iston Respublikasining tuman (shahar) hokimliklari ishtirokida;

(b) har chorakda Vazirlar Mahkamasida tegishli vazirlik va idoralar rahbarlari ishtirokida tanqidiy muhokama qilib boriladi.

20. Qoraqalpog‘iston Respublikasi Vazirlar Kengashi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

21. Mazkur qaror ijrosini samarali tashkil qilishga mas’ul va shaxsiy javobgar etib Qoraqalpog‘iston Respublikasi Vazirlar Kengashi Raisi F.U. Ermanov belgilansin.

22. Qaror ijrosini nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2025-yil 14-avgust,

PQ-248-son

O‘zbekiston Respublikasi Prezidentining 2025-yil 14-avgustdagi PQ-248-son qaroriga
1-ILOVA

Qoraqalpog‘iston Respublikasida “yashil tamoyil asosida” qurilish-ta’mirlash ishlari amalga oshiriladigan ijtimoiy soha obyektlarining

MANZILLI RO‘YXATI

					(mlrd so‘m)
T/r	Tuman/shahar nomi	Mahalla nomi	Obyekt nomi (raqami)	Obyektlarni to‘liq ishga tushirish
T/r	Tuman/shahar nomi	Mahalla nomi	Obyekt nomi (raqami)	Qurilish turi	Talab etiladigan mablag‘
Jami					60,0
I	Maktablar				22,8
1.	Beruniy tumani	“Oltinsoy” MFY	45-son maktab	Rekonstruksiya qilish	7,1
2.	Amudaryo tumani	“Beshovul” MFY	37-son maktab	Mukammal ta’mirlash	5,1
3.	Chimboy tumani	“Tazajol” MFY	13-son maktab	Mukammal ta’mirlash	3,5
4.	Shumanay tumani	“Birleshik” MFY	27-son maktab	Rekonstruksiya qilish	7,1
II	Maktabgacha ta’lim tashkilotlari				25,7
5.	Nukus tumani	“Aqterek” MFY	14-son	Rekonstruksiya qilish	5,3
6.	Chimboy tumani	“Tagjap” OFYda	29-son		6,3
7.	Nukus shahri	“Tung‘ishqonis” MFY	9-son		7,7
8.	Amudaryo tumani	“Daryobo‘yi” MFY	32-son		6,4
III	Poliklinikalar				11,5
9.	Beruniy tumani	“Palvash” MFY	13-son	Rekonstruksiya qilish	5,5
10.	Amudaryo tumani	“Xolimbeg” OFY	71-son	Rekonstruksiya qilish	4,1
11.	Shumanay tumani	“Mamiy” OFY	Shumanay QVP	Joriy ta’mirlash	1,9

Izoh:

Qurilish-ta’mirlash ishlari amalga oshiriladigan ijtimoiy soha obyektlari uchun talab etiladigan mablag‘larga loyiha-smeta hujjatlari asosida o‘zgartirish va qo‘shimchalar kiritilishi mumkin;

11 ta obyektni qurish-ta’mirlash ishlarini amalga oshirishda buyurtmachi vazifasi Qoraqalpog‘iston Respublikasi Vazirlar Kengashining “Yagona buyurtmachi xizmati” injiniring kompaniyasi tomonidan amalga oshiriladi;

qurilish-ta’mirlash ishlarida O‘zbekiston Respublikasi Prezidentining 2025-yil 11-martdagi PQ-100-son qarori va Vazirlar Mahkamasining 2025-yil 7-maydagi 300-son qaroriga muvofiq energiya samaradorlik loyihalarini amalga oshirish tartibi qo‘llanadi.

O‘zbekiston Respublikasi Prezidentining 2025-yil 14-avgustdagi PQ-248-son qaroriga
2-ILOVA

Qoraqalpog‘iston Respublikasida 2025-2026-yillarda ta’mirlash ishlari olib boriladigan avtomobil yo‘llarining

MANZILLI RO‘YXATI

T/r

Chora-tadbirlar

Amalga oshirish mexanizmi

Ijro muddati

Mas’ul ijrochilar

Qo‘ng‘irot — Mo‘ynoq avtomobil yo‘lining 91 km qismi asfalt qoplamasini karta usulida ta’mirlash ishlarini boshlash uchun O‘zbekiston Respublikasi respublika budjetidan Avtomobil yo‘llari qo‘mitasiga ajratilgan mablag‘lar doirasida 21 mlrd so‘m mablag‘ ajratish.

1. Qo‘ng‘irot tumani hududidan o‘tuvchi davlat ahamiyatidagi “D-231” Qo‘ng‘irot sh. — Mo‘ynoq sh. avtomobil yo‘lining 10 — 23 km (13 km) qismini (10 mlrd so‘m) ta’mirlash.

2. Mo‘ynoq tumani hududidan o‘tuvchi davlat ahamiyatidagi “D-231” Qo‘ng‘irot sh. — Mo‘ynoq sh. avtomobil yo‘lining 23 — 91 km (68 km) qismini (11 mlrd so‘m) ta’mirlash.

2025-yil avgust-sentabr

Avtomobil yo‘llari qo‘mitasi

(J. Tursunov),

Iqtisodiyot va moliya vazirligi

(I. Norqulov),

Qoraqalpog‘iston Respublikasi Vazirlar Kengashi

(F. Ermanov)

Nukus shahridan Taxtako‘pir tumaniga olib boruvchi “D-234” Nukus — Chimboy — Taxtako‘pir avtomobil yo‘lining 59 km qismini ta’mirlash ishlarini boshlash uchun O‘zbekiston Respublikasi respublika budjetidan ajratilgan mablag‘lar doirasida 15 mlrd so‘m mablag‘ ajratish.

