Hujjat kuchini yo‘qotgan " " 29.04.2026
Oʻzbekiston Respublikasi Vazirlar Mahkamasining
qarori
“In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisidagi nizomni tasdiqlash haqida
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2026-yil 28-apreldagi 206-sonli “Agrar va oziq-ovqat sohalarini davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Qishloq xoʻjaligi vazirligi huzuridagi Agrosanoatni rivojlantirish agentligi faoliyatini tashkil etish toʻgʻrisida” 2024-yil 30-sentabrdagi PQ-344-son hamda “Qishloq xoʻjaligi maydonlaridagi qoʻshimcha imkoniyatlardan foydalangan holda mahsulot yetishtirishni koʻpaytirishga doir chora-tadbirlar toʻgʻrisida” 2024-yil 30-dekabrdagi PQ-465-son qarorlariga muvofiq, shuningdek, respublika hududlarida yangi intensiv bogʻ va tokzorlarni barpo etgan tadbirkorlik subyektlarini davlat tomonidan qoʻllab-quvvatlash maqsadida Vazirlar Mahkamasi qaror qiladi:
1. Quyidagilarni nazarda tutuvchi “In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisidagi nizom ilovaga muvofiq tasdiqlansin:
muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun ariza bilan murojaat qilish hamda murojaatlarni koʻrib chiqish tartibi;
muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun subsidiya ajratish tartibi;
muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarini parvarishlash boʻyicha majburiyatlarning bajarilishi yuzasidan monitoring yuritish tartibi.
2. Belgilansinki, muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun subsidiyalar Oʻzbekiston Respublikasi Qishloq xoʻjaligi vazirligi huzuridagi Agrosanoatni rivojlantirish agentligining Agrosanoatni rivojlantirish va qoʻllab-quvvatlash davlat maqsadli jamgʻarmasi mablagʻlari hisobidan ajratiladi.
3. Oʻzbekiston Respublikasi Iqtisodiyot va moliya vazirligi har yili Oʻzbekiston Respublikasi Davlat budjeti parametrlarini shakllantirishda Qishloq xoʻjaligi vazirligining hisob-kitoblariga asosan muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun talab etiladigan mablagʻlarning nazarda tutilishini taʼminlasin.
4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 28-iyul,
468-son
Vazirlar Mahkamasining 2025-yil 28-iyuldagi 468-son qaroriga
ILOVA
“In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisida
NIZOM
1-bob. Umumiy qoidalar
1. Ushbu Nizom mulkchilik shaklidan qatʼiy nazar barcha tadbirkorlik subyektlariga muvofiqlik sertifikati (ixtiyoriy) mavjud boʻlgan “in-vitro” sharoitida koʻpaytirilgan payvandtagli meva va tok koʻchatlarni xarid qilish xarajatlarining bir qismini qoplash uchun Oʻzbekiston Respublikasi Qishloq xoʻjaligi vazirligi huzuridagi Agrosanoatni rivojlantirish agentligi (keyingi oʻrinlarda — Agentlik) huzuridagi Agrosanoatni rivojlantirish va qoʻllab-quvvatlash davlat maqsadli jamgʻarmasidan (keyingi oʻrinlarda — Jamgʻarma) subsidiya ajratish, ajratilgan subsidiya mablagʻlaridan samarali foydalanilishi yuzasidan monitoring yuritish hamda maqsadsiz foydalanilgan subsidiyalarni qaytarish tartibini belgilaydi.
Subsidiyalar yangi intensiv bogʻ, tokzorlarni barpo etgan, shuningdek, dala chetlariga, kanallar, sugʻorish va kollektor-drenaj tarmoqlari atrofidagi maydonlarga ekilgan “in-vitro” sharoitida koʻpaytirilgan payvandtagli meva va tok koʻchatlarini xarid qilgan talabgorlarga Jamgʻarma hisobidan koʻchatlar turi, navi va xarajatining hisob-kitobidan kelib chiqib ajratiladi.
2. Ushbu Nizomda quyidagi tushunchalardan foydalaniladi:
intensiv bogʻ — intensiv koʻchatlar (pakana va yarimpakana) hamda payvandtaglardan yetishtirilgan koʻchatlarni zich ekish sxemasida resurs-tejamkor agrotexnologik tadbirlarni amalga oshirish asosida tashkil etilgan va suv tejovchi sugʻorish texnologiyalari joriy etilgan mevali bogʻ;
