Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tuzilmasini takomillashtirish, shuningdek Vazirlar Mahkamasining “Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi toʻgʻrisidagi nizomga qoʻshimchalar kiritish toʻgʻrisida” 2005-yil 11-apreldagi 99-son qarorining 2-bandiga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasining tashkiliy tuzilmasi 1-ilovaga muvofiq;

Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi markaziy apparatining tuzilmasi 2-ilovaga muvofiq tasdiqlansin.

Oʻrmon xoʻjaligi bosh boshqarmasi markaziy apparati xodimlarining umumiy cheklangan soni Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tizimining umumiy belgilangan soni doirasida 41 nafar, shu jumladan boshqaruv xodimlari 31 nafar etib belgilansin.

2. Oʻzbekiston Respublikasi qishloq va suv xoʻjaligi vaziriga Oʻrmon xoʻjaligi bosh boshqarmasi va uning markaziy apparatining tashkiliy tuzilmasini shtatda belgilangan xodimlar soni doirasida maqbullashtirish boʻyicha chora-tadbirlarni amalga oshirish huquqi berilsin.

3. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.

4. Mazkur qarorning bajarilishini nazorat qilish Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.

1. Vazirlar Mahkamasining “Oʻzbekiston Respublikasi oʻrmon fondi yerlarida ovchilik xoʻjaligini tashkil etish va yuritish chora-tadbirlari toʻgʻrisida” 1992-yil 12-oktabrdagi 469-son qarori 1-bandining uchinchi va oʻn birinchi xatboshidagi “Ovchilik xoʻjaligi, qoʻriqxonalar va milliy parklar” soʻzlari “Qoʻriqxonalar, milliy tabiiy bogʻlar va ovchilik xoʻjaligi” soʻzlari bilan almashtirilsin.

2. Oʻzbekiston Respublikasi Vazirlar Mahkamasining “Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi faoliyatini tashkil etish masalalari toʻgʻrisida” 2000-yil 20-martdagi 98-son qarorida (Oʻzbekiston Respublikasi QT, 2000-y., 3-son, 13-modda):

2-band quyidagi tahrirda bayon qilinsin:

“2. Belgilab qoʻyilsinki, Oʻrmon xoʻjaligi bosh boshqarmasi markaziy apparati hamda Qoraqalpogʻiston Respublikasi oʻrmon xoʻjaligi boshqarmasi faoliyatini mablagʻ bilan taʼminlash ularga qarashli korxonalar ajratmalari hisobiga amalga oshiriladi”;

3-bandning uchinchi xatboshi quyidagi tahrirda bayon qilinsin:

“Qoraqalpogʻiston Respublikasi oʻrmon xoʻjaligi boshqarmasi boshligʻi Qoraqalpogʻiston Respublikasi Vazirlar Kengashi bilan kelishgan holda Oʻzbekiston Respublikasi Qishloq va suv xoʻjaligi vazirligi tomonidan lavozimga tayinlanadi”.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va ayrim qarorlarini oʻz kuchini yoʻqotgan deb hisoblash toʻgʻrisida” 2000-yil 14-apreldagi 149-son qaroriga ilovaning 13-bandi (Oʻzbekiston Respublikasi QT, 2000-y., 4-son, 20-modda) oʻz kuchini yoʻqotgan deb hisoblansin.

4. Oʻzbekiston Respublikasi Vazirlar Mahkamasining 2001-yil 30-martdagi 160-son qarori (Oʻzbekiston Respublikasi QT, 2001-y., 3-son, 20-modda) bilan tasdiqlangan Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi toʻgʻrisidagi nizomda:

4-banddagi “Qoraqalpogʻiston Respublikasi va viloyatlar oʻrmon xoʻjaligi boshqarmalari” soʻzlari “Qoraqalpogʻiston Respublikasi oʻrmon xoʻjaligi boshqarmasi” soʻzlari bilan almashtirilsin;

6-banddagi “oʻzining hududiy boshqarmalari” soʻzlari “Qoraqalpogʻiston Respublikasi oʻrmon xoʻjaligi boshqarmasi” soʻzlari bilan almashtirilsin;

12-bandning uchinchi xatboshi quyidagi tahrirda bayon qilinsin:

“Qoraqalpogʻiston Respublikasi oʻrmon xoʻjaligi boshqarmasi boshligʻi Qoraqalpogʻiston Respublikasi Vazirlar Kengashi bilan kelishgan holda Oʻzbekiston Respublikasi Qishloq va suv xoʻjaligi vazirligi tomonidan lavozimga tayinlanadi”.