1. Nukus shahri hududidan o‘tuvchi 14,3 — 22 km (7,7 km) qismini (1,5 mlrd so‘m) ta’mirlash.

2. Kegeyli tumani hududidan o‘tuvchi 22 — 47 km (25 km) qismini (6,5 mlrd so‘m) ta’mirlash.

3. Chimboy tumani hududidan o‘tuvchi 47 — 58 km (11 km) va 63 — 84 km (21 km) qismlarini (5 mlrd so‘m) ta’mirlash.

4. Qorao‘zak tumani hududidan o‘tuvchi 84 — 90 km (6 km) qismini (2 mlrd so‘m) ta’mirlash.

2025-2026-yillar davomida

Avtomobil yo‘llari qo‘mitasi

(J. Tursunov),

Iqtisodiyot va moliya vazirligi

(I. Norqulov),

Qoraqalpog‘iston Respublikasi Vazirlar Kengashi

(F. Ermanov)

O‘zbekiston Respublikasi Prezidentining 2025-yil 14-avgustdagi PQ-248-son qaroriga
3-ILOVA

Qoraqalpog‘iston Respublikasining qadimiy, tog‘ va daryo bo‘yi hududlarida yangi turistik marshrutlarni yo‘lga qo‘yish bo‘yicha

MANZILLI DASTUR

T/r	Turizm obyekti nomi	Joylashgan hudud
1.	Mizdaxkon arxeologiya-arxitektura majmuasi	Xo‘jayli tumani
2.	Shayx Jalil bobo ziyoratgohi	Qorao‘zak va Amudaryo tumanlari
3.	Amu-qaratau dam olish majmuasi	Qorao‘zak va Amudaryo tumanlari

O‘zbekiston Respublikasi Prezidentining 2025-yil 14-avgustdagi PQ-248-son qaroriga
4-ILOVA

Qoraqalpog‘iston Respublikasini ijtimoiy-iqtisodiy rivojlantirish jamg‘armasining

VASIYLIK KENGASHI TARKIBI

1.	J. Qo‘chqorov	—	O‘zbekiston Respublikasi Bosh vazirining o‘rinbosari — iqtisodiyot va moliya vaziri, Vasiylik kengashi raisi
2.	A. Orinbayev	—	Qoraqalpog‘iston Respublikasi Jo‘qorg‘i Kengesi Raisi, Vasiylik kengashi raisining o‘rinbosari
3.	S. Sadullayev	—	O‘zbekiston Respublikasi iqtisodiyot va moliya vaziri o‘rinbosari
4.	F. Ermanov	—	Qoraqalpog‘iston Respublikasi Vazirlar Kengashi Raisi
5.	B. Jumamuratov	—	“Qoraqalpog‘iston Respublikasida loyihalarni amalga oshirish markazi” loyiha ofisi direktori, Vasiylik kengashi kotibi

Izoh: Vasiylik kengashi a’zolari boshqa ishga o‘tgan taqdirda, uning tarkibiga ushbu lavozimga yangidan tayinlangan yoki zimmasiga tegishli funksiyalar yuklangan shaxslar kiritiladi.

O‘zbekiston Respublikasi Prezidentining 2025-yil 14-avgustdagi PQ-248-son qaroriga
5-ILOVA

Qoraqalpog‘iston Respublikasini ijtimoiy-iqtisodiy rivojlantirish jamg‘armasi mablag‘larini shakllantirish manbalari va sarflash yo‘nalishlari

I. Jamg‘arma mablag‘larini shakllantirish manbalari

1. G‘ildirakli transport vositalari, o‘ziyurar mashinalar va ularning tirkamalarini “erkin muomalaga chiqarish” (import) bojxona rejimida rasmiylashtiradigan jismoniy va yuridik shaxslardan undiriladigan utilizatsiya yig‘imining 5 foizi*.

2. Qoraqalpog‘iston Respublikasida shakllanadigan alkogol mahsulotlari, shu jumladan, pivo (import qilinadigan alkogol mahsulotlari va pivodan tashqari) uchun ishlab chiqaruvchilar tomonidan to‘lanadigan aksiz solig‘ining 70 foizi*.

3. Jamg‘armaning vaqtincha bo‘sh turgan mablag‘larini tijorat banklari depozitlariga joylashtirish hisobidan olinadigan daromadlar.

4. Qoraqalpog‘iston Respublikasi respublika budjeti daromadlarining prognozdan oshirib bajarilgan qismidan ajratmalar.

5. Jismoniy va yuridik shaxslarning homiylik xayriyalari, xalqaro moliya institutlari va xorijiy tashkilotlarning grantlari.

6. Qonunchilikda taqiqlanmagan boshqa manbalar.

II. Jamg‘arma mablag‘lari sarflanadigan asosiy yo‘nalishlar

1. Investorlar ishtirokida investitsiya loyihalari, davlat-xususiy sheriklik loyihalari, Qoraqalpog‘iston Respublikasining infratuzilmasini rivojlantirish bilan bog‘liq istiqbolli loyihalarni amalga oshirish.

2. Qoraqalpog‘iston Respublikasining alohida hududlarini rivojlantirish va renovatsiya dasturlari, master reja va quriladigan obyektlarning loyiha hujjatlarini ishlab chiqish.

3. Iqtisodiyot tarmoqlari va ijtimoiy soha obyektlarini qurish, rekonstruksiya qilish, mukammal ta’mirlash va jihozlash.

4. Renovatsiya dasturlarini amalga oshirish.

5. “Yangi O‘zbekiston” massivlari, davlat uy-joy dasturlarida ko‘zda tutilgan massivlar, shuningdek, maxsus iqtisodiy zonalar, kichik sanoat zonalari, yoshlar sanoat va tadbirkorlik zonalarini tashqi muhandislik-kommunikatsiya tarmoqlari (ichimlik va oqova suv, elektr energiyasi, tabiiy gaz tarmoqlari va avtomobil yo‘li) bilan ta’minlash.

6. Jismoniy va yuridik shaxslarga yetkazilgan mulkiy va ma’naviy zararlarni qoplash hamda shahar va tumanlarni ijtimoiy-iqtisodiy rivojlantirish tadbirlarini moliyalashtirish.

7. “Qoraqalpog‘iston Respublikasida loyihalarni amalga oshirish markazi” loyiha ofisining moddiy-texnika bazasini mustahkamlash.

8. Aholining kundalik hayotidagi kommunal hamda boshqa sohalardagi kechiktirib bo‘lmaydigan masalalarni tezkor hal etishga qaratilgan va qonunchilikda taqiqlanmagan chora-tadbirlarni moliyalashtirish.