“in-vitro” laboratoriyasi — oʻsimlik organizmining toʻqimalarini mikroklonal koʻpaytirish usuli orqali “sogʻlom”, viruslardan holi boʻlgan koʻchat hamda payvandtag yetishtirish uchun ixtisoslashgan, maxsus jihozlangan laboratoriya;
muvofiqlik sertifikati (ixtiyoriy) — sertifikatlangan koʻchatlarning belgilangan talablarga muvofiqligi koʻchatlar turi, navi, nav tozaligi va viruslar (kasalliklar)dan holiligini tasdiqlovchi sertifikatlashtirish tizimi qoidalariga binoan berilgan hujjat;
talabgor — yangi intensiv bogʻ va/yoki tokzor barpo etishda payvandtagli meva va tok koʻchatlari xarajatlarining bir qismini qoplash uchun murojaat qilgan tadbirkorlik subyekti;
“Agrosubsidiya” AT — Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsiya platformasi tarkibiga kiruvchi hamda qishloq xoʻjaligi ekinlarini yetishtirish uchun imtiyozli kreditlar va subsidiyalarni ajratish, mahsulot yetishtiruvchilarga shaffoflik tamoyili asosida xizmatlar koʻrsatish imkoniyatlarini taʼminlab beradigan axborot tizimi.
3. Subsidiyalar:
yangi intensiv bogʻ barpo etgan talabgorga hamda dala chetlariga, kanallar, sugʻorish va kollektor-drenaj tarmoqlari atrofidagi maydonlarga ekilgan muvofiqlik sertifikati (ixtiyoriy) mavjud boʻlgan “in-vitro” sharoitida koʻpaytirilgan payvandtagli meva koʻchatlarini xarid qilish xarajatlarining 50 foizi, biroq har bir payvandtagli meva koʻchatiga 25 ming soʻmdan oshmagan miqdorda;
muvofiqlik sertifikati (ixtiyoriy) mavjud boʻlgan uzumning danaksiz va yangi nav koʻchatlariga (keyingi oʻrinlarda — tok koʻchatlari) 7,5 ming soʻmdan, mahalliy tok koʻchatlariga 2 ming soʻmdan oshmagan miqdorda ajratiladi.
4. Muvofiqlik sertifikati (ixtiyoriy) mavjud boʻlgan “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismi ushbu Nizomga 1-ilovaga muvofiq sxema boʻyicha qoplanadi.
2-bob. Subsidiya ajratish boʻyicha ariza bilan murojaat qilish
5. “In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhi (keyingi oʻrinlarda — Ishchi guruh) ushbu Nizomga 2-ilovaga muvofiq namunaviy tarkibda tashkil etiladi.
6. Talabgor yangi bogʻ va tokzorlar barpo qilingan hamda dala chetlariga, kanallar, sugʻorish va kollektor-drenaj tarmoqlari atrofidagi yer maydonlariga ekilgan koʻchatlar turi, navi, qiymati toʻgʻrisidagi maʼlumotlarni mazkur Nizomga 3-ilovaga muvofiq xarajatlarining bir qismini qoplash uchun subsidiya ajratish boʻyicha Ishchi guruhga “Agrosubsidiya” AT orqali quyidagilarni ilova qilgan holda ariza bilan murojaat qiladi:
sogʻlom, viruslardan holi boʻlgan “in-vitro” laboratoriyasida koʻpaytirilgan payvandtagli koʻchatlarning muvofiqlik sertifikati (ixtiyoriy) nusxasi;
talabgor bilan “in-vitro” sharoitida koʻchat yetishtiruvchi koʻchatchilik xoʻjaligi oʻrtasida tuzilgan oldi-sotdi shartnomasi nusxasi;
koʻchatlar sotib olingani boʻyicha hisob-faktura, “in-vitro” sharoitida koʻchat yetishtiruvchi koʻchatchilik xoʻjaligining tavsiyasi va muvofiqlik sertifikati (ixtiyoriy) boʻyicha uch yillik kafolat xati.
Talabgor arizadagi maʼlumotlar va ilova qilingan hujjatlarning toʻgʻriligi uchun javobgar hisoblanadi.
Talabgordan ushbu bandda nazarda tutilmagan boshqa hujjatlarni taqdim etishni talab qilishga yoʻl qoʻyilmaydi.
7. Ushbu Nizomning 6-bandida nazarda tutilgan hujjatlar toʻliq boʻlmaganda yoki belgilangan tartibda rasmiylashtirilmagan holda taqdim etilganda Ishchi guruh tomonidan arizani qabul qilish rad etiladi.
3-bob. Talabgorning murojaatini koʻrib chiqish va subsidiya ajratish
8. Ishchi guruhi talabgorning arizasini koʻrib chiqishda quyidagilarga masʼul hisoblanadi:
tuman (Quvasoy shahar) hokimi — Ishchi guruh faoliyatini tashkil qilish va talabgorning subsidiya ajratish toʻgʻrisidagi arizasini joyiga chiqqan holda oʻz muddatida va toʻliq oʻrganishga hamda rasmiylashtirilgan hujjatlarning toʻgʻriligiga;
tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari — tuman qishloq xoʻjaligi boʻlimi boshligʻi — subsidiya ajratish toʻgʻrisidagi hujjatlarni oʻz vaqtida rasmiylashtirishga;
tuman (shahar) fermerlar kengashi raisi — talabgor va “in-vitro” sharoitida koʻchat yetishtiruvchi koʻchatchilik xoʻjaligi oʻrtasida tuzilgan oldi-sotdi shartnomasi shartlarining bajarilishi (koʻchat yetkazib berish muddatlari, sifati va boshqalar) boʻyicha talabgorning huquqlari himoya qilinishiga;
oʻsimliklar karantini va himoyasi tuman boʻlimi boshligʻi — “in-vitro” sharoitida koʻchat yetishtiruvchi koʻchatchilik xoʻjaligi muvofiqlik sertifikati (ixtiyoriy) mavjud boʻlgan “in-vitro” laboratoriyasida koʻpaytirilgan payvandtagli meva va tok koʻchatlari ekilganiga;
Agentlikning tuman (Quvasoy shahar) loyiha ofisi rahbari — talabgorning arizasida “in-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlari uchun subsidiya hisoblanishiga, bunda:
a) xarajatlarning 50 foizi, biroq har bir muvofiqlik sertifikati (ixtiyoriy) mavjud boʻlgan payvandtagli meva koʻchatiga 25 ming soʻmdan oshmagan miqdorda;
b) muvofiqlik sertifikati (ixtiyoriy) mavjud boʻlgan tok koʻchatlariga 7,5 ming soʻmdan, muvofiqlik sertifikati (ixtiyoriy) mavjud boʻlgan mahalliy tok koʻchatlariga 2 ming soʻmdan oshmagan miqdorda.
9. Ishchi guruh “Agrosubsidiya” AT orqali taqdim etilgan ariza va unga ilova qilingan hujjatlarni uch ish kuni ichida joyiga chiqqan holda oʻrganadi va talabgorga subsidiya ajratish maqsadga muvofiqligi yoki rad etish toʻgʻrisidagi xulosani tasdiqlaydi.
Ishchi guruh rahbari va uning aʼzolari xulosaning toʻgʻri rasmiylashtirilgani va haqqoniyligi uchun masʼul hisoblanadi.
Subsidiya ajratish rad etilgan taqdirda, talabgor bir oy muddatda Ishchi guruh xulosasida koʻrsatilgan kamchiliklarni toʻliq bartaraf qilgan holda, “Agrosubsidiya” AT orqali subsidiya ajratish toʻgʻrisida qayta murojaat qilishi mumkin.
Talabgor Ishchi guruhning subsidiya ajratishni rad etish toʻgʻrisidagi xulosasidan norozi boʻlgan taqdirda, yuqori turuvchi organga yoki sudga shikoyat qilishi mumkin.
10. Ishchi guruh talabgorga subsidiya ajratish maqsadga muvofiqligi toʻgʻrisidagi xulosani rasmiylashtirgandan soʻng bir ish kuni ichida tasdiqlangan xulosani “Agrosubsidiya” AT orqali Agentlikka yuboradi.
11. Ishchi guruh xulosasi Agentlik tomonidan besh ish kun ichida koʻrib chiqilib, talabgorga subsidiya ajratish yoki subsidiya ajratishni rad etish haqida “Agrosubsidiya” AT orqali maʼlum qiladi.
Bunda Agentlik tomonidan subsidiya ajratishni rad etishga ushbu Nizomning 6-bandi talablariga rioya qilinmagan holatlar asos hisoblanadi.
12. Agentlik Ishchi guruh tomonidan tasdiqlangan ijobiy xulosaga asosan besh ish kuni ichida talabgorning tijorat bankidagi hisobvaragʻiga subsidiyani oʻtkazib beradi.
13. Agentlikning subsidiya ajratishni rad etish toʻgʻrisidagi xulosasida koʻrsatilgan kamchiliklar (sabablar) talabgor tomonidan bartaraf etilgan holda, qayta murojaat qilinishi mumkin.
4-bob. Monitoring qilish tartibi
14. Talabgor dala chetlariga hamda kanallar, sugʻorish va kollektor-drenaj tarmoqlari atrofidagi maydonlarga hamda loyiha asosida tashkil etilgan yangi bogʻ va tokzorlarga ekilgan koʻchatlarda oʻz muddatida agrotexnik tadbirlarini oʻtkazish va parvarishlash ishlarini amalga oshirib boradi.