* Mazkur manbalar Davlat budjeti daromadlari tarkibida to‘liq aks ettirilgan holda Jamg‘armaga o‘tkazib beriladi.

O‘zbekiston Respublikasi Prezidentining 2025-yil 14-avgustdagi PQ-248-son qaroriga
6-ILOVA

2025-2026-yillarda Qoraqalpog‘iston Respublikasini barqaror ijtimoiy-iqtisodiy rivojlantirish bo‘yicha asosiy maqsadli ko‘rsatkichlarga erishishga qaratilgan

CHORA-TADBIRLAR DASTURI

Oldingi tahrirga qarang.

T/r	Chora-tadbirlar	Amalga oshirish mexanizmi	Amalga oshirish shakli	Ijro muddati	Mas’ul ijrochilar
1.	Xalqaro moliya tashkilotlari bilan birgalikda Strategiyaning ustuvor yo‘nalishlarini hamda aholi yashashi va tadbirkorlik uchun qulay infratuzilmaviy loyihalarga mablag‘larni jalb qilishni nazarda tutuvchi Qoraqalpog‘iston Respublikasini kompleks ijtimoiy-iqtisodiy rivojlantirishga qaratilgan 5 yillik batafsil dastur loyihasini (keyingi o‘rinlarda — Dastur) ishlab chiqish (qarorning 2- va 3-bandlari).	Dastur loyihasini ishlab chiqish va Vazirlar Mahkamasiga kiritish. Bunda: (a) iqtisodiy, ijtimoiy, muhandislik va transport-logistika infratuzilmasi loyihalarini samarali joylashtirish hamda hududlarning o‘zaro bog‘liqligini yaxshilashni inobatga olgan holda Nukus, Qo‘ng‘irot, Beruniy va Chimboy aglomeratsiya markazlarini rivojlantirish; (b) Chimboy va Qo‘ng‘irot tumanlarini jadal kompleks rivojlantirishda ushbu tumanlar markazlarining master rejalarini Dastur bilan o‘zaro uyg‘unlikda ishlab chiqish; (v) Dasturni moliyalashtirish uchun natijaga asoslangan moliyalashtirish tizimi (PforR) orqali 150 — 200 million dollar xorijiy mablag‘lar jalb etilishini nazarda tutish.	Normativ-huquqiy hujjat loyihasi	2026-yil may oyiga qadar	Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov), Loyiha ofisi (B. Jumamuratov)
2.	Qo‘ng‘irot va Beruniy tumanlarida sanoatni rivojlantirish.	1. O‘zbekiston Respublikasi Prezidentining 2025-yil 19-martdagi “Kichik va o‘rta biznesning iqtisodiyotdagi o‘rnini oshirish chora-tadbirlari to‘g‘risida”gi PF-50-son Farmoniga muvofiq Beruniy tumanida qo‘shimcha sanoat loyiha ofisini tashkil qilish. 2. Qo‘ng‘irot va Beruniy tumanlaridagi sanoat loyiha ofislari faoliyati uchun 20 milliard so‘m qo‘shimcha mablag‘ ajratish.	Amaliy chora-tadbirlar	2025-yil 1-oktabr	Vazirlar Mahkamasi (J. Qo‘chqorov), Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov)
3.	Zamonaviy erkin iqtisodiy zona tashkil etish.	1. Qoraqalpog‘iston Respublikasi hududlarining geografik joylashuvi, sanoat salohiyati, qulay transport koridori, temir yo‘l infratuzilmasi va boshqa shart-sharoitlarni inobatga olib, kamida 1 ta zamonaviy erkin iqtisodiy zona tashkil etish uchun sanoat loyiha ofislari uchun ajratilgan mablag‘lar hisobidan ilg‘or tajribaga ega xorijiy konsalting kompaniyasini jalb qilish. 2. Erkin iqtisodiy zonani tashkil etishning texnik topshirig‘ida kamida 4 ta xorijiy investorlarni jalb qilishni nazarda tutish.	Normativ-huquqiy hujjat loyihasi	2025-yil 1-oktabr	Vazirlar Mahkamasi (J. Xodjayev, J. Qo‘chqorov), Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov)
4.	Qoraqalpog‘iston Respublikasida noruda foydali qazilmalarni qayta ishlashni rag‘batlantirish (qarorning 4-bandi “v” kichik bandi).	Qoraqalpog‘iston Respublikasi hududida noruda foydali qazilmalarni qayta ishlashni tashkil qilgan tadbirkorlik subyektiga tegishli auksionda g‘olib deb topilgan summani bo‘lib-bo‘lib to‘lashga ruxsat etish bo‘yicha normativ-huquqiy hujjat loyihasini ishlab chiqish va Vazirlar Mahkamasiga kiritish.	Normativ-huquqiy hujjat loyihasi	2025-yil sentabr	Tog‘-kon sanoati va geologiya vazirligi (B. Islamov), Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov)
5.	Tog‘-kon sanoati va geologiya vazirligi huzuridagi “Yer qa’ridan foydalanish markazi” davlat muassasasining Qoraqalpog‘iston Respublikasi boshqarmasini tashkil etish (qarorning 6-bandi).	1. Hududiy boshqarmani o‘z vakolatlarini amalga oshirish uchun zarur malakali mutaxassislar, ma’lumotlar bazalari, moddiy-texnika jihozlari bilan ta’minlash, nizomi va tuzilmasini tasdiqlagan holda davlat ro‘yxatidan o‘tkazish hamda uning faoliyatini to‘liq yo‘lga qo‘yish.	Amaliy chora-tadbirlar	2025-yil 15-sentabr	Tog‘-kon sanoati va geologiya vazirligi (B. Islamov), Davlat aktivlarini boshqarish agentligi (A. Ortikov), Iqtisodiyot va moliya vazirligi (A. Xaydarov), Geologiya fanlari universiteti (A. Kadirxodjayev), Fanlar akademiyasi (Sh. Ayupov), Nukus davlat texnika universiteti (B. Kaipbergenov), Qoraqalpog‘iston Respublikasi Vazirlar Kengashi (F. Ermanov)
		2. Hududiy boshqarmani Nukus shahri T. Qayipbergenov ko‘chasi, 25-uy manzilida joylashgan binoning 3-qavatiga tekin foydalanish huquqi asosida joylashtirish.		2025-yil 15-sentabr
		3. Qoraqalpog‘iston Respublikasida tabiiy resurslarning yangi zaxiralarini aniqlash va ishga tushirish ishlarini tashkil qilish hamda ushbu ishlarni amalga oshirish uchun belgilangan tartibda mablag‘ ajratish.		2025-yil 1-oktabr
		4. Qoraqalpog‘iston Respublikasida joylashgan barcha istiqbolli yer qa’ri uchastkalari ro‘yxatini konturlari va koordinatalari bilan birga shakllantirish, yer fondi toifasini o‘zgartirish va elektron onlayn auksion savdolariga chiqarish.		2025-yil 1-oktabr
6.	Qoraqalpog‘iston Respublikasida 2026 — 2028-yillarda tabiiy resurslarning yangi zaxiralarini aniqlash va ishga tushirish uchun geologiya-qidiruv ishlarini olib borish dasturini qabul qilish (qarorning 7-bandi).	1. Qoraqalpog‘iston Respublikasida 2026 — 2028-yillarda tabiiy resurslarning yangi zaxiralarini aniqlash va ishga tushirish uchun geologiya-qidiruv ishlarini olib borish dasturini ishlab chiqish va Vazirlar Mahkamasiga kiritish. 2. Dasturni Tog‘-kon sanoati va geologiya vazirligiga respublika mineral xomashyo bazasini rivojlantirish yillik dasturlari doirasida Davlat budjetidan ajratiladigan mablag‘lar hisobidan moliyalashtirishni nazarda tutish.	Normativ-huquqiy hujjat loyihasi	2025-yil 1-noyabr	Tog‘-kon sanoati va geologiya vazirligi (B. Islamov), Iqtisodiyot va moliya vazirligi (I. Norqulov), Loyiha ofisi (B. Jumamuratov)
7.	“A-380” G‘uzor — Buxoro — Nukus — Beyneu xalqaro ahamiyatdagi avtomobil yo‘lining Qoraqalpog‘iston Respublikasi hududidan o‘tuvchi 439 — 765 km va 876 — 1204 km oralig‘ida 3 ta “Service area” yoki “Service point” yo‘lbo‘yi servis obyektlarini Davlat aktivlarini boshqarish, transformatsiya va xususiylashtirish jamg‘armasi mablag‘lari hisobidan qurish (qarorning 9-bandi).	1. Mazkur obyektlarni hamda avtoturargohlarni qurish uchun doimiy foydalanish huquqi asosida yer uchastkalarini ajratish.	Amaliy chora-tadbirlar	2025-yil sentabr	Davlat aktivlarini boshqarish agentligi (A. Ortikov), Avtomobil yo‘llari qo‘mitasi (J. Tursunov), Kadastr agentligi (F. Pulatov), Qoraqalpog‘iston Respublikasi Vazirlar Kengashi (F. Ermanov)
		2. Ajratilgan yer uchastkalarining master rejasi loyihalarini ishlab chiqish.	Master reja ishlab chiqish	2025-yil sentabr
		3. Obyektlarni ularning qurilishi tugallangandan so‘ng tayyor biznes shaklida realizatsiya qilish uchun elektron onlayn auksion (tanlov) savdolariga chiqarish.	Amaliy chora-tadbirlar	2026-yil 1-yanvar
8.	Tadbirkorlik subyektlarini moliyaviy qo‘llab-quvvatlash (qarorning 12-bandi).	1. Qoraqalpog‘iston Respublikasida ro‘yxatdan o‘tib, ushbu hududda 12 oydan ortiq faoliyat yuritayotgan hamda bir yil davomida kamida 10 nafar kishini doimiy ish bilan ta’minlagan tadbirkorlik subyektlari ro‘yxatini real vaqt rejimida shakllantirib boruvchi texnik imkoniyat yaratish.	Amaliy chora-tadbirlar	2025-yil sentabr	Iqtisodiyot va moliya vazirligi (I. Norqulov), “Tadbirkorlikni rivojlantirish kompaniyasi” AJ (A. Mahamatov), Soliq qo‘mitasi (Sh. Kudbiyev), Tijorat banklari rahbarlari
8.		2. Tadbirkorlik subyektlariga o‘tgan yil yakunlari bo‘yicha jami daromadining 50 foizigacha miqdorida ulush kiritish shaklidagi moliyaviy yordam ko‘rsatish tartibining uzluksiz ishlashi uchun zarur choralarni ko‘rish.	Amaliy chora-tadbirlar	Doimiy
9.	Kredit tarixi yomonlashgan jismoniy va yuridik shaxslarga imkoniyat yaratish.	“Oilaviy tadbirkorlikni rivojlantirish” dasturi doirasida kredit olib, loyihasini muvaffaqiyatli amalga oshirgan va to‘liq kreditini so‘ndirgan, biroq to‘lov muddatlarini buzish hisobiga kredit tarixi yomonlashgan jismoniy va yuridik shaxslarning kredit tarixini, istisno tariqasida, bir marotaba “yaxshi” toifaga o‘zgartirish. Bunda “Oilaviy tadbirkorlikni rivojlantirish” dasturi doirasida loyiha muvaffaqiyatli amalga oshirilgani to‘g‘risida xulosa kredit ajratgan bank hamda mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimlarining yordamchilari tomonidan tasdiqlanadi.	Amaliy chora-tadbirlar	2025-yil oktabr	Markaziy bank (T. Ishmetov), Qoraqalpog‘iston Respublikasi Vazirlar Kengashi (F. Ermonov), tijorat banklari