15. Talabgor tomonidan dala chetlariga hamda kanallar, sugʻorish va kollektor-drenaj tarmoqlari atrofidagi maydonlarga hamda loyiha asosida tashkil etilgan yangi bogʻ va tokzorlarga ekilgan koʻchatlarda oʻz muddatida agrotexnik tadbirlarini oʻtkazish va parvarishlash ishlarini amalga oshirilgani yuzasidan Ishchi guruh ikki yil mobaynida monitoring qilib boradi.
16. Ishchi guruh koʻchatlar uchun ajratilgan subsidiyadan samarali foydalanish holatini har yili bir marta monitoring qiladi va koʻchatlarning holati yuzasidan (yaxshi yoki yomon) ikki nusxada dalolatnoma rasmiylashtiradi hamda dalolatnomaning bir nusxasi Ishchi guruhda va ikkinchi nusxasi talabgorda saqlanadi.
17. Monitoring davomida kamchiliklar aniqlanganda, Ishchi guruh uch ish kuni ichida talabgorga ajratilgan subsidiya mablagʻlarini qaytarish haqidagi talabnoma xatini yuboradi.
Talabgor ogohlantirish xatini olgan kundan eʼtiboran bir oy ichida ajratilgan subsidiyani Agentlikning maxsus shaxsiy gʻazna hisobvaragʻiga qaytaradi.
18. Tuman (shahar) ishchi guruhi talabgor tomonidan xarid qilingan va ekilgan muvofiqlik sertifikatiga (ixtiyoriy) ega boʻlgan “in-vitro” sharoitida koʻpaytirilgan payvandtagli meva va tok koʻchatlarining rivojlanish holati yuzasidan monitoring oʻtkazadi.
Oʻtkazilgan monitoring natijasiga koʻra birinchi va ikkinchi yillarda qurib qolgan va kasallanib yaroqsiz holga kelgan koʻchatlar soni ekilgan koʻchatlar umumiy sonining 10 foizidan oshganda, olingan subsidiya nobud boʻlgan koʻchatlar soniga mutanosib ravishda qaytariladi.
Koʻrib qolgan va kasallanib yaroqsiz holga kelgan koʻchatlar talabgor tomonidan kuzgi ekish mavsumida “in-vitro” sharoitida koʻpaytirilgan payvandtagli meva va tok koʻchatlariga almashtirilib, koʻchatlar toʻliqligi 90 foizdan yuqori boʻlganda subsidiyalar qaytarilmaydi.
Subsidiya ajratilgan maydonlarda koʻchatlar toʻliqligini taʼminlash uchun talabgor tomonidan qoʻshimcha ravishda ekilgan payvandtagli meva va tok koʻchatlariga subsidiya ajratilmaydi.
Talabgor subsidiyani belgilangan muddat va miqdorda qaytarmaganda, Agentlik subsidiyani sud tartibida undirish choralarini koʻradi.
19. Jamoatchilik nazorati subyektlari tomonidan subsidiya predmetidan maqsadli foydalanilmayotgan yoki yaroqsiz holdaligi aniqlansa, bunday holatlar videotexnika vositalari orqali qayd etilishi (yozib olinishi) va ikki kun muddatda Ishchi guruhga taqdim qilinishi mumkin.
20. Tuman (shahar) Ishchi guruhi jamoatchilik nazorati subyektlari tomonidan aniqlangan holatlar boʻyicha kelib tushgan videoyozuvlarni qabul qilingandan soʻng uch ish kuni mobaynida talabgor yoki uning vakolatli xodimi ishtirokida oʻrganish oʻtkazadi.
21. Talabgor ushbu Nizom talablarini bajarmagan taqdirda, Agentlikning yoki tuman ishchi guruhining subsidiyani qaytarish haqidagi yozma xabarnomasini olgan kundan eʼtiboran bir oy muddatda olingan subsidiyani Agentlikning tegishli maxsus shaxsiy gʻazna hisobvaragʻiga qaytarishi lozim.
5-bob. Yakunlovchi qoidalar
22. Subsidiya berishda yuzaga keladigan kelishmovchiliklar tomonlar oʻrtasida muzokaralar oʻtkazish orqali hal etiladi.
Bunda taraflar oʻrtasida kelishmovchiliklar muzokaralar oʻtkazish orqali hal etilmagan taqdirda, nizolar sud tartibida hal qilinadi.
23. Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi subsidiyadan maqsadli foydalanilishini nazorat qiladi.
24. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.
“In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisidagi nizomga
1-ILOVA
Muvofiqlik sertifikati (ixtiyoriy) mavjud boʻlgan “in-vitro” usulida koʻpaytirilgan payvandtagli meva va tok koʻchatlarni xarid qilish xarajatlarining bir qismini qoplash
SXEMASI