10.	Qoraqalpog‘iston Respublikasida tadbirkorlik subyektlari va aholiga bank xizmatlari ko‘rsatish sifatini yaxshilash.	1. Qoraqalpog‘iston Respublikasida tadbirkorlik subyektlari va aholiga bank xizmatlari ko‘rsatish sifatini yaxshilash bo‘yicha dastur ishlab chiqib, amalga oshirish. Bunda: aholi va tadbirkorlarning moliyaviy xizmatlardan foydalanish imkoniyatlarini kengaytirish, ayniqsa, chekka va qishloq hududlarda bank infratuzilmasini rivojlantirish; Nukus shahri, Qo‘ng‘irot, Chimboy, Amudaryo hamda To‘rtko‘l tumanlarini xususiy banklar xizmati bilan qamrab olish uchun qulay sharoit yaratish.	Dastur ishlab chiqish	2025-2026-yillar davomida	Markaziy bank (T. Ishmetov), tijorat banklari
10.		2. “Biznesni rivojlantirish banki” ATB va “O‘zsanoatqurilishbank” ATBning Qoraqalpog‘iston Respublikasi filiallariga 5 mlrd so‘mgacha bo‘lgan kreditlarni ajratishni mustaqil hal qilish huquqini berish masalasini ko‘rib chiqish.	Dastur ishlab chiqish	2025-yil 1-sentabr	Markaziy bank (T. Ishmetov), tijorat banklari
11.	Logistika xablarini tashkil etish.	1. Hududni Qozog‘iston Respublikasining Qizilo‘rda viloyati bilan bog‘lovchi Qizilo‘rda — Taxtako‘pir avtomobil yo‘lini qurish yuzasidan ikki tomonlama hamkorlik bo‘yicha hukumatlararo qo‘shma komissiya doirasida muzokaralar olib borish.	Amaliy chora-tadbirlar	2025-yil sentabr	Bosh vazir o‘rinbosari (J. Xodjayev), Transport vazirligi (I. Maxkamov), Tashqi ishlar vazirligi (B. Saidov), Investitsiyalar, sanoat va savdo vazirligi (L. Kudratov), Avtomobil yo‘llari qo‘mitasi (J. Tursunov), Bojxona qo‘mitasi (A. Mavlonov), Qoraqalpog‘iston Respublikasi Vazirlar Kengashi (F. Ermonov), Loyiha ofisi (B. Jumamuratov)
		2. Hududni Turkmanistonning Toshhovuz viloyati bilan bog‘lovchi Xo‘jayli — Toshhovuz chegara postini ochish yuzasidan ikki tomonlama hamkorlik bo‘yicha hukumatlararo qo‘shma komissiya doirasida muzokaralar olib borish.	Amaliy chora-tadbirlar	2025-yil oktabr
		3. Muzokaralar natijasi bo‘yicha aniq asoslantirilgan takliflarni O‘zbekiston Respublikasi Prezidenti Administratsiyasiga kiritish.		2025-yil noyabr
12.	Nukus shahri G‘arezsizlik, S. Kamalov, G. Sheraziyeva ko‘chalarining master rejasini ishlab chiqish.	Nukus shahri ko‘chalarida tunu kun faoliyat ko‘rsatadigan va barcha zaruriy infratuzilma obyektlariga ega bo‘lgan turizm, ko‘ngilochar, gastronomik, savdo va servis obyektlarini tashkil etish.	Master reja ishlab chiqish	2025-yil dekabr	“Asakabank” AJ (K. Tulyaganov), Qoraqalpog‘iston Respublikasi Vazirlar Kengashi (F. Ermanov)
13.	Qoraqalpog‘iston Respublikasining qadimiy, tog‘ va daryo bo‘yi hududlarida yangi turistik marshrutlarni yo‘lga qo‘yish.	1. Tajribaga ega xorijiy va mahalliy kompaniyalarni jalb qilgan holda ushbu qarorning 3-ilovasidagi turistik majmualarni rivojlantirish bo‘yicha master rejalarni ishlab chiqish va tasdiqlash.	Master reja ishlab chiqish	2025-yil oktabr	Ekologiya, atrof-muhitni muhofaza qilish va iqlim o‘zgarishi vazirligi (A. Abduhakimov), Iqtisodiyot va moliya vazirligi (I. Norqulov), Turizm qo‘mitasi (U. Shadiyev), Qoraqalpog‘iston Respublikasi Vazirlar Kengashi (F. Ermanov)
		2. Turistik majmualar va ularga tutash hududda turizm, savdo va ko‘ngilochar xizmatlar ko‘rsatishni tashkil etish uchun yer uchastkalarini elektron onlayn auksionga chiqarish choralarini ko‘rish. Bunda master rejalarni ishlab chiqish bilan bog‘liq xarajatlar O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi hamda Turizm qo‘mitasining budjetdan tashqari mablag‘lari hisobidan teng ulushlarda qoplanadi.	Amaliy chora-tadbirlar	2025-yil oktabr-noyabr
		3. Turistik majmualarda amalga oshirilgan ishlar va ularning holati haqida videorolik shaklidagi hisobotlarni Prezident Administratsiyasiga kiritish.	Hisobot	2026-yil dekabr
14.	“Saygachiy” majmua (landshaft) buyurtma qo‘riqxonasida sayg‘oqlarning populyatsiyasini oshirish va Qozog‘istondan O‘zbekistonga sayg‘oqlarning migratsiyasini qayta tiklash.	1. Sayg‘oqlarning migratsiyasini tiklash hamda populyatsiyasini oshirish bo‘yicha ishchi guruhni tashkil qilish. 2. Ishchi guruhni Qozog‘iston Respublikasiga xizmat safariga yuborish. 3. “Saygachiy” majmua (landshaft) buyurtma qo‘riqxonasiga kamida 500 ta sayg‘oqni olib kelish, Qozog‘iston Respublikasi bilan Shalqar — Beyneu temir yo‘l liniyasida sayg‘oqlar o‘tishi uchun yo‘laklar barpo qilish va chegara hududida migratsiya yo‘llarini ko‘paytirish bo‘yicha ikki tomonlama muzokaralar o‘tkazish.	Amaliy chora-tadbirlar	2026-yil avgust	Bosh vazir o‘rinbosari (J. Xodjayev), Ekologiya va iqlim o‘zgarishi milliy qo‘mitasi (A. Abduhakimov), Davlat xavfsizlik xizmati (B. Kurbanov), Qoraqalpog‘iston Respublikasi Vazirlar Kengashi (F. Ermanov)
14.		4. Muzokaralar natijasi bo‘yicha takliflarni O‘zbekiston Respublikasi Prezidenti Administratsiyasiga kiritish.	Muzokara yakunidan keyin ikki hafta muddatd	2026-yil oktabr
15.	Chimboy tumanida o‘quv va ishlab chiqarish etnoturizm maskanini tashkil etish.	1. Chimboy tumani markazidagi kasbiy ko‘nikmalar markazi huzurida Bandlikka ko‘maklashish davlat jamg‘armasi mablag‘lari hisobidan o‘quv va ishlab chiqarish etnoturizm maskanini tashkil etish. Bunda o‘tov (qora uy)larni ishlab chiqarish ko‘nikmasi, qoraqalpoq milliy bezaklari, zargarlik va boshqa milliy hunarmandchilik mahsulotlarini tayyorlash, xorijiy tillarni o‘rgatish, dizayner hamda tadbirkorlik savodxonligi yo‘nalishlarida o‘qitish va ishlab chiqarish (yasash, tayyorlash), shuningdek, ko‘rsatiladigan xizmatlar va yaratilgan mahsulotlar uchun bino hamda taqdimot xonalarini (showroom) tashkil qilish nazarda tutiladi.	Loyiha-smeta hujjatlarini ishlab chiqish va qurilish ishlarini boshlash	2025-yil oktabr	Kambag‘allikni qisqartirish va bandlik vazirligi (B. Zaxidov), Qoraqalpog‘iston Respublikasi Vazirlar Kengashi (F. Ermanov), Turizm qo‘mitasi (U. Shadiyev), Loyiha ofisi (B. Jumamuratov)
15.		2. Ushbu markazni 2026-yil 1-martga qadar ishga tushirish va turizm marshrutiga qo‘shish.	Qurilish ishlarini yakunlab foydalanishga topshirish	2026-yil mart
16.	Festival va tadbirlar ro‘yxatini shakllantirish.	1. Mahalliy aholining avloddan-avlodga o‘tib kelayotgan an’anaviy bayram kunlari ro‘yxatini tuzish. 2. Sayyohlarda katta qiziqish uyg‘otadigan bayramlarni tanlab olish va ularni o‘tkazish uchun qulay sanalarni belgilash.	Amaliy chora-tadbirlar	Har yili 10-yanvarga qadar	Turizm qo‘mitasi (U. Shadiyev), Madaniyat vazirligi (O. Nazarbekov), Qoraqalpog‘iston Respublikasi Vazirlar Kengashi (F. Ermanov)
16.	Festival va tadbirlar ro‘yxatini shakllantirish.	3. Ommaviy axborot vositalari orqali targ‘ibot va tashviqot ishlarini olib borish.	Amaliy chora-tadbirlar	Doimiy
17.	Hududning turizm salohiyatini xorijiy ommaviy axborot vositalari orqali targ‘ib qilib borish.	1. Targ‘ibot xarajatlari uchun UNWTO, UNDP, GIZ kabi tashkilotlarning grant mablag‘larini jalb qilish choralarini ko‘rish.	Amaliy chora-tadbirlar	2025-2026-yillar davomida	O‘zbekiston Respublikasi Prezidenti Administratsiyasi (Sh. Asadov), Turizm qo‘mitasi (U. Shadiyev), Qoraqalpog‘iston Respublikasi Vazirlar Kengashi (F. Ermanov)
17.		2. Euronews va shunga o‘xshash telekanallar orqali xorijda Qoraqalpog‘iston Respublikasining turizm obyektlari, gastro va ekstremal turizm salohiyatini keng targ‘ib qilish.	Amaliy chora-tadbirlar	Har chorakda
18.	Xorazm — Qoraqalpog‘iston turizm yo‘nalishini o‘zaro bog‘liq holda rivojlantirish.	Urganch — Nukus — Qo‘ng‘irot temir yo‘l yo‘nalishida elektropoyezdlar qatnovini yo‘lga qo‘yish bo‘yicha taklif ishlab chiqish va Vazirlar Mahkamasiga kiritish.	Normativ-huquqiy hujjat loyihasi	2025-yil noyabr	Transport vazirligi (I. Maxkamov) Iqtisodiyot va moliya vazirligi (I. Norqulov), Turizm qo‘mitasi (U. Shadiyev)
19.	Ichimlik suv tarmoqlarini yaxshilash.	1. Uzunligi 97 km bo‘lgan Qo‘ng‘irot-Mo‘ynoq magistral suv tarmog‘ini qurish, shuningdek, Tuyamo‘yin suv tozalash inshootini to‘liq rekonstruksiya qilish (suv tindirgich qurish) ishlariga Osiyo taraqqiyot bankining “Iqlim o‘zgarishiga moslashgan suv ta’minoti tizimini rivojlantirish” loyihasi doirasida 70,0 million dollar qarz mablag‘larini yo‘naltirish bo‘yicha muzokaralar o‘tkazish.	Amaliy chora-tadbirlar	2025-yil sentabr	“O‘zsuvta’minot” AJ (A. Suvonqulov), Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov)
		2. Muzokaralar natijasi bo‘yicha takliflarni O‘zbekiston Respublikasi Prezidenti Administratsiyasiga kiritish.	Prezident Administratsiyasiga axborot kiritish	2025-yil noyabr
		3. Osiyo taraqqiyot banki bilan birgalikda loyihaoldi hujjatlarni ishlab chiqish va ishlarni boshlash.	Loyihaoldi hujjatlarni ishlab chiqish	2025-2026-yillar davomida