Bosqichlar

Subyektlar

Tadbirlar

Muddatlar

1-bosqich

Talabgor

Muvofiqlik sertifikati (ixtiyoriy) mavjud boʻlgan “in-vitro” usulida koʻpaytirilgan meva payvandtagli koʻchat va tok koʻchatlarini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhiga (keyingi oʻrinlarda — tuman (Quvasoy shahar) ishchi guruhi) “Agrosubsidiya” AT orqali ariza bilan murojaat qiladi.

payvandtagli meva va tok koʻchatlari ekilgandan soʻng

2-bosqich

Tuman (Quvasoy shahar) ishchi guruhi

1. Talabgorning arizasini oʻrganib chiqadi va xulosalar maqsadga muvofiq boʻlgan taqdirda, Agentlikka taqdim etadi.

3 ish kunida

2. Hujjatlar ijobiy boʻlmagan taqdirda, talabgorga rad javobini beradi

1 ish kunida

3-bosqich

Agentlik

Ishchi guruh tomonidan taqdim etilgan hujjatlarni oʻrganib chiqadi:

a) talabgorga subsidiya ajratish toʻgʻrisidagi xulosani rasmiylashtiradi;

b) hujjatlar ijobiy boʻlmagan taqdirda talabgorga rad javobini beradi

5 ish kunida

4-bosqich

Agentlik

Talabgorning tijorat bankidagi hisobvaragʻiga subsidiyani oʻtkazib beradi.