20.	Mayningga ixtisoslashgan maxsus zona tashkil etish.	1. Quyidagilarni nazarda tutuvchi O‘zbekiston Respublikasi Prezidenti qarori loyihasini ishlab chiqish. Bunda: mayningga ixtisoslashgan maxsus zona tashkil etish; maxsus zonada mayning uchun qayta tiklanuvchi energiya manbalaridan foydalanishga ruxsat etish; maxsus zonadan mayning uchun yagona elektr energetika tizimiga ulangan holda elektr energiyasidan foydalanilgan taqdirda maxsus tariflar qo‘llash.	Normativ-huquqiy hujjat loyihasi	2025-yil sentabr	Istiqbolli loyihalar milliy agentligi (D. Li), Investitsiyalar, sanoat va savdo vazirligi (L. Kudratov), Energetika vazirligi (J. Mirzamahmudov), Raqamlashtirish vazirligi (Sh. Shermatov), Qoraqalpog‘iston Respublikasi Vazirlar Kengashi (F. Ermanov), Loyiha ofisi (B. Jumamuratov)
20.	Mayningga ixtisoslashgan maxsus zona tashkil etish.	2. Qaror loyihasini belgilangan tartibda tegishli vazirlik va idoralar bilan kelishgan holda Vazirlar Mahkamasiga kiritish.	Normativ-huquqiy hujjat loyihasi	2025-yil noyabr
21.	Qorako‘lchilik ilmiy-naslchilik tajriba stansiyasi faoliyatini tashkil etish.	1. To‘rtko‘l tumanida qorako‘l zotli qo‘ylarning Qoraqalpog‘iston Respublikasiga xos sur rangli yuqori elita sinfli nasldor qorako‘l qo‘ylar yetishtirishga ixtisoslashtirilgan Qorako‘lchilik ilmiy-naslchilik tajriba stansiyasi faoliyatini tashkil etish.	Amaliy chora-tadbirlar	2025-yil sentabr	Veterinariya va chorvachilikni rivojlantirish qo‘mitasi (B. Norqobilov), Qoraqalpog‘iston Respublikasi Vazirlar Kengashi (F. Ermanov)
		2. Ilmiy-naslchilik tajriba stansiyasining asosiy vazifalarini tasdiqlash va unda quyidagilarni inobatga olish: yuqori nasldor elita sinfiga mansub sur rangli qorako‘l zotli qo‘ylar otarlarini ilmiy asosda tashkil etish; otarlarda naslchilik va sun’iy urug‘lantirish ishlarini tizimli tashkil etish, bunda ranglar bo‘yicha eksportbop yarim doira qalamgul, qovurg‘asimon va yassi gul tipidagi qorako‘l qo‘ylar seleksiyasiga alohida e’tibor qaratish; serpusht qorako‘l qo‘ylarini o‘zaro juftlash orqali jahon mo‘yna bozorlari talabidan kelib chiqib qorako‘l terining raqobatbardosh turlarini yaratish; yetishtirilgan yuqori mahsuldor qorako‘l qo‘y va qo‘chqorlarni aholi xonadonlariga, dehqon hamda fermer xo‘jaliklariga tizimli ravishda yetkazib berishni yo‘lga qo‘yish.	Ilmiy-naslchilik tajriba stansiyasi nizomini tasdiqlash	2025-yil oktabr
		3. Ilmiy-naslchilik tajriba stansiyasini tashkil etish uchun Qoraqalpog‘iston Respublikasi respublika budjetining qo‘shimcha manbalari hisobidan 6 mlrd so‘m mablag‘ ajratish.	Amaliy chora-tadbirlar	2025-yil oktabr
		4. Ilmiy-naslchilik tajriba stansiyasini To‘rtko‘l tumani “Atauba” OFY Samandorlik ko‘chasi 100-uyga tekin foydalanish huquqi asosida joylashtirish.	Amaliy chora-tadbirlar	2025-yil oktabr	Qoraqalpog‘iston Respublikasi Vazirlar Kengashi (F. Ermanov), Davlat aktivlarini boshqarish agentligi (A. Ortikov)
22.	Iqlimga mos ozuqa ekinlari, dorivor va ziravorlar urug‘larini ekish.	1. Xitoy, Turkiya kabi davlatlardan olimlar va mutaxassislarni jalb qilgan holda yaylovlarga (zaruratga ko‘ra dron bilan) iqlimga mos ozuqa ekinlari, dorivor va ziravorlar urug‘larini sepish amaliyotini yo‘lga qo‘yish.	Amaliy chora-tadbirlar	2025-2026-yillar davomida	Veterinariya va chorvachilikni rivojlantirish qo‘mitasi (B. Norqobilov), Qoraqalpog‘iston Respublikasi Vazirlar Kengashi (F. Ermanov), AT “Xalq banki” (Sh. Atabayev), “Mikrokreditbank” ATB (O. Butayev)
		2. Buxoro cho‘l-yaylov ozuqabop o‘simliklar urug‘chiligi ilmiy-ishlab chiqarish markazi tomonidan yaylov yer maydonlariga cho‘l o‘simliklari urug‘larini ekish orqali kelgusi uch yilda 2 ming gektar yaylovlarda urug‘chilik maydonlarini tashkil etish.	Amaliy chora-tadbirlar
		3. 2025-2026-yillarda xalqaro moliya institutlarining mablag‘lari hisobidan qo‘ychilik, echkichilik va boshqa yo‘nalishlardagi loyihalarni amalga oshirish choralarini ko‘rish.	Amaliy chora-tadbirlar
23.	Chorvachilikni rivojlantirish orqali aholini sifatli mahsulotlar bilan ta’minlash.	2025-2026-yillarda xorijiy davlatlardan 1,2 ming bosh yirik shoxli mollarni hamda Mo‘g‘ulistondan 10 ming bosh mayda shoxli mollarni olib kelish choralarini ko‘rish.	Amaliy chora-tadbirlar	2025-2026-yillar	Qoraqalpog‘iston Respublikasi Vazirlar Kengashi (F. Ermanov), Veterinariya va chorvachilikni rivojlantirish qo‘mitasi (B. Norqobilov), AT “Xalq banki” (Sh. Atabayev)
24.	Chorva ozuqa bazasini mustahkamlash.	“Beruniy — Agro Star” MCHJga chorva ozuqa ekinlarini ekish maqsadida Beruniy, Kegeyli, Qo‘ng‘irot, Chimboy tumanlaridan jami 1 000 gektar yer maydonini ajratish. Bunda Osiyo taraqqiyot banki bilan hamkorlikda malakali ekspertlarni jalb qilgan holda ozuqa ekinlarini yetishtirish va hududning iqlim sharoitiga mos urug‘ navlarini tanlash.	Amaliy chora-tadbirlar	2026-yil 1-yanvar	Qoraqalpog‘iston Respublikasi Vazirlar Kengashi (F. Ermanov), Iqtisodiyot va moliya vazirligi (I. Norqulov)
25.	Chorvachilik xo‘jaliklariga ozuqa ekinlarini yetishtirish uchun qulaylik yaratish.	Qoraqalpog‘iston Respublikasi hududida 2025-yil 1-sentabrdan boshlab chorvachilik xo‘jaliklariga ozuqa ekinlarini yetishtirish uchun ajratilgan yerlar me’yorini sug‘oriladigan yerlar uchun kamida 0,5 gektar, yaylovlar va pichanzorlar uchun kamida 3 gektar etib belgilash.	Amaliy chora-tadbirlar	2025-yil sentabr	Qoraqalpog‘iston Respublikasi Vazirlar Kengashi (F. Ermanov), Veterinariya va chorvachilikni rivojlantirish qo‘mitasi (B. Norqobilov)
26.	“Qoraqalpog‘istonda biznes yuriting” shiori ostida targ‘ibot ishlarini olib borish.	Raqamli texnologiyalar vazirligi va mobil aloqa operatorlari bilan birgalikda fuqarolarning mobil telefon raqamiga beg‘araz asosda “Qoraqalpog‘istonda biznes yuriting” shiori ostida tadbirkorlarga yaratilgan barcha yengilliklar, jumladan, soliq va bojxona imtiyozlariga oid bo‘lgan SMS-xabarlar yuborilishini ta’minlash. Bunda fuqarolarning telefon raqamiga yuboriladigan SMS-xabar matni va mazmuni “Qoraqalpog‘istonda loyihalarni amalga oshirish markazi” loyiha ofisi bilan kelishilgan holda tayyorlanadi.	Amaliy chora-tadbirlar	Yilning har choragida	Raqamli texnologiyalar vazirligi (Sh. Shermatov), Iqtisodiyot va moliya vazirligi (I. Norqulov), Soliq qo‘mitasi (Sh. Kudbiyev), Loyiha ofisi (B. Jumamuratov), mobil aloqa operatorlari
27.	Aholida zamonaviy qishloq xo‘jaligi madaniyatini, bog‘dorchilik va issiqxonachilik sohasidagi tadbirkorlik ko‘nikmalarini shakllantirish.	1. Agrosanoatni rivojlantirish agentligi huzuridagi “AGROSANOAT INNOVATORLARI” MCHJga zarur muhandislik-kommunikatsiya hamda yo‘l-transport infratuzilmasiga ega bo‘lgan yer uchastkasini 49 yil muddatga ijara huquqi asosida ajratish.	Amaliy chora-tadbirlar	2025-yil sentabr	Agrosanoatni rivojlantirish agentligi (N. Abdullayev), Qishloq xo‘jaligi vazirligi (I. Abdurahmonov), Iqtisodiyot va moliya vazirligi (I. Norqulov), Qoraqalpog‘iston Respublikasi Vazirlar Kengashi (F. Ermanov)
		2. Agrosanoatni rivojlantirish agentligi tomonidan mazkur yer maydonida zamonaviy resurs tejamkor texnologiyalarni qo‘llagan holda intensiv bog‘ va issiqxonalar barpo qilish. 3. Intensiv bog‘ va issiqxonalarni barpo qilish, qayta ta’mirlash, ekspluatatsiyasi hamda mahsulot yetishtirish va saqlash xarajatlarini Agrosanoatni rivojlantirish va qo‘llab-quvvatlash davlat maqsadli jamg‘armasi mablag‘lari hisobidan qoplash. 4. “AGROSANOAT INNOVATORLARI” MCHJga ushbu intensiv bog‘ va issiqxonalarni barpo qilishda tovarlar va xizmatlarni to‘g‘ridan-to‘g‘ri shartnoma tuzish orqali xarid qilishga va loyihalashtirish ishlari hamda qurilish ishlarini bir vaqtning o‘zida amalga oshirishga ruxsat berish.		2025-yil oktabr
		5. Agrosanoatni rivojlantirish va qo‘llab-quvvatlash davlat maqsadli jamg‘armasining xarajatlar smetasiga tegishli o‘zgartirishlar kiritish. 6. 2026-yildan “Agentlik namuna issiqxonasi”da mahsulot yetishtirish hamda saqlash xarajatlari uchun Agrosanoatni rivojlantirish agentligi Agrosanoatni rivojlantirish va qo‘llab-quvvatlash davlat maqsadli jamg‘armasining yillik xarajatlar smetasiga tegishli mablag‘ ajratilishini ta’minlab borish.		2025-yil sentabr
28.	Qoraqalpog‘iston Respublikasini ijtimoiy-iqtisodiy rivojlantirish jamg‘armasi mablag‘laridan foydalanish uchun dastur tasdiqlash.	1. Aholining kundalik hayotidagi kommunal hamda boshqa sohalardagi kechiktirib bo‘lmaydigan masalalarni tezkor hal etishga qaratilgan dasturni ishlab chiqish va tasdiqlash.	Hujjatni tasdiqlash va amaliy chora-tadbirlar	Har yili	Jamg‘arma vasiylik kengashi (J. Qo‘chqorov)
		2. Dasturga zaruratga ko‘ra o‘zgartirish va qo‘shimchalar kiritish.		Yil davomida
		3. Dasturni amalga oshirish uchun Jamg‘arma mablag‘larini o‘z vaqtida va to‘liq ajratish.		Dasturga muvofiq

(6-ilova O‘zbekiston Respublikasi Prezidentining 2026-yil 25-martdagi PF-46-sonli Farmoni tahririda — Qonunchilik ma’lumotlari milliy bazasi, 30.03.2026-y., 06/26/46/0290-son)

(Qonunchilik ma’lumotlari milliy bazasi, 15.08.2025-y., 07/25/248/0737-son; 27.12.2025-y., 06/25/258/1223-son; 29.12.2025-y., 07/25/388/1235-son; 30.03.2026-y., 06/26/46/0290-son)