5 ish kunida

5-bosqich

Talabgor

Loyiha asosida tashkil etilgan yangi bogʻ va tokzorlarga ekilgan koʻchatlarda oʻz muddatida agrotexnik tadbirlarini oʻtkazib, parvarishlash ishlarini amalga oshirib boradi.

Doimiy

6-bosqich

Tuman (Quvasoy shahar) ishchi guruhi

1. Tashkil etilgan yangi bogʻ va tokzorlarga ekilgan koʻchatlarni monitoring qilib boradi va koʻchatlarning holati yuzasidan (yaxshi va yomon) ikki nusxada dalolatnoma rasmiylashtiradi.

2. Monitoring davomida shartnoma shartlari bajarilmagani aniqlangan taqdirda, oʻtkazib berilgan subsidiyani qaytarish yuzasidan yozma ravishda talabnoma yuboradi.

Har yil yakuni boʻyicha

7-bosqich

Talabgor

Mablagʻlarni Agentlikning tegishli maxsus shaxsiy gʻazna hisobvaragʻiga qaytaradi.

Talabnoma olgan kundan 1 oy muddat mobaynida

“In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisidagi nizomga
2-ILOVA
“In-vitro” usulida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash uchun subsidiya ajratishga koʻmaklashuvchi __________ tuman (Quvasoy shahar) ishchi guruhining
NAMUNAVIY TARKIBI
1. Tuman (Quvasoy shahar) hokimi, ishchi guruh rahbari
2. Tuman hokimining qishloq va suv xoʻjaligi masalalari boʻyicha oʻrinbosari — tuman qishloq xoʻjaligi boʻlimi boshligʻi, ishchi guruh rahbari oʻrinbosari
3. Tuman fermerlar kengashi raisi
4. Oʻsimliklar karantini va himoyasi tuman boʻlimi boshligʻi
5. Tuman loyiha ofisi rahbari
“In-vitro” sharoitida koʻpaytirilgan payvandtagli meva va tok koʻchatlarini xarid qilish xarajatlarining bir qismini qoplash tartibi toʻgʻrisidagi nizomga
3-ILOVA

Agrosanoatni rivojlantirish agentligi direktori __________ ga “__________” fermer xoʻjaligi (MCHJ) rahbari __________ tomonidan sotib olingan koʻchat uchun subsidiya ajratish boʻyicha

ARIZA

__________ tumani __________ hududida ______ yildan buyon faoliyat koʻrsatayotgan ______ ixtisoslashgan “__________” fermer xoʻjaligi (MCHJ) 20____ yil jami ____ gektar yer maydoni, shundan ____ kontur ____ gektar, ____ konturda ____ gektar, ____ konturda ____ gektar maydonda yangi intensiv bogʻ, tokzor tashkil etish uchun talab etiladigan koʻchatlar ____ soni, ____ turi, ____ navi, _________ ming soʻm qiymati.

Talabgor nomi _________, olgan koʻchati ____ dona, koʻchat yetkazib beruvchining nomi ______, tuzilgan shartnoma sanasi va raqami ______.

Sarflangan xarajatlarning bir qismini qoplash uchun subsidiya ajratishda amaliy yordam berishingizni soʻrayman.

Xizmat koʻrsatuvchi tijorat bank “_________” ________. Tegishli hujjatlar ilova qilinadi.

“__________” fermer xoʻjaligi (MCHJ) rahbari __________

_____________________________________________ (imzo)

(Qonunchilik maʼlumotlari milliy bazasi, 29.07.2025-y., 09/25/468/0658-